1. ໂດຍຕອບສະໜອງຕາມຄຳເຊີນຂອງ ສະຫາຍ ສີຈິ້ນຜິງ, ເລຂາທິການໃຫຍ່ ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງ ສາທາລະນະລັດ ປະຊາຊົນຈີນ, ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຢ້ຽມຢາມສັນຖະວະໄມຕີ ສາທາລະນະລັດ ປະຊາຊົນຈີນ ຢ່າງເປັນທາງການ ແຕ່ວັນທີ 03-05 ພຶດສະພາ 2016.
ໃນໄລຍະການຢ້ຽມຢາມ, ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນ ປະຕິວັດລາວ, ປະທານປະເທດ ແຫ່ງ ສ ປປ ລາວ ໄດ້ພົບປະເຈລະຈາຢ່າງເປັນທາງການ ກັບ ສະຫາຍ ສີຈິ້ນຜິງ, ເລຂາທິການໃຫຍ່ ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ; ພົບປະຫາລືກັບ ສະຫາຍ ລີເຄີສຽງ, ກໍາມະການປະຈໍາກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປ ຈີນ; ສະຫາຍ ຈາງເຕີຈຽງ, ກໍາມະການປະຈໍາກົມການເມືອງສູນກາງພັກ, ປະທານຄະນະປະຈຳສະພາຜູ້ແທນປະຊາຊົນທົ່ວປະເທດຈີນ ແລະ ສະຫາຍ ລິວຢຸນຊານ, ກໍາມະການປະຈໍາກົມການເມືອງສູນກາງພັກ, ເລຂາທິການສູນກາງພັກກອມມູນິດຈີນ. ໃນການພົບປະທີ່ດໍາເນີນໄປພາຍໃຕ້ບັນຍາກາດ ແຫ່ງໄມຕີຈິດມິດຕະພາບອັນສະໜິດສະໜົມ, ທັງສອງຝ່າຍໄດ້ແຈ້ງໃຫ້ກັນຊາບ ກ່ຽວກັບ ສະພາບການທີ່ພົ້່ນເດັ່ນຂອງແຕ່ລະພັກ, ແຕ່ລະປະເທດ, ທັງໄດ້ແລກປ່ຽນຄຳຄິດຄຳເຫັນນຳກັນ ແລະ ໄດ້ບັນລຸຄວາມເຫັນ ເປັນເອກະພາບກັນຢ່າງກວ້າງຂວາງກ່ຽວກັບ ການສືບຕໍ່ເສີມຂະຫຍາຍ ສາຍພົວພັນລະຫວ່າງສອງພັກ, ສອງລັດ ລາວ-ຈີນ ໃຫ້ເລິກເຊິ່ງຕື່ມອີກໃນສະພາບການໃໝ່ ແລະ ບັນຫາພາກພື້ນ ແລະ ສາກົນ ທີ່ສອງຝ່າຍຕ່າງມີຄວາມສົນໃຈຮ່ວມກັນ. ນອກຈາກຢ້ຽມຢາມນະຄອນຫລວງປັກກິ່ງແລ້ວ, ສະຫາຍ ບຸນຍັງ ວໍລະຈິດ ພ້ອມດ້ວຍຄະນະຜູ້ແທນ ຍັງໄດ້ຢ້ຽມຢາມແຂວງ ຢູນນານ.
2. ສອງຝ່າຍ ສະແດງຄວາມປິຕິຊົມຊຶ່ນ ຕໍ່ຜົນສໍາເລັດອັນໃຫຍ່ຫລວງ ໃນພາລະກິດສ້າງສາສັງຄົມນິຍົມ ຂອງແຕ່ລະປະເທດ, ໃນພາລະກິດປະຕິຮູບເປີດປະຕູສູ່ພາຍນອກຂອງຈີນ ແລະ ພາລະກິດການປ່ຽນແປງໃໝ່ ຂອງລາວ.
ຝ່າຍຈີນ ສະແດງຄວາມຊົມເຊີຍຢ່າງສຸດອົກສຸດໃຈ ຕໍ່ຜົນສໍາເລັດອັນຈົບງາມ ໃນການດຳເນີນກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ X ຂອງພັກປະຊາຊົນປະຕິວັດລາວ ແລະ ກອງປະຊຸມຄັ້ງປະຖົມມະລຶກ ຂອງ ສະພາແຫ່ງຊາດ ສະໄໝທີ VIII ແລະ ເຊື່ອໝັ້ນວ່າ ພາຍໃຕ້ການນຳພາອັນໜັກແໜ້ນຂອງ ພັກປະຊາຊົນ ປະຕິວັດລາວ, ປະຊາຊົນລາວ ຈະສາມາດບັນລຸໜ້າທີ່ ແລະ ເປົ້າໝາຍທີ່ກອງປະຊຸມໃຫຍ່ ຄັ້ງທີ X ວາງອອກ ແລະ ສາມາດຍາດໄດ້ຜົນສຳເລັດອັນໃຫຍ່ຫລວງກວ່າເກົ່າ ໃນພາລະກິດແຫ່ງການ ສ້າງສາປະເທດສັງຄົມນິຍົມ ໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມປອງດອງ, ປະຊາທິປະໄຕ, ຍຸດຕິທໍາ ແລະ ສີວິໄລ.
