spot_img
Homeຂ່າວພາຍ​ໃນກະຊວງກະສິກຳຯ ສັ່ງເພີ່ມທະວີເຝົ້າລະວັງ ຕັກແຕນລະບາດຮອບໃໝ່ ຢູ່ 3 ແຂວງພາກເໜືອ!

ກະຊວງກະສິກຳຯ ສັ່ງເພີ່ມທະວີເຝົ້າລະວັງ ຕັກແຕນລະບາດຮອບໃໝ່ ຢູ່ 3 ແຂວງພາກເໜືອ!

Published on

ຂປລ. ໃນ​ວັນ​ທີ 4 ​ເມສາ 2016 ຜ່ານ​ມາ​ນີ້, ກະຊວງ​ກະສິກໍາ ​ແລະ ປ່າ​ໄມ້​​ ໄດ້​ອອກຄຳສັ່ງກ່ຽວກັບການ ເພີ່ມ​ທະ​ວີ​ຄວາມຮັບຜິດຊອບ ຕໍ່ການ​ປ້ອງ​ກັນ, ຄວບ​ຄຸມ​ ແລະ ກຳ​ຈັດການ​ລະ​ບາດ​ ຂອງ​ຕັກ​ແຕນ ຢູ່ ແຂວງຫລວງ​ພະ​ບາງ, ຜົ້ງ​ສາ​ລີ ແລະ ຫົວ​ພັນ ພາຍຫລັງ​ເກີດ​ ການລະ​ບາດ​ຂອງ​ຕັກ​ແຕນ​ ໃນ​ປີ 2015 ຢູ່​ ບັນດາ​ແຂວງ​ພາກ​ເໜືອ.

ໄລຍະ ​ຜ່ານ​ມາ, ອົງການ​ປົກຄອງ​ທ້ອງ​ຖິ່ນ ​ແຕ່ລະ​ຂັ້ນ​ໄດ້​ຊ່ວຍ ປຸກລະດົມພະນັກງານ ແລະ ປະຊາຊົນ ບັນດາເຜົ່າ ເຂົ້າຮ່ວມໃນການ​ເຝົ້າລະວັງ, ປ້ອງ​ກັນ, ​ສະກັດ​ກັ້ນ ​ແລະ​ ຄວບ​ຄຸມການລະບາດ ຂອງຕັກແຕນ ຢ່າງເປັນເຈົ້າການ ​ແລະ ມີຄວາມຮັບຜິດຊອບສູງ, ສາມາດຫລຸດຜ່ອນ ຄວາມເສຍຫາຍລົງໄດ້ ພໍສົມຄວນ. ຈາກການຕິດຕາມ ຂອງໜ່ວຍງານວິຊາການ ໂດຍການມີສ່ວນຮ່ວມ ຂອງປະຊາຊົນ ມາຮອດ​ເດືອນ​ພະຈິກ 2015 ສາມາດພົບເຫັນ ຈຸດວາງໄຂ່ໄດ້ເຖິງ 140 ຈຸດໃນ 112 ບ້ານ, ກວມເອົາ 7 ເມືອງ ຂອງ​ແຂວງຫລວງພະ​ບາງ, ​​ຜົ້ງສາລີ​ ແລະ ຫົວພັນ; ຖ້າ​ເບີ່​ງຕາມ ວົງຈອນຊີວິດຂອງຕັກແຕນ ຄາດວ່າຈະລະບາດ ອີກຮອບໃໝ່ ລະຫວ່າງເດືອນເມສາ ຫາມິ​ຖຸ​ນາ ນີ້. ສະນັ້ນ, ຖ້າພວກເຮົາບໍ່ມີກະກຽມ ແລະ ມີແຜນການຮັບມື ລະອຽດແຕ່ຫົວທີ ກໍຈະເຮັດໃຫ້ ເນື້ອທີ່ປູກພືດ (ເຂົ້າໄຮ່ ແລະ ສາລີ) ​ຈໍານວນ 7.500 ​ເຮັກຕາ ຫລື ເທົ່າກັບ 50% ຂອງເນື້ອທີ່ທັງໝົດ ໃນ 112 ບ້ານ ມີຄວາມສ່ຽງຖືກ ຕັກແຕນທໍາລາຍ. ເພື່ອ​ປ້ອງ​ກັນ, ສະກັດ​ກັ້​ນ ແລະ ກຽມພ້ອມຮັບ​ມື​ແຕ່​ຫົວທີ, ຫລີກລ້ຽງຕໍ່ຜົນ​ເສຍ​ຫາຍ ​ດັ່ງກ່າວ​ທີ່ຈະເກີດຂຶ້ນ.

ຫລ້າ​ສຸດ ລັດ​ຖະ​ມົນ​ຕີ​ ກະ​ຊວງກະ​ສິ​ກຳ ແລະ ປ່າ​ໄມ້, ປະທານຄະນະ ກໍາມະການສະເພາະກິດ ເພື່ອແກ້ໄຂບັນຫາ ການລະບາດຂອງຕັກແຕນ ແລະ ໜູຂີ ຢູ່ແຂວງ ຫລວງພະບາງ ແລະ ບາງແຂວງພາກເໜືອ ​ໄດ້ອອກຄໍາສັ່ງດັ່ງ​ ນີ້: ໃຫ້ ​ກົມ​ປູກຝັງສົມທົບກັບ ຄະນະກໍາມະການປ້ອງກັນ ແລະ ຄວບຄຸມໄພພິບັດ ຂັ້ນແຂວງ, ພະ​ແນ​ກກະສິກໍາ ​ແລະ ປ່າ​ໄມ້ ປະ​ຈໍາ​ແຂວງ ຫລວງພະບາງ, ຜົ້ງສາລີ ແລະ ຫົວພັນ ກຽມພ້ອມຮັບມືກັບ ​ການລະບາດ​ຂອງ​ຕັກ​ແຕນ​ ຝູງ​ໄມ້ປ່ອງ ໂດຍການວາງແຜນຢ່າງເປັນລະບົບ, ຕໍ່​ເນື່ອງຕິດພັນກັບ ການສຶກສາອົບຮົມ, ໂຄສະນາເຜີຍແຜ່ ແລະ ປູກຈິດສຳນຶກໃຫ້ປະຊາຊົນ ແລະ ການຈັດຕັ້ງຢູ່ຂັ້ນຮາກຖານ​ ໃນເຂດພື້ນທີ່ ທີ່​ມີ​ການລະບາດຜ່ານມາ ລວມທັງພື້ນທີ່ຫລໍ່ແຫລມ ​ເພື່ອ​ຮັບ​ຮູ້​ເຖິງຜົນ​ກະທົບ ພ້ອມກັນ​ຍົກ​ສູງ​ ສະຕິ​ລະວັງ​ຕົວ​ ໃນ​ການ​ປ້ອງ​ກັນ, ກຳຈັດ ​ແລະ ​ຄວບ​ຄຸມຕັກແຕນ ໃຫ້ທ່ວງທັນກັບສະພາບການ; ໃນສະເພາະ ໜ້າອັນຮີບດ່ວນນີ້ ​ໃຫ້ກົມປູກຝັງສົມທົບ​ກັບ ພະ​ແນ​ກກະສິກໍາ ​ແລະ ປ່າ​ໄມ້ ປະ​ຈໍາ​ແຂວງຫລວງພະບາງ, ຜົ້ງສາລີ ແລະ ຫົວພັນ ສືບຕໍ່ຝຶກອົບຮົມ ໃຫ້ແກ່ວິຊາການ ລວມທັງ​ອາສາ​ສະໝັກ (ທີ່​ເປັນ​ຊາວ​ກະສິກອນ) ​ເພື່ອ​ສ້າງ​ເປັນ​ກຳລັງ​ແຮງ​ຢ່າງ​ພຽງພໍ ກຽມພ້ອມຮັບມືກັບ ການລະບາດຂອງຕັກແຕນ ທີ່ຈະເກີດຂຶ້ນອີກ ໃນຮອບໃໝ່ນີ້. ​ຕ້ອງປະສານສົມທົບ ລະຫວ່າງ ການນໍາໃຊ້ ພູມປັນຍາຊາວບ້ານ (ດັງ​ໄຟ​ຮົມ​ຄວັນ​ ເພື່ອ​ຂັບ​ໄລ່​ຕັກ​ແຕນ, ​ເກັບ​ຕັກ​ແຕນ, ​ຂຸດ​ຫາ​ໄຂ່ຕັກ​ແຕນ…) ແລະ ການນໍາໃຊ້ເຕັກນິກ ວິທະຍາສາດ (ຢາປາບສັດຕູພືດ, ການສີດພົ່ນສານເຄມີ…) ພ້ອມດຽວກັນ ກໍຕ້ອງ​ຄຳນຶງ​ເຖິງ​ຜົນ​ກະທົບ​ ຕໍ່ສຸຂະພາບຄົນ, ສັດ ແລະ ພືດ ລວມທັງ​ສິ່ງ​ແວດ​ລ້ອມ ອື່ນໆ; ໃຫ້​ພະ​ແນ​ກກະສິກໍາ ​ແລະ ປ່າ​ໄມ້ ປະ​ຈໍາ​ແຂວງ ຫລວງພະບາງ, ຜົ້ງສາລີ ແລະ ຫົວພັນ ຖືເອົາວຽກນີ້ ເປັນວຽກບູລິມະສິດຂອງຕົນ, ຜັນ​ຂະຫຍາຍ​ເປັນແຜນການເຄື່ອນໄຫວ ອັນ​ລະອຽດ ແລະ ມີການແຕ່ງຕັ້ງ ຄະນະຮັບຜິດຊອບ ເພື່ອຊີ້ນໍາ-ບັນຊາ​ການຈັດ​ຕັ້ງ​ປະຕິບັດ​ ຢ່າງແທດເຖິງຕົວຈິງ.

ໃນກໍລະນີເກີດການ ລະບາດຢູ່ພື້ນທີ່ໃດ ແມ່ນມອບໃຫ້ບ້ານ ຫລື ເມືອງນັ້ນ ເປັນເຈົ້າການປຸກ ລະດົມ ປະຊາຊົນ, ກໍາລັງທະຫານ ແລະ ຕໍາຫລວດ​ ໃນພື້ນທີ່ໃກ້ຄຽງ ຊ່ວຍກັນຄວບຄຸມ ແລະ ກໍາຈັດ ຕາມວິທີການທີ່ໄດ້ຝຶກຊ້ອມໄວ້ ແລ້ວຢ່າງທັນການ; ສໍາລັບງົບປະມານຮັບໃຊ້ ວຽກງານດັ່ງກ່າວ, ໃຫ້​ພະແນກ ກະສິກໍາ ແລະ ປ່າໄມ້ ປະຈໍາ​ແຂວງຫລວງພະບາງ, ຜົ້ງສາລີ ແລະ ຫົວພັນ ສ້າງ​​ເປັນແຜນການ​ລະອຽດ (​​ແຜນ​ວຽກ, ​ແຜນ​ຄົນ ​ແລະ​ ແຜນ​ງົບປະມານ) ​ເພື່ອ​ສະ​ເໜີ ຄະນະກໍາມະການປ້ອງກັນ ແລະ ຄວບຄຸມໄພພິບັດ ຂັ້ນແຂວງ ​ແລະ ​ຂັ້ນສູນ​ກາງ ຕາມ​ຂັ້ນຕອນ ເພື່ອກຽມພ້ອມຮັບມືກັບການລະບາດ ຂອງຕັກແຕນ ໃນ​ໄລຍະເດືອນ ​ເມສາມິ​ຖຸ​ນາ ນີ້; ໃຫ້ກົມປູກຝັງ ສົມທົບກັບພາກສ່ວນກ່ຽວຂ້ອງ ອ້ອມຂ້າງສູນກາງ ແລະ ທ້ອງຖິ່ນ ສືບຕໍ່ປຸກລະດົມແຫລ່ງທຶນ ຈາກທຸກພາກສ່ວນເສດຖະກິດ ໃນສັງຄົມ, ນັບທັງພາຍໃນ ແລະ ຕ່າງປະເທດ ລວມທັງອົງການ ຈັດຕັ້ງສາກົນອື່ນໆ. ພິເສດ ແມ່ນປະເທດເພື່ອນມິດໃກ້ຄຽງ ທີ່ເພີ່ນມີບົດຮຽນ ແລະ ເຄື່ອງມືອຸປະກອນ; ມອບໃຫ້ກົມປູກຝັງອອກຄໍາແນະນໍາ ທາງດ້ານວິຊາການ ເພື່ອຈັດຕັ້ງປະຕິບັດ ຄໍາສັ່ງສະບັບນີ້ ໃຫ້ໄດ້ຮັບຜົນດີ. ຜ່ານການຈັດຕັ້ງປະຕິບັດ ມີຂໍ້ສະດວກ, ຫຍຸ້ງຍາກແນວໃດ ໃຫ້ລາຍງານການນຳ ກະຊວງກະສິກຳ ແລະ ປ່າໄມ້ ຊາບເປັນປົກກະຕິ.

