ລະດູຝົນປີນີ້ລັດຖະບານໄດ້ເອົາໃຈໃສ່ເປັນພິເສດຕໍ່ການຄວບຄຸມການລະບາດຂອງຕັກແຕນຝູງໂດຍໄດ້ອະນຸ ມັດງົບບ້ວງແກ້ໄຂໄພພິບັດຈຳນວນ 1,56 ຕື້ກີບໃສ່ຂະບວນການປາບປາມແຕ່ຫົວທີ ທັງນີ້ກໍເພື່ອຫຼີກເວັ້ນບັນຫາຄວາມເສຍຫາຍດ້ານຜົນຜະລິດປະຊາຊົນໂດຍຂະນະນີ້ພະນັກງານກ່ຽວຂ້ອງຂອງກົມປູກຝັງກຳລັງເຂັ່ງຮ້ອນສົມທົບກັບທ້ອງຖິ່ນໃນເຂດລະບາດ 11 ເມືອງ 3 ແຂວງພາກເໜືອດ້ວຍການລະດົມປະຊາຊົນສີດຢາຢ່າງເປັນຂະບວນຊຶ່ງຄາດວ່າທ້າຍເດືອນກໍລະກົດໃຫ້ສຳເລັດໃນ 140 ຈຸດເປົ້າໝາຍ.
ຂໍ້ມູນເປີດເຜີຍຈາກກົມປູກຝັງກະຊວງກະສິກຳ ແລະປ່າໄມ້ລະບຸວ່າ: ຕັກ ແຕນ ຫຼື ຕັກແຕນຝູງ, ຕັກແຕນໄມ້ປ່ອງ (ຕັກແຕນຂີ) ແມ່ນສັດຕູພືດຊະນິດໜຶ່ງທີ່ເກາະກິນໃບພືດເປັນຫຼັກແລ້ວສ້າງຄວາມເສຍຫາຍໃຫ້ແກ່ຜົນຜະລິດພືດຢ່າງຫຼວງຫຼາຍ, ຕັກແຕນຝູງມີຊື່ສາມັນວ່າ Yellow-spined bamboo Locust ແລະ ມີວິທະຍາສາດວ່າ: Ceracris kiangus Tsai ( 1929 ) ພົບເຫັນການທຳລາຍ ຄັ້ງທຳອິດຂອງຕັກແຕນຊະນິດນີ້ແມ່ນຢູ່ ພາກໃຕ້ຂອງປະເທດຈີນຊຶ່ງຈະມີການທຳລາຍພືດຫຼາຍກວ່າ 25 ຊະນິດ ແຕ່ພືດຫຼັກໆທີ່ພວກມັນທຳລາຍແມ່ນໄມ້ປ່ອງ (ຕະກູນໄມ້ໄຜ່) ເມື່ອກິນໃບໄມ້ປ່ອງຍັງ ເຫຼືອແຕ່ກິ່ງກ້ານ ແລ້ວພວກມັນກໍ່ຈະລົງໄປກັດກິນໃບເຂົ້າ, ໃບສາລີ ແລະພືດອື່ນໆພວກມັນມັກອາໄສຢູ່ຕາມລຽບແຄມແມ່ນ້ຳເຂດທີ່ມີຄວາມສູງຈາກລະດັບໜ້ານ້ຳທະເລປະມານ 350-1300 ແມັດ ແລະອຸນຫະພູມສະເລ່ຍປະມານ 30 ອົງສາ.
ຂະນະທີ່ຂໍ້ມູນທີ່ອົງການອາຫານ ແລະການກະເສດ (FAO) ໄດ້ລາຍງານໃນວັນທີ 27 ມີນາ 2013 ຮູ້ວ່າ: ໄດ້ມີການລະບາດຂອງຕັກແຕນຝູງຊະນິດນີ້ຄັ້ງໃຫຍ່ຢູ່ສາທາລະນະລັດມາລາກັດສະກາ ຊຶ່ງຄາດວ່າການລະບາດຄັ້ງນັ້ນຈະສົ່ງຜົນເຮັດໃຫ້ປະຊາກອນຈຳນວນ 60% ຫຼື ປະມານ 22 ລ້ານຄົນ ຂອງປະເທດປະເຊີນໜ້າກັບພາວະຄວາມຂາດແຄນອາຫານ, ສຳລັບບັນດາເຂດປະເທດໃກ້ຄຽງພວກເຮົາກໍ່ເຄີຍມີການລະບາດເຊັ່ນກັນເຊັ່ນ: ລະບາດຢູ່ປະເທດຫວຽດນາມ 3 ຄັ້ງຄື: ປີ 2008, 2012 ແລະ ປີ 2015 ປະເທດຈີນ.
ສຳລັບ ສປປ ລາວ ມີການລາຍງານການລະບາດຄັ້ງທຳອິດໃນເດືອນຕຸລາ 2014 ຢູ່ເມືອງໂພນທອງແຂວງຫຼວງພະບາງ ແລະຄັ້ງທີສອງແມ່ນເດືອນເມສາປີຕໍ່ມາທີ່ເມືອງໂພນທອງ ແລະເມືອງ ວຽງຄຳ ແຂວງຫຼວງພະບາງ, ເມືອງ ຊອນ, ເມືອງຊຳເໜືອ ແລະເມືອງຫົວ ເມືອງ ແຂວງຫົວພັນ, ເມືອງໃໝ່ ແລະ ເມືອງຂວາ ແຂວງຜົ້ງສາລີ ເຮັດໃຫ້ການຜະລິດເຂົ້າໄຮ່, ເຂົ້ານາປີ, ສາລີ ແລະພືດ ສວນເສຍຫາຍຢ່າງໜັກໜ່ວງເຮັດໃຫ້ເກີດຜົນກະທົບດ້ານຜົນຜະລິດຂອງປະຊາຊົນ ໃນຈຳນວນ 339 ໝູ່ບ້ານ, 3.359 ຄອບຄົວ, ເນື້ອທີ່ເສຍຫາຍທັງໝົດ 3.651 ເຮັກຕາ.
ຕໍ່ບັນຫາດັ່ງກ່າວກະຊວງກະສິກຳ ແລະປ່າໄມ້ ກໍຄືກົມປູກຝັງໄດ້ສົມທົບກັບອຳນາດການປົກຄອງຂັ້ນແຂວງ, ຂັ້ນເມືອງມີມາດຕະການໃນການແກ້ໄຂ ແລະຕອບໂຕ້ຢ່າງເລັ່ງດ່ວນດ້ວຍການຈັດຕັ້ງປະຕິບັດຕາມກົດໝາຍປ້ອງກັນພືດຢ່າງ ເຂັ້ມງວດ, ໄດ້ອອກແຈ້ງການຫາລະດັບ ທ້ອງຖິ່ນ ເພື່ອປະກາດເປັນເຂດການກຳຈັດ ແລະຄວບຄຸມການລະບາດຂອງຕັກແຕນຝູງ, ໄດ້ແຕ່ງຕັ້ງຄະນະກຳມະການສະເພາະກິດຂັ້ນທ້ອງຖິ່ນ ແລະຂັ້ນສູນ ກາງ, ໄດ້ແຕ່ງຕັ້ງພະນັກງານວິຊາການລົງປະຈຳຢູ່ພື້ນທີ່ລະບາດ.
ຄຽງຄູ່ກັນນັ້ນຍັງໃດ້ຕອບໂຕ້ທາງ ດ້ານວິຊາການດ້ວຍການຈູດໄຟຮົມຄວັນໄລ່, ເກັບຕັກແຕນມາເຜົາທຳລາຍ, ນຳໃຊ້ວິທີການພົ່ນຢາທີ່ມີຜົນກະທົບໜ້ອຍທີ່ສຸດ, ຈັດຝຶກອົບຮົມດ້ານເຕັກນິກວິຊາການຕ່າງໆທີ່ກ່ຽວຂ້ອງພ້ອມທັງປະສານສົມທົບກັບອົງການອາຫານ ແລະການກະເສດ (FAO) ແລະ ສປ ຈີນ ໃນການສຳຫຼວດ ແລະວາງແຜນການກຳຈັດໃນໄລຍະສັ້ນ, ໄລຍະກາງ ແລະໄລຍະຍາວ.
