ຕົ້ນໝາກມັງກອນສາມາດ ປູກໄດ້ໃນທຸກສະພາບດິນເຊັ່ນ:
ດິນປົນຊາຍ, ດິນໜຽວ, ດິນເຮື້ອສຳລັບດິນໜຽວ ແລະດິນເຮື້ອຈຳເປັນຕ້ອງມີການປັບໜ້າດິນດ້ວຍການໃສ່ຝຸ່ນຄອກ ແລະແກບດຳ, ພ້ອມນັ້ນຕົ້ນມັງກອນເປັນຕົ້ນໄມ້ທີ່ມັກອາໄສຢູ່ໃນດິນປອດໂປ່ງ, ບໍ່ແອອັດຈົນເກີນໄປ ແລະສາມາດລະບາຍນ້ຳໄດ້ດີຍ້ອນວ່າໝາກມັງກອນເປັນພືດຕະກູນດຽວກັບຕົ້ນກະບອງເພັດ, ຈິ່ງເປັນພືດທີ່ມັກອາກາດຮ້ອນແລະແດດກ້າ, ການປູກໝາກມັງກອນນັ້ນຈິ່ງຄວນກຽມພື້ນທີ່ໃຫ້ຢູ່ໃນບໍລິເວນກາງແຈ້ງບໍ່ມີຮົ່ມເງົາຈາກຕົ້ນໄມ້ອື່ນມາບັງ, ໝາກມັງກອນຈະສາມາດຈະເລີນເຕີບໂຕ ແລະອອກດອກ, ອອກໝາກໄດ້ເປັນຢ່າງດີ.
ໝາກມັງກອນສາມາດປູກໄດ້ 2 ຮູບແບບເປັນຕົ້ນແມ່ນປູກໃນ ຖັງ (ໃຊ້ຕົ້ນມັງກອນ 1-2 ຕົ້ນຕໍ່ໜຶ່ງຫຼັກ) ແລະການປູກໃນພື້ນທີ່ ກວ້າງ (ໃຊ້ຕົ້ນມັງກອນ 4 ຕົ້ນຕໍ່ ໜຶ່ງຫຼັກ).
ສ່ວນວິທີການປູກແບບຖັງຊຶ່ງເປັນການປູກເພື່ອໄວ້ປະດັບເທົ່ານັ້ນ, ອຸປະກອນປະກອບມີທໍ່ນ້ຳຂະໜາດກວ້າງ 4 ນີ້ວ, ຍາວ 1,3 ແມັດ ຫຼື ເສົາໄມ້ເນື້ອແຂງກໍໄດ້ແລ້ວແຕ່ຄວາມສະດວກ, ຖັງກວ້າງ 50 ຊັງຕີແມັດ, ຄ້າງດ້ານເທິງອາດຈະເຮັດຈາກໄມ້ ຫຼື ປູນເປັນຮູບ 4 ລ່ຽມ ຫຼື ຈະຕຸລັດກວ້າງ, ຍາວ 30 ຊັງຕີແມັດ, ໃຍໝາກພ້າວ, ດິນ ແລະ ເຊືອກຟາງ.
ຫຼັງຈາກທີ່ກຽມອຸປະກອນແລ້ວກໍສາມາດໃຊ້ເສົາຕັ້ງເປັນຫຼັກໃນຖັງ, ຈາກນັ້ນໃສ່ໃຍໝາກພ້າວຮອງກົ້ນຖັງເພື່ອໃຫ້ນ້ຳຖ່າຍເທໄດ້ດີໃນປະລິມານ 1/3 ໃນອັດຕາສ່ວນຂອງກະຖັງຈາກນັ້ນນຳດິນ ປະສົມກັບໃຍໝາກພ້າວ ຫຼື ແກບດຳ(ແກບທີ່ບົ່ມຈົນດຳ) ໃສ່ລົງໄປໃນຖັງຈົນຮອດຂອບຖັງຈາກນັ້ນໃຫ້ ນຳເອົາຕົ້ນໝາກມັງກອນມາປູກ ໃຫ້ໃກ້ກັບເສົາແລ້ວໃຊ້ເຊືອກຟາງ ມັດຕົ້ນໝາກມັງກອນໃຫ້ຕິດກັບເສົາ ແຕ່ບໍ່ຕ້ອງມັດແໜ້ນຈົນເກີນໄປ, ຄວນມັດໄວ້ຈົນກວ່າວ່າຕົ້ນໝາກມັງກອນຈະເລີນເຕີບໂຕຈົນສາມາດພັນຫົວເສົາ, ແລ້ວຈິ່ງນຳດິນມາປົກດ້ານເທິງຂອງຖັງໝາກມັງກອນຈະມີລັກສະນະເປັນລ່ຽມ ແຕ່ດ້ານໜຶ່ງຂອງຕົ້ນແປດັ່ງນັ້ນເວລາມັດຕົ້ນມັງກອນໃຫ້ຈັບເອົາດ້ານແປຂອງຕົ້ນເຂົ້າຕິດກັບຫຼັກເພາະດ້ານແປຈະເປັນດ້ານທີ່ຈະ ອອກຮາກ.
ສຳລັບວິທີການປູກໃນພື້ນທີ່ກວ້າງກໍສາມາດປະຕິບັດຄືກັບການປູກໃນຖັງ, ແຕ່ຈະແຕກຕ່າງເລັກນ້ອຍເປັນຕົ້ນແມ່ນການຕັ້ງເສົາເປັນຫຼັກດ້ວຍທໍ່ນ້ຳກວ້າງ 6 ນີ້ວ, ຍາວ 2 ແມັດ ຫຼື ເສົາໄມ້ເນື້ອ ແຂງນັ້ນຈະຂຸດດິນເລິກລົງໄປ 30 ຊັງຕີແມັດ, ໃຊ້ໄມ້ສົນ ຫຼື ໄມ້ໄຜ່ລຳປ້ອງໃຫຍ່ເປັນເສົາເຂັມຍາວ 60 ຊັງຕີແມັດ, ຕອກເລິກລົງໄປໃນດິນ 30 ຊັງຕີແມັດ, ພົ້ນຈາກດິນ 30 ຊັງຕີແມັດ, ຈາກນັ້ນນຳຫຼັກມາຕັ້ງເທິງເສົາເຂັມທີ່ພົ້ນແລ້ວເທປູນລົງໃນເສົາປະມານ 1 ກະປ໋ອງປູນເພື່ອໃຫ້ປູນຕິດກັບຫຼັກ ແລະເສົາເຂັມເຂົ້າໃສ່ກັນ, ຈາກນັ້ນຟັນໃຫ້ເປັນຂອດຮອບຫຼັກລັກສະນະຄ້າຍຄືຝາຊີ, ຫຼັງຈາກນັ້ນກໍນຳຕົ້ນມັງກອນ 4 ຕົ້ນມາປູກລົງ 4 ດ້ານຂອງຫຼັກ ໂດຍ ໃຊ້ເຊືອກຟາງມັດແບບຫຼວມໆ ແລະຕ້ອງມັດຈົນກວ່າຈະພົ້ນຫົວ ຫຼັກ, ຈາກນັ້ນນຳດິນບໍລິເວນຂ້າງໆ ຂອບມາປົກເທິງຕົ້ນທີ່ປູກແຕ່ລັກສະນະຍັງຄົງຄ້າຍຄືຝາຊີການເຮັດແບບຝາຊີເພື່ອໃຫ້ນ້ຳສາມາດໄຫຼຜ່ານໂດຍບໍ່ຂັງຢູ່ບໍລິເວນຕົ້ນ ຊຶ່ງ ອາດຈະເປັນສາເຫດເຮັດໃຫ້ເກີດ ໂລກເນົ່າ, ຫຼັງຈາກນັ້ນໃຊ້ເຊືອກຟາງປິດອ້ອມຮອບຂອດຖືວ່າສຳເລັດ.
ສ່ວນການຮັກສາ ແລະການ ໃສ່ປຸ໋ຍຄວນໃສ່ທຸກ 15 ວັນ, ໃສ່ ເທື່ອລະ 2-4 ບ່ວງ ຖ້າເປັນປຸ໋ຍເຄມີ, ຫຼັງຈາກໃສ່ປຸ໋ຍແລ້ວຕ້ອງຫົດນ້ຳຕິດຕໍ່ກັນເປັນເວລາ 3 ວັນ, ແຕ່ຖ້າມີຝຸ່ນຄອກເຊັ່ນ ຂີ້ໄກ່ ຫຼື ຂີ້ງົວກໍໃຊ້ໄດ້ ແລະໃຫ້ໃສ່ເດືອນລະ 1 ຄັ້ງ, ສ່ວນການໃຫ້ນ້ຳແມ່ນສາມາດໃຫ້ 1 ຄັ້ງພາຍໃນ 2-3 ວັນ ແລະບໍ່ຄວນຫົດຫຼາຍເກີນໄປ ເພາະອາດເຮັດໃຫ້ເປັນໂລກຮາກ ເນົ່າໄດ້.
ເມື່ອປູກໝາກມັງກອນໄດ້ 8 ເດືອນ ຫາ 1 ປີ, ກໍ່ຈະເລີ່ມໃຫ້ ຜົນຜະລິດປະມານ 30 ໝາກຕໍ່ ໜຶ່ງຄ້າງ, ສ່ວນປີທີ 2 ປະມານ 50 ຫມາກຕໍ່ໜຶ່ງຄ້າງ ແລະປີທີ 3 ປະມານ 100-200 ໝາກຕໍ່ ຄ້າງ, ສຳລັບ ປີທີ 4-5 ປະມານ 300 ໝາກຕໍ່ໜຶ່ງຄ້າງຂຶ້ນໄປ ສ່ວນຂະໜາດຂອງ ໝາກໂດຍສະເລ່ຍ ປະມານ 3-4 ໜ່ວຍຕໍ່ກິໂລ, ຫາກຕ້ອງການໃຫ້ໝາກຜະລິດອອກມາ ຕະຫຼອດປີກໍສາມາດເຮັດໄດ້ໂດຍ ໃຊ້ດອກໄຟຂະໜາດ 200 ວັດໜຶ່ງດອກຕໍ່ເສົາສີ່ເສົາເປີດໄຟຕັ້ງແຕ່ 19:00 ໂມງແລງ ຫາ 5:00 ໂມງເຊົ້າຕິດຕໍ່ກັນທຸກຄືນເປັນເວ ລາ 15 ຄືນ, ຕາດອກກໍ່ຈະເລີ່ມສ້າງ ຂຶ້ນມາ, ຈັບເບິ່ງບ່ອນຕາດ້ານລຸ່ມ ຂອງໜາມຈະຮູ້ສຶກໄດ້ຫຼັງ ຈາກ ນັ້ນອີກປະມານ 5 ວັນ ດອກກໍ່ຈະ ພັດທະນາເຕີບໂຕຂຶ້ນເລື້ອຍໆຈົນໄດ້ 15 ວັນກໍຈະບານ ແລະ ປະສົມຕິດອີກ 30 ວັນ ກໍຈະເລີ່ມ ສຸກ ແລະເກັບໝາກໄດ້.
ແຫລ່ງຂ່າວຈາກ: 