ທະນາຄານພັດທະນາອາຊີ ຫຼື ADB ຄາດວ່າເສດຖະກິດຂອງ ສປປ ລາວ ຈະຂະຫຍາຍຕົວເພີ່ມຂຶ້ນໃນປີ 2016 ແລະປີ 2017 ເນື່ອງການສົ່ງອອກກະແສໄຟຟ້າ ແລະການບໍລິການຕ່າງໆທີ່ສືບຕໍ່ມີທ່າເຕີບໂຕເພີ່ມຂຶ້ນ.
ວັນທີ 30 ມີນາ ຜ່ານມາທີ່ສຳນັກງານທະນາຄານພັດທະນາອາຊີ ປະຈຳລາວ ໄດ້ມີກອງປະຊຸມເຜີຍແຜ່ບົດລາຍງານຄາດຄະເນການພັດທະນາຂອງອາຊີ 2016 ໂດຍມີທ່ານ ນາງ ແຊນດຣ້າ ນິໂຄຣ ຜູ້ຕາງໜ້າສຳນັກງານທະນາຄານພັດທະນາອາຊີ ປະຈຳລາວ ພ້ອມດ້ວຍບັນດາສື່ມວນຊົນເຂົ້າຮ່ວມ.
ຕາມບົດລາຍງານຂອງເອດີບີສະບັບໃໝ່ ລະບຸວ່າ: ອຸປະສົງທີ່ຈະເຮັດໃຫ້ເສດຖະກິດຂອງລາວ ຂະຫຍາຍຕົວເພີ່ມຂຶ້ ນໃນປີ 2016 ແລະປີ 2017 ນັ້ ນແມ່ນເນື່ອງຈາກວ່າການສົ່ງອອກກະແສໄຟຟ້າ, ທຸລະກິດກໍ່ສ້າງ ແລະການບໍລິການຕ່າງໆມີທ່າແຮງຂະຫຍາຍຕົວເພີ່ມຂຶ້ນ, ດຸນການຄ້າດີຂຶ້ນ ແລະການລົງທຶນຕ່າງປະເທດເຂົ້າມາລາວເພີ່ມຂຶ້ນບວກກັບລາຄານ້ຳມັນຕ່ຳຈະຊ່ວຍບັນເທົາການຂາດດຸນການຊຳລະຕ່າງປະເທດ ແລະພາວະເງິນເຟີ້.
ໂດຍທັງນີ້ ຍອດມູນຄ່າຜະລິດຕະພັນພາຍໃນ (ຈີດີພີ) ຈະຂະຫຍາຍຕົວປະມານ 6,8% ໃນປີ 2016 ຊຶ່ງເພີ່ມຂຶ້ນເລັກນ້ອຍເມື່ອທຽບກັບປີ 2015 ຢູ່ໃນລະດັບ 6,7% ແລະຄາດວ່າຈະເພີ່ມຂຶ້ນອີກເປັນ 7% ໃນປີ 2017 ໂດຍຜົນກະທົບຈາກການຂະຫຍາຍຕົວທີ່ຊ້າລົງຂອງປະເທດຈີນຕໍ່ກັບການຄ້າ ແລະການລົງທຶນຂອງລາວ ຄາດວ່າຈະບໍ່ຮ້າຍແຮງ ຍ້ອນຜົນຂອງການທີ່ເສດຖະກິດຂອງປະເທດໄທຄ່ອຍໆດີຂຶ້ນ ແລະການຂະຫຍາຍຕົວທີ່ເຂັ້ມແຂງຂອງປະເທດຫວຽດນາມ ສະພາບດັ່ງກ່າວຈະສົ່ງຜົນດີໃຫ້ແກ່ການສົ່ງອອກ, ການທ່ອງທ່ຽວ ແລະການໂອນເງິນກັບເຂົ້າປະເທດເພີ່ມຂຶ້ນໃຫ້ແກ່ ສປປ ລາວ.
