ກອງ​ປະຊຸມ​ຄັ້ງ​ທີ 2 ຄະນະ​ຊີ້​ນຳ​ລະດັບ​ຊາດ ສຳລັບ​ການ​ສຳ​ຫຼວດ​ພົນລະເມືອງ ແລະ ທີ່ຢູ່​ອາໄສ​ຄັ້ງ​ທີ IV ປີ 2015 ທີ່​ໄດ້​ເຊີນ​ເອົາ​ຄະນະ​ຊີ້​ນຳ​ທັງ​ໝົດ ມາ​ປຶກສາ​ຫາລື ແລະ ແລກປ່ຽນ​ຄວາມ​ຄິດ​ເຫັນ ເພື່ອ​ເຮັດ​ແນວໃດ​ໃຫ້​ການຈັດຕັ້ງ​ປະຕິບັດ​ການ​ສຳ​ຫຼວດ​ຄັ້ງ​ນີ້ ສາມາດ​ດຳເນີນ ແລະ ສຳເລັດ​ຕາມ​ວັດຖຸ​ປະສົງ​ຕາມ​ແຜນການ​ທີ່​ວາງ​ໄວ້ ຂະນະ​ທີ່​ທ່ານ ສົມ​ສະຫວາດ ເລັ່ງ​ສະ​ຫວັດ ຮອງ​ນາຍົກລັດຖະມົນຕີ ຫົວໜ້າ​ຄະນະ​ຊີ້​ນຳ​ລະດັບ​ຊາດ ສຳລັບ​ການ​ສຳ​ຫຼວດ​ພົນລະເມືອງ ແລະ ທີ່ຢູ່​ອາໄສ​ຄັ້ງ​ທີ IV ປີ 2015 ເນັ້ນ​ຫາລື 4 ບັນຫາ ໃນ​ນັ້ນ ລວມ​ທັງ​ບັນຫາ​ດ້ານ​ງົບປະມານ​ທີ່​ຍັງ​ບໍ່​ພຽງພໍ 3,1 ລ້ານ​ໂດ​ລາ​ສະຫະລັດ ຫຼື 24 ຕື້​ກວ່າ​ກີບ ໃນ​ຈຳນວນ​ທັງ​ໝົດ 7,2 ລ້ານ​ໂດ​ລາ​ສະຫະລັດ ຫຼື ປະມານ 57,6 ຕື້​ກີບ.

ທ່ານ ສົມ​ສະຫວາດ ເລັ່ງ​ສະ​ຫວັດ ກ່າວ​ວ່າ: ການ​ສຳ​ຫຼວດ​ພົນລະເມືອງ ແລະ ທີ່ຢູ່​ອາໄສ​ແມ່ນ​ການ​ສຳ​ຫຼວດ​ໜຶ່ງ​ທີ່​ມີ​ຄວາມ​ສຳຄັນ ແລະ ຈຳເປັນ​ຕ້ອງ​ໄດ້​ຈັດ​ຕັ້ງ​ປະຕິບັດ​ສຳລັບ​ປະເທດ​ໜຶ່ງໆ ຍ້ອນ​ເຫັນ​ໄດ້​ຄວາມ​ສຳຄັນ​ດັ່ງກ່າວ ລັດຖະບານ​ຈຶ່ງ​ມີ​ຄວາມ​ມຸ້ງ​ໝັ້ນ​ທີ່​ຈະ​ສືບຕໍ່ ຈັດ​ຕັ້ງ​ປະຕິບັດ​ການ​ສຳ​ຫຼວດ​ຄັ້ງ​ຕໍ່​ໄປ ໃນ​ປີ 2015 ແລະ ໄດ້​ອະນຸມັດ​ໃຫ້​ຈັດ​ຕັ້ງ​ສຳ​ຫຼວດ​ຄັ້ງ​ນີ້ ຕາມ​ຂໍ້​ຕົກລົງ​ສະບັບ​ເລກ​ທີ 89/​ນຍ ລົງ​ວັນ​ທີ 11 ກັນຍາ 2013 ເຊິ່ງ​ຜົນ​ໄດ້​ຮັບ​ຈາກ​ການ​ສຳ​ຫຼວດ​ຄັ້ງ​ນີ້ ຈະ​ເປັນ​ບ່ອນ​ອີງ​ອັນ​ໜັກ​ແໜ້ນ​ໃຫ້​ແກ່​ລັດຖະບານ ໃນ​ການ​ຕິດຕາມ ແລະ ປະ​ເມີນ​ຄວາມ​ຄືບ​ໜ້າ ການຈັດຕັ້ງ​ປະຕິບັດ​ເປົ້າ​ໝາຍ​ສະຫັດ​ສະ​ວັດ​ແຫ່ງ​ການ​ພັດທະນາ ການ​ຕີ​ລາຄາ​ການຈັດຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ ຄັ້ງ​ທີ 7 ແລະ ເພື່ອ​ເປັນ​ບ່ອນ​ອີງ​ໃຫ້​ແກ່​ການ​ສ້າງ​ແຜນ​ພັດທະນາ​ເສດຖະກິດ-ສັງຄົມ ຄັ້ງ​ທີ VIII (2016-2020) ໂດຍ​ສະເພາະ ເພື່ອ​ເປັນ​ແຫຼ່ງ​ຂໍ້​ມູນ​ທີ່​ສຳຄັນ​ໃນ​ປະເທດ ສຳລັບ​ການ​ວາງ​ແຜນການ​ຕິດຕາມ ການ​ຕັດສິນ​ໃຈ ການ​ສ້າງ​ນະໂຍບາຍ ແລະ ການ​ຄົ້ນຄວ້າ​ກ່ຽວ​ກັບ​ປະຊາກອນ ການ​ດຳເນີນ​ທຸລະ​ກິດ ການ​ຕະຫຼາດ ການ​ພັດທະນາ​ກຳລັງ​ແຮງ​ງານ ແລະ ຈະ​ເປັນ​ພື້ນຖານ​ອັນ​ສຳຄັນ ໃຫ້​ແກ່​ການ​ກະກຽມ​ເຂົ້າ​ປະຊາ​ຄົມ​ເສດຖະກິດ​ອາ​ຊຽນ ໃນ​ປີ 2015 ແລະ ການ​ຫຼຸດ​ພົ້ນ​ອອກ​ຈາກ​ປະເທດ​ດ້ອຍ​ພັດທະນາ​ໃນ​ປີ 2020.

ປັດຈຸບັນ​ການ​ກະກຽມ​ຄວາມ​ພ້ອມ​ໃນ​ການ​ສຳ​ຫຼວດ ໂດຍ​ສະເພາະ​ໂຄງ​ປະກອບ​ການຈັດຕັ້ງ​ຍັງ​ບໍ່​ທັນ​ສຳເລັດ ເຊິ່ງ​ຈະ​ຕ້ອງ​ໄດ້​ສືບຕໍ່​ຢ່າງ​ຮີບ​ດ່ວນ ທັງ​ຢູ່​ໃນ​ຂັ້ນ​ກະຊວງ-ທ້ອງຖິ່ນ ດ້ານ​ງົບປະມານ​ກໍ່​ເຊັ່ນ​ດຽວ​ກັນ ຢ່າງໃດ​ກໍ່​ຕາມ ບົນ​ພື້ນຖານ​ຄວາມ​ເປັນ​ຈິງ​ພວກ​ເຮົາ ຍັງ​ມີ​ບັນຫາ​ທີ່​ເປັນ​ສິ່ງ​ທ້າ​ທາຍ​ຢູ່ ດັ່ງນັ້ນ ກອງ​ປະຊຸມ​ຄັ້ງ​ນີ້​ເນັ້ນ​ໃສ່ 4 ບັນຫາ ເຊັ່ນ: ຄົ້ນຄວ້າ ແລະ ປະກອບ​ຄຳ​ເຫັນ​ໃສ່​ບົດ​ແນະນຳ ການຈັດຕັ້ງ​ປະຕິບັດ​ການ​ສຳ​ຫຼວດ​ສຳລັບ​ກະຊວງ​ທີ່​ກ່ຽວຂ້ອງ ໃນ​ນັ້ນ ລົງ​ເລິກ​ບັນດາ​ເປົ້າ​ໝາຍ​ການ​ສຳ​ຫຼວດ ການ​ປະກອບ​ບຸກ​ຄະລາ​ກອນ ແລະ ງົບປະມານ ການ​ແບ່ງ​ໜ້າທີ່​ຄວາມ​ຮັບຜິດຊອບ​ຂອງ​ຄະນະ​ນຳ​ຂັ້ນ​ສູນ​ກາງ ຕ້ອງ​ແທດເໝາະ​ກັບ​ໜ້າທີ່-ພາລະ​ບົດບາດ ເພື່ອ​ຮັບປະກັນ​ປະສິດທິພາບ​ໃນ​ການ​ດຳເນີນ​ການ​ສຳ​ຫຼວດ ພ້ອມ​ຄົ້ນຄວ້າ​ຊອກ​ຫາ​ວິທີ​ການ ແລະ ຊ່ອງ​ທາງ​ໃນ​ການ​ລະດົມ​ທຶນ ປະກອບສ່ວນ​ເຂົ້າ​ໃນ​ການຈັດຕັ້ງ​ປະຕິບັດ​ການ​ສຳ​ຫຼວດ ແລະ ມີ​ຄຳ​ເຫັນ​ໃນ​ການຈັດຕັ້ງ​ປະຕິບັດ​ການ​ສຳ​ຫຼວດ ໂດຍ​ສະເພາະ​ແມ່ນ​ແຜນການ​ໂຄສະນາ ແລະ ການ​ເຜີຍແຜ່​ການ​ສຳ​ຫຼວດ.

ກອງ​ປະຊຸມ​ດັ່ງກ່າວ ຈັດ​ຂຶ້ນ​ໃນ​ວັນ​ທີ 8 ພຶດສະພາ ທີ່​ຫ້ອງ​ວ່າການ​ລັດຖະບານ ໂດຍ​ການ​ເປັນ​ປະທານ​ຂອງ​ທ່ານ ສົມ​ສະຫວາດ ເລັ່ງ​ສະ​ຫວັດ ແລະ ມີ​ບັນດາ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທີ່ມາ http://www.vientianemai.net/teen/khao/1/11765