 

ແຫລ່ງຂ່າວ:

ຂປລ

ບົດຄວາມຫຼ້າສຸດ

ຕຳກາງອາກາດ ເຫດລົດບິນຕໍາກັນກາງອາກາດຢູ່ເມືອງສາງຊຸນ ສປ.ຈີນ ໃນລະຫວ່າງຊ້ອມການສະແດງເປີດໂຕລົດບິນໄດ້

ໃນວັນທີ 18/09/2025 ມີລາຍງານຈາກສຳນັກຂ່າວປະເທດຈີນ ເກີດອຸບປະຕິເຫດ ລົດບິນຕໍາກັນລະຫວ່າງຊ້ອມການສະແດງ ທີ່ເມືອງສາງຊຸນ ຂອງປະເທດຈີນ ລາຍງານມີຜູ້ບາດເຈັບ 1 ຄົນ. ອຸບບັດຕິເຫດດັ່ງກ່າວໄດ້ເກີດຂຶ້ນໃນຕອນທີ່ບໍລິສັດ Xpeng ຂອງປະເທດຈີນ ໄດ້ຈັດງານສະແດງເປີດໂຕລົດບິນ. ສະແດງເຖິງເຕັກໂລໂນຊີທີ່ທັນສະໄໝ...

ຍ້ອນຫຼັບໃນ! ກະບະລີໂວ້ຕຳລົດສອງແຖວ ບາດເຈັບ 18 ຄົນ ໃນນັ້ນ 3 ຄົນສາຫັດ

ກະບະລີໂວ້ຫຼັບໃນຕຳລົດສອງແຖວ ບາດເຈັບ 18 ຄົນ ໃນນັ້ນ 3 ຄົນສາຫັດ ຢູ່ບ້ານດ້ານຊ້າງ ເມືອງໄຊທານີ ນະຄອນຫຼວງວຽງຈັນ ເຈົ້າໜ້າທີ່ ປກສ ເມືອງໄຊທານີ ນະຄອນຫຼວງວຽງຈັນ ໃຫ້ຮູ້ວ່າ:...

ທັງໜ້າຕາດີ ທັງຈິດໃຈດີ Felix Stray kids ໃນ 2 ປີທີ່ (2024-2025) Felix ໄດ້ບໍລິຈາກໃຫ້ປະເທດລາວ ລວມມູນຄ່າທັງໝົດປະມານ 3 ຕື້ກີບ

ທັງໜ້າຕາດີ ທັງຈິດໃຈດີ Felix Stray kids ຂອບໃຈທີ່ໃຫ້ການສະໜັບສະໜູນມາຕະຫຼອດ 2 ປີ (2024-2025) ທີ່ໄດ້ເຂົ້າມາຊ່ວຍເຫຼືອເດັກນ້ອຍໃນປະເທດລາວໃຫ້ມີຊີວິດການເປັນຢູ່ ແລະ ສະພາບເວດລ້ອມທີ່ດີຂຶ້ນ, ໃນ 2...

ຕ້ອງກະກຽມຂໍ້ມູນຫຍັງແນ່ ເພື່ອຂຽນປະກອບເອກະສານເຮັດບັດປະຈໍາຕົວດິຈິຕອນ ກຽມພ້ອມໄວ້ ເພື່ອຄວາມສະດວກ ແລະ ວ່ອງໄວ

ໃນປັດຈຸບັນໃນນະຄອນຫຼວງວຽງຈັນສາມາດເຮັດບັດປະຈໍາຕົວໄດ້ແລ້ວ ຢູ່ທີ່ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ບ້ານແສງສະຫວ່າງ ເມືອງໄຊເສດຖາ ນະຄອນຫຼວງວຽງຈັນ ເຊິ່ງກ່ອນທີ່ຈະເຮັດບັດປະຈຳຕົວດິຈິຕອນແມ່ນ ຕ້ອງໄດ້ຊື້ແບບຟອມປະກອບຂໍ້ມູນ ລາຄາ 30,000 ກີບ ແລະ ຈະເປີດບໍລິການເຮັດບັດປະຈຳຕົວໃນທົ່ວປະເທດໃນຕົ້ນເດືອນຕຸລາ...