ຂປລ. ກະຊວງໄປສະນີ ໂທລະຄົມມະນາຄົມ ແລະ ການສື່ສານ ຮ່ວມກັບສະມາຄົມຄົນພິການຕາລາວ ເປີດນໍາໃຊ້ໂປຣແກຣມອ່ານອອກສຽງເປັນພາສາລາວ ໃນລະບົບຄອມພິວເຕີ ໃນວັນທີ 9 ພຶດສະພາ 2016 ນີ້ຢູ່ນະຄອນຫລວງວຽງຈັນ ເຊິ່ງໂປຣແກມດັ່ງກ່າວ ແມ່ນໃຊ້ໃນການອ່ານຂໍ້ຄວາມພາສາລາວໃຫ້ເປັນສຽງຄໍາເວົ້າ ທັງຈະເຮັດໜ້າທີ່ສົມທຽບຂໍ້ຄວາມທີ່ຈະອ່ານ ໃສ່ກັບຖານຂໍ້ມູນສຽງທີ່ມີລະບົບໂປຣແກຣມ, ຈາກນັ້ນ ກໍສະແດງສຽງຄໍາເວົ້າ ທີ່ສອດຄ່ອງກັບຂໍ້ຄວາມອ່ານອອກມາ. ວິທີການນີ້ແມ່ນເຕັກນິກໃໝ່ ທີ່ມີຄວາມຊັດເຈນຫລາຍທີ່ສຸດ ຈາກການນໍາໃຊ້ໂປຣແກຣມດັ່ງກ່າວ ເຊິ່ງສາມາດອ່ານທຸກຂໍ້ຄວາມ ທີ່ສະແດງໃນໜ້າຄອມພິວເຕີ ຫລື ຕາມຈຸດທີ່ລູກສອນເມົ້າຊີ້ໄປ ແລະ ຍັງສາມາດສະແດງສຽງຂອງຕົວອັກສອນ ໃນເວລາກົດປຸ່ມແປ້ນພິມຂອງມັນ.
ທ່ານ ພົນປະສິດ ພິດສະໄໝ ຫົວໜ້າສູນບໍລິຫານລັດ ດ້ວຍເອເລັກໂຕຣນິກ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ໄດ້ກ່າວວ່າ: ເປັນເວລາສອງປີກວ່າ ທີ່ພາກສ່ວນກ່ຽວຂ້ອງ ໄດ້ດຳເນີນການຄົ້ນຄວ້າພັດທະນາ, ປັດຈຸບັນໄດ້ສຳເລັດການສ້າງໂປຣແກຣມນີ້ອອກມາ, ພາຍຫລັງທີ່ມີການຕິດຕັ້ງ ແລະ ຝຶກອົບຮົມນຳໃຊ້ໃຫ້ແກ່ສະມາຄົມຄົນພິການຕາລາວ ໃນໄລຍະໜຶ່ງ ກໍເຫັນວ່າໄດ້ຮັບການຕອບຮັບຈາກຜູ້ນຳໃຊ້ ກໍຄືຄົນພິການຕາເປັນຢ່າງດີ ເຮັດໃຫ້ເຂົາເຈົ້າສາມາດນຳໃຊ້ຄອມພິວເຕີ ຊອກຫາຂໍ້ມູນທາງອິນເຕີເນັດ ແລະ ສາມາດພິມພາສາລາວ ໃນຄອມພິວເຕີໄດ້. ຈາກການນຳໃຊ້ ໂປຣແກຣມນີ້ ເຮັດໃຫ້ນັກຮຽນຄົນພິການຕາ ສາມາດທີ່ຈະເຂົ້າຮຽນຮ່ວມກັບນັກຮຽນທົ່ວໄປ ໃນໂຮງຮຽນສາມັນໄດ້ ເພາະຜ່ານມາໄດ້ມີການທົດລອງຮຽນຮ່ວມກັນ ຢູ່ມະຫາວິທະຍາໄລແຫ່ງຊາດ.
ທ່ານ ພົນປະສິດ ພິດສະໄໝ ກ່າວຕື່ມອີກວ່າ: ເຖິງແມ່ນໂປຣແກຣມທີ່ພັດທະນາຂຶ້ນມານີ້ ຈະສາມາດນຳໃຊ້ແຕ່ໃນອຸປະກອນຄອມພິວເຕີກໍຕາມ ແຕ່ທາງກະຊວງ ຍັງມີແຜນສືບຕໍ່ພັດທະນາ ໃຫ້ສາມາດນຳໃຊ້ໃນລະບົບມືຖື ເພາະການນຳໃຊ້ໃນລະບົບມືຖືໄດ້ ບໍ່ພຽງແຕ່ຈະສ້າງຄວາມສະດວກໃຫ້ຄົນພິການຕາເທົ່ານັ້ນ ແຕ່ຍັງຈະໄດ້ກຸ່ມຜູ້ຊົມໃຊ້ອື່ນໆອີກ ໂດຍສະເພາະຜູ້ຊົມໃຊ້ອາຍຸສູງ. ໂຄງການພັດທະນາໂປຣແກຣມ ອ່ານອອກສຽງພາສາລາວ ແມ່ນໜຶ່ງໃນການຜັນຂະຫຍາຍແຜນຍຸດທະສາດຂອງ ການພັດທະນາເຕັກໂນໂລຊີສື່ສານຂໍ້ມູນຂ່າວ ສານຂອງກະຊວງໄປສະນີ ແລະ ໂທລະຄົມມະນາຄົມ ແລະ ການສື່ສານ ພາຍໃຕ້ແນວຄວາມຄິດສ້າງ ດີຈີຕອນຂອງທຸກຄົນ.
ສໍາລັບຄົນທົ່ວໄປແລ້ວ ອາດຈະມີຫລາຍທາງເລືອກທີ່ຈະຊອກຫານໍາໃຊ້ສິ່ງທີ່ງ່າຍ, ສະດວກ ແລະ ທັນສະໄໝ ແຕ່ສໍາລັບຄົນພິການຕານັ້ນ ເຖິງແມ່ນວ່າເຕັກໂນໂລຊີຈະສັບສົນປານໃດກໍຕາມ ຂໍພຽງແຕ່ມີໂອກາດກໍຈະບໍ່ຫລົດລະຄວາມພະຍາຍາມທີ່ຈະຮຽນຮູ້ນໍາໃຊ້, ສະນັ້ນ ທາງໂຄງການອະນຸຍາດໃຫ້ທຸກພາກສ່ວນ ໄດ້ນໍາເອົາໂປຣແກຣມໄປນໍາໃຊ້ໂດຍບໍ່ໄດ້ເສຍຄ່າ, ພ້ອມທັງ ເປີດໂອກາດໃຫ້ບັນດານັກຄົ້ນຄ້ວາຕ່າງໆ ເອົາໂປຣແກຣມໄປປະຍຸກນໍາໃຊ້ ຫລື ພັດທະນາຕໍ່ໍ່ ເພື່ອສ້າງຄວາມສາມາດຂອງການນໍາໃຊ້ໂປແກຼມໃຫ້ມີຄວາມຫລາກຫລາຍ.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!