ຂະແໜງກະສິກຳ ແລະ ປ່າໄມ້ ແມ່ນຂະແໜງການໜຶ່ງທີ່ມີບົດບາດສຳຄັນ ໃນໂຄງປະກອບເສດຖະກິດຂອງແຂວງ ໄຊຍະບູລີ ກໍຄືຂອງຊາດ. ໃນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ IX ຂອງພັກ ກໍຄືແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII 2016-2020 ແລະ ແຜນພັດທະນາເສດຖະກິດ – ສັງຄົມ ຂອງແຂວງ ກໍຄືແຜນພັດທະນາຂອງ ຂະແໜງການກະສິກຳ ແລະ ປ່າໄມ້ ຕາມ 3 ແຜນງານໃຫຍ່ຄືແຜນ ງານຄ້ຳປະກັນ ທາງດ້ານສະບຽງອາຫານ ແຜນງານຜະລິດເປັນສິນຄ້າ, ແຜນງານຄຸ້ມຄອງປ່າໄມ້ ແລະ ຊັບພະຍາກອນປ່າໄມ້.
ຕາມຂໍ້ມູນຈາກ ພະແນກກະສິກຳ ແລະ ປ່າໄມ້ແຂວງໄຊຍະບູລີໃຫ້ຮູ້ວ່າ: ໃນ 6 ເດືອນຕົ້ນປີ ທົ່ວແຂວງໄຊຍະບູລີ ສາມາດຜະລິດເຂົ້ານາແຊງ ເນື້ອທີ່ແຜນການໄດ້ 3.500 ເຮັກຕາ. ປັກດຳໄດ້ທັງໝົດ 3.364 ເຮັກຕາ ເທົ່າກັບ 96,13% ຂອງແຜນການ ຄາດຄະເນຜົນຜະລິດ 15.869 ໂຕນ, ສະມັດຖະພາບສະເລ່ຍ 4,72 ໂຕນ/ເຮັກຕາ, ການຜະລິດພືດລະດູແລ້ງເນື້ອທີ່ແຜນການ 12.400 ເຮັກຕາ, ປະຕິບັດໄດ້ 13.681,47 ເຮັກຕາ ຄາດ ຄະເນຜົນຜະລິດ 62.577 ໂຕນ, ທຽບໃສ່ແຜນການປີເພີ່ມຂຶ້ນ 858 ເຮັກຕາ ທຽບໃສ່ແຜນການ ຜົນຜະລິດເພີ່ມຂຶ້ນ 696 ໂຕນ. ສິ່ງທີ່ພົ້ນເດັ່ນ ໃນການຜະລິດລະດູແລ້ງ ຂອງແຂວງໄຊຍະບູລີ ເພີ່ມຂຶ້ນຍ້ອນພວກ ເຮົາໄດ້ຮ່ວມມືກັບບໍລິສັດຈີນ ສົ່ງເສີມການປູກເຂົ້ານາແຊງເປັນສິນຄ້າ. ໃນຂົງເຂດຈຸດສຸມ 3 ທົ່ງພຽງ ຊຶ່ງມີເນື້ອທີ່ທັງ ໝົດ 234,61 ເຮັກຕາ. ນອກນີ້ ຍັງໄດ້ນຳພາຊາວນາປູກເຂົ້າດ້ວຍເຕັກນິກໃໝ່. ພ້ອມນີ້ຍັງ ໄດ້ຮ່ວມມືກັບບໍລິສັດອີຈັງຟຸດ ໃນການປູກໝາກແຕງຍີ່ປຸ່ນຢູ່ເມືອງແກ່ນທ້າວ, ເມືອງພຽງ ໃນເນື້ອທີ່ 50 ເຮັກຕາ. ຮ່ວມມືກັບບໍລິສັດຍິງນົງ ໃນການປູກໝາກໂມ ໃນເນື້ອທີ່ 181 ກວ່າເຮັກຕາ, ການປູກພືດເປັນສິນຄ້າ ໄດ້ມີທ່ວງທ່າຂະຫຍາຍຕົວດີສົມຄວນ ຊຶ່ງທົ່ວແຂວງມີເນື້ອທີ່ປູກພືດ ເປັນສິນຄ້າທັງໝົດ 117,622 ເຮັກຕາ, ຜົນຜະລິດທັງໝົດ 896,566 ໂຕນ, ພົ້ນເດັ່ນກວ່າໝູ່ແມ່ນສາລີອາຫານສັດ, ມັນຕົ້ນ, ໝາກເດືອຍ ທັງນີ້ ເນື່ອງຈາກວ່າບັນດາພືດດັ່ງກ່າວ ແມ່ນມີທ່າແຮງທາງດ້ານການຕະຫຼາດ ໃນລາຄາທີ່ຊາວກະສິກອນຍອມຮັບໄດ້.
ຄຽງຄູ່ກັບການຊຸກຍູ້ ສົ່ງເສີມຂອງພາກສ່ວນລັດ ແລະ ພາກສ່ວນ ຜູ້ປະກອບການ ລວມທັງບັນດາບໍລິສັດ ຜູ້ລົງທຶນຕ່າງໆ ໃນຂົງເຂດກະສິກຳ ແລະ ການປຸງແຕ່ງຜົນຜະລິດກະສິກຳເຊັ່ນ: ສາລີ ມີເນື້ອທີ່ທັງໝົດ 51,140 ເຮັກຕາ. ຜົນຜະລິດ 288,895 ໂຕນ, ມັນຕົ້ນມີເນື້ອທີ່ທັງໝົດ 11,484 ເຮັກຕາຜົນ ຜະລິດ 351,758 ໂຕນ, ໝາກເດືອຍ ມີເນື້ອທີ່ 38,259 ເຮັກຕາ, ຜົນຜະລິດ 108,657 ໂຕນ ແລະ ພືດອື່ນໆ ມີເນື້ອທີ່ທັງໝົດ 16,777 ເຮັກຕາ ຜົນຜະລິດໄດ້ 147,254 ໂຕນ.
ແຫລ່ງຂ່າວ:
