ຂປລ. ​ ໃນ​ຊຸມ​ປີຜ່ານມາ ປະຊາຊົນ ເມືອງ​ຫົວ​ເມືອງ​​ ​ແຂວງ​ຫົວພັນ ໄດ້​ຢຶດຖືອາຊີບ​ ການປູກຝັງ-ລ້ຽງ​ສັດ ເປັນ​ອັນດັບ​ຕົ້ນ​, ການ​ຄ້າ-ການ​ບໍລິການ​ ​​ເປັນສໍາຮອງ. ປັດ​ຈຸ​ບັນ ມີ​ເນື້ອ​ທີ່​ນາ​​ປູກ​ເຂົ້າ 900 ​ກວ່າເຮັກ​ຕາ, ສະ​ເລ່ຍ ສະມັດ​ຕະພາບ​ໄດ້ 4,6 ​ໂຕນ​ຕໍ່​ເຮັກຕາ, ​ເນື້ອ​ທີ່​ປູກ​ເຂົ້າ​ເນີນສູງ ​ມີ 280 ​ກວ່າເຮັກຕາ, ສະ​ມັດ​ຕະພາບ 2,8 ​ໂຕນ​ຕໍ່​ເຮັກຕາ. ສະ​ເລ່ຍ​ປະຊາຊົນ​ ໄດ້​ຮັບ​ເຂົ້າ​ເປືອກ 365 ກິ​ໂລ​ຕໍ່ຄົນ​ຕໍ່​ປີ; ສ່ວນວຽກ​ງານ​​ຮັບປະກັນ​ ສະບຽງ​ອາຫານ ກໍ​ຄືການ​ຜະລິດ​ ເປັນ​ສິນຄ້າ ທີ່​ເປັນທ່າ​ແຮງ​ຕົ້ນຕໍ ​ແມ່ນການ​ປູກ​ສາລີ, ໝາກ​ເດືອຍ​ ​ແລະ​ ຂີງ. ​

ທ່ານ ອ້ອມ ສຸລິນທອນ ຫົວໜ້າຫ້ອງການ ​ກະສິກໍາ​-ປ່າ​ໄມ້ ເມືອງ​ຫົວ​ເມືອງ ​ແຂວງ​ຫົວພັນ​ ໃຫ້​ສໍາພາດ​ຕໍ່​ນັກ​ຂ່າວ​​ ເມື່ອ​ບໍ່​ດົນ​ນີ້ວ່າ: ເມືອງ​ຫົວ​ເມືອງ ປະກອບ 10 ກຸ່ມ​ບ້ານ, ມີ 75 ບ້ານ, ມີ​ພົນລະ​ເມືອງ​ ທັງ​ໝົດ 32.000 ຄົນ, ມີ​ 4.815 ຄອບຄົວ. ສຳລັບປີ​ນີ້​ ມີເນື້ອ​ທີ່​ປູກ​ສາລີ 4.000 ​ກວ່າເຮັກຕາ, ເກັບ​ກູ້​​ແລ້ວເກືອບ 100%, ຜົນ​ຜະລິດ​ໄດ້ ປະມານ 14 ພັນ​ກວ່າ​ໂຕນ; ​ເນື້ອ​ທີ່​ປູກ​ໝາກ​ເດືອຍ ​ມີປະມານ 700 ​ເຮັກຕາ ​ໄລຍະ​ນີ້​ ແມ່ນ​ກໍາລັງ​ເກັບ​ກູ້​ ​ແລະ​ ເນື້ອ​ທີ່​ປູກ​ຂີງ​ ປະມານ 500 ກວ່າ​ເຮັກຕາ, ​ສາມາດ​ເກັບ​ກູ້​ໄດ້ 100%. ​ເມືອງ​ຫົວ​ເມືອງ​ ໄດ້ມີ​ການ​ຜູກ​ພັນ​ສັນຍາ​ ກັບ​ນັກທຸລະກິດ 23 ຫົວໜ່ວຍ​ ມາ​ເກັບ​ຊື້​ຜົນ​ຜະລິດ​ ຈາກ​​ກະສິກອນ ​ໂດຍ​ສະ​ເພາະ​ ແມ່ນ​ໝາກ​ເດືອຍ ​ກັບ​ສາລີ. ນອກຈາກ​ ການ​ປູກຝັງ​ແລ້ວ, ​ ເມືອງ​ຫົວ​ເມືອງ​ ມີ​ທ່າ​ແຮງ​ພູມ​ສັນຖານ​ ເໝາະ​ກັບ​ການ​ ລ້ຽງສັດ​ໃຫຍ່, ປັດຈຸບັນ ​ທົ່ວ​ເມືອງ​ມີງົວ 11 ພັນ​ກວ່າ​ໂຕ, ຄວາຍ 2.000 ກວ່າ​ໂຕ, ໝູ 54 ພັນ​ກວ່າ​ໂຕ, ​ແບ້ 4.000 ກວ່າ​ໂຕ ​ແລະ ​ສັດ​ປີກ​ຈໍານວນ​ໜຶ່ງ.

