ສະບາຍດີຜູ້ອ່ານທຸກໆທ່ານມື້ນີ້ ເຮົາຈະມາລົງເລິກເຖິງກົດໝາຍວ່າດ້ວຍມູນມໍລະດົກ ແລະການສືບມູນມໍລະດົກ ຊຶ່ງກົດໝາຍດັ່ງກ່າວນີ້ແມ່ນເປັນກົດໝາຍທີ່ຄຸ້ມ ຄອງກ່ຽວກັບການແບ່ງປັນຊັບ ສິນ, ສິນສົມສ້າງ, ຊັບເດີມ ແລະອື່ນໆໃຫ້ແກ່ຜູ້ທີ່ມີສິດສືບທອດມູນມໍລະດົກພາຍຫຼັງທີ່ເຈົ້າມູນໄດ້ເສຍຊີວິດ ຫຼື ເວົ້າອີກຢ່າງໜຶ່ງກໍຄືວ່າພາຍຫຼັງທີ່ເຈົ້າຂອງຊັບສິນນັ້ນໄດ້ເສຍຊີວິດລົງໄປ.
ຕາມປົກກະຕິແລ້ວຜູ້ທີ່ມີສິດ ສືບທອດມູນມໍລະດົກກໍແມ່ນຜົວ ຫຼື ເມຍຝ່າຍທີ່ຍັງມີຊີວິດຢູ່ ແລະບັນດາລູກ (ລູກຄີງ, ລູກລ້ຽງ ແລະລູກນ້າ) ແຕ່ໃນບົດນີ້ຜູ້ຂຽນ ຈະຍັງບໍ່ທັນໄດ້ລົງເລິກ ຫຼື ຈຳແນກສິດຂອງການໄດ້ຮັບມູນມໍລະດົກ ຂອງລູກແຕ່ລະປະເພດເທື່ອ ຊຶ່ງບົດນີ້ພຽງແຕ່ຈະກ່າວເຖິງບັນດາລູກຄີງ ແລະຜົວ ຫຼື ເມຍຝ່າຍທີ່ຍັງ ມີຊີວິດຢູ່ກ່ຽວກັບສິດທີ່ໄດ້ຮັບໃນ ການສືບທອດມູນມໍລະດົກວ່າຈະແບ່ງກັນຄືແນວໃດຕາມກົດໝາຍ.
ຕົວຢ່າງ: ຫາກວ່າທ້າວ ກ ກ່ອນແຕ່ງງານກັບນາງ ຂ ທ້າວ ກ ມີລົດກະບະໜຶ່ງຄັນພ້ອມທັງເງິນຈຳນວນຊາວລ້ານກີບ ສ່ວນນາງ ຂ ເອງກ່ອນການແຕ່ງດອງກັບ ທ້າວ ກ ນາງ ຂ ກໍມີຊັບສິນ ຫຼື ເອີ້ນໃນຊື່ທາງດ້ານຂອງກົດໝາຍ ກໍຄືຊັບເດີມຄື: ລົດເກງໜຶ່ງຄັນ ແລະເງິນຈຳນວນສາມສິບລ້ານກີບ ພາຍຫຼັງທີ່ທັງສອງຄົນນີ້ໄດ້ ແຕ່ງງານກັນໄດ້ປະມານສິບປີແລ້ວທັງສອງມີລູກຊາຍສອງຄົນອາຍຸ ແປດປີ ແລະຫົກປີຫຼັງຈາກນັ້ນ ທ້າວ ກ ເກີດການປ່ວຍໂຊ ແລະ ສຸດທ້າຍທ້າວ ກ ກໍ່ໄດ້ເສຍຊີວິດລົງ ຊຶ່ງໃນຊ່ວງໄລຍະເວລາທີ່ທັງ ສອງຄົນນີ້ແຕ່ງດອງ ຫຼື ເປັນຜົວ ເມຍກັນນັ້ນທັງສອງມີສິນສົມສ້າງນຳກັນຄື: ເຮືອນສອງຫຼັງ, ດິນເປົ່າຫວ່າງສອງຕອນລົດຟໍຈູນເນີ ສອງຄັນ ແລະເງິນອີກຈຳນວນສອງຮ້ອຍລ້ານກີບ ແລະທ້າວ ກ ເອງກ່ອນຈະເສຍຊີວິດກໍບໍ່ໄດ້ ຂຽນພິໄນກຳຍົກຊັບ ຫຼື ມອບຊັບໃຫ້ແກ່ບຸກຄົນໃດດັ່ງນັ້ນໃນທາງກົດໝາຍແລ້ວໃນກໍລະນີດັ່ງກ່າວ ນີ້ຈະແບ່ງສິນທັງໝົດນີ້ແນວໃດ? ແລະຈະແບ່ງໃຫ້ບຸກຄົນໃດແດ່?
ອີງຕາມມາດຕາ 12 ຂອງກົດ ໝາຍວ່າດ້ວຍການສືບທອດມູນມໍ ລະດົກຄື: ການແບ່ງປັນມູນມໍລະດົກລະຫວ່າງຜົວ ຫຼື ເມຍທີ່ຍັງມີຊີ ວິດຢູ່ ແລະລູກທີ່ໄດ້ລະບຸໄວ້ວ່າ ໃນກໍລະນີທີ່ຜົວ ຫຼື ເມຍຫາກໄດ້ ເສຍຊີວິດໄປໂດຍໄດ້ປະເມຍ ຫຼື ຜົວ ແລະລູກໄວ້ກໍແມ່ນລູກເປັນຜູ້ມີສິດຮັບມູນມໍລະດົກທີ່ເປັນຊັບເດີມຂອງຜູ້ທີ່ເສຍຊີວິດສາມສ່ວນສີ່ ແລະອີກໜຶ່ງສ່ວນສີ່ແມ່ນເມຍ ຫຼື ຜົວທີ່ຍັງມີຊີວິດຢູ່ເປັນຜູ້ຮັບສ່ວນສິນສົມສ້າງນັ້ນແມ່ນໃຫ້ແບ່ງ ປັນເຄິ່ງຄື: ເຄິ່ງໜຶ່ງໃຫ້ເມຍ ຫຼື ຜົວ ທີ່ຍັງມີຊີວິດຢູ່ ແລະອີກເຄິ່ງໜຶ່ງ ນັ້ນແມ່ນໃຫ້ແບ່ງປັນແກ່ພວກລູກເປັນພູດສະເໝີກັນ ຊຶ່ງເມຍ ຫຼື ຜົວ ທີ່ຍັງມີຊີວິດຢູ່ນັ້ນມີສິດຄຸ້ມຄອງຊັບທີ່ຕົກທອດເປັນຂອງລູກທີ່ຍັງບໍ່ທັນເຖິງກະສຽນອາຍຸ.
ເມື່ອເຮົາເອົາມາດຕານີ້ຂອງກົດໝາຍວ່າດ້ວຍການສືບທອດມູນມໍລະດົກມາພິຈາລະນາກັບຕົວຢ່າງຂອງທ້າວ ກ ທີ່ຍົກຂຶ້ນມາກໍ ສາມາດແບ່ງປັນຊັບສິນ ຫຼື ມູນມໍລະດົກໄດ້ດັ່ງນີ້ຄື: ກ່ຽວກັບຊັບສິນ ເດີມ ຫຼື ຊັບເດີມຂອງທ້າວ ກ ມີຄື: ລົດກະບະໜຶ່ງຄັນ ແລະເງິນຊາວລ້ານກີບ ໃນນັ້ນຜູ້ເປັນເມຍຈະໄດ້ ເງິນຈຳນວນຫ້າລ້ານກີບ ນັ້ນກໍເທົ່າກັບໜຶ່ງສ່ວນສີ່ຂອງຊາວລ້ານ ກີບ ສ່ວນເງິນທີ່ຍັງເຫຼືອສິບຫ້າລ້ານກີບ ແມ່ນມອບໃຫ້ລູກທັງສອງຄົນແບ່ງປັນຄົນລະເຄິ່ງ ນອກຈາກນີ້ລົດກະບະກໍຕ້ອງປະເມີນມູນຄ່າເປັນເງິນວ່າລາຄາເທົ່າໃດແລ້ວຈິ່ງແບ່ງໃຫ້ເມຍໜຶ່ງສ່ວນສີ່ ຂອງຈຳນວນທີ່ປະເມີນໄດ້ນັ້ນ ສ່ວນທີ່ຍັງເຫຼືອສາມສ່ວນແມ່ນຕົກ ເປັນພູດຂອງລູກທັງສອງຄົນ.
ນອກຈາກການໄດ້ຮັບຊັບເດີມ ຂອງຜູ້ທີ່ເສຍຊີວິດແລ້ວຍັງຕ້ອງມາເບິ່ງສິນສົມສ້າງທີ່ ທ້າວ ກ ແລະນາງ ຂ ໄດ້ຮ່ວມກັນສ້າງສາມາວ່າມີຈຳນວນເທົ່າໃດຄື: ເຮືອນສອງຫຼັງ, ດິນເປົ່າຫວ່າງສອງຕອນ, ລົດຟໍຈູນເນີສອງຄັນ ແລະເງິນອີກຈຳນວນສອງຮ້ອຍລ້ານກີບ ໃນກໍລະນີກົດໝາຍໄດ້ລະບຸວ່າຈະຕ້ອງແບ່ງສິນສົມສ້າງໃຫ້ ນາງ ຂ ເຄິ່ງໜຶ່ງຂອງຈຳນວນສິນສົມສ້າງທັງໝົດຄື: ນາງ ຂ ຈະໄດ້ເຮືອນໜຶ່ງຫຼັງດິນເປົ່າຫວ່າງໜຶງຕອນລົດຟໍຈູນເນີໜຶ່ງຄັນ ແລະເງິນຈຳນວນໜຶ່ງຮ້ອຍລ້ານກີບ ສ່ວນອີກເຄິ່ງໜຶ່ງຂອງສິນສົມສ້າງທັງໝົດນັ້ນແມ່ນຕົກເປັນພູດຂອງລູກທັງສອງຄົນ.
ໃນກໍລະນີຂອງຄອບຄົວທ້າວ ກ ແລະນາງ ຂ ນີ້ແມ່ນມີລູກສອງຄົນທີ່ຍັງບໍ່ທັນເຖິງກະສຽນອາຍຸ ຫຼື ໝາຍຄວາມວ່າລູກອາຍຸຍັງບໍ່ ຮອດສິບແປດປີດັ່ງນັ້ນເຖິງວ່າມູນມໍລະດົກທັງໝົດດັ່ງກ່າວຈະຖືກ ແບ່ງປັນໃຫ້ແກ່ ນາງ ຂ ແລະ ພວກລູກຢ່າງຄັກແນ່ແລ້ວກໍຕາມ ແຕ່ນາງ ຂ ກໍຍັງມີສິດຄຸ້ມຄອງຊັບສິນສ່ວນທີ່ຕົກເປັນຂອງລູກດັ່ງກ່າວນັ້ນຕໍ່ໄປຈົນກວ່າພວກລູກນັ້ນຈະ ເຖິງກະສຽນອາຍຸສິບແປດປີ.
ນີ້ແມ່ນຕົວຢ່າງຂອງການແບ່ງປັນມູນມໍລະດົກລະຫວ່າງຜົວ ຫຼື ເມຍທີ່ຍັງມີຊີວິດຢູ່ ແລະລູກແລ້ວບົດຕໍ່ໆໄປຜູ້ຂຽນຈະໄດ້ນຳເອົາບັນຫາອື່ນທີ່ກ່ຽວກັບການແບ່ງປັນມູນມໍລະດົກນີ້ມາຕື່ມເພື່ອໃຫ້ພວກ ທ່ານໄດ້ເຂົ້າໃຈເລິກເຊິ່ງກ່ຽວກັບກົດໝາຍດັ່ງກ່າວນີ້.
ຂໍ້ມູນຈາກ: ເສດຖະກິດ-ສັງຄົມ