ຜົນການສຶກສາຂອງຄະນະນັກວິໄຈໃນອົດສະຕຣາລີພົບວ່າ 5 ເກາະຂອງໝູເກາະໂຊໂລມອນໃນມະຫາສະໝຸດປາຊີຟິກຈົມລົງໄປເພາະລະດັບນໍ້າທະເລສູງຂຶ້ນ ແລະ ການກັດເຊາະຕາຝັ່ງ ຂະນະທີ່ 6 ເກາະສ່ຽງຈົມລົງໃນອະນາຄົດ.
ຜົນການສຶກສາທີ່ຕີພິມໃນວາລະສານເອັນໄວຣອນເມນທັລຣີເຊີດເລດເຕີລະບຸວ່າ ມີເກາະຢ່າງໜ້ອຍ 5 ເກາະທາງຕອນເໜືອຂອງໝູເກາະໂຊໂລມອນທີ່ຫາຍໄປ ເປັນເກາະປະກາຮັງທີ່ບໍ່ມີຄົນອາໄສຢູ່ ແຕ່ຊາວປະມົງໃຊ້ເປັນທີ່ພັກຊົ່ວຄາວ ແລະ ບໍ່ແມ່ນເກາະນ້ອຍໆ ເພາະມີເນື້ອທີ່ບໍ່ຕໍ່າກວ່າ 30 ໄລ່ ຂະນະທີ່ອີກ 6 ເກາະກຳລັງຖືກເຊາະຕາຝັ່ງແບບຮຸນແຮງ ໜຶ່ງໃນນັ້ນມີບ້ານເຮືອນປະມານ 10 ຫຼັງຖືກກະແສນໍ້າພັດລົງທະເລລະຫວ່າງປີ 2011-2015 ໝູ່ບ້ານຫຼາຍແຫ່ງທີ່ຕັ້ງມາຕັ້ງແຕ່ປີ 1935 ຖືກເຊາະຕາຝັ່ງຈົນຕ້ອງອົບພະຍົມໄປຕັ້ງຊຸມຊົນໃໝ່.
ຄະນະວິໄຈເຕືອນວ່າ ໝູ່ເກາະໂຊໂລມອນເປັນຈຸດທີ່ລະດັບນໍ້າທະເລສູງຂຶ້ນຫຼາຍກວ່າອັດຕາສະເລ່ຍທົ່ວໂລກເຖິງ 3 ເທົ່າ ສ່ຽງເກີດນໍ້າຖ້ວມ ແລະ ຕາຝັ່ງຖືກເຊາະໃນວົງກວ້າງ ຜົນການວິເຄາະພາບຖ່າຍທາງອາກາດ ແລະ ພາບຖ່າຍດາວທຽມຕັ້ງແຕ່ປີ 1947 ເຖິງ 2014 ປະກອບກັບຂໍ້ມູນຂອງຊາວບ້ານພົບວ່າ ຈຸດທີ່ຮັບພະລັງງານຄື້ນສູງສ່ຽງຖືກເຊາະຕາຝັ່ງຫຼາຍທີ່ສຸດ ເນື່ອງຈາກເປັນຈຸດທີ່ເກີດປະຕິກິລິຍາເສີມກັນລະຫວ່າງລະດັບນໍ້າເທເລສູງຂຶ້ນ ແລະ ຄື້ນກະທົບຝັ່ງ ປະກົດການນີ້ກຳລັງເກີດຂຶ້ນທົ່ວໂລກ ແຕ່ຍັງບໍ່ມີມາດຕະການຮັບມືໃນລະດັບໂລກ ມີແຕ່ການແກ້ບັນຫາສະເພາະໜ້າຂອງແຕ່ລະຂຸມຊົນເທົ່ານັ້ນ.