ທ່ານ ​ຫົວໜ້າ​ຫ້ອງການ ​ກະສິກໍາ​-ປ່າ​ໄມ້ ເມືອງ​ ໃຫ້​ຮູ້​ຕື່ມ​ວ່າ: ການ​ຊຸກຍູ້​ ປູກ​ພືດ​ລະດູ​ແລ້ງ​ ເມືອງ​ຫົວ​ເມືອງ​ ຖ້າ​ທຽບ​ໃສ່​ເມືອງ​ອື່ນໆ​ ​ເຫັນ​ວ່າຍັງ​ບໍ່​ທັນ​ເປັນ​ ຂະ​ບວນການພໍ​ປານ​ໃດ ອີງ​ໃສ່​ສະ​ພາບ​ພື້ນທີ່​ ບໍ່​ເໝາະ​ສົມ, ປີ​ນີ້​ປະຊາຊົນ ​​ປູກ​ພືດ​ລະດູ​ແລ້ງ​ໄດ້ 54 ​ເຮັກຕາ ​ເປັນຕົ້ນແມ່ນ ປູກໝາກ​ໂມ, ຜັກ​ບົ່ວ, ຜັກທຽມ ​ແລະ ​ພືດ​ຜັກ​ອື່ນໆ, ປັດຈຸບັນ​ ສາມາດ​ເກັບ​ກູ້​ ຜົນ​ຜະລິດ​ໄດ້​ກວ່າ 80%. ຢ່າງ​ໃດ​ກໍ​ຕາມ ການ​ພັດທະນາ​ກະສິກໍາ​ ຢູ່​ເມືອງ​ຫົວ​ເມືອງ ຍັງ​ພົບສິ່ງ​ທ້າ​ທາຍ ເຖິງ​ວ່າ​ມີ​ຫົວໜ່ວຍ ​ທຸລະ​ກິດ​ມາ​ລົງທຶນ ​ແຕ່ຕະຫລາດ ​ຈໍາໜ່າຍ​ສິນຄ້າ​ ຍັງ​ບໍ່​ທັນ​ແນ່ນ​ອນ, ລາຄາ​ຕົກ​ຕໍ່າ​ ​ໂດຍ​ສະ​ເພາະ ລາຄາ​ສາລີ​​ ປີ​ນີ້​ຕົກ​ຕໍ່າ​ກວ່າທຸກໆ​ປີ ໃນ​ຮອບ 5 ປີ ສະ​ເລ່ຍ 750 ກີບ​ຕໍ່​ກິ​ໂລ, ຂີງ​ລາຄາ​ຂາຍ 1.000 ກີບ/ກິ​ໂລ ຍັງ​ບໍ່​ມີ​ຕະຫລາດ, ໝາກ​ເດືອຍ ​ເຖິງ​ວ່າ​ຈະ​ມີ​ໂຮງງານ​ອົບ ​ແຕ່​ຂອດ​ການ​ຊື້-​ຂາຍ​ ຍັງ​ບໍ່​ເປັນ​ທີ່​ຍອມຮັບ​ ຂອງ​ປະຊາຊົນ ລາຄາ​ຂຶ້ນ​ລົງ​ບໍ່​ແນນ​ອນ, ເມືອງ​ຫົວ​ເມືອງ ​ບໍ່​ມີ​ທາງ​ຫລວງ​ແຫ່ງ​ຊາດ ​ຜ່ານແຕ່ມີ​ຫລາຍ​ທາງ​ອອກ ​ເຮັດ​ໃຫ້​ຜູ້​ປະກອບ​ການ ​ຫລື​ ນັກ​ທຸລະ​ກິດ​ສວຍ​ໂອກາດ ລັກລອບ​ຊື້​-ຂາຍ ​ແລະ ສິ່ງ​ສຳຄັນ ເມືອງ​ຫົວ​ເມືອງ ມີສະພາບ​ພື້ນຖານ​ ເປັນ​ເຂດ​ຫ້ວຍ​ເລິກ​ພູ​ສູງ ​ເຮັດ​ໃຫ້​ການ​ຜະລິດ ​ເປັນ​ສິນຄ້າ​ ພົບ​ຄວາມ​ຫຍຸ້ງຍາກ.

ແຫລ່ງຂ່າວ:

ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!