ສຳລັບລະດູຝົນປີ 2016 ທີ່ຈະມາເຖິງນີ້, ລັດຖະບານໄດ້ເອົາໃຈໃສ່ເປັນພິເສດ ເພື່ອຄອບຄຸມຕັກແຕນບໍ່ໃຫ້ແຜ່ກະຈາຍອອກໄປເປັນວົງກວ້າງດ້ວຍການອະນຸມັດໃຫ້ນຳໃຊ້ງົບປະມານບ້ວງແກ້ໄຂໄພພິບັດຈຳນວນ 1,56 ຕື້ກີບ ເຂົ້າສູ່ວຽກງານດັ່ງກ່າວໃຫ້ມີປະສິດທິຜົນ, ພ້ອມທັງການຮ່ວມມືຈາກອົງການອາຫານ ແລະການກະເສດ (FAO) ໃຫ້ການສະໜັບສະໜູນທາງດ້ານວິຊາການ, ຊ່ຽວຊານ, ເຊົ່າລົດລົງພາກສະໜາມຈຳນວນ 24 ຄັນ ແລະສະໜອງວັດຖຸອຸປະກອນທີ່ຈຳເປັນຈຳນວນໜຶ່ງຄິດເປັນມູນຄ່າທັງໝົດ 328.811 ໂດລາ ແລະ ໄດ້ຮັບການຊ່ວຍເຫຼືອບັ້ງສີດຢາຈຳນວນ 200 ບັ້ງ ແລະຢາປາບສັດຕູພືດຈຳນວນ 18 ພັນກິໂລຈາກ ສປ ຈີນ.
ເພື່ອໃຫ້ໄປຕາມແຜນການທີ່ວາງໄວ້ມາຮອດປະຈຸບັນກົມປູກຝັງແມ່ນກຳລັງຂຸ້ນຂຽວເປີດຂະບວນການປາບປາມ ແລະ ຄອບຄຸມການລະບາດຂອງຕັກແຕນຝູງດັ່ງກ່າວຢ່າງເຂັ່ງຮ້ອນໂດຍການຈັດສົ່ງພະນັກງານລົງໄປປະສານສົມທົບກັບພະນັກງານວິຊາການຂັ້ນແຂວງ, ຂັ້ນເມືອງ ແລະອຳນາດການປ້ອງຄອງບ້ານຕ່າງໆໃນເຂດມີການລະບາດຈຳນວນທັງໝົດ 500 ກວ່າຄົນ ເພື່ອລະດົມຂົນຂວຍພໍ່ແມ່ປະຊາຊົນສີດຢາໃນຈຸດທີ່ຕັກແຕນວາງໄຂ່ຊຶ່ງເປັນເຂດຄອຍຊັນຫຍຸ້ງຍາກຕໍ່ການເຂົ້າເຖິງ, ປະຈຸບັນສຳເລັດການສີດຢາໄປແລ້ວປະມານ 30% ຂອງ ແຜນການທັງໝົດ 140 ຈຸດ ແລະຄາດວ່າຈະໃຫ້ສຳເລັດການສີດຢາທັງໝົດໃນທ້າຍເດືອນກໍລະກົດທີ່ຈະມາເຖິງນີ້.
ໂດຍພື້ນທີ່ຕັກແຕນລະບາດໃນປີນີ້ ລວມມີທັງໝົດ 11 ເມືອງໃນ 3 ແຂວງ ພາກເໜືອຄື: ເມືອງງອຍ, ວຽງຄຳ, ປາກແຊງ, ໂພນທອງ, ໂພນໄຊ, ປາກອູ ແຂວງ ຫຼວງພະບາງ; ເມືອງໃໝ່ ແຂວງຜົ້ງສາລີ ເມືອງຮ້ຽມ, ຊ່ອນ, ຫົວເມືອງ ແລະເມືອງ ຊຳເໜືອ ແຂວງຫົວພັນ.
ທີ່ມາ: 