ທ່ານ ດຣ. ຄຳມະນີ ອິນທິລາດ ກຳມະການສູນກາງພັກ ລັດຖະມົນຕີກະຊວງ ພບ ໄດ້ໃຫ້ສຳພາດໃນວັນທີ 23 ມີນາ 2016 ວ່າ: ອີງຕາມສະພາບດິນຟ້າອາກາດປີນີ້ ແມ່ນມີຄວາມແຫ້ງແລ້ງຫຼາຍສົມຄວນ ເຊິ່ງໄດ້ແກ່ຍາວ ແລະ ສົ່ງຜົນກະທົບເປັນບໍລິເວນກວ້າງ ເລີ່ມແຕ່ພາກໃຕ້ຂອງລາວ ກຳປູເຈຍ ຫວຽດນາມ ໄທ ມາເລເຊຍ ແລະ ອິນໂດເນເຊຍ ຕໍ່ສະພາບການດັ່ງກ່າວ ພວກເຮົາກໍ່ໄດ້ເອົາໃຈໃສ່ເປັນພິເສດ ໃນການກຽມພ້ອມປ່ອຍນ້ຳ ໃນບັນດາເຂື່ອນລົງໄປສູ່ນ້ຳຂອງຕື່ມ ເພື່ອແກ້ໄຂໄພແລ້ງ ຢູ່ໃນເຂດແມ່ນ້ຳຂອງຕອນລຸ່ມ ໂດຍສະເພາະ ຢູ່ທົ່ງພຽງປາກແມ່ນ້ຳຂອງ (ສສ ຫວຽດນາມ) ທີ່ມີການປູກພືດກະສິກຳຢ່າງຫຼວງຫຼາຍ ສປປ ລາວ ມີເຂື່ອນໄຟຟ້າທີ່ມີອ່າງເກັບກັກນ້ຳຂະໜາດໃຫຍ່ຢູ່ແມ່ນ້ຳ 4 ສາຍ ຄື: ນ້ຳອູ ນ້ຳຄານ ນ້ຳງື່ມ ແລະ ນ້ຳເທີນ ການສະໜອງນ້ຳໃນປັດຈຸບັນຂອງເຂື່ອນໃຫຍ່ຢູ່ພາກກາງ ແລະ ພາກໃຕ້ແມ່ນມີລະດັບກາງ ສະນັ້ນ ການສະໜອງນ້ຳໃນການຜະລິດພະລັງງານໄຟຟ້າກໍ່ມີຂອບເຂດຈຳກັດ ແຕ່ເຂື່ອນນ້ຳງື່ມ ແມ່ນມີນ້ຳພຽງພໍເພື່ອຜະລິດ ແລະ ສາມາດປ່ອຍນ້ຳລົງສູ່ແມ່ນ້ຳຂອງໄດ້.
ໃນວັນທີ 21-22 ມີນາ 2016 ພວກເຮົາໄດ້ເປີດກອງປະຊຸມເພື່ອສຶກສາ ແລະ ເກັບກຳຂໍ້ມູນຕື່ມກ່ຽວກັບການສະໜອງນ້ຳ ເພື່ອຊ່ວຍແກ້ໄພແຫ້ງແລ້ງຢູ່ນ້ຳຕອນລຸ່ມໃນປັດຈຸບັນ ເຊິ່ງນັບແຕ່ວັນທີ 23 ມີນາ 2016 ເປັນຕົ້ນໄປ ນ້ຳທີ່ປ່ອຍອອກຈາກ ສປປ ລາວ ລົງໄປແມ່ນ້ຳຂອງຕອນລຸ່ມ ເຊິ່ງໄດ້ວັດແທກຢູ່ຈຸດໃຕ້ສຸດຂອງດິນລາວ ປະມານ 1.136 ແມັດກ້ອນຕໍ່ວິນາທີ ບວກກັບນ້ຳທີ່ໄຫຼຈາກນ້ຳມູນ ແລະ ນ້ຳສາຍອື່ນໆຂອງໄທ ປະມານ 220 ແມັດກ້ອນຕໍ່ວິນາທີ ແລະ ນ້ຳທີ່ໄຫຼຈາກປະເທດຈີນ ປະມານ 2.254 ແມັດກ້ອນຕໍ່ວິນາທີ ລວມແລ້ວ ປະລິມານນ້ຳທັງໝົດຈາກແມ່ນ້ຳຂອງຜ່ານລາວ ລົງສູ່ກຳປູເຈຍ ແລະ ຫຽດນາມຕອນໃຕ້ ປະມານ 3.611 ແມັດກ້ອນຕໍ່ວິນາທີ ໂດຍນ້ຳທີ່ປ່ອຍລົງຈະໄປເຖິງເຂດດັ່ງກ່າວໃນວັນທີ 2 ເມສາ 2016 ເພື່ອສືບຕໍ່ແກ້ໄຂຜົນກະທົບຊ່ວຍປະເທດເພື່ອນບ້ານນັ້ນ ສປປ ລາວ ມີແຜນສະໜອງຈົນເຖິງທ້າຍເດືອນພຶດສະພາ 2016 ຄຽງຄູ່ກັບການສະໜອງນ້ຳເພື່ອແກ້ໄຂສະພາບແຫ້ງແລ້ງດັ່ງກ່າວ ພວກເຮົາກໍ່ສາມາດຜະລິດກະແສໄຟຟ້າໄດ້ຕື່ມອີກ ເພື່ອຮັບໃຊ້ການຊົມໃຊ້ຢູ່ພາຍໃນ ແລະ ສົ່ງອອກຕ່າງປະເທດ ສະນັ້ນ