Huawei P9 ແລະ P9 Plus ເປີດໂຕຢ່າງເປັນທາງການແລ້ວ!!

1
1928

ສຸດທ້າຍກໍມາເຖິງແລ້ວ!!! ສຳລັບງານເປີດໂຕສະມາດໂຟນຊີຣີຍອດນິຍົມແບບ P ເຊິ່ງມື້ນີ້ເອງທາງ Huawei ກໍໄດ້ຈັດງານເປີດໂຕຢ່າງເປັນທາງການແລ້ວທີ່ເມືອງລອນດອນ (London) ປະເທດອັງກິດ. ຫຼັງຈາກທີ່ມີຂ່າວລືອອກມາທຸກມື້ຂອງສະມາດໂຟນຊີຣີນີ້ ບໍ່ວ່າຈະເປັນຮູບຫຼຸດ ລວມໄປເຖິງສະເປັກແລະລາຄາອີກນຳ ແຕ່ວ່າສິ່ງທີ່ປ່ຽນໄປສຳລັບຂ່າວໃນຄັ້ງນີ້ກໍຄື P9 Plus ເຊິ່ງຈະເປັນໂຕແທນໃຫ້ກັບລຸ້ນ P9 Max ທີ່ມີຂ່າວລືອອກມາກ່ອນນີ້

image

Huawei P9

ສຳລັບ Huawei P9 ເປັນສະມາດໂຟນລຸ້ນເຮືອທຸງຈາກຫົວເຫວີ່ຍ ເຊິ່ງການອອກແບບໃນລຸ້ນນີ້ນັ້ນແມ່ນມີແຖບທີ່ຊ່ວຍໃຫ້ສັນຍານມີຄວາມສະຖຽນແລະດີຂຶ້ນຄືກັນກັບ iPhone 6s. ສ່ວນດ້ານຂອງໜ້າຈໍນັ້ນມາພ້ອມກັບໜ້າຈໍຂະໜາດ 5.2 ນິ້ວ, ຄວາມລະອຽດ 1980×1080 ພິກເຊວ (FHD) ແລະຈໍນັ້ນແມ່ນໃຊ້ຈໍ IPS LCD.

image

ໃນດ້ານຂອງຮາດແວຣນັ້ນແມ່ນໃຊ້ງານຊິບປະມວນຜົນ Kirin 955 ເຊິ່ງເປັນຊິບລຸ້ນທີ່ຖືກປັບປຸງແກ້ໄຂມາຈາກລຸ້ນ Kirin 950 ທີ່ໃຊ້ງານໃນ Mate 8. ເຊິ່ງເປັນຊິບປະມວນຜົນແບບ octa-core ຄວາມໄວທີ່ 2.5GHz ສຳລັັບ Quad-Cortex-A72 ແລະຄວາມໄວທີ່ 1.8GHz ສຳລັບ Quad-Cortex-A53.

ສຳລັບ P9 ນີ້ຈະມາພ້ອມກັບ 2 ລຸ້ນໄດ້ແກ່: ລຸ້ນສະເປັກຕ່ຳທີ່ມາພ້ອມກັບ ROM 32 GB ແລະ RAM 3GB ແລະລຸ້ນສະເປັກສູງແມ່ນ ROM 64 GB ແລະ RAM 4GB. ທັງ 2 ລຸ້ນນັ້ນຮອງຮັບ microSD ຄືກັນ (ສູງສຸດ 128 GB)

image

ໃນທີ່ສຸດກໍມາຮອດຄຸນສົມບັດຫຼັກທີ່ຄິດວ່າເປັນຂ່າວຫຼາຍທີ່ສຸດສຳລັບສະມາດໂຟນລຸ້ນນີ້. ນັ້ນກໍຄືກ້ອງຂອງລຸ້ນນີ້ນັ້ນຈະມາພ້ອມກັບກ້ອງຄູ່ທີ່ຮ່ວມກັນພັດທະນາກັບບໍລິສັດ Leica ຈາກເຢຍລະມັນ, ເຊິ່່ງ P9 ມາພ້ອມກັບກ້ອງຄູ່ທັງສອງມີຄວາມລະອຽດ 12 ລ້ານພິກເຊວ, ກ້ອງເບື້ອງໜຶ່ງເປັນໂຕກວດຈັບຄວາມລະອຽດສີຕ່າງໆ ແລະກ້ອງອີກເບື້ອງແມ່ນມີໜ້າທີ່ກວດຈັບສະເພາະຄວາມລະອຽດສີດຳແລະຂາວເທົ່ານັ້ນ. ເຊິ່ງຈະຊ່ວຍໃຫ້ສາມາດກວດຈັບສີເທົາ ແລະສີໃຫ້ເປັນທຳມະຊາດຫຼາຍຂຶ້ນ. ສຳລັບກ້ອງທັງສອງຄູ່ນັ້ນແມ່ນຈະເຮັດວຽກຮ່ວມກັນໄດ້ຢ່າງລົງຕົວ ເຊິ່ງຈະສາມາດເຮັດໃຫ້ການສົ່ງພາບມີຄວາມລະອຽດຂຶ້ນບໍ່ວ່າຈະເປັນແສງທີ່ດີຂຶ້ນແລະຫຼຸດຮູບໃຫ້ມີນອຍ (noise) ໜ້ອຍລົງໃນບ່ອນທີ່ມີແສງໜ້ອຍ

image

ສຳລັບຮູຮັບແສງແມ່ນ f/2.2 ແລະເລນມີຄວາມກວ້າງໃນການເບິ່ງເຫັນທຽບເທົ່າກັບເລນກ້ອງທີ່ 27 ມມ ແລະ 35 ມມ. ລະບົົບໂຟກັດອັດຕະໂນມັດແມ່ນອາໄສການລວມຕົວກັນຂອງເລເຊີ, ການຄຳນວນຄວາມຄົມຊັດແລະເລິກ (ໜ້າຈະເປັນ Algorithm ທີ່ຢູ່ເທິງພື້ນຖານຄວາມແຕກຕ່າງລະຫວ່າງກ້ອງທັງສອງທີ່ສາມາດເບິ່ງເຫັນໄດ້) ແລະ ມີແຟລັດຄູ່ LED ທີ່ຈະຊ່ວຍໃຫ້ຖ່າຍຮູບໃນບ່ອນມືດໄດ້ຢ່າງດີ. ກ້ອງໜ້າຄວາມລະອຽດ 8 ລ້ານພິກເຊວ

ສຳລັບໂຕເຄື່ອງນັ້ນເຮັດມາຈາກອະລູມີນ້ຽມ ເຊິ່ງມີລັກສະນະຄືກັນກັບ Nexus 6P ໂດຍສະເພາະແມ່ນແຖບກ້ອງດ້ານຫຼັງ ແລະມີລະບົບສະແກນລາຍນິ້ວມືທີ່ດ້ານຫຼັງໂຕເຄື່ອງ. ໃຊ້ງານລະບົບ Android 6.0 MarshMallow ແລະຄອບດ້ວຍ EMUI 4.1

image

ສຳລັບ P9 ນັ້ນມາພ້ອມກັບແບັດເຕີຣີຂະໜາດ 3,000mAh ແລະສິ່ງທີ່ເພີ່ມມາໃໝ່ອີກຄືແມ່ນພອຣດ USB Type-C.

Huawei P9 Plus

image

P9 Max ເປັນຊື່ລຸ້ນທີ່ມີຂ່າວລືມາກ່ອນໜ້ານີ້ ແຕ່ວ່າຕອນນີ້ນັ້ນໄດ້ເປີດໂຕເປັນ Huawei P9 Plus ແທນ. ສຳລັບເຄື່ອງນີ້ແມ່ນມີໜ້າຈໍຂະໜາດ 5.5 ນິ້ວ, ຄວາມລະອຽດ 1980×1080 ພິກເຊວ (FHD) ແຕ່ວ່າມີການປ່ຽນມາໃຊ້ຈໍ AMOLED ແທນຈໍ IPS LCD ແລະຍັງມາພ້ອມກັບເທັກໂນໂລຢີ Press Touch

ໃນດ້ານຂອງຊິບປະມວນຜົນ, ຄຸນສົມບັດອື່ນໆ ແລະ ກ້ອງນັ້ນແມ່ນໃຊ້ໂຕດຽວກັນກັບ P9.

ໃນສ່ວນຂອງ P9 Plus ມີພຽງແຕ່ລຸ້ນ 64GB ແລະ RAM 4GB ເທົ່ານັ້ນ ເຊິ່ງແຕກຕ່າງຈາກ P9 ທີ່ມີໃຫ້ເລືອກເຖິງ 2 ລຸ້ນ ແລະຍັງໄດ້ມີການເພີ່ມແບັດເຕີຣີຂຶ້ນເປັນ 3,400mAh. ທາງ “ຫົວເຫວີ່ຍ” ບອກວ່າສຳລັບລຸ້ນໃຫຍ່ນັ້ນຍັງມາພ້ອມກັບ dual-IC Rapid Charge, ເຊິ່ງສາມາດເຮັດໃຫ້ເຈົ້າສາມາດລົມໂທລະສັັບໄດ້ເຖິງ 6 ຊົ່ວໂມງສຳລັັບການສາກພຽງ 10 ນາທີເທົ່ານັ້ນ!!

ໃນເລື່ອງຂອງລາຄາສຳລັບ Huawei P9 ເລີ່ມຕົ້ນແມ່ນ £599 (5.545.000 ກີບ), ໃນຂະນະທີ່ລຸ້ນ P9 Plus ນັ້ນລາຄາຢູ່ທີ່ £749 (6.934.00 ກີບ). ສຳລັບສະມາດໂຟນທັງສອງລຸ້ນນັ້ນຈະພ້ອມຂາຍໃນວັນທີ 16 ເມສານີ້ ແລະຈະຂາຍໃນ 29 ປະເທດທີ່ຍຸໂຣບ ແລະຕາເວັນອອກກາງ ເປັນກຸ່ມທຳອິດ

ໝາຍເຫດ: ໃຜທີ່ກັງວົນເລື່ອງລາຄາກໍບໍ່ຕ້ອງເປັນຫ່ວງຫຼາຍເພາະລາຄາຂາຍຢູ່ນອກນັ້ນຈະແພງກວ່າລາຄາທີ່ນຳເຂົ້າປະເທດລາວຫຼາຍ

ທີ່ມາ:gsmarena

1 COMMENT

  1. […] ໄດ້ເປີດໂຕສະມາດໂຟນເຮືອທຸງລຸ້ນໃໝ່ຄື P9 ແລະ P9 Plus ຢ່າງເປັນທາງການ ທີ່ມີພັນທະມິດແບບ Leica […]

Comments are closed.