ຝ່າຍລາວ ສະແດງຄວາມຊົມເຊີຍຢ່າງສຸດອົກສຸດໃຈຕໍ່ຝ່າຍຈີນ ທີ່ໄດ້ເລີ່ມຕົ້ນປະຕິບັດແຜນພັດທະນາເສດຖະ ກິດ-ສັງຄົມແຫ່ງຊາດ 5 ປີ ຄັ້ງທີ XIII ຢ່າງຈົບງາມ ແລະ ເຊື່ອໝັ້ນວ່າ ພາຍໃຕ້ການນຳ ພາອັນໜັກແໜ້ນ ຂອງ ພັກກອມມູນິດຈີນ, ປະຊາຊົນຈີນ ຈະປະສົບຜົນສຳເລັດ ໃນການສ້າງສັງຄົມອີ່ມໜຳສຳລານຮອບດ້ານ, ການລົງເລິກປະຕິຮູບຮອບດ້ານ, ການປົກຄອງລັດດ້ວຍກົດໝາຍຮອບດ້ານ ແລະ ການຄຸ້ມຄອງພັກ ຢ່າງເຂັ້ມງວດຮອບດ້ານ; ບັນລຸເປົ້າໝາຍການສ້າງປະເທດສັງຄົມນິຍົມທີ່ທັນສະໄໝ, ຮັ່ງມີເຂັ້ມແຂງ, ປະຊາທິປະໄຕ, ສີວິໄລ ແລະ ກົມກຽວປອງດອງ.
3. ໃນໂອກາດວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 55 ປີ, ສອງຝ່າຍ ໄດ້ຫວນຄືນປະຫວັດສາດ ທີ່ສະຫງ່າລາສີຂອງ ປະຊາຊົນສອງຊາດ ໃນສະໄໝການຕໍ່ສູ້ຍາດເອົາເອກະລາດ, ປົດປ່ອຍຊາດ ແລະ ໃນໄລຍະແຫ່ງການສ້າງສາສັງຄົມນິຍົມ ທີ່ໄດ້ສະໜັບສະໜູນ ແລະ ຊ່ວຍເຫຼືອເຊິ່ງກັນແລະກັນ, ໄດ້ສະຫລຸບຖອດຖອນບົດຮຽນ ແຫ່ງການຂະຫຍາຍຕົວຂອງສາຍພົວພັນ ລາວ-ຈີນ ແລະ ເຫັນວ່າ ສອງປະເທດ ລາວ-ຈີນ ລ້ວນແຕ່ເປັນປະເທດສັງຄົມນິຍົມ ທີ່ນຳພາໂດຍພັກກອມມູນິດ, ມີອຸດົມການທີ່ສອດຄ່ອງກັນ, ມີອະນາຄົດຊະຕາກຳກ່ຽວພັນກັນ ແລະ ມີເສັ້ນທາງແຫ່ງ ການພັດທະນາທີ່ຄ້າຍຄຽງກັນ, ເຊິ່ງແມ່ນພື້ນຖານດ້ານການເມືອງອັນສໍາຄັນ ໃນການພັດທະນາສາຍພົວພັນ ລາວ-ຈີນ. ສອງຝ່າຍກຳແໜ້ນ ທິດທາງແຫ່ງການເສີມຂະຫຍາຍສາຍພົວພັນນໍາກັນ, ໂດຍຍຶດໝັ້ນການຊຸກຍູ້ການຮ່ວມມື ທີ່ເປັນຮູບປະທຳໃນຂົງເຂດຕ່າງໆ, ເພີ່ມທະວີການປະສານສົມທົບກັນ ໃນກິດຈະການພາກພື້ນ ແລະ ສາກົນ, ເສີມຂະຫຍາຍມິດຕະພາບທີ່ດີ ລະຫວ່າງ ປະຊາຊົນສອງຊາດໃຫ້ໜັກແໜ້ນ, ຊຸກຍູ້ສາຍພົວພັນ ລາວ-ຈີນ ໃຫ້ໄດ້ຮັບຜົນສຳເລັດອັນອຸດົມສົມບູນຢ່າງບໍ່ຢຸດຢັ້ງ ແລະ ກາຍເປັນມໍລະດົກອັນລ້ຳຄ່າລວມຂອງ ສອງພັກ, ສອງລັດ ລາວ-ຈີນ.
ສອງຝ່າຍຢືນຢັນຄືນວ່າ, ລາວ-ຈີນ ໃນຖານະເປັນປະເທດສັງຄົມນິຍົມ, ເປັນຄູ່ຮ່ວມຊະຕາກຳ ທີ່ມີຄວາມໝາຍຍຸດທະສາດ ຈະສືບຕໍ່ຢືດໝັ້ນການພົວພັນຕາມທິດນຳໝັ້ນຄົງຍາວນານ, ໄວ້ເນື້ອເຊື່ອໃຈກັນ, ຮ່ວມມືຮອບດ້ານ ບົນຈິດໃຈແຫ່ງການເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ; ລົງເລິກການຮ່ວມມືແລກ ປ່ຽນໃນຂົງເຂດຕ່າງໆຢ່າງຮອບດ້ານ, ຊຸກຍູ້ສາຍພົວພັນ ແບບຄູ່ຮ່ວມຍຸດທະສາດຮອບດ້ານ ລາວ-ຈີນ ທີ່ຕ່າງຝ່າຍຕ່າງມີຜົນປະໂຫຍດ, ຊ່ວຍເຫລືອກັນ ແລະ ມີຄວາມເຊື່ອໝັ້ນກັນໃນລະດັບສູງນັ້ນ ໃຫ້ກ້າວສູ່ລະດັບໃໝ່ຢ່າງບໍ່ຢຸດຢັ້ງ, ປະກອບສ່ວນອັນສໍາຄັນເຂົ້າໃນການປົກປັກຮັກສາສັນຕິພາບ, ສະຖຽນລະພາບ, ຄວາມຈະເລີນຮຸ່ງເຮືອງ ແລະ ການພັດທະນາໃນພາກພື້ນ ແລະ ໃນໂລກ.
4. ສອງຝ່າຍເຫັນດີເປັນເອກະພາບກັນວ່າ ຈະນຳໃຊ້ມາດຕະການທີ່ມີປະສິດທິຜົນຕົວຈິງ ເພື່ອລົງເລິກການຮ່ວມມືໃນຂົງເຂດ ດັ່ງລຸ່ມນີ້:
1/. ຮັກສາມູນເຊື້ອການໄປມາຫາສູ່ກັນຢ່າງເປັນປະຈຳ ຂອງ ການນຳຂັ້ນສູງ ຂອງ ສອງພັກ, ສອງລັດ, ແລກປ່ຽນຄຳຄິດເຫັນຢ່າງເລິກເຊິ່ງ ກ່ຽວກັບ ບັນຫາສຳຄັນຂອງການພົວພັນສອງຝ່າຍ ກໍຄື ສະພາບການໃນພາກພື້ນ ແລະ ສາກົນ ຢ່າງທັນການ; ເພີ່ມທະວີການປະສານງານໃນບັນຫາຍຸດທະສາດ, ເຮັດໃຫ້ຄວາມເຊື່ອໝັ້ນເຊິ່ງກັນແລະກັນດ້ານການເມືອງມີຄວາມເລິກເຊິ່ງ ແລະ ກຳແໜ້ນທິດທາງ ການເສິີມຂະຫຍາຍສາຍພົວພັນສອງຝ່າຍ ລາວ-ຈີນ.
2/. ຈັດຕັ້ງຜັນຂະຫຍາຍ ແຜນການຮ່ວມມື ລະຫວ່າງ ສອງພັກ ລາວ-ຈີນ ໄລຍະສົກປີ 2016-2020 ໃຫ້ໄດ້ດີ, ສືບຕໍ່ຈັດກອງປະຊຸມສຳມະນາທິດສະດີລະຫວ່າງ ສອງພັກ, ລົງເລິກແລກປ່ຽນບົດ ຮຽນກ່ຽວກັບ ວຽກງານການກໍ່ສ້າງພັກ ແລະ ວຽກງານຄຸ້ມຄອງພັກ-ຄຸ້ມຄອງລັດ, ລົງເລິກການ ຮ່ວມມືໃນການຝຶກອົບຮົມພະນັກງານພັກ–ລັດ, ຊຸກຍູ້ການຮ່ວມມືແລກປ່ຽນລະຫວ່າງ ບັນດາອົງການອ້ອມຂ້າງຂອງ ສູນກາງພັກທັງສອງ ແລະ ລະຫວ່າງບັນດາອົງຄະນະພັກແຂວງທີ່ມີຊາຍແດນຕິດຈອດກັນຂອງສອງຝ່າຍ.
3/. ສືບຕໍ່ລົງເລິກການພົວພັນມິດຕະພາບ ລະຫວ່າງສະພາແຫ່ງຊາດລາວກັບ ສະພາປະຊາຊົນທົ່ວປະເທດຈີນ, ສູນກາງແນວລາວສ້າງຊາດ ກັບ ສະພາປຶກສາການເມືອງປະຊາຊົນທົ່ວປະເທດຈີນ, ເພີ່ມທະວີການແລກປ່ຽນ ການໄປມາຫາສູ່ກັນ ລະຫວ່າງອົງການກ່ຽວຂ້ອງ, ຊຸກຍູ້ການປະສານງານ ດ້ານນະໂຍບາຍ ແລະ ແລກປ່ຽນປະສົບປະການ, ຮ່ວມກັນເສີມຂະຫຍາຍບົດບາດອັນສຳຄັນ ໃນການຊຸກຍູ້ການສ້າງສາ ລະບອບສັງຄົມນິຍົມຂອງສອງປະເທດ ແລະ ການເສີມຂະຫຍາຍສາຍພົວພັນ ລາວ-ຈີນ.
4/. ໃນຂົງເຂດເສດຖະກິດ-ການຄ້າ, ສືບຕໍ່ຍຶດໝັ້ນຫລັກການສະເໝີພາບ, ຕ່າງຝ່າຍຕ່າງມີຜົນປະໂຫຍດ, ເນັ້ນໜັກປະສິດທິຜົນຕົວຈິງ, ຫລາຍຮູບຫລາຍແບບ ແລະ ພ້ອມກັນພັດທະນາ, ເປີດກວ້າງບໍລິມາດ ການຮ່ວມມືທີ່ເປັນຮູບປະທຳ, ຍົກສູງລະດັບ ແລະ ຄຸນນະພາບໃນການຮ່ວມມື.
– ເພີ່ມທະວີການປະສານສົມທົບໃນດ້ານຍຸດທະສາດ ໃນການພັດທະນາ ແລະ ຮ່ວມມືໃນດ້ານການຜະລິດ, ຊຸກຍູ້ຍຸດທະສາດ“ໜຶ່ງແລວທາງ ໜຶ່ງເສັ້ນທາງ” ຂອງຈີນ ແລະ ຍຸດທະສາດ “ການປ່ຽນຈາກປະເທດ ທີ່ບໍ່ມີຊາຍແດນຕິດຈອດທະເລ ເປັນປະເທດເຊື່ອມຈອດເຊື່ອມໂຍງກັບພາກພື້ນ ແລະ ສາກົນ” ຂອງລາວ, ການປະສານສົມທົບ ລະຫວ່າງ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ຂອງລາວ ກັບ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ XIII ຂອງຈີນ; ປະສານສົມທົບກັນຢ່າງແໜ້ນແຟ້ນ ໃນການສ້າງແຜນແມ່ບົດການຮ່ວມມື ກ່ຽວກັບ ການຮ່ວມກັນຊຸກຍູ້ຂໍ້ລິເລີ່ມ “ໜຶ່ງແລວທາງ ໜຶ່ງເສັ້ນທາງ” ໃຫ້ສໍາເລັດໂດຍໄວ, ນຳໃຊ້ມາດຕະການຕົວຈິງ ເພື່ອຊຸກຍູ້ການຮ່ວມມືໃນຂະແໜງການຜະລິດ ແລະ ການລົງທຶນ ຂອງ ສອງປະເທດ.
– ເສີມຂະຫຍາຍຢ່າງເຕັມສ່ວນບົດບາດຂອງ ຄະນະກຳມະການຮ່ວມມືດ້ານເສດຖະກິດ, ການຄ້າ ແລະ ເຕັກນິກ ລາວ-ຈີນ ແລະ ກົນໄກການຮ່ວມມືອື່ນໆ, ເພີ່ມທະວີການປະສານງານຢ່າງຄົບຊຸດ ໃນການຮ່ວມມືໃຫ້ເປັນຮູບປະທຳ ໃນຂົງເຂດຕ່າງໆ ຂອງ ສອງຝ່າຍ; ຊຸກຍູ້ສືບຕໍ່ເຊັນແຜນແມ່ບົດການຮ່ວມມືດ້ານເສດຖະກິດ-ເຕັກນິກ ລາວ- ຈີນ ສົກປີ 2016-2020, ກຳນົດເປົ້າໝາຍ, ຂົງເຂດຈຸດສຸມ ແລະ ບັນຊີບັນດາໂຄງການຂອງການຮ່ວມມື ສອງຝ່າຍ.
– ຮັບປະກັນການຈັດຕັ້ງຜັນຂະຫຍາຍ ໂຄງການໃຫຍ່ທີ່ສຳຄັນ ໃນການຮ່ວມມືໃຫ້ດຳເນີນໄປດ້ວຍດີ; ຊຸກຍູ້ການກໍ່ສ້າງເສັ້ນທາງລົດໄຟ ລາວ-ຈີນ, ສ້າງຕັ້ງບໍລິສັດຮ່ວມທຶນ ແລະ ວຽກງານກ່ຽວຂ້ອງ ໃນການຈັດຕັ້ງປະຕິບັດໂຄງການໃຫ້ໄດ້ດີ; ຊູກຍູ້ໂຄງການກໍ່ສ້າງເຂດພັດທະນາ ກວມລວມ ໄຊເສດຖານະຄອນຫລວງວຽງຈັນ ໃຫ້ມີຄວາມຄືບໜ້າໃໝ່. ຝ່າຍຈີນ ສົ່ງເສີມ ແລະ ສະໜັບສະໜູນ ບັນດາວິສາຫະກິດ ທີ່ມີຄວາມສາມາດ ແລະ ຄວາມເຊື່ອຖື ເພື່ອສ້າງຕັ້ງເຂດຮ່ວມມືເສດຖະກິດ-ການຄ້າ ຢູ່ ສ ປປ ລາວ; ຝ່າຍຈີນ ຍິນດີຈະແບ່ງປັນປະສົບການ ໃນການສ້າງເຂດເສດຖະກິດພິເສດ ແລະ ເຂດເສດ ຖະກິດ-ເຕັກນິກພັດທະນາໃໝ່ ໃຫ້ຝ່າຍລາວ; ເລັ່ງລັດຊຸກຍູ້ການສ້າງເຂດຮ່ວມມືເສດຖະກິດ ບໍ່ເຕັນ-ບໍ່ຫານ ລາວ-ຈີນ, ຊຸກຍູ້ການເສີມຂະຫຍາຍທ່າແຮງດ້ານເສດຖະກິດ ຂອງ ສອງປະເທດ ແລະ ເອື້ອອຳ ນວຍໃຫ້ແກ່ການຄ້າ-ການລົງທຶນ ແລະ ການໄປມາຫາສູ່ກັນ ຂອງ ປະຊາຊົນສອງປະເທດ.
– ສືບຕໍ່ດຳເນີນການຮ່ວມມືໃນຂົງເຂດພະລັງງານ, ຝ່າຍຈີນ ສົ່ງເສີມ ແລະ ສະໜັບສະໜູນ ໃຫ້ວິສາຫະກິດ ແລະ ອົງການການເງິນ-ການທະນາຄານຂອງຈີນ ເຂົ້າຮ່ວມຍຸດທະສາດແຫ່ງການພັດທະນາດ້ານພະລັງງານຂອງລາວ, ຜັນຂະຫຍາຍສັນຍາການຮ່ວມມືລົງທຶນ ທີ່ໄດ້ລົງນາມກັນແລ້ວ ໃຫ້ໄດ້ດີ ເພື່ອບັນລຸການສ້າງລາຍຮັບຮ່ວມກັນ ທີ່ຕ່າງຝ່າຍຕ່າງມີຜົນປະໂຫຍດ ແລະ ມີການພັດທະນາຢ່າງຍາວນານ.
– ເພີ່ມທະວີການແລກປ່ຽນບົດຮຽນໃນຂະແໜງການກະສິກຳ, ສືບຕໍ່ຮ່ວມມືໃນການຝຶກອົບຮົມ ຊັບພະຍາກອນມະນຸດ, ຊຸກຍູ້ການຮ່ວມມືການຄ້າຂາຍຜົນຜະລິດກະສິກຳສະອາດ, ສືບຕໍ່ເພີ່ມທະວີການຮ່ວມມື ໃນດ້ານຕ່າງໆ ເຊັ່ນ: ການກວດກາ ແລະ ກັກກັ້ນສຸຂະນາໄມພຶດ ແລະ ສັດ, ການປ້ອງກັນ ຄວບຄຸມພະຍາດສັດ – ພືດພັນຂ້າມແດນ, ນໍາໃຊ້ເຕັກນິກໃນຂົງເຂດກະສິກໍາ ໃນການເພາະແນວພັນ, ເຄື່ອງກົນຈັກອຸປະກອນກະສິກຳ, ການຄົ້ນຄວ້າ ແລະ ພັດທະນາແຫລ່ງພະລັງງານມາຈາກທາດຊີວະມວນຂອງພືດ ແລະ ສັດ ແລະ ການຮ່ວມມືໃນຂົງເຂດອື່ນໆ.
5/. ຮ່ວມມືຢ່າງແໜ້ນແຟ້ນດ້ານປ້ອງກັນຊາດ-ປ້ອງກັນຄວາມສະຫົງບ, ຮັກສາການໄປມາຫາສູ່ກັນ ຂອງການນຳຂັ້ນສູງ ແລະ ເປີດກວ້າງການຮ່ວມມືທີ່ເປັນຮູບປະທຳ ລະຫວ່າງ ສອງກອງທັບ, ເພີ່ມທະວີການຮ່ວມມືແລກປ່ຽນແບບມິດຕະພາບ ຮັກສາຄວາມສະຫງົບຕາມຊາຍແດນ, ການຝຶກ ອົບຮົມພະນັກງານ, ການຝຶກຊ້ອມການທະຫານ, ວຽກງານການເມືອງ ແລະ ການຮ່ວມມືແລກປ່ຽນ ໃນຂົງເຂດອື່ນໆ, ເພີ່ມທະວີ ການສະໜັບສະໜູນເຊິ່ງກັນ ແລະ ກັນ ໃນຂອບການຮັກສາຄວາມປອດໄພຫຼາຍຝ່າຍ.
6/. ລົງເລິກການຮ່ວມມືໃນການປະຕິບັດກົດໝາຍ ແລະ ຮັກສາຄວາມປອດໄພ, ເພີ່ມທະວີການຮ່ວມມື ໃນການຄຸ້ມຄອງຊາຍແດນ ແລະ ການຮ່ວມມືໃນການສ້າງຄວາມສາມາດໃນການປະຕິບັດກົດໝາຍ, ສະກັດກັ້ນ ແລະ ຕ້ານລັດທິກໍ່ການຮ້າຍ ແລະ ການກໍ່ອາຊະຍາກຳຂ້າມຊາດ ເຊັ່ນ: ຢາເສບຕິດ, ການນຳໃຊ້ອິນເຕີເນັດ ແລະ ການຕົວະຕົ້ມຫລອກລວງທາງສື່ອອນລາຍ, ການຄ້າມະນຸດ ແລະ ອື່ນໆ ເພື່ອປົກປັກຮັກສາ ຄວາມປອດໄພແຫ່ງຊາດ ແລະ ຄວາມໝັ້ນຄົງທາງສັງຄົມຂອງສອງປະເທດ; ນຳໃຊ້ມາດຕະການທີ່ມີປະສິດທິຜົນ ໃນການປົກປ້ອງຄວາມປອດໄພຂອງພົນລະເມືອງ, ອົງການຈັດຕັ້ງ ແລະ ໂຄງການກໍ່ສ້າງສຳຄັນຂອງກັນ ແລະ ກັນຢ່າງຈິງຈັງ; ເພີ່ມທະວີການຮ່ວມມື ໃນຂອບກົນໄກການປະຕິບັດກົດໝາຍ ແລະ ຮັກສາຄວາມປອດໄພ ຕາມລຳແມ່ນ້ຳຂອງ, ຕັ້ງໜ້າຊຸກຍູ້ການສ້າງສູນຮ່ວມມືປະຕິບັດກົດໝາຍ ແລະ ຮັກສາຄວາມປອດໄພ ຕາມລຳແມ່ນ້ຳຂອງ – ແມ່ນ້ຳລ້ານຊ້າງ, ເຊິ່ງເປັນການປະກອບສ່ວນອັນໃໝ່ ເຂົ້າໃນການປົກປັກຮັກສາສັນຕິພາບ ແລະ ຄວາມໝັ້ນຄົງຕາມລຳແມ່ນ້ຳດັ່ງກ່າວ ແລະ ພາກພື້ນ.
7/. ເປີດກວ້າງການພົວພັນລະຫວ່າງປະຊາຊົນ, ເພີ່ມທະວີ ການຮ່ວມມືໃນຂົງເຂດວັດທະນະທຳ, ການສຶກສາ, ສາທາລະນະສຸກ, ກິລາ, ທ່ອງທ່ຽວ, ສື່ມວນຊົນ ຂ່າວສານ ແລະ ຂົງເຂດອື່ນໆຂອງສອງຝ່າຍ ແລະ ດຳເນີນການຮ່ວມມື ແລກປ່ຽນລະຫວ່າງອົງການຈັດຕັ້ງກຳມະບານ, ຊາວໜຸ່ມ, ແມ່ຍິງ ຂອງສອງປະເທດ; ເລັ່ງລັດລົງນາມສັນຍາ ແຜນປະຕິບັດງານຮ່ວມມື ຂົງເຂດວັດທະນະທຳສົກປີ 2016-2018 ແລະ ຊຸກຍູ້ການດໍາເນີນວຽກງານຂອງ ສູນວັດທະນະທຳຈີນ ທີ່ ສປປ ລາວ; ຈັດຕັ້ງຜັນຂະຫຍາຍ ແຜນການຮ່ວມມືຂົງເຂດການສຶກສາ ຂອງສອງປະເທດໃຫ້ດີ, ຊຸກຍູ້ສອງຝ່າຍ ໃຫ້ມີການຮ່ວມມື ແລະ ແລກປ່ຽນໃນຂົງເຂດການສິດສອນພາສາຈີນ ແລະ ລາວ, ແລກປ່ຽນນັກຮຽນ-ນັກສຶກສາ ແລະ ການສ້າງໂຮງຮຽນຮ່ວມກັນ ແລະ ອື່ນໆ, ສືບຕໍ່ແລກປ່ຽນອາສາສະໝັກໜຸ່ມນ້ອຍ ແລະ ຮ່ວມກັນຈັດກິດຈະກຳ ໃນປີແຫ່ງການແລກປ່ຽນດ້ານການສຶກສາອາຊຽນ-ຈີນ.
8/. ເປີດກວ້າງການຮ່ວມມື ລະຫວ່າງ ທ້ອງຖິ່ນ ຂອງ ສອງປະເທດ, ໂດຍສະເພາະ ແມ່ນການຮ່ວມມື ແລກປ່ຽນລະຫວ່າງ ບັນດາແຂວງ ທີ່ຢູ່ລຽບຕາມຊາຍແດນ, ເສີມຂະຫຍາຍຢ່າງເຕັມສ່ວນ ບົດບາດຂອງກົນໄກການຮ່ວມມື ລະຫວ່າງ ບັນດາແຂວງພາກເໜືອຂອງລາວ ກັບ ແຂວງຢູນນານຂອງ ຈີນ; ປະສົມປະສານ ການດຳເນີນການຮ່ວມມື ຕ້ານຢາເສບຕິດ ແລະ ພັດທະນາຂະແໜງການ ປູກພືດທົດແທນ ຢູ່ຕາມເຂດຊາຍແດນໃຫ້ຫຼາຍຂຶ້ນ.
5. ຝ່າຍຈີີນຢືນຢັນຄືນ ໃນການເຄົາລົບຄວາມເປັນເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ ຂອງ ສ ປປ ລາວ. ຝ່າຍລາວຢືນຢັນຄືນ ໃນການຢຶດໝັ້ນນະໂຍບາຍປະເທດຈີນດຽວ ຢ່າງໜັກແໜ້ນ, ສະໜັບສະໜູນການພົວພັນສອງຝັ່ງທະເລ ໃຫ້ພັດທະນາໄປຢ່າງສັນຕິ ແລະ ສະໜັບສະໜູນພາລະກິດອັນສໍາຄັນ ໃນການທ້ອນໂຮມປະເທດຊາດຈີນ, ເດັດດ່ຽວຄັດຄ້ານ ທຸກການເຄື່ອນໄຫວໃນທຸກຮູບແບບ ທີ່ເປັນການແບ່ງແຍກ “ ໄຕ້ຫວັນເປັນເອກະລາດ”.
6. ສອງຝ່າຍ ຕີລາຄາສູງຕໍ່ການຮ່ວມມື ໃນວຽກງານຂອງພາກພື້ນ ແລະ ສາກົນ ຢ່າງມີປະສິດທິຜົນ, ທັງໄດ້ຢືນຢັນຄືນວ່າ ຈະສືບຕໍ່ເພີ່ມທະວີການປະສານງານ ແລະ ສົມທົບກັນ ໃນຂອບກົນໄກພະຫຸພາຄີຕ່າງໆ ເຊັ່ນ: ອົງການສະຫະປະຊາຊາດ, ອົງການການຄ້າໂລກ, ກອງປະຊຸມອາຊີ- ເອີຣົບ, ກອງປະຊຸມສຸດຍອດອາຊີຕາເວັນອອກ, ຈີນ–ອາຊຽນ, ອາຊຽນ–ຈີນ–ຍີ່ປຸ່ນ-ເກົາຫລີໃຕ້, ເວທີປຶກສາຫາລືຂົງ ເຂດອາຊຽນ, ກົນໄກແມ່ນ້ຳລ້ານຊ້າງ-ແມ່ນ້ຳຂອງ, ການຮ່ວມມືໃນອະນຸພາກພື້ນແມ່ນໍ້າຂອງ ແລະ ກົນໄກຮ່ວມມືອື່ນໆ ເພື່ອປະກອບສ່ວນສຳຄັນ ໃນການປົກປັກຮັກສາສັນ ຕິພາບ, ຄວາມໝັ້ນຄົງ ແລະ ການພັດທະນາ ຂອງ ພາກພື້ນ ແລະ ສາກົນ. ຝ່າຍຈີນ ສະໜັບສະໜູນການ ເປັນປະທານໝູນວຽນອາ ຊຽນຂອງ ສປປ ລາວ ໃນປີ 2016, ຍີນດີ ປະສານສົມທົບກັບຝ່າຍລາວ ໃນການຈັດກອງປະຊຸມຜູ້ນຳ ຂອງບັນດາປະເທດອາຊີຕາເວັນອອກ ແລະ ກອງປະຊຸມປິ່ນອ້ອມຕ່າງໆ. ຝ່າຍລາວຍິນດີຮ່ວມກັບຝ່າຍຈີນ ໃນການຈັດກິດຈະກຳ ເພື່ອສະເຫຼີມສະຫຼອງ ວັນສ້າງຕັ້ງ ການເປັນຄູ່ຮ່ວມເຈລະຈາ ອາຊຽນ-ຈີນ ຄົບ ຮອບ 25 ປີ ໃຫ້ໄດ້ດີ, ຊຸກຍູ້ການພົວພັນອາຊຽນ-ຈີນ ໃຫ້ນັບມື້ນັບມີການພັດທະນາຢ່າງບໍ່ຢຸດຢັ້ງ. ສອງຝ່າຍເຫັນດີ ເປັນເອກະພາບນໍາກັນວ່າ ການປົກປັກຮັກສາສັນຕິ ພາບ, ສະຖຽນລະພາບ, ການຮ່ວມມືເພື່ອການພັດທະນາໃນທະເລຈີນໃຕ້ ແມ່ນສອດຄ່ອງກັບຜົນປະໂຫຍດລວມ ຂອງບັນດາປະເທດ ໃນພາກພື້ນ, ທັງຮຽກຮ້ອງໃຫ້ບັນດາຝ່າຍທີ່ກ່ຽວຂ້ອງ ແກ້ໄຂຂໍ້ຂັດແຍ່ງໂດຍສັນຕິວິທີ, ໂດຍຜ່ານການເຈລະຈາປຶກສາຫາລື, ປະຕິບັດຖະແຫລງການແຫ່ງການປະພຶດຂອງ ບັນດາຝ່າຍໃນທະເລຈີນໃຕ້ (DOC) ຢ່າງຄົບຖ້ວນ ແລະ ມີປະສິດທິຜົນ; ປຶກສາຫາລືເທື່ອລະກ້າວ, ເປັນເອກະພາບກັນ ເພື່ອກ້າວໄປເຖິງການ ບັນລຸຫລັກການແຫ່ງການປະພຶດ ຂອງ ບັນດາຝ່າຍໃນທະເລຈີນໃຕ້ (COC) ໂດຍໄວ.
7. ໃນໄລຍະການຢ້ຽມຢາມ, ສອງຝ່າຍ ໄດ້ລົງນາມ ແຜນການຮ່ວມມືລະຫວ່າງ ພັກປະຊາຊົນປະຕິວັດລາວ ແລະ ພັກກອມູນິດຈີນ ໄລຍະສົກປີ 2016-2020, ສັນຍາວ່າດ້ວຍການຮ່ວມມືດ້ານເສດຖະກິດ – ເຕັກນິກ ລະຫວ່າງລັດຖະບານລາວ ແລະ ລັດຖະບານຈີນ, ບົດບັນທຶກຄວາມ ເຂົ້າໃຈ ກ່ຽວກັບການຊຸກຍູ້ການຮ່ວມມືໃນຂະແໜງການຜະລິດ ແລະ ການລົງທຶນ ແລະ ເອກະສານຮ່ວມມືອື່ນໆອີກ ລວມທັງໝົດ ຈໍານວນ 10 ສະບັບ.
8. ສອງຝ່າຍ ສະແດງຄວາມເພິ່ງພໍໃຈຕໍ່ ໝາກຜົນ ຂອງ ການຢ້ຽມຢາມ ສປ ຈີນ ຂອງສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນ ປະຕິວັດລາວ, ປະທານປະເທດ ແຫ່ງ ສ ປປ ລາວ ໃນຄັ້ງນີ້, ເຫັນດີເປັນເອກະພາບກັນວ່າ ການຢ້ຽມຢາມຄັ້ງນີ້ ມີຄວາມໝາຍສຳຄັນຕໍ່ການຊຸກຍູ້ ແລະ ເສີມຂະຫຍາຍການພົວພັນ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ.
ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ສະແດງຄວາມຂອບອົກຂອບໃຈຕໍ່ ສະຫາຍ ສີຈິນຜິງ, ເລຂາທິການໃຫຍ່ ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ ແລະ ພັກກອມມູນິດຈີນ, ລັດຖະບານ ແລະ ປະຊາຊົນຈີນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ, ສົມກຽດ ແລະ ເຕັມໄປດ້ວຍໄມຕີຈິດມິດຕະພາບ ແລະ ໄດ້ເຊື້ອເຊີນ ສະຫາຍ ສິຈິນຜິງ, ເລຂາທິການໃຫຍ່, ປະທານປະເທດ ແຫ່ງ ສປ ຈີນ ຢ້ຽມຢາມ ສປປ ລາວ. ສະຫາຍ ສິຈິນຜິງ ໄດ້ສະແດງຄວາມຂອບໃຈຕໍ່ການເຊື້ອເຊີນ ຂອງ ສະ ຫາຍ ບຸນຍັງ ວໍລະຈິດ.
ທີ່ ປັກກິ່ງ, ວັນທີ 04 ພຶດສະພາ 2016
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!