ຂະແໜງກະສິກຳ ແລະປ່າໄມ້ ແມ່ນຂະແໜງການໜຶ່ງທີ່ມີບົດບາດສຳຄັນໃນໂຄງປະກອບເສດຖະກິດຂອງແຂວງໄຊຍະບູລີ ກໍຄືຂອງຊາດໃນການຈັດຕັ້ງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII 2016-2020 ແລະແຜນພັດທະນາເສດຖະກິດ-ສັງຄົມຂອງແຂວງກໍ່ຄືແຜນພັດທະນາຂອງຂະແໜງການກະສິກຳ ແລະປ່າໄມ້ ຕາມ 3 ແຜນງານໃຫຍ່ຄືແຜນງານຄ້ຳປະກັນທາງດ້ານສະບຽງອາຫານແຜນງານຜະລິດເປັນສິນຄ້າ, ແຜນງານຄຸ້ມຄອງປ່າໄມ້ ແລະຊັບພະຍາກອນປ່າໄມ້.
ຕາມຂໍ້ມູນຈາກພະແນກກະສິກຳ ແລະປ່າໄມ້ ແຂວງໄຊຍະບູລີ ໃຫ້ຮູ້ວ່າໃນ 6 ເດືອນຕົ້ນປີທົ່ວແຂວງໄຊຍະບູລີເນື້ອທີ່ຜະລິດເຂົ້ານາແຊງຕາມແຜນການ 3.500 ເຮັກຕາ ປັກດຳໄດ້ທັງໝົດ 3.364 ເຮັກຕາ ເທົ່າກັບ 96,13% ຂອງແຜນ ການຄາດຄະເນຜົນຜະລິດ 15.869 ໂຕນສະມັດຖະພາບສະເລ່ຍ 4,72 ໂຕນຕໍ່ເຮັກຕາການຜະລິດພືດລະດູແລ້ງເນື້ອທີ່ແຜນການ 12.400 ເຮັກຕາ ປະຕິບັດ ໄດ້ 13.681 ເຮັກຕາ ຄາດຄະເນຜົນຜະລິດ 62.577 ໂຕນ ທຽບໃສ່ແຜນການປີເພີ່ມຂຶ້ນ 858 ເຮັກຕາ ທຽບໃສ່ແຜນການຜົນຜະລິດເພີ່ມຂຶ້ນ 696 ໂຕນ ສິ່ງທີ່ພົ້ນເດັ່ນໃນການຜະລິດລະດູແລ້ງຂອງແຂວງໄຊຍະບູລີເພີ່ມຂຶ້ນຍ້ອນພວກເຮົາໄດ້ຮ່ວມມືກັບບໍລິສັດຈີນສົ່ງເສີມການປູກເຂົ້ານາແຊງເປັນສິນຄ້າໃນຂົງເຂດຈຸດສຸມ 3 ທົ່ງພຽງ ຊຶ່ງມີເນື້ອທີ່ທັງໝົດ 234 ກວ່າເຮັກຕາ ນອກນີ້ ຍັງໄດ້ນຳພາຊາວນາປູກເຂົ້າດ້ວຍເຕັກນິກໃໝ່.
ພ້ອມນີ້ຍັງໄດ້ຮ່ວມມືກັບບໍລິສັດອີຈັງຟຸດໃນການປູກໝາກແຕງຢີ່ປຸ່ນ ຢູ່ເມືອງແກ່ນທ້າວ, ເມືອງພຽງ ໃນເນື້ອທີ່ 50 ເຮັກຕາຮ່ວມມືກັບບໍລິສັດຍິງນົງໃນການປູກໝາກໂມໃນເນື້ອທີ່ 181 ເຮັກຕາກວ່າ ການປູກພືດເປັນສິນຄ້າໄດ້ມີທ່ວງທ່າ ຂະຫຍາຍຕົວດີສົມຄວນ ຊຶ່ງທົ່ວແຂວງມີ ເນື້ອທີ່ປູກພຶດເປັນສິນຄ້າທັງໝົດ 117.622 ເຮັກຕາ ຜົນຜະລິດທັງໝົດ 8,96 ແສນກວ່າໂຕນພົ້ນເດັ່ນກວ່າໝູ່ ແມ່ນສາລີອາຫານສັດ, ມັນຕົ້ນ, ໝາກເດືອຍທັງນີ້ເນື່ອງຈາກວ່າບັນດາພືດດັ່ງກ່າວແມ່ນມີທ່າແຮງທາງດ້ານການຕະ ຫຼາດໃນລາຄາທີ່ຊາວກະສິກອນຍອມ ຮັບໄດ້.
ຄຽງຄູ່ກັບການຊຸກຍູ້ສົ່ງເສີມຂອງພາກສ່ວນລັດ ແລະພາກສ່ວນຜູ້ປະກອບການລວມທັງບັນດາບໍລິສັດຜູ້ລົງທຶນຕ່າງໆ ໃນຂົງເຂດກະສິກຳ ແລະການປຸງ ແຕ່ງຜົນຜະລິດກະສິກຳເຊັ່ນ: ສາລີ ມີເນື້ອທີ່ທັງໝົດ 51,140 ເຮັກຕາ. ຜົນຜະລິດ 2,88 ແສນກວ່າໂຕນ, ມັນຕົ້ນມີເນື້ອທີ່ທັງໝົດ 11 ພັນກວ່າເຮັກຕາຜົນຜະລິດ 3,51 ແສນກວ່າໂຕນ, ໝາກເດືອຍມີ ເນື້ອທີ່ 38 ພັນກວ່າເຮັກຕາ, ຜົນຜະລິດ 108.657 ໂຕນ ແລະພືດອື່ນໆມີເນື້ອທີ່ທັງໝົດ 16.777 ເຮັກຕາຜົນຜະລິດໄດ້ 147,254 ໂຕນ.
ທີ່ມາ: