ໃນກໍລະນີທີ່ຜູ້ຊື້ປະກັນໄພລົດຫາກໄດ້ເຮັດປະກັນໄພກັບບໍລິສັດປະກັນໄພ ແລະຕໍ່ມາກໍໄດ້ມີອຸບັດເຫດເກີດຂຶ້ນໃນກໍລະນີດັ່ງ
ກ່າວນີ້ຖາມວ່າຜູ້ຮັບປະກັນໄພ ຫຼື ບໍລິສັດປະກັນໄພຈະຮັບຜິດຊອບຕໍ່ຄວາມເສຍຫາຍທີ່ເກີດຂຶ້ນ ຫຼື ບໍ່? ຊຶ່ງເວົ້າຈາກສິ່ງທີ່ເກີດຂຶ້ນໃນສັງ ຄົມຕົວຈິງແລ້ວປະເດັນດັ່ງກ່າວ ນີ້ກໍຍັງເປັນປະເດັນທີ່ຫຼາຍໆຄົນ ໃຫ້ຄວາມສົນໃຈ ແລະຖຽງກັນຢ່າງຫຼວງຫຼາຍຢູ່ເນື່ອງຈາກວ່າ ອີງຕາມກົດໝາຍການປະກັນໄພ ຂອງລາວເອງແລ້ວກໍບໍ່ມີມາດຕາ ໃດທີ່ລະບຸ ຫຼື ອະທິບາຍກ່ຽວກັບປະກັນດັ່ງກ່າວນີ້ເລີຍ ຍິ່ງໄປກວ່າ ນັ້ນປະເດັນດັ່ງກ່າວນີ້ຍັງຖືວ່າ ເປັນປະເດັນທີ່ບໍ່ໄດ້ຖືກຮັບຮອງ ຫຼື ບໍ່ໄດ້ເຮັດຂຶ້ນຢ່າງເປັນເອກະພາບກັນໃນລະຫວ່າງແຕ່ລະບໍລິສັດປະ ກັນໄພ ຫຼື ແຕ່ລະຜູ້ຮັບປະກັນໄພເອງອີກດ້ວຍ ຊຶ່ງຜູ້ຮັບປະກັນໄພ ບາງບໍລິສັດກໍຄຸ້ມຄອງໃນກໍລະນີທີ່ເກີດອຸບັດເຫດແຕ່ໃບຂັບຂີ່ຂອງຜູ້ ຂັບຂີ່ຍານພາຫະນະນັ້ນໄດ້ໝົດອາຍຸລົງແຕ່ບາງບໍລິສັດກັບປະຕິເສດຄວາມຮັບຜິດຊອບດັ່ງກ່າວ ຊຶ່ງນີ້ ກໍແມ່ນບັນຫາຍ້ອນວ່າລະບຽບການກ່ຽວກັບການປະກັນໄພຂອງ ແຕ່ລະບໍລິສັດຄວນຈະມີລະບຽບການທີ່ຄືກັນ ແລະຕ້ອງຖືກຕ້ອງ ແລະສອດຄ່ອງກັບຫຼັກກົດໝາຍ ໂດຍສະເພາະກໍແມ່ນກົດໝາຍການປະກັນໄພເອງ ແລະກົດໝາຍການຈະລາຈອນທາງບົກອີກດ້ວຍ ດັ່ງນັ້ນໃນມື້ນີ້ຜູ້ຂຽນຈິ່ງຂໍຍົກເອົາກໍລະນີຂອງກົດໝາຍຕ່າງປະເທດມາໃຫ້ທ່ານຜູ້ອ່ານໄດ້ເຂົ້າໃຈເພີ່ມເຕີມກ່ຽວກັບປະເດັນດັ່ງກ່າວນີ້ ຕື່ມໃນຕ່າງປະເທດສຳລັບກໍລະນີດັ່ງກ່າວນີ້ແມ່ນຖືວ່າບໍລິສັດ ຫຼື ຜູ້ຮັບປະກັນໄພຈະຄຸ້ມຄອງ ຫຼື ເວົ້າ ອີກຢ່າງໜຶ່ງກໍຄືວ່າບໍລິສັດຈະເປັນ ຜູ້ຮັບຜິດຊອບຕໍ່ຄວາມເສຍຫາຍທີ່ເກີດຂຶ້ນຈາກອຸບັດເຫດໃນກໍລະນີ ທີ່ຜູ້ຊື້ປະກັນໄພມີໃບຂັບຂີ່ທີ່ໝົດ ອາຍຸແລ້ວ ໂດຍທີ່ໃຊ້ເຫດຜົນວ່າ ຫາກຜູ້ທີ່ຊື້ປະກັນໄພມີໃບຂັບຂີ່ປະເພດດຽວກັນກັບຍານພາຫະນະທີ່ ຂັບຂີ່ຢູ່ນັ້ນກໍຖືວ່າຜູ້ຊື້ປະກັນໄພຮູ້ເຖິງກົດລະບຽບການສັນຈອນ ຕາມທ້ອງຖະໜົນ ແລະມີຄວາມສາມາດຂັບຂີ່ຍານພາຫະນະດັ່ງກ່າວ ຊຶ່ງຖືກຮັບຮອງຈາກພາກສ່ວນທີ່ກ່ຽວຂ້ອງຢ່າງຖືກຕ້ອງຕາມກົດໝາຍ ດັ່ງນັ້ນ ຫາກໃບຂັບຂີ່ໝົດອາຍຸກໍບໍ່ໄດ້ໝາຍຄວາມ ວ່າຜູ້ຂັບຂີ່ຈະຕ້ອງລືມ ຫຼື ບໍ່ຮູ້ກົດລະບຽບຂອງການສັນຈອນແຕ່ ຢ່າງໃດພຽງແຕ່ຜູ ູ້ຊື້ປະກັນໄພທີ່ມີ ໃບຂັບຂີ່ທີ່ໝົດອາຍຸນັ້ນກໍຕ້ອງໄປຕໍ່ອາຍຸຂອງໃບຂັບຂີ່ຕາມລະບຽບການຕາມກຳນົດເວລາ ດັ່ງນັ້ນ ຈິ່ງເປັນຫຼັກໃຫ້ແກ່ຜູ້ຮັບປະກັນໄພ ຫຼື ບໍລິສັດປະກັນໄພແຕ່ລະບໍລິສັດຈະຕ້ອງກຳນົດໃຫ້ຕ້ອງມີ ຄວາມຄຸ້ມຄອງ ຫຼື ຄວາມຮັບຜິດ ຊອບໃນກໍລະນີທີ່ມີຄວາມເສຍຫາຍໃນອຸບັດເຫດທີ່ເກີດຂຶ້ນ.
ເຖິງຢ່າງໃດກໍຕາມ ເຖິງແມ່ນ ວ່າຢູ່ຕ່າງປະເທດຈະລະບຸໃຫ້ກໍລະນີດັ່ງກ່າວນີ້ ບໍລິສັດປະກັນໄພຕ້ອງມີຄວາມຮັບຜິດຊອບຕໍ່ຄວາມເສຍຫາຍທີ່ເກີດຂຶ້ນຈາກອຸບັດເຫດກໍ ຕາມແຕ່ຕາມກົດໝາຍລາວເອງກໍບໍ່ໄດ້ລະບຸບັນຫາດັ່ງກ່າວນີ້ໄວ້ແຕ່ຢ່າງໃດ ຊຶ່ງຫາກເກີດຂໍ້ຂັດແຍ່ງເກີດຂຶ້ນກໍຕ້ອງແມ່ນພາກສ່ວນທີ່ກ່ຽວຂ້ອງ ຫຼື ສານເປັນຜູ້ເຮັດໜ້າທີ່ພິຈາລະນາວ່າໃຜ ຫຼື ຝ່າຍໃດຄວນຈະຮັບຜິດຊອບໃນກໍລະນີດັ່ງກ່າວນີ້ແທ້.
ດັ່ງນັ້ນ ສິ່ງທີ່ສຳຄັນ ແລະຈຳເປັນທີ່ສຸດສຳລັບທັງສອງຝ່າຍ ນັ້ນກໍຄືຝ່າຍຜູ້ຮັບປະກັນ ຫຼື ບໍລິສັດປະກັນໄພ ແລະຜູ້ຊື້ປະກັນໄພ ຫຼື ຝ່າຍລູກຄ້າເອງກໍຕ້ອງໄດ້ບອກກ່າວຄວາມເປັນ, ເງື່ອນໄຂຕ່າງໆ ຫຼື ກໍລະນີການໄດ້ສິດ, ກໍລະນີການເສຍສິດຮຽກຮ້ອງຕ່າງໆທີ່ກ່ຽວ ກັບການປະກັນໄພນັ້ນໃຫ້ແກ່ອີກຝ່າຍໜຶ່ງຮັບຮູ້ກ່ອນການຕັດສິນໃຈເຮັດສັນຍາປະກັນໄພນຳກັນ ຈິ່ງຈະບໍ່ມີບັນຫາ ຫຼື ຂໍ້ຂັດແຍ່ງ ເກີດຂຶ້ນ.
ຂໍ້ມູນຈາກ: ເສດຖະກິດ-ສັງຄົມ