# ວິເສດ ສະແຫວງສຶກສາ
ມື້ນີ້ຂໍສະເໜີກ່ຽວກັບມາດຕະການ ແລະ ກົດໝາຍໃໝ່ໆໝາດໆກ່ຽວກັບຢາສູບ,ກ່ຽວກັບວັດຖຸມີຄ່າປະເພດເອ້ຍ້ອງ ແລະ ສິດທິຂອງແມ່ຮ້າງ ໃນຕ່າງປະເທດມາຝາກ
ກ່ຽວກັບຢາສູບ ໃນທີ່ສຸດກຳປູເຈຍກໍໄດ້ກາຍເປັນປະເທດອັນດັບທີ 8 ໃນອາຊຽນທີ່ມີຂໍ້ບັງຄັບໃຫ້ພິມຮູບກ່ຽວກັບອັນຕະລາຍຂອງຢາສູບໃສ່ຊອງຢາສູບ ໂດຍໃຫ້ກວມເອົາເນື້ອທີ່ 55% ຂອງເນື້ອທີ່ຊອງ. ມາຮອດປັດຈຸບັນ ຍັງແຕ່ລາວກັບມຽນມາເທົ່ານັ້ນທີ່ຍັງບໍ່ທັນມີການລົງມືຕົວຈິງເທື່ອ (ແຕ່ມີແຜນຮຽບຮ້ອຍແລ້ວ)ນີ້ແມ່ນຂ່າວໃນວັນທີ 26 ມີນານປີນີ້ ຢູ່ໜ້າໜັງສືພິມວຽງຈັນທາມເຮົາເອງນີ້ລະ.ຂ່າວໄດ້ໃຫ້ລາຍລະອຽດຕື່ມວ່າ ກົດໝາຍຄວບຄຸມຢາສູບກຳປູເຈຍໄດ້ຖືກຮັບຮອງເອົາແຕ່ 11 ເດືອນຜ່ານມາ ຕໍ່ຈາກນັ້ນໃນເດືອນພະຈິກປີ 2015 ລັດຖະບານກຳປູເຈຍກໍໄດ້ອອກດຳລັດສອງສະບັບ ເພື່ອຜັນຂະຫຍາຍກົດໝາຍຄວບຄຸມຢາສູບ, ໃນນັ້ນລວມມີດຳລັດບັງຄັບໃຫ້ບໍລິສັດຢາສູບພິມຮູບແບບເຕືອນເຖິງໄພອັນຕະລາຍຈາກການສູບຢາໃສ່ຊອງຢາສູບທຸກຊອງ. ພໍຕົກມາຕົ້ນເດືອນມີນາປີນີ້ ກຳປູເຈຍກໍໄດ້ອອກດຳລັດອີກ 1 ສະບັບ ກຳນົດໃຫ້ສະຖານທີ່ເຮັດວຽກ, ສະຖານທີ່
ສາທາລະນະ, ໂຮງແຮມ ແລະ ຮ້ານອາຫານທຸກແຫ່ງ ເປັນບ່ອນປອດຢາສູບຢ່າງສິ້ນເຊີງ, ໃຜລະເມີດຈະຖືກປັບໄໝເປັນເງິນຈຳນວນ 5 ໂດລາສະຫະລັດ/ຄັ້ງ. ສ່ວນສະຖານເຊິ່ງກຳນົດໃຫ້ເປັນບ່ອນປອດຄວັນຢາ ແຕ່ບໍ່ຕິດປ້າຍ “ຫ້າມສູບຢາ” ນັ້ນ ກໍຈະຖືກປັບໄໝເປັນຈຳນວນເງິນ 12,5 ໂດລາສະຫະລັດ. ສຳລັບໂຮງແຮມ ແລະ ຮ້ານອາຫານທີ່ບໍລິການຂອງເຂ່ຍຂີ້ຢານັ້ນກໍຈະຖືກປັບໄໝເປັນຈຳນວນເງິນເທົ່າໆກັນ ເພາະຖືວ່າເປັນການຊຸກຍູ້ໃຫ້ຄົນສູບຢາ.
ກ່ຽວກັບເຄື່ອງປະດັບເອ້ຍ້ອງ ສ່ວນຢູ່ມຽນມານັ້ນ ລັດຖະບານມີແຜນອອກລະບຽບການເພີ່ມຕື່ມສະເພາະ ເພື່ອເຮັດໃຫ້ການຜັນຂະຫຍາຍກົດໝາຍຄຸ້ມຄອງວັດຖຸມີຄ່າສຳລັບເພດເອ້ປີ 1995 ມີປະສິດທິພາບ ເພາະວ່າຜ່ານມາມີແຕ່ກົດໝາຍຂໍ້ຫລໍ້ ແຕ່ບໍ່ມີຂໍ້ກຳນົດກົດລະບຽບ ເພື່ອຫັນເປັນການປະຕິບັດຕົວຈິງ. ໃນປັດຈຸບັນ ກະຊວງບໍ່ແຮ່ ແລະສະມາຄົມກຸ່ມນັກທຸລະກິດອັນຍະມະນີ ແລະ ເຄື່ອງເອ້ຍ້ອງ ພວມຮ່ວມກັນສ້າງຂໍ້ກຳນົດ ແລະ ລະບຽບການດັ່ງກ່າວ.ລະບຽບການຈະກຳນົດບັນດາຫລັກການກ່ຽວກັບການອະນຸມັດຢ່າງເປັນທາງການ ເພື່ອສົ່ງອອກຄຳ ແລະ ເພັດ. ນອກນັ້ນຍັງມີແຜນຈະກຳນົດຫລຸດພາສີການສົ່ງອອກວັດຖຸມີຄ່າທີ່ຍັງບໍ່ທັນໄດ້ເຈຍລະໄນລົງເປັນ 5% ຈາກ 30% ທີ່ກຳນົດໄວ້ໃນກົດໝາຍ. ປະເທດທີ່ເປັນລູກຄ້າໃຫຍ່ສຳລັບວັດຖຸມີຄ່າຂອງມຽນມານັ້ນໄດ້ແກ່ ສປ ຈີນ ແລະ ສ.ເກົາຫລີ. ໃນສົກປີ 2014-2015 ມູນຄ່າການສົ່ງອອກວັດຖຸມີຄ່າຂອງມຽນມານັ້ນບັນລຸເຖິງ 14,63 ລ້ານໂດລາສະຫະລັດ.
ກ່ຽວກັບສິດທິຂອງແມ່ຍິງທີ່ເປັນຮ້າງ ໃນວັນທີ 8 ເດືອນມີນານີ້ ກອງປະຊຸມຄະນະລັດຖະມົນຕີຍີ່ປຸ່ນ ໄດ້ຮັບຮອງເອົາມະຕິຫລຸດໄລຍະເວລາການຫ້າມແມ່ຍິງທີ່ເປັນຮ້າງແຕ່ງດອງໃໝ່ຈາກ 180 ຫລື 6 ເດືອນ ຍັງເຫລືອສູງສຸດພຽງ100 ວັນ. ຂໍອະທິບາຍຕື່ມວ່າ ເມື່ອກ່ອນ, ແມ່ຍິງຍີ່ປຸ່ນທີ່ເປັນແມ່ຮ້າງນັ້ນກ່ອນຈະສາມາດແຕ່ງດອງໃໝ່ກໍຕ້ອງໄດ້ລໍຖ້າເຖິງ 6 ເດືອນ ຫລື 180 ວັນ. ການປັບຫລຸດໄລຍະລໍຖ້າ ເພື່ອແຕ່ງດອງໃໝ່ຂອງຍິງແມ່ຮ້າງຍີ່ປຸ່ນມີຂຶ້ນຍ້ອນມີສຽງວິພາກວິຈານຈາກອົງການສິດທິມະນຸດ ໂດຍສະເພາະແມ່ນຈາກຄະນະກຳມະການສົນທິສັນຍາວ່າດ້ວຍການລຶບລ້າງທຸກຮູບແບບການຈຳແນກຕໍ່ເພດຍິງ ຫລື ຊີດໍ (CEDAW). ຕາມທັດສະນະຂອງຊີດໍ, ຍີ່ປຸ່ນຄວນຍົກເລີກບໍ່ໃຫ້ມີໄລຍະລໍຖ້າສຳລັບແມ່ຍິງທີ່ເປັນຮ້າງ ເຊິ່ງຕ້ອງການແຕ່ງດອງ ເພາະຖືວ່າຍັງເປັນການຈຳແນກຢູ່.
ຂ່າວຈາກ: 