spot_img
Home​ຂ່າວທ່ອງທ່ຽວບ້ານ ໂພສີ ເມືອງ ຄຳ ດິນແດນແຫ່ງຄວາມຊົງຈຳທີ່ບໍ່ມີວັນລືມ

ບ້ານ ໂພສີ ເມືອງ ຄຳ ດິນແດນແຫ່ງຄວາມຊົງຈຳທີ່ບໍ່ມີວັນລືມ

Published on

ທ່ອງທ່ຽວກັບລາວໂພສຕ໌ວັນນີ້ຈະພາທຸກທ່ານໄປທ່ຽວທີ່ ເມືອງ ຄຳ ແຂວງ ຊຽງຂວາງ ເຊິ່ງສະຖານທີ່ທ່ຽວທີ່ເຮົາຈະໄປຈະມີຢູ່ສາມແຫ່ງ ຄື: ບ້ານ ສົບມ່າ ຫຼື ບ້ານ ໂພສີ ໃນປັດຈຸບັນ, ວັງວຽນ ແລະ ວັງແລ ທັງສາມສະຖານທີ່ນີ້ອາດຈະບໍ່ຄຸ້ນຫູຫຼາຍໆຄົນ ເພາະມັນບໍ່ແມ່ນສະຖານທີ່ທ່ອງທ່ຽວທີ່ມີຊື່ສຽງໃນເມືອງຄຳ ແຕ່ພວກທ່ານອາດຈະຍັງບໍ່ຮູ້ເທື່ອວ່າທັງສາມສະຖານທີ່ນີ້ຖ້າຫາກທ່ານໄດ້ໄປສຳພັດແລ້ວ ທ່ານຈະຕິດໃຈໃນມົນສະເໜ່ທີ່ລຽບງ່າຍຂອງມັນຢ່າງບໍ່ມີວັນລືມ.

ການເດີນຈາກໂພນສະຫວັນມາ ບ້ານສົບມາ ຫຼື ບ້ານ ໂພສີ ເມືອງຄຳ ໃຊ້ເວລາຢູ່ປະມານ 1-2 ຊົ່ວໂມງ ຫຼື ກາຍບໍ່ນ້ຳຮ້ອນໄປປະມານ 7-8 KM ທາງເຂົ້າໝູ່ບ້ານເປັນທາງດິນແດງ ສອງຝາກທາງແມ່ນມີຮ້ວຍຮ່ອງ, ພູຜາ ສະລັບກັບເຮືອນປະຊາຊົນ ຖ້າໄປໃນຊ່ວງນີ້ (ເດືອນເມສາ) ທ່ານຈະແນມເຫັນພູໂລ້ນບາງໜ່ວຍແຈກຢາຍກັນໄປສຸດທາງ ຍ້ອນປະຊາຊົນເຂດນັ້ນໄດ້ຈູດໄຮ່ ຖາງໄວ້ ເພື່ອກຽມປູສາລີ ໃນຍາມຝົນຕົກໃໝ່ຫຼັງສົງການ.

ການເດີນທາງເຂົ້າໝູ່ບ້ານ ແມ່ນຈະຕ້ອງຂ້າມຂົວນ້ຳມ່າໄປ ບາງຄົນກໍ່ຂີ່ລົດໃຫຍ່ຂ້າມແມ່ນ້ຳມ່າໄປເລີຍ ເພາະມີບ່ອນນ້ຳຕື້ນສາມາດຂີ່ລົດຂ້າມ ຫຼື ຍ່າງຂ້າມໄດ້.

ຕາມຄຳບອກເລົ່າຂອງປະຊາຊົນໃນເຂດນັ້ນກ່ຽວກັບທີ່ມາຊື່ບ້ານ ສົບມາ ໃນອະດີດ ຫຼື ບ້ານ ໂພສີໃນປັດຈຸບັນ ວ່າ ຍ້ອນວ່າ ບ້ານ ສົບມາ ມີແມ່ນ້ຳ ມ່າ ແລະ ແມ່ນ້ຳມັດ ໄຫລມາໂຮມກັນໃນຈຸດດຽວກໍ່ເລີຍໃສ່ຊື່ວ່າບ້ານສົບມາ ໃນອະດີດ.

ລັກສະນະພິເສດຂອງໝູ່ບ້ານນີ້ແມ່ນຈະອ້ອມດ້ວຍແມ່ນ້ຳສອງສາຍ ຄື ທາງເບື້ອງເໜືອຈະມີແມ່ນ້ຳມ່າໄຫລຜ່ານ ແລະ ທາງເບື້ອງໃຕ້ຈະມີແມ່ນ້ຳມັດໄຫລຜ່ານ ແມ່ນ້ຳມັດຈະເປັນນ້ຳນ້ອຍແຕ່ນ້ຳໄສໄຫລເຢັນເຫັນປາລອຍໄປມາຕະຫຼອດປີ ສ່ວນແມ່ນ້ຳມ່າຈະເປັນແມ່ນ້ຳໃຫຍ່ກ່ວາແມ່ນ້ຳມັດນ້ຳອຸ່ນເລັກນ້ອຍບໍ່ໃສປານໃດແຕ່ກໍ່ເປັນນ້ຳໄຫລປາກໍ່ມີຫຼາຍ ແມ່ນ້ຳທາງສອງສາຍນ້ຳນີ້ຖືເປັນສາຍເລືອດໃຫຍ່ຂອງປະຊາຊົນໃນເຂດນັ້ນ ເພາະເປັນທັງບ່ອນຫາກິນ, ບ່ອນອາບ, ບ່ອນກິນ ທຸກຢ່າງກໍ່ວ່າໄດ້. ນອກຈາກຈະມີສາຍນ້ຳທີ່ອ້ອມຮອບໝູ່ບ້ານນີ້ແລ້ວຍັງມີໜ່ວຍພູຢັ່ງຢາຍອ້ອມຮອບໝູ່ບ້ານນີ້ເຊັ່ນດຽວກັນ.

ອາກາດຂອງເມືອງ ຄຳ ຈະຄ້າຍຄືກັບ ນະຄອນຫຼວງວຽງຈັນ ຍາມກາງເວັນຈະຮ້ອນເອົ້າ ແຕ່ພໍຕາເວັນຕົກດິນອາກາດຈະເຢັນສະບາຍດີ ແລະ ເດິກມາຈະໜາວເລັກໜ້ອຍ

ໝູ່ບ້ານສົບມາ ຫຼື ບ້ານ ໂພສີ ສ່ວນໃຫຍ່ຈະເປັນຊົນເຜົ່າເມີ້ຍອາໃສຢູ່ ແບບເປັນຍາດເຄືອພີ່ນ້ອງກຸ່ມໃຫຍ່ຕະກູນດຽວເກືອບໝົດບ້ານ, ເຮືອນຂອງພວກເຂົາເຈົ້າຈະຖືກຈັດສັນໃຫ້ຕັ້ງເປັນແຖວລະບຽບ ປັດຈຸບັນມີຢູ່ສີ່ແຖວຮູບແບບເຮືອນມີລັກສະນະຄ້າຍຄືກັນເກືອບໝົດທຸກຫຼັງ ແຕ່ຈຸດພິເສດແມ່ນຕີນເສົາຂອງທຸກເຮືອນຈະມີກ່ອນຫີນຍອງກ່ອນຈິ່ງຕັ້ງເສົາທຸກຕົ້ນ, ມີເຕົາໄຟໃນເຮືອນຄືກັນທຸກຫຼັງເຮືອນ ກ້ອງຊານເຮືອນບ່ອນລ້າງຖ້ວຍ ພວກເຂົາກໍ່ຈະກໍ່ເປັນຄືອ່າງຕື້ນໄວ້ຄືກັນໝົດທຸກຫຼັງເຮືອນ.

13023336_987695424631835_2101712354_n

ອາຊີບຫຼັກຂອງປະຊາຊົນບ້ານນີ້ແມ່ນການປູກສາລີເປັນສິນຄ້າສົ່ງອອກ, ການເຮັດນາປູກເຂົ້າໄກ້ນ້ອຍ ແມ່ຍິງຕຳຫູກທຸກຄົວເຮືອນ, ລ້ຽງງົວ, ລ້ຽງໝູດຳ, ລ້ຽງໄກ່… ຜູ້ຊາຍແມ່ນເປັນຝ່າຍອາຫານຄືການຫາປາ, ເຂົ້າປ່າເພື່ອລ່າສັດເປັນຕົ້ນ 

13020163_987695081298536_640927359_n

ປະເພນີຂອງພວກເຂົາເຈົ້າໃນຍາມບຸນປີໃໝ່ທຸກໆປີ ລູກຫຼານຍາດພີ່ນ້ອງຢູ່ຕ່າງຖິ່ນກໍ່ຈະມາເຕົ້າໂຮມກັນໃນວັນບຸນປີໃໝ່ ແຕ່ລະເຮືອນກໍ່ຈະມີການຈັດພິທີບາສີສູ່ຂັວນ ເຮັດສົມມາຜູ້ເຖົ້າຜູ້ແກ່ຕາມຮີດຄອງລາວທີ່ເຄີຍປະຕິບັດກັນມາແຕ່ບູຮານ

13023238_987708561297188_1235154181_n

ຫຼັງຈາກເຊັດພິທີບາສີສູ່ຂັວນແລ້ວກໍ່ຈະແມ່ນການກິນເຂົ້າສາມັກຄີ ແລະ ຈຸດເດັ່ນແມ່ນການກິນເຫຼົ້າໄຫສາມັກຄີ ແລ້ວພາກັນມ່ວນຊື່ນ ບໍ່ວ່າຈະເປັນເດັກນ້ອຍຜູ້ເຖົ້າຜູ້ແກ່ກໍ່ພາກັນເຕັ້ນຖືບເຮືອນ ປານເຮືອນສິຫັກ ເຊິ່ງເປັນພາບທີ່ຫາເບິ່ງໄດ້ຍາກໃນເມືອງຫຼວງ ສ່ວນທາງກ່ອງຕະລ່າງເຮືອນກໍ່ມີກູ່ມຄົນພາກັນກິນເຫຼົ້າໃຫ ແລະ ເຕັ້ນຢ່າງມ່ວນຊື່ນ ເພື່ອຈະແດງເຖິງຄວາມສຸກ, ຊື່ນອົກຊື່ນໃຈ ແລະ ຄວາມສາມັກຄີ. ຈຸດພິເສດຄົນເມືອງນີ້ຍາມມ່ວນກໍ່ມ່ວນແທ້ມ່ວນວ່າ ບາດຮອດຍາມເຮັດວຽກກໍ່ຕັ້ງໃຈເຮັດແທ້ເຮັດວ່າ ຖືກວ່າເປັນຄົນເຮັດແທ້ທຳຈິງ.

13046304_987695951298449_251823754_n

ຊົນນະບົດຈະມີອາກາດທີ່ບໍລິສຸດ ແລະ ຄວາມອຸດົມສົມບູນຂອງທຳມະຊາດທີ່ເຮົາສຳພັດໄດ້ແລ້ວ ແລະ ຄົນໃນແຖບຊົນນະບົດບໍ່ວ່າຈະຢູ່ບ້ານເມືອງໃດ ເມື່ອເວລາທີ່ເຮົາໄປຢ້ຽມຢາມສິ່ງທຳອິດທີ່ເຮົາສຳພັດໄດ້ແມ່ນຮອຍຍິ້ມ ມິດຕະພາບທີ່ດີ ຄວາມຈິງໃຈທີ່ພວກເຂົາມອບໃຫ້ ສະເໜ່ຂອງຄົນໃນແຖບຊົນນະບົດແມ່ນພວກເຂົາຈະບໍ່ຖືຕົວ, ບໍ່ຖືກຽດ ເຂົ້າກັບເຮົາໄດ້ງ່າຍ, ໃຫ້ການຕ້ອນຮັບເຮົາເປັນຢ່າງດີສະເໝີຕົ້ນສະເໝີປາຍ ຂຶ້ນເຮືອນໃດກໍ່ໄດ້ກິນເຂົ້າບໍ່ອົດຕາຍ ເຊິ່ງສິ່ງເຫຼົ່ານີ້ຫາບໍ່ໄດ້ໃນເມືອງ ເຖິງຈະມີເງິນຫຼາຍປານໃດກໍ່ຫາຊື້ບໍ່ໄດ້.

ການເດີນທາງຍັງບໍ່ທັນສິ້ນສຸດ ວັນຕໍ່ໄປເຮົາຈະໄປຫຼິ້ນທີ່ວັງວຽນ ແລະ ວັງແລ ສອງວັງນ້ຳນີ້ຈະງາມພຽງໃດຕ້ອງຕິດຕາມກັນຕໍ່ໄປ.

ຂຽນໂດຍ: ປັອກເລັກ ລາວໂພສຕ໌

 

 

 

 

ບົດຄວາມຫຼ້າສຸດ

ຕັ້ງໃຈ ຫຼື ອຸບັດຕິເຫດ! ເປີດເຜີຍສາເຫດເຮືອບິນ ແອອິນເດຍ ປະສົບອຸບັດຕິເຫດຕົກ

ເປີດເຜີຍສາເຫດເຮືອບິນ ແອອິນເດຍ ປະສົບອຸບັດຕິເຫດຕົກ ເຮັດໃຫ້ມີຜູ້ເສຍຊີວິດເປັນຈຳນວນຫຼາຍ. ສຳນັກຂ່າວຕ່າງປະເທດລາຍງານໃນວັນທີ 12 ກໍລະກົດ 2025, ໜ່ວຍງານສອບສວນອຸບັດຕິເຫດທາງອາກາດອິນເດຍ (AAIB) ໄດ້ເຜີຍແຜ່ລາຍງານເບື້ອງຕົ້ນກ່ຽວກັບສາເຫດທີ່ເຮັດໃຫ້ເຮືອບິນສາຍການບິນແອອິນເດຍ (Air India) ຖ້ຽວບິນທີ AI171...

ສຕລ ປະກາດລາຍຊື່ນັກກິລາທີມຊາດລາວ ຍູ 23 ເຂົ້າຮ່ວມການແຂ່ງຂັນບານເຕະ ຊາຍຊິງແຊ້ມອາຊຽນ ຮຸ່ນອາຍຸບໍ່ເກີນ 23 ປີ ທີ່ປະເທດອິນໂດເນເຊຍ.

ປະກາດ 23 ລາຍຊື່ນັກກິລາທີມຊາດລາວ ຮ່ວມການແຂ່ງຂັນບານເຕະ ຊາຍຊິງແຊ້ມອາຊຽນ ຮຸ່ນອາຍຸບໍ່ເກີນ 23 ປີ ທີ່ປະເທດອິນໂດເນເຊຍ. ໃນວັນທີ 11 ກໍລະກົດ 2025 ສະຫະພັນບານເຕະແຫ່ງຊາດລາວ (ສຕລ)...

ດາວດວງໃໝ່! ສາຍແສງໃນເວທີສາກົນ ອອດສະກ້າ ນັກກິລາໜຸ່ມນ້ອຍລາວ ອອກເດີນທາງຮ່ວມຝຶກຊ້ອມກັບສະໂມສອນ ຄອນເນຢາ

ນ້ອງ ອອດສະກ້າ ອາຍຸ 11 ປີ ໜຸ່ມນ້ອຍແຄ່ງລູກເຂົ້າໜຽວ ອອກເດີນທາງຮ່ວມຝຶກຊ້ອມກັບສະໂມສອນ ຄອນເນຢາ ທີ່ປະເທດແອັດສະປາຍ. ກາຍເປັນອີກຂ່າວດີຂອງວົງການກິລາບານເຕະເຍົາວະຊົນລາວ ອີກໜຶ່ງຜົນງານໃນເວທີສາກົນ ທ້າວ ສີນໄຊ ຫຼວງບຸນເຮືອງ ຫຼື...

ເຈົ້າໜ້າທີ່ຕຳຫຼວດໄທຈັບກຸມ ໜຸ່ມຮັກສັດເລືອກທາງຜິດ ຂາຍຢາບ້າເພື່ອຫາເງິນຊື້ອາຫາານໃຫ້ໝາ-ແມວ

ໜຸ່ມໄທຮັກສັດເລືອກທາງຜິດ ຂາຍຢາບ້າເພື່ອຊື້ອາຫານມາລ້ຽງໝາ-ແມວ 30 ກວ່າໂຕ ສຳນັກຂ່າວໄທລັດລາຍງານໃນວັນທີ 9 ກໍລະກົດ 2025 ຜ່ານມາ, ເຈົ້າໜ້າທີ່ຕຳຫຼວດໄທ ຮ່ວມກັບພາກສ່ວນກ່ຽວຂ້ອງໄດ້ລົງພຶ້ນທີ່ເພື່ອແກ້ໄຂບັນຫາຢາເສບຕິດ ຕາມການລາຍງານຂອງພົນລະເມືອງດີວ່າມີກຸ່ມຄົນຄ້າຂາຍຢາເສບຕິດໃນຊຸມຊົນແຫ່ງໜຶ່ງໃນ ຈັງຫວັດ ສຣະແກ້ວ ປະເທດໄທ. ຕາມການລົງພຶ້ນທີ່ຕົວຈິງຂອງເຈົ້າໜ້າທີ່ໄທສາມາດຈັບຕົວຜູ້ຖືກຫາໄດ້ໜຶ່ງຄົນ...