ທ່ານ ທອງສິງ ທໍາມະວົງ ນາຍົກລັດຖະມົນຕີ, ໄດ້ລາຍງານການເຄື່ອນໄຫວຂອງລັດຖະບານໃນການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມ 5 ປີຄັ້ງທີ VII (2011-2015) ຕໍ່ກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ VIII ໃນຕອນເຊົ້າວັນທີ 20 ເມສານີ້ວ່າ: ຕະຫລອດໄລຍະ5 ປີຜ່ານມາ, ເຖິງວ່າສະພາບແວດລ້ອມຂອງສາກົນ, ພາກພື້ນ ແລະ ພາຍໃນປະເທດມີທັງຂໍ້ສະດວກ, ກາລະໂອກາດ, ຂໍ້ຫຍຸ້ງຍາກ ແລະ ສິ່ງທ້າທາຍທົດສອບຕ່າງໆກໍຕາມ,ແຕ່ລັດຖະບານຊູດທີ 7 ໄດ້ຕັ້ງໜ້າປະຕິບັດພາລະບົດບາດ, ໜ້າທີ່ ແລະ ສິດຂອງຕົນໃນການບໍລິຫານປະເທດດ້ວຍຄວາມຮັບພິຊອບສູງ,ຊຶ່ງສາມາດສ້າງຜົນງານອັນສໍາຄັນຫລາຍດ້ານຄື: (1) ສາມາດປົກປັກຮັກສາເອກະລາດ,ອໍານາດອະທິປະໄຕ ແລະ ຜືນແຜນດິນອັນຄົບຖ້ວນຂອງຊາດໄວ້ໄດ້ຢ່າງໝັ້ນຄົງ, ປະເທດຊາດສືບຕໍ່ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະ ຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ.(2)ລັດຖະບານໄດ້ຖືເອົາການພັດທະນາເສດຖະກິດເປັນໃຈກາງໄປຕາມທິດພັດທະນາແບບຍືນຍົງໂດຍສົມທົບແໜ້ນການພັດທະນາ ແລະ ນໍາໃຊ້ຊັບພະຍາກອນທໍາມະຊາດທີ່ເປັນທ່າແຮງຢ່າງມີຈຸດສຸມ, ປົກປັກຮັກສາສິ່ງແວດລ້ອມດ້ວຍການເດັດດ່ຽວປະຕິບັດແນວທາງປ່ຽນແປງໃໝ່, ເອົາໃຈໃສ່ສົ່ງເສີມກໍາລັງແຮງຂອງທຸກພາກສ່ວນເສດຖະກິດທັງພາຍໃນ ແລະ ຕ່າງປະເທດທີ່ມີຄວາມສະເໝີພາບຕໍ່ໜ້າກົດໝາຍ ແລະ ເຄື່ອນໄຫວຕາມກົນໄກເສດຖະກິດຕະຫລາດທີ່ມີການຄຸ້ມຄອງຂອງລັດ ຍ້ອນແນວນັ້ນຈຶ່ງເຮັດໃຫ້ເສດຖະກິດຂອງຊາດຂະຫຍາຍຕົວຢ່າງຕໍ່ເນື່ອງສະເລ່ຍ 7,9% ແລະ ລາຍໄດ້ສະເລ່ຍຕໍ່ຄົນ 1.970 ໂດລາສະຫະລັດ,ອັດຕາເງິນເຟີຢູ່ໃນລະດັບຕໍ່າ, ສາມາດເກັບລາຍຮັບງົບປະມານໄດ້ 24,6%ຂອງ GDP ລື່ນຄາດໝາຍກໍານົດໄວ້, ຈໍານວນຄອບຄົວທຸກຍາກໄດ້ຫລຸດລົງເຫລືອພຽງ 6,59% ຂອງຈໍານວນຄອບຄົວທັງ

ໝົດໃນທົ່ວປະເທດ, ພື້ນຖານໂຄງລ່າງທາງດ້ານຄົມມະນາຄົມ,ໂທລະຄົມມະນາຄົມໄດ້ມີການຂະ ຫຍາຍຕົວຢ່າງແຂງແຮງ,ມີເສັ້ນທາງທີ່ສາມາດໄປມາໄດ້ສອງລະດູການທົ່ວປະເທດ ແລະ ເຊື່ອມຈອດກັບປະເທດໃກ້ຄຽງ,ປະຊາຊົນໃນຕົວເມືອງ ແລະ ຊົນນະບົດຫ່າງໄກສອກຫລີກໄດ້ຊົມໃຊ້ໂທລະສັບ ແລະ ລະບົບການສື່ສານທັນສະໄໝດ້ວຍຮູບການຕ່າງໆ ແລະ ຜົນງານອັນພົ້ນເດັ່ນຊຶ່ງບໍ່ເຄີຍມີມາໃນປະຫວັດສາດຂອງຊາດເຮົາກໍຄືໃນໂອກາດສະເຫລີມສະຫລອງວັນສະຖາປະນາ ສປປ ລາວ ຄົບຮອບ 40 ປີ ປະເທດຂອງພວກເຮົາໄດ້ສໍາເລັດການສົ່ງດາວທຽມຂຶ້ນສູ່ອາວະກາດເປັນດວງທໍາອິດ ແລະ ສໍາເລັດພິທີວາງສີລາລຶກໂຄງການກໍ່ສ້າງເສັ້ນທາງລົດໄຟຄວາມໄວສູງທີ່ມີຄວາມທັນສະໄໝ ແລະ ເຕັກນິກສູງ,ຊຶ່ງປັດຈຸບັນແມ່ນພວມລົງມືກໍ່ສ້າງ. ເບິ່ງລວມແລ້ວໂສມໜ້າຂອງປະເທດພວກເຮົາທັງຢູ່ຕົວເມືອງ ແລະ ຊົນນະບົດໄດ້ມີການຫັນປ່ຽນຢ່າງເດັນຊັດ, ໂຄງປະກອບເສດຖະກິດໄດ້ປ່ຽນໄປຕາມທິດຫັນເປັນອຸດສະຫະກໍາ ແລະ ທັນສະໄໝນັບມື້ເຊື່ອມໂຍງກັບສາກົນ.(3) ຂົງເຂດວັດທະນາທໍາ-ສັງຄົມ ໄດ້ມີການພັດທະນາດີຂື້ນໃນຫລາຍດ້ານຄຽງຄຸ່ກັບການພັດທະທາງດ້ານເສດຖະກິດ,ໃນ

ນັ້ນໄດ້ເອົາໃຈໃສ່ພັດທະນາທາງດ້ານຊັບພະຍາກອນມະນຸດ,ຍົກລະດັບການສຶກສາ, ໂດຍໄດ້ສະໜອງງົບປະມານໃຫ້ແກ່ຂະແໜງການສຶກສາຫລາຍຂື້ນກວມປະມານ 17% ຂອງລາຍຮັບຈາກການລົງທຶນຂອງລັດ, ທົ່ວປະເທດໄດ້ສໍາເລັດການຈົບຊັ້ນປະຖົມບໍາລູງໃນປີ 2015 ແລະ ມີຫລາຍທ້ອງຖິ່ນກໍໄດ້ສໍາເລັດການຈົບຊັ້ນມັດທະຍົມຕົ້ນ, ພ້ອມກັນນັ້ນພວກເຮົາກໍໄດ້ເອົາໃນໃສ່ປັບປຸງ ແລະ ຂະຫຍາຍພື້ນຖານໂຄງລ່າງທາງດ້ານສາທາລະນະສຸກໄປສູ່ົນະບົດເຂດຫ່າງໄກສອກຫລີກ, ຄຽງຄູ່ກັບການຍົກລະດັບຄຸນນະພາບການບໍລິການ, ອັນພົ້ນເດັ່ນແມ່ນການຈັດຕັ້ງປະຕິບັດເປົ້າໝາຍສະຫະສະວັດດ້ານການພັດທະນາ ແລະ ເຫັນວ່າມີຜົນສໍາເລັດເປັນສ່ວນໃຫຍ່, ອັດຕາການຊົມໃຊ້ນໍ້າສະອາດ ແລະ ວິດຖ່າຍຂອງຄອບຄົວໄດ້ບັນລຸເກີນຄາດໝາຍ, ສ່ວນໃນຂົງເຂດຖະແຫລ່ງຂ່າວ, ວັດທະນາທໍາ ແລະ ທ່ອງທ່ຽວ ກໍມີຜົນສໍາເລັດຫລາຍປະການ, ໄດ້ເອົາໃຈໃສ່ອະນຸລັກຮັກສາ ແລະ ສົ່ງເສີມວັດທະນາທໍາອັນດີງາມຂອງຊາດ, ກໍຄືຂອງບັນດາເຜົ່າ, ຂົງເຂດແຮງງານ ແລະ ສະຫວັດດີການສັງຄົມກໍມີຄວາມກ້າວໜ້າຫລາຍປະການເປັນຕົ້ນ:ການຍົກລະດັບສີມືແຮງງານ, ການກະຕຸກຊຸກຍູ້ຮູ້ບຸນຄຸນຜູ້ມີຄຸນ

ງາມຄວາມດີຕໍ່ການປະຕິວັດ ແລະ ຕໍ່ປະເທດຊາດ.(4) ລັດຖະບານໄດ້ເອົາໃຈໃສ່ປັບປຸງກົນໄກ, ລະບຽບການບໍລິຫານລັດໃຫ້ກະທັດລັດ, ໂປ່ງໃສເພີ່ມຂຶນ, ໄດ້ເພີ່ມທະວີກົນໄກການປະສານງານ ແລະ ແບບແຜນວິທີເຮັດວຽກຂອງບັນດາກະຊວງ, ອົງການ ແລະ ທ້ອງຖິ່ນອັນໄດ້ເຮັດໃຫ້ການບໍລິຫານລັດ ແລະ ຮັບໃຊ້ສັງຄົມມີປະສິດທິຜົນ ດີຂຶ້ນເລື້ອຍໆ, ໂດຍປະຕິບັດຕາມທິດສ້າງລັດທີ່ປົກຄອງ ແລະ ຄຸ້ມຄອງດ້ວຍກົດໝາຍ, ໄດ້ທົບທວນ, ວາງ ແລະ ປັບປຸງຕິນິກໍາໃຫ້ສອດຄ່ອງກັບສະພາບການຕົວຈິງ

ຂອງປະເທດ ແລະ ສົນທິສັນຍາສາກົນຕ່າງໆທີ່ພວກເຮົາເປັນພາຄີ, ອັນພິເສດແມ່ນໄດ້ສໍາເລັດການທົດລອງແບ່ງຂັ້ນຄຸ້ມຄອງລະຫວ່າງສູນກາງ ແລະ ທ້ອງຖິ່ນຕາມທິດສາມສ້າງຄື:ຫັນກົງຈັກຂອງສູນກາງໃຫ້ເຮັດພາລະບົດບາດຄຸ້ມຄອງມະຫາພາກເປັນຕົ້ນຕໍໄປຄຽງຄູ່ກັບການສ້າງແຂວງໃຫ້ເປັນຫົວໜ່ວຍຍຸດທະສາດ, ສ້າງເມືອງໃຫ້ເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດ

ທະນາ.(5) ໄດ້ປະສານສົມທົບຢ່າງກົມກຽວລະຫວ່າງການພັດທະນາເສດຖະກິດ-ສັງຄົມ ແລະ ການຕ່າງປະເທດກັບວຽກງານປ້ອງກັນຊາດ-ປ້ອງກັນຄວາມສະຫງົບ, ໄດ້ເອົາໃຈໃສ່ແກ້ໄຂບັນດາປະກົດການຫຍໍ້ທໍ້ຕ່າງໆຂອງສັງຄົມ,ຊຶ່ງໄດ້ສ້າງເງື່ອນໄຂອໍານວຍໃຫ້ແກ່ການທໍາມາຫາກິນຂອງປະຊາຊົນບັນດາເຜົ່າ, ທັງສາມາດສ້າງຄວາມເຊື່ອໝັ້ນ,ຄວາມໄວ້ວາງໃຈໃນການລົງທຶນຂອງຜູ້ປະກອບການທັງພາຍໃນ ແລະ ຕ່າງປະເທດ, ເຮັດໃຫ້ການສ້າງສາ ແລະ ພັດທະນາຂອງປະເທດເຮົາດໍາເນີນໄປດ້ວຍຄວາມໝັ້ນທ່ຽງ ແລະ ມີຜົນສໍາເລັດເປັນກ້າວໆມາ.(6) ລັດຖະບານໄດ້ເຄື່ອນໄຫວຕ່າງປະເທດຢ່າງຕັ້ງໜ້າເຮັດໃຫ້ອິດທິພົນ ແລະ ບົດບາດຂອງ ສປປ ລາວ ໃນເວທີພາກພື້ນ ແລະ ສາກົນໄດ້ຮັບການເຊີດຊູໃຫ້ສູງເດັ່ນຂຶ້ນກວ່າເກົ່າ, ເພື່ອນມິດຂອງພວກເຮົາກໍນັບມື້ກວ້າງຂວາງ ແລະ ສາມາດຍາດແຍ່ງການຮ່ວມມືກັບຕ່າງປະເທດ, ໂດຍສະເພາະການຮ່ວມມືດ້ານເສດຖະກິດໄດ້ເປັນຢ່າງດີ ແລະ ມີຜົນສໍາເລັດເປັນກ້າວໆມາ,ອັນພົ້ນເດັ່ນແມ່ນ ສປປ ລາວໄດ້ເຂົ້າເປັນສະມາຊິກຂອງອົງການການຄ້າ

ໂລກໃນປີ 2013, ໄດ້ຕັ້ງໜ້າເຂົ້າຮ່ວມກັບບັນດາປະເທດສະມາຊິກອາຊຽນສ້າງຕັ້ງປະຊາຄົມເສດຖະ ກິດອາຊຽນ,ໄດ້ເປັນເຈົ້າພາບກອງປະຊຸມລັດຖະສະພາອາຊີ-ເອີຣົບຄັ້ງທີ 7, ກອງປະຊຸມສຸດຍອດອາຊີ-ເອີຣົບຄັ້ງທີ 9 ແລະ ກອງປະຊຸມສໍາຄັນລະດັບພາກພື້ນ ແລະ ສາກົນອື່ນໆ, ປັດຈຸບັນ ສປປ ລາວກໍາລັງປະຕິບັດບົດບາດເປັນປະທານໝູນວຽນຂອງອາຊຽນ, ຊຶ່ງເວົ້າລວມແລ້ວປະເທດເຮົາໄດ້ປະ ກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາສັນຕິພາບ, ສະຖຽນລະພາບ, ສົ່ງເສີມມິດຕະ ພາບ ແລະ ການຮ່ວມມືເພື່ອພັດທະນາໃນພາກພື້ນ ແລະ ໃນໂລກ, ຊຶ່ງຜົນສໍາເລັດທີ່ກ່າວມານັ້ນແມ່ນຍ້ອນແນວທາງ ແລະ ການນໍາພາອັນຖືກຕ້ອງຂອງພັກ, ຍ້ອນຄວາມພະຍາຍາມດ້ວຍຄວາມຮັບພິຊອບສູງ,ຄວາມສາມັກຄີເປັນເອກະພາບຂອງລັດຖະບານ, ອົງການປົກຄອງແຕ່ລະຂັ້ນກໍຄືພະນັກງານ,ທະຫານ, ຕໍາຫລວດ,ປະຊາຊົນບັນດາເຜົ່າ ແລະ ການຊ່ວຍເຫລືອຂອງສາກົນ.

ຄຽງຄູ່ກັບຜົນສໍາເລັດດ້ານຕ່າງໆທີ່ກ່າວມານັ້ນ, ທ່ານນາຍົກລັດຖະມົນຕີ ທອງສິງ ທໍາມະວົງ ຍັງໄດ້ຍົກໃຫ້ເຫັນບັນດາຂໍ້ຄົງຄ້າງ ແລະ ສິ່ງທ້າທາຍສໍາຄັນຈໍານວນໜຶ່ງໃນຈັດຕັ້ງປະຕິບັດໃນໄລຍະຜ່ານມາເປັນຕົ້ນ: ການອໍານວຍຄວບຄຸມເສດຖະກິດຍັງມີບາງດ້ານບໍ່ທັນເຂັ້ມງວດ, ເຖິງວ່ເສດຖະກິດມີການເຕີບໂຕແຕ່ພື້ນຖານຍັງບໍ່ທັນໜັກແໜ້ນ,ຖານລາຍຮັບຍັງບໍ່ທັນເຂັ້ມແຂງ, ຍັງອາໃສການຂຸດຄົ້ນທໍາມະຊາດ ແລະ ການສົ່ງອອກວັດຖຸດິບເປັນອັນສໍາຄັນ,ລະດັບການພັດທະນາລະຫວ່າງຕົວ

ເມືອງ ແລະ ຊົນນະບົດຍັງມີຄວາມແຕກໂຕນ, ການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມ, ແຜນງົບປະມານທີ່ສະພາແຫ່ງຊາດໄດ້ຮັບຮອງເອົາແລ້ວມີບາງດ້ານບໍ່ສາມາດບັນລຸຕາມຄາດ   ໝາຍການປະຕິບັດວິໄນແຜນການ-ການເງິນກໍຄືການຄຸ້ມຄອງບັນດາໂຄງການລົງທຶນຂອງລັດຍັງບໍ່ທັນເຂັ້ມງວດ ແລະ ເດັດຂາດ, ບັນດາໂຄງການຈໍານວນໜຶ່ງຂາດປະສິດທິຜົນເຮັດໃຫ້ໜີ້ສີນຂອງລັດເພີ່ມຂຶ້ນເກີນຄວາມສາມາດຂອງງົບປະມານ ແລະ ແກ້ໄຂຍາກ, ການພັດທະນາວີສາຫະກິດຍັງບໍ່

ທັນໄດ້ດີ, ຄວາມສາມາດແຂ່ງຂັນໃນເງື່ອນໄຂເຊື່ອມໂຍງຍັງຕໍ່າ, ນະໂຍບາຍດ້ານຕ່າງໆທີ່ລັດຖະບານໄດ້ປະກາດໃຊ້ແລ້ວຍັງມີບາງອັນປະຕິບັດບໍ່ທັນໄດ້, ການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍຍັງບໍ່ທັນເດັດຂາດເຂັ້ມງວດ, ເຮັດໃຫ້ມີການສວຍໃຊ້ ແລະ ເກີດມີການສໍ້ລາດບັງຫລວງ ແລະ ປະກົດການຫຍໍ່ທໍ້ໃນສັງຄົມບໍ່ທັນໄດ້ຮັບການແກ້ໄຂຢ່າງເປັນຮູບປະທໍາແທ້ ແລະ ມີບາງດ້ານກໍຍັງມີທ່າອ່ຽງເພີ່ມຂື້ນ, ຊຶ່ງບັນດາຂໍ້ຄົງຄ້າງທີ່ກ່າວມານັ້ນເກີດຈາກຫລາຍສາເຫດທັງໃນຕົວ ແລະ ນອກຕົວ, ແຕ່ອັນຕົ້ນຕໍ່ສໍາຄັນຈໍານວນໜຶ່ງເກີດຈາກຄວາມເຂົ້າໃຈຕໍ່ແນວທາງນະໂຍບາຍຂອງພັກຍັງບໍ່ທັນເລິກເຊິ່ງເຖິງຖອງ, ຄວາມຮູ້ກ່ຽວກັບເສດຖະກິດຕະຫລາດຕາມທິດສັງຄົມນິຍົມຍັງບໍ່ທັນຈະແຈ້ງ,ບໍ່ເອກະພາບ ຕ່າງຄົນຕ່າງເຂົ້າໃຈ, ຕ່າງຄົນຕ່າງເຮັດ, ການຈັດຕັ້ງປະຕິບັດກົນໄກລະບຽບການຍັງບໍ່ທັນໄປລວງດຽວກັນ, ບໍ່ທັນແທດເໝາະກັບຄວາມເປັນຈິງ ແລະ ບໍ່ທັນເປັນການກະຕຸກຊຸກຍູ້ປຸກລະດົມກໍາລັງແຮງ

ຂອງທົ່ວສັງຄົມເຂົ້າຮ່ວມໃນການພັດທະນາປະເທດຊາດດີເທົ່າທີ່ຄວນ, ຄວາມຮັບພິຊອບ ແລະ ຄວາມເປັນເຈົ້າການຂອງຂະແໜງການຂອງສູນກາງ ແລະ ທ້ອງຖິ່ນບໍ່ທັນສູງ, ການຈັດຕັ້ງປະຕິບັດຕົວຈິງໃນການຫັນນະໂຍບາຍ,ກົດໝາຍ, ແຜນງານ ແລະ ໂຄງການລະອຽດຍັງຊັກຊ້າ ແລະ ບໍ່ແທດເໝາະຕົວຈິງ, ຊໍ້າຊອນ ແລະ ບາງຄັ້ງຍັງມີລັກສະນະກົດໜ່ວງທ່ວງດຶງການຈັດຕັ້ງປະຕິບັດນໍາອີກ.

ຂ່າວຈາກ: