ສະພາບບັນຫາຂາດແຄນແຮງງານໃນບັນດາໂຮງຈັກໂຮງງານຕ່າງໆຢູ່ລາວຍັງຄົງເປັນບັນຫາທີ່ແກ້ໄຂບໍ່ຕົກໂດຍສະເພາະແມ່ນໃນໂຮງງານຕັດຫຍິບທີ່ຂະນະນີ້ໄດ້ປະເຊີນຢ່າງໜ້າເປັນຫ່ວງ ສະເພາະປີແລ້ວມີພະນັກງານຫຼຸດລົງ 2 ພັນຄົນ ສະເທືອນເຖິງການຜະລິດບໍ່ໄດ້ ຕາມຈຳນວນລູກຄ້າສັ່ງຊື້ ສົ່ງຜົນກະທົບຕໍ່ຍອດມູນຄ່າການສົ່ງອອກໃນຂະແໜງການນີ້ຫຼຸດລົງຈາກຕົວເລກປີ 2014 ເຖິງ 7,25%.
ວັນທີ 25 ມີນາ 2016 ທີ່ໂຮງແຮມ ອ່າງຄຳ ນະຄອນຫຼວງວຽງຈັນ ສະມາຄົມອຸດສາຫະກຳຕັດຫຍິບລາວ (ສອຕລ) ໄດ້ໄຂກອງປະຊຸມໃຫຍ່ຄັ້ງທີ I ສະໄໝປີ 2015-2018 ໂດຍເປັນປະທານຂອງ ທ່ານ ປອ ໄຊບັນດິດ ຣາຊະພົນ ປະທານ ສອຕລ ພ້ອມນີ້ກໍມີບັນດາແຂກຖືກເຊີນ ແລະສະມາຊິກສະມາຄົມເຂົ້າຮ່ວມ.
ທ່ານ ປອ ໄຊບັນດິດ ຣາຊະພົນ ໄດ້ກ່າວວ່າ: ອຸດສະຫະກຳຕັດຫຍິບລາວ ເປັນຂະແໜງການໜຶ່ງທີ່ທາງພາກລັດໄດ້ໃຫ້ຄວາມສຳຄັນນອນຢູ່ໃນແຜນບຸລິມະສິດຂອງລັດໃນການພັດທະນາໃຫ້ ສປປ ລາວ ຫຼຸດພົ້ນອອກຈາກຄວາມທຸກຍາກທັງເປັນຂະແໜງການທີ່ສາມາດສ້າງວຽກເຮັດງານທຳໄດ້ຢ່າງຫຼວງຫຼາຍ ໂດຍບໍ່ຈຳກັດຄວາມຮູ້ຄວາມສາມາດຂອງແຮງງານ.
ນັບແຕ່ປີ 2003-2011 ອຸດສາຫະກຳຕັດຫຍິບລາວແມ່ນມີການຂະຫຍາຍຕົວຕໍ່ເນຶ່ອງ ແຕ່ຕົກມາຮອດປີ 2012 ທ່ານປະທານ ສອຕລ ໃຫ້ຮູ້ວ່າ: ໄດ້ມີທ່າອຽງຫຼຸດລົງເນື່ອງມາຈາກສະພາບການຂາດແຄນແຮງງານການຍາດແຍ່ງແຮງງານກັນເອງຢູ່ພາຍໃນ ແລະເຄື່ອນຍ້າຍໄປຕ່າງປະເທດ ຊຶ່ງບັນຫາດັ່ງກ່າວແມ່ນໄດ້ແກ່ຍາວຈົນມາເຖິງປະຈຸບັນ ໂດຍການສົ່ງອອກປີ 2015 ຫຼຸດລົງ 7,25% ທຽບໃສ່ປີ 2014 ໃນມູນຄ່າ 174,2 ລ້ານໂດລາຈາກຈຳນວນທັງໝົດ 39,86 ລ້ານຜືນ.
ໃນນັ້ນ ມູນຄ່າສົ່ງອອກໄປຕະຫຼາດອີຢູມີ 157 ລ້ານກວ່າໂດລາຫຼຸດລົງ 8,4%, ສະຫະລັດອາເມຣິກາ 5,4 ລ້ານໂດລາ ເພີ່ມຂຶ້ນ 52,38%, ການາດາ 8,4 ແສນໂດລາຫຼຸດລົງເກືອບ 4 ເທົ່າ, ຍີ່ປຸ່ນ 10 ລ້ານກວ່າໂດລາເພີ່ມຂຶ້ນ 31,75% ແລະສົ່ງອອກໄປຕະຫຼາດອື່ນໆມີມູນຄ່າ 6,4 ລ້ານໂດລາຫຼຸດລົງ 80,16% ຖ້າທຽບໃສ່ປີ 2014 ຜ່ານມາ.
ແນວໃດກໍດີ ສຳລັບທິດທາງໃນຕໍ່ໜ້າ ທ່ານ ປອ ໄຊບັນດິດ ຣາຊະພົນ ຄາດວ່າ ສະພາບເສດຖະກິດຂອງລາວ ແລະບັນດາປະເທດໃນໂລກຈະມີທ່າອຽງທີ່ດີຂຶ້ນ ໂດຍສະເພາະແມ່ນເສດຖະກິດຂອງປະເທດຄູ່ຄ້າເຊັ່ນ: ສະຫະລັດອາເມຣິກາ, ອີຢູ ແລະຍີ່ປຸ່ນ ທີ່ອາດຈະສົ່ງຜົນດີຕໍ່ສິນຄ້າປະເພດເຄື່ອງນຸ່ງຫົ່ມຈະໄດ້ຮັບອະນິສົງໄປນຳ.
ທັງນີ້ ເພື່ອເປັນການຮອງຮັບຕະຫຼາດທີ່ຈະມີການຂະຫຍາຍຕົວ ແລະມີຄວາມຕ້ອງການແບບໃໝ່ທາງສະມາຄົມແມ່ນຈະໄດ້ສືບຕໍ່ຮັກສາແຮງງານທີ່ມີຢູ່ແຕ່ຈະໄດ້ເພີ່ມປະສິດທິພາບ ແລະຄຸນນະພາບ, ປັບປຸງພາຍໃນຕະຫຼອດຮອດການຂົນຂວາຍໂຮງງານ ລວມທັງຫ້າງຮ້ານທຸລະກິດຕັດຫຍິບເຂົ້າມາເປັນສະມາຊິກໃຫ້ຫຼາຍຂຶ້ນກວ່າເກົ່າ.
ໂດຍປະຈຸບັນ ທ່ານ ປະທານ ສອຕລ ເປີດເຜີຍຕື່ມວ່າ: ສປປ ລາວ ມີໂຮງງານຕັດຫຍິບທັງໝົດ 92 ແຫ່ງ ທຽບໃສ່ປີ 2014 ຫຼຸດລົງ 6 ແຫ່ງ ສ່ວນໃຫຍ່ແມ່ນໂຮງງານຂະໜາດນ້ອຍທີ່ມີກຳລັງແຮງງານຕ່ຳກວ່າ 50 ຄົນ ໃນນັ້ນ ມີໂຮງງານທີ່ຜະລິດເພື່ອສົ່ງອອກມີ 60 ແຫ່ງ ເຫຼືອນັ້ນແມ່ນໂຮງງານທີ່ເຮັດການຜະລິດໃຫ້ຜູ້ສົ່ງອອກ ນອກຈາກນັ້ນຍັງມີໂຮງງານປັກແສ່ວ, ພິມຜ້າ, ຊັກຟອກ ແລະແກັດ ເຈ້ຍຈຳນວນທັງໝົດ 33 ແຫ່ງທີ່ສ້າງວຽກເຮັດງານທຳໃຫ້ແຮງງານ ລວມມີທັງໝົດ 28 ພັນຄົນຫຼຸດລົງ 2 ພັນຄົນ ຈາກປີ 2014.
ທີ່ມາ: