ເພື່ອເຮັດໃຫ້ ສປປ ລາວ ຫຼຸດພົ້ນອອກຈາກຄວາມດ້ອຍພັດທະນາ, ມີສະຖຽນລະພາບທາງດ້ານການເມືອງອັນໜັກແໜ້ນ, ມີຄວາມເປັນລະບຽບຮຽບຮ້ອຍດ້ານສັງຄົມ, ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງດ້ວຍຈັງຫວະວ່ອງໄວ, ທ່ານນາຍົກລັດຖະມົນຕີແຫ່ງ ສປປ ລາວ ຄົນໃໝ່ ໄດ້ວາງວິໄສທັດພັດທະນາຮອດປີ 2030 ໂດຍເຮັດໃຫ້ຈີດີພີຕໍ່ຫົວຄົນເພີ່ມຂຶ້ນກວ່າ 4 ເທົ່າ, ວາງຍຸດທະສາດການພັດທະນາເສດຖະກິດສັງຄົມໄລຍະ 10 ປີ (2016-2025) ໂດຍເຮັດໃຫ້ຈີດີພີຕໍ່ຫົວຄົນໃຫ້ເພີ່ມຂຶ້ນ 2 ເທົ່າຕົວ, ບັນລຸເປົ້າໝາຍສຳຄັນຕົ້ນຕໍ 17 ເປົ້າໝາຍ ແລະວາງແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ VIII (2016-2020) ໂດຍຊຸກຍູ້ການຂະຫຍາຍຕົວຂອງເສດຖະກິດຢ່າງຕໍ່ເນື່ອງ, ສົມດຸນ ແລະຍືນຍົງ, ເຮັດໃຫ້ຈີດີພີຂະຫຍາຍຕົວບໍ່ໃຫ້ຫຼຸດ 7,5% ຕໍ່ປີທັງນີ້ເພື່ອສ້າງພື້ນຖານເຮັດໃຫ້ລາວເຮົາກາຍເປັນປະເທດມີລາຍຮັບປານກາງສູງຕາມທິດເສດຖະກິດພູມປັນຍາສີຂຽວ ແລະຍືນຍົງ.
ໃນມື້ເປີດກອງປະຊຸມຄັ້ງປະຖົມມະລືືກຂອງສະພາແຫ່ງຊາດຊຸດທີ VIII ທ່ານ ທອງລຸນ ສີສຸລິດ ນາຍົກລັດ ຖະມົນ ຕີແຫ່ງ ສປປ ລາວ ລາຍງານໂດຍສັງ ເຂບກ່ຽວກັບວິໃສທັດຮອດປີ 2030, ຍຸດທະສາດການພັດທະນາເສດຖະກິດສັງຄົມໄລຍະ 10 ປີ (2016-2025) ແລະແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີVIII (2016-2020) ລະບຸວ່າ: ແຕ່ນີ້ຮອດປີ 2030 ຕ້ອງໄດ້ສ້າງບາດລ້ຽວໃໝ່ເພື່ອໃຫ້ລາວເຮົາເປັນປະເທດທີ່ມີລາຍຮັບປານກາງສູງຕາມທິດເສດຖະກິດພູມປັນຍາສີຂຽວ ແລະຍືນຍົງ, ໃຫ້ບັນລຸເປົ້າໝາຍແບບຍືນຍົງຂອງສະຫະປະຊາຊາດວາງອອກ, ເຮັດໃຫ້ຈີດີພີຕໍ່ຫົວຄົນເພີ່ມຂຶ້ນກວ່າ 4 ເທົ່າຖ້າທຽບໃສ່ປີ 2015, ອຸດສາຫະກຳ ເພີ່ມຂຶ້ນໃຫ້ເປັນ 2 ເທົ່າ, ມີໂຄງລ່າງພື້ນຖານເສດຖະກິດທີ່ເຂັ້ມແຂງເພື່ອຫັນເປັນອຸດສາຫະກຳ ແລະທັນສະໄໝຕໍ່ໄປ.
ສຳລັບຍຸດທະສາດຮອດປີ 2025 ຕ້ອງເຮັດໃຫ້ພື້ນຖານເສດຖະກິດສັງຄົມມີຄວາມໜັກແໜ້ນເຂັ້ມແຂງເພື່ອສ້າງວັດຖຸປັດໄຈໃຫ້ແກ່ການກ້າວຂຶ້ນເປັນປະເທດທີ່ມີລາຍຮັບປານກາງສູງຈີດີພີຕໍ່ຫົວຄົນໃຫ້ເພີ່ມຂຶ້ນ 2 ເທົ່າຕົວທຽບໃສ່ປີ 2015, ບັນລຸເປົ້າໝາຍສຳຄັນ ຕົ້ນຕໍ 17 ເປົ້າໝາຍ, ຫຼຸດຜ່ອນອັດຕາຄວາມທຸກຍາກຂອງປະຊາຊົນໃຫ້ຢູ່ໃນລະດັບບໍ່ເກີນ 5% ຂອງຈຳນວນປະຊາກອນທັງໝົດ, ການພັດທະນາແບບຍືນຍົງຂອງອົງການສະຫະປະຊາຊາດວາງອອກມີຊັບພະຍາກອນມະນຸດ ແລະກຳລັງແຮງງານທີ່ມີຄຸນນະພາບສູງສ້າງຄວາມສາມາດແຂ່ງຂັນໃນເງື່ອນໄຂໂລກາພິວັດແຫ່ງການເຊື່ອມໂຍງໃນພາກພື້ນ ແລະສາກົນ.
ສ່ວນແຜນພັດທະນາເສດຖະກິດສັງຄົມແຫ່ງຊາດຮອດປີ 2020 ນັ້ນແມ່ນຕ້ອງຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບ ແລະຄວາມເປັນລະບຽບຮຽບຮ້ອຍໃນສັງຄົມຢ່າງໜັກແໜ້ນ, ສືບຕໍ່ແກ້ໄຂຄວາມທຸກຍາກຂອງປະຊາຊົນໃຫ້ໄດ້ຢ່າງໜັກແໜ້ນ ແລະທົ່ວເຖິງ, ພັດທະນາປະເທດໃຫ້ຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020 ໂດຍຊຸກຍູ້ການຂະຫຍາຍຕົວຂອງເສດຖະກິດຢ່າງຕໍ່ເນື່ອງ, ສົມດຸນ ແລະຍືນຍົງ, ຈີດີພີ ຂະຫຍາຍຕົວບໍ່ໃຫ້ຫຼຸດ 7,5% ຕໍ່ປີ, ໃນນີ້ຂະແໜງກະສິກຳປ່າໄມ້ເພີ່ມຂຶ້ນສະເລ່ຍ 3,2%, ກວມເອົາປະມານ 19% ຂອງລວມຍອດມູນຄ່າຜະລິດຕະພັນພາຍໃນ, ໃນປີ 2020, ຂະແໜງອຸດສາຫະກຳເພີ່ມຂຶ້ນ 9,3%, ກວມເອົາປະມານ 32% ຂອງລວມຍອດມູນຄ່າຜະລິດຕະພັນພາຍໃນ ໃນປີ 2020, ຂະແໜງບໍລິການເພີ່ມຂຶ້ນ 8,9% ກວມເອົາປະມານ 41% ຂອງລວມຍອດມູນຄ່າຜະລິດຕະພັນພາຍ ໃນ, ໃນປີ 2020, ນອກນີ້ກໍໃຫ້ມີການຄຸ້ມຄອງ ແລະນຳໃຊ້ຊັບພະຍາກອນທຳມະຊາດຢ່າງມີປະສິດທິຜົນສູງ, ສ້າງໃຫ້ໄດ້ການຫັນປ່ຽນຮູບແບບການພັດທະນາຕາມທິດເສີມຂະຫຍາຍທ່າແຮງທີ່ບົ່ມຊ້ອນ ແລະຂໍ້ໄດ້ປຽບຂອງປະເທດ, ເຂົ້າຮ່ວມໃນການເຊື່ອມໂຍງກັບພາກພື້ນ ແລະສາກົນຢ່າງເປັນເຈົ້າການ.
ທ່ານນາຍົກລັດຖະມົນຕີກ່າວຕື່ມວ່າ: ຕໍ່ກັບທິດທາງໜ້າທີ່ລວມ ແລະຄາດໝາຍສູ້ຊົນຂອງແຜນພັດທະນາແຫ່ງຊາດຮອດປີ 2020 ທີ່ກ່າວມາຂ້າງເທິງນັ້ນຈະສາມາດບັນລຸໄດ້ໝາກຜົນ ຫຼື ເປົ້າໝາຍໃຫຍ່ 3 ປະການຄື: ເປົ້າໝາຍທີໜຶ່ງ: ເສດຖະກິດແຫ່ງຊາດມີການເຕີບໂຕຢ່າງຕໍ່ເນື່ອງ, ໝັ້ນທ່ຽງ ແລະສົມດຸນ, ເປົ້າໝາຍທີສອງ: ຊັບພະຍາກອນມະນຸດ ແລະລະ ດັບຄວາມສາມາດຂອງລັດຖະກອນ ແລະກຳລັງແຮງງານທົ່ວໄປໄດ້ຮັບການພັດທະນາ, ຄວາມທຸກຍາກຂອງປະຊາຊົນບັນດາເຜົ່າໄດ້ຮັບການແກ້ໄຂຢ່າງທົ່ວເຖິງ, ທຸກຊົນເຜົ່າ ແລະເພດໄວສາມາດເຂົ້າເຖິງການສຶກສາ ແລະການບໍລິການສາທາລະນະສຸກໄດ້ຢ່າງທົ່ວເຖິງ ແລະມີຄຸນນະພາບ, ສົ່ງເສີມການປົກປັກຮັກສາ ແລະພັດທະນາເອກະລັກວັດທະນະທຳອັນດີງາມຂອງຊາດ, ເປົ້າໝາຍສຸດທ້າຍ: ຊັບພະຍາກອນທຳມະຊາດ ແລະ ສິ່ງແວດລ້ອມໄດ້ຮັບການປົກປັກຮັກສາ ແລະນຳໃຊ້ຢ່າງມີປະສິດທິຜົນຕາມທິດສີຂຽວ ແລະຍືນຍົງ, ກຽມພ້ອມຮັບມືກັບໄພພິບັດທາງທຳມະຊາດ ແລະການປ່ຽນແປງດິນຟ້າອາກາດຢ່າງມີປະສິດທິພາບ.
ທີ່ມາ:
ຕິດຕາມຂ່າວເສດຖະກິດ-ສັງຄົມລາວ ກົດໄລຄ໌ເລີຍ!