ໃນສະບັບກ່ອນນີ້ພວກເຮົາໄດ້ເວົ້າເຖິງ ການສືບທອດມູນມໍລະດົກຂອງຜູ້ທີ່ເສຍຊີວິດລະຫວ່າງຜົວ ຫຼື ເມຍທີ່ຍັງຢູ່ ແລະລູກ ແລະຄາດວ່າຈາກບົດດັ່ງກ່າວຈະເຮັດໃຫ້ທ່ານຜູ້ອ່ານໄດ້ເຂົ້າໃຈ ເຖິງປະເດັນດັ່ງກ່າວນັ້ນຫຼາຍຂຶ້ນກວ່າເກົ່າ
ດັ່ງນັ້ນໃນມື້ນີ້ຜູ້ຂຽນຈະໄດ້ ເຂົ້າບັນຫາໃໝ່ນັ້ນກໍຄືສິດໃນການຮັບມໍລະດົກຂອງລູກໃນກໍລະນີ ທີ່ ພໍ່ ຫຼື ແມ່ຫາກໄດ້ເສຍຊີວິດລົງໄປ ມື້ນີ້ຜູ້ຂຽນຈະຂໍຍົກເອົາຄຳວ່າລູກ ຊຶ່ງແບ່ງອອກເປັນຈັກປະເພດ? ແລະສິດຂອງພວກລູກແຕ່ລະປະ ເພດແມ່ນມີຄວາມຄືກັນ ແລະແຕກ ຕ່າງກັນຄືແນວໃດ ໃນທາງກົດໝາຍມາອະທິບາຍໃຫ້ທ່ານຜູ້ອ່ານ ໄດ້ເຂົ້າໃຈຢ່າງເລິກເຊິ່ງຂຶ້ນຕື່ມ ກວ່າເກົ່າໃນທາງກົດໝາຍແລ້ວ ຈະແບ່ງຄຳວ່າລູກອອກເປັນລູກຄີງ, ລູກລ້ຽງ ແລະລູກນ້າ, ລູກຄີງ ແມ່ນໝາຍເຖິງລູກແທ້ໆຂອງຕົນ ເອງສ່ວນຄຳວ່າລູກລ້ຽງແມ່ນການຮັບເອົາລູກຂອງບຸກຄົນອື່ນ ມາເປັນລູກລ້ຽງຂອງຕົນ ແລະສຸດທ້າຍແມ່ນຄຳວ່າລູກນ້າແມ່ນ ໝາຍເຖິງລູກຂອງຜົວ ຫຼື ເມຍຂອງຕົນເອງ (ລູກຕິດຜົວ ຫຼື ລູກຕິດເມຍ) ຊຶ່ງບໍ່ແມ່ນລູກທີ່ເກີດກັບຕົນເອງ.
ຫຼັງຈາກທີ່ພວກເຮົາໄດ້ທຳຄວາມເຂົ້າໃຈກ່ຽວກັບພວກລູກ ແຕ່ລະປະເພດກັນແລ້ວເຮົາຈະມາລົງເລິກເຖິງວ່າສິດໃນການຮັບມູນ ມໍລະດົກຂອງພວກລູກເຫຼົ່ານີ້ຈະມີຄືແນວໃດແດ່? ຈະແຕກຕ່າງກັນ ຫຼື ຄືກັນແນວໃດ? ອີງຕາມມາດຕາ 15 ຂອງກົດໝາຍວ່າດ້ວຍ ການສືບທອດມູນມໍລະດົກຄືການແບ່ງປັນມູນມໍລະດົກລະຫວ່າງພວກລູກ ຂອງຜູ້ເສຍຊີວິດທີ່ໄດ້ລະບຸໄວ້ວ່າຖ້າວ່າຜູ້ທີ່ເສຍຊີວິດຫາກ ມີແຕ່ລູກຄີງເທົ່ານັ້ນ ມູນມໍລະດົກທັງໝົດ ຊຶ່ງເປັນສິນສົມສ້າງ ແລະຊັບເດີມທີ່ຕົກທອດແກ່ພວກກ່ຽວ ກໍໃຫ້ແບ່ງປັນເປັນພູດສະເໝີກັນ ຖ້າຫາກວ່າຜູ້ທີ່ເສຍຊີວິດຫາກມີ ທັງລູກຄີງ, ລູກລ້ຽງ ແລະລູກນ້າມູນມໍລະດົກທີ່ເປັນພູດສິນສົມສ້າງຂອງຜູ້ກ່ຽວ (ຜູ້ທີ່ເສຍຊີວິດ) ນັ້ນ ກໍໃຫ້ແບ່ງປັນເປັນພູດສະເໝີກັນ ສ່ວນລູກລ້ຽງມີສິດໄດ້ຮັບມູນມໍ ລະດົກພູດທີ່ເປັນຊັບເດີມຂອງຜູ້ທີ່ເສຍຊີວິດເໝືອນດັ່ງ ຫຼື ເທົ່າທຽມກັນກັບລູກຄີງແຕ່ສຳລັບລູກນ້າ ແມ່ນບໍ່ມີສິດໄດ້ຮັບພູດທີ່ເປັນຊັບເດີມຂອງຜູ້ເປັນພໍ່ນ້າ ຫຼື ແມ່ນ້າ ຂອງຕົນ ນອກຈາກນີ້ໃນທາງກົດໝາຍແລ້ວຍັງໄດ້ກຳນົດເອົາໄວ້ວ່າລູກລ້ຽງແມ່ນ ບໍ່ມີສິດສືບທອດ ມູນມໍລະດົກທີ່ເປັນຂອງພໍ່, ແມ່ ເດີມຂອງຕົນໄດ້ອີກເວັ້ນເສຍແຕ່ພໍ່, ແມ່ເດີມນັ້ນຈະຂຽນພິໄນກຳມອບຊັບໃຫ້ໂດຍສະເພາະ.
ຍົກຕົວຢ່າງ ທ້າວ ຈັນ ໄດ້ແຕ່ງດອງກັນ ນາງ ອັງຄານ ຊຶ່ງພວກເຂົາມີລູກທັງໝົດຢູ່ສາມຄົນຄື: ລູກຄີງຂອງທ້າວ ຈັນ ເອງມີ 1 ຄົນ, ລູກລ້ຽງທີ່ ທ້າວ ຈັນ ແລະນາງ ອັງຄານ ໄດ້ຮັບເອົາມາລ້ຽງໄວ 1 ຄົນ ແລະລູກນ້າທີ່ເປັນລູກ ຕິດມານຳ ນາງ ອັງຄານ ອີກ 1 ຄົນ ດັ່ງນັ້ນ ໃນເມື່ອທ້າວ ຈັນ ໄດ້ເສຍຊີວິດລົງໄປແລ້ວມູນມໍລະດົກຂອງທ້າວ ຈັນ ຈະແບ່ງໃຫ້ພວກລູກຄືດັ່ງນີ້ ເຊັ່ນວ່າ: ທ້າວ ຈັນ ມີຊັບເດີມຄືລົດ ຈຳນວນສອງຄັນ, ສ່ວນສິນສົມສ້າງແມ່ນມີເງິນສົດຢູ່ຈຳນວນສາມສິບລ້ານກີບ (ໃນກໍລະນີນີ້ແມ່ນມູນມໍລະດົກທີ່ໄດ້ຮັບການແບ່ງໃຫ້ເມຍ ຫຼື ນາງ ອັງຄານ ໄປແລ້ວ) ຊັບເດີມຂອງທ້າວ ຈັນ ຄື: ລົດຈຳນວນສອງຄັ້ນນັ້ນແມ່ນຈະແບ່ງ ໃຫ້ແກ່ລູກຄີງ 1 ຄັນ ແລະລູກລ້ຽງ 1 ຄັນ ສ່ວນວ່າລູກນ້າທີ່ເປັນລູກ ຕິດນຳ ນາງ ອັງຄານ ນັ້ນແມ່ນບໍ່ມີ ສິດໄດ້ຮັບຊັບສິນໃນພູດດັ່ງກ່າວນີ້ ໄປໃນສ່ວນສິນສົມສ້າງຂອງທ້າວ ຈັນ ຄືເງິນສົດຈຳນວນສາມສິບລ້ານກີບ ນັ້ນແມ່ນໃຫ້ແບ່ງປັນເປັນພູດສະເໝີກັນລະຫວ່າງລູກທັງ 3 ຄົນ ຄືລູກຄີງໄດ້ສິບລ້ານກີບ, ລູກລ້ຽງສິບລ້ານກີບ ແລະລູກນ້າໄດ້ສິບລ້ານກີບ.
ນີ້ແມ່ນການແບ່ງປັນມູນມໍລະດົກຕາມກົດໝາຍລະຫວ່າງພວກລູກຄື: ລະຫວ່າງລູກຄີງ, ລູກລ້ຽງ ແລະລູກນ້າທີ່ຄິດວ່າຈະຊ່ວຍໃຫ້ ທ່ານຜູ້ອ່ານໄດ້ເຂົ້າໃຈກັນເພີ່ມເຕີມ.
ຂໍຂອບໃຈຂໍ້ມູນຈາກ