ໂຄງການ​ກໍ່ສ້າງ​ອາຄານ​ຫໍພັກ​ນັກ​ສຶກ​ສາ​ຫຼັງ​ໃໝ່ ຈຳນວນ 3 ຫຼັງ​ຂອງ​ວິທະຍາໄລ​ເຕັກນິກ ລາວ-ເຢຍ​ລະ​ມັນ ແມ່ນ​ໄດ້​ຮັບ​ການສະໜັບສະໜູນ​ຈາກ​ລັດຖະບານເຢຍ​ລະ​ມັນ ເປັນ​ຈຳນວນ​ເງິນ 3,8 ລ້ານ​ເອີ​ໂຣ ແລະ ການ​ປະກອບ​ສ່ວນ​ຂອງ​ລັດຖະບານ​ລາວ ປະມານ 20% ເຊິ່ງ​ຫໍ​ພັກ​ຫຼັງ​ໃໝ່ນີ້ ຈະ​ສາມາດ​ຮອງ​ຮັບ​ນັກ​ສຶກ​ສາໄດ້​ປະມານ 200 ຄົນ ແລະ ມີແຜນການ​ທີ່​ຈະ​ຂະຫຍາຍ​ເພີ່ມ​ໃນຕໍ່ໜ້າ ໃນ​ໄລຍະ​ທີ່​ຜ່ານ​ມາ​ທາງໂຄງການ​ຮ່ວມ​ມື ລາວ-ເຢຍ​ລະມັນ ກໍ່​ໄດ້​ມີ​ພິທີ​ເປີດ ແລະ ມອບຮັບ​ສອງ​ອາຄານ​ໂຮງ​ຊ່າງ​ໃໝ່ ພ້ອມ​ອຸປະກອນ​ທີ່​ທັນ​ສະໄໝ​ສຳລັບ​ພາກ​ວິຊາ​ໄຟຟ້າ ແລະ ລົດຍົນ.

ໂຄງການ​ນີ້​ມີ​ຄວາມ​ໝາຍຄວາມ​ສຳຄັນ​ຍິ່ງ ​ຕໍ່​ການ​ພັດ​ທະນາ​ວຽກ​ງານ​ອາຊີວະ​ສຶກ​ສາ ແລະ ເຝີກ​ອົບຮົມ​ວິຊາ​ຊີບ ເວົ້າລວມ ເວົ້າ​ສະເພາະ ກໍ່​ແມ່ນ​ວິ​ທະຍາ​ໄລ​ເຕັກນິກ ລາວ-ເຢຍ​ລະ​ມັນ ທີ່​ຖື​ວ່າ​ເປັນ​ເອກະລັກ​ຂອງ​ການຮ່ວມ​ມື​ລະຫວ່າງ​ລັດຖະບານ​ສອງຝ່າຍ ​ພ້ອມ​ທັງ​ສະຖານ​ອາຊີວະສຶກ​ສາ ທີ່​ເປັນ​ແກນ​ຫຼັກ​ໃນ​ການ​ກໍ່ສ້າງ​ກຳລັງ​ແຮງ​ງານ​ດ້ານ​ເຕັກນິກ ​ໃນ​ສາຂາ​ອາຊີບ ແລະ ລະດັບຕ່າງໆ ​ທີ່​ພຽບ​ພ້ອມ​ໄປ​ດ້ວຍຄວາມ​ຮູ້ ມີ​ທັກ​ສະສີ​ມື ແລະ ຄຸນສົມບັດ ເພື່ອ​ສະໜອງ​ໃຫ້​ແກ່​ຕະຫຼາດ​ແຮງ​ງານ ແລະ ການ​ພັດທະ​ນາ​ເສດຖະກິດ-ສັງຄົມ​ຂອງປະເທດ.

ພິທີ​ມອບ-ຮັບ​ອາຄານ​ຫຼັງ​ດັ່ງກ່າວ ຈັດ​ຂຶ້ນ​ວັນ​ທີ 26 ເມສາ 2016 ຢູ່​ວິທະຍາໄລ​ເຕັກນິກ​ລາວ-ເຢຍ​ລະ​ມັນ ນະຄອນຫຼວງ​ວຽງຈັນ ເຂົ້າ​ຮ່ວມ​ໃນ​ພິທີ​ມີ​ທ່ານ ​ຮສ.​ດຣ. ສົມ​ອົກ ກິ່ງ​ສະ​ດາ ຮອງລັດຖະມົນຕີ​ກະຊວງ​ສາ​ທາ​ລະນະ​ສຸກ ປະທານ​ສະມາຄົມ​ມິດ​ຕະພາບ​ລາວ-ເຢຍ​ລະ​ມັນ ທ່ານ Grau ເອກ​ອັກ​ຄະ​ລັດ​ຖະ​ທູດ​ເຢຍລະ​ມັນ ປະຈຳ​ລາວ ທ່ານ ບົວລານ ສີ​ລິ​ປັນຍາ ຮອງ​ລັດ​ຖະ​ມົນຕີ​ກະຊວງ​ສຶກ​ສາ​ທິ​ການ ແລະ ກີລາ ທ່ານ ສົມ​ລິດ ວິ​ຣິ​ວົງ ຜູ້​ອຳນວຍ​ການ​ວິທະຍາໄລ​ເຕັກນິກ ລາວ-ເຢຍ​ລະ​ມັນ ພ້ອມ​ດ້ວຍ​ນັກສຶກ​ສາ ແລະ ແຂກ​ທີ່​ຖືກ​ເຊີນ​ເຂົ້າຮ່ວມ.

ແຫລ່ງຂ່າວ:

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!