ທ່ານ ນາງ ແຊນດຣ້າ ນິໂຄຣ ກ່າວວ່າ: ທ່າແຮງທີ່ມີຕໍ່ເນື່ອງໃນຂະແໜງພະລັງງານ ແລະກໍ່ສ້າງພ້ອມທັງການຂະຫຍາຍຕົວຢ່າງເຂັ້ມແຂງຂອງຂະແໜງການບໍລິການຕ່າງໆ ຈະຊ່ວຍຮັກສາອັດຕາການຂະຫຍາຍຕົວໄວ້ຢ່າງແຂງແຮງຕະຫຼອດໄລຍະສອງປີຕໍ່ໜ້າ ແລະຮັບປະກັນໃຫ້ເສດຖະກິດຮັກສາການຂະຫຍາຍຕົວໄປຕາມແຜນທີ່ວາງໄວ້ທີ່ຈະເຮັດໃຫ້ ສປປ ລາວ ສາມາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາພາຍໃນປີ 2020, ພ້ອມດຽວກັນນີ້ ສປປ ລາວ ຕ້ອງໄດ້ເພີ່ມທະວີຄວາມເຂັ້ມແຂງໃຫ້ແກ່ສະຖານະພາບທາງດ້ານຄັງສຳຮອງເງິນຕາຕ່າງປະເທດຂອງຕົນ ໂດຍປະຕິບັດນະໂຍບາຍຕ່າງໆທາງດ້ານງົບປະມານ ແລະການເງິນຫຼຸດຜ່ອນຜົນກະທົບຈາກຄວາມສ່ຽງຕ່າງໆທີ່ມາຈາກພາຍນອກ ພ້ອມທັງການຂະຫຍາຍພື້ນຖານການສົ່ງອອກໃຫ້ມີຄວາມຫຼາກຫຼາຍ ແລະການປັບປຸງສະພາບແວດລ້ອມພາຍໃນທີ່ອຳນວຍໃຫ້ແກ່ການດຳເນີນທຸລະກິດເພື່ອເພີ່ມການຜະລິດ.
ແນວໃດກໍດີ ການຜະລິດກະແສໄຟຟ້າຄາດວ່າຈະຍັງຮັກສາການຂະຫຍາຍຕົວຢ່າງເຂັ້ມແຂງ ເນື່ອງຈາກວ່າມີຫຼາຍໂຄງການໄຟຟ້າໃໝ່ໄດ້ເລີ່ມທຳການຜະລິດພາຍໃນປີນີ້ ພ້ອມທັງ ໂຄງການໄຟຟ້າຄວາມຮ້ອນຫົງສາທີ່ມີກຳລັງການຜະລິດ 1,9 ກິກກາວັດ ໄດ້ປະກອບສ່ວນເຕັມຄວາມສາມາດໃຫ້ແກ່ ຈີດີພີ ຕະຫຼອດປີຄັ້ງທຳອິດ ນອກນັ້ນ ຂະແໜງກໍ່ສ້າງທີ່ມີເພີ່ມຂຶ້ນໃນບັນດາໂຄງການໄຟຟ້າຕ່າງໆ, ການປຸກສ້າງ ແລະພັດທະນາອາຄານພານິດ ແລະອຸດສາຫະກຳ, ປຸກສ້າງທີ່ຢູ່ອາໄສໃໝ່ ແລະການຂະຫຍາຍຕົວທີ່ເຂັ້ມແຂງຂອງຂະແໜງບໍລິການຕ່າງໆທີ່ໄດ້ຮັບແຮງຊຸກຍູ້ຈາກການທ່ອງທ່ຽວ, ການເງິນ ແລະໂທລະຄົມມະນາຄົມ ແລະການສື່ສານທີ່ມີການຂະຫຍາຍຕົວກໍຍັງຈະຊ່ວຍຍູ້ໜູນໃຫ້ຈີດີພີຂະຫຍາຍຕົວ.
ທັງນີ້ ເຖິງວ່າມາດຕະການເກັບພາສີ ແລະການຄວບຄຸມລາຍຈ່າຍຂອງລັດມີຄວາມຮັດກຸມຂຶ້ນ ກໍຕາມແຕ່ການຂາດດຸນງົບປະມານຍັງຄາດວ່າຈະເພີ່ມຂຶ້ນຈາກ 4,7% ໃນປີ 2015 ມາເປັນ 5% ໃນປີ 2016 ເນື່ອງຈາກວ່າ ປະລິມານຄວາມຕ້ອງການບໍລິໂພກຂອງໂລກຈະຫຼຸດລົງ ພ້ອມທັງການອ່ອນຄ່າລົງຂອງລາຄາທອງ ແລະຄຳ ຊຶ່ງຈະເຮັດໃຫ້ການເກັບພາສີລາຍຮັບງົບປະມານໄດ້ໜ້ອຍລົງ, ການສົ່ງອອກ ຂອງລາວຈະເພີ່ມຂຶ້ນໂດຍສະເພາະການເພີ່ມຂຶ້ນຂອງປະລິມານການຂາຍໄຟຟ້າໃຫ້ປະເທດໄທ, ພາວະເງິນເຟີ້ ຈະຍັງຢູ່ໃນລະດັບທີ່ຕ່ຳເນື່ອງຈາກລາຄານໍ້້າມັນຂອງໂລກຍັງຢູ່ໃນລະດັບຕ່ຳ ຊຶ່ງອັດຕາເງິນ ເຟີ້ໃນປີ 2015 ຢູ່ທີ່ 1,3% ແລະຈະເພີ່ມສູງຂຶ້ນມາຢູ່ທີ່ 1,8% ໃນປີ 2016.
ທີ່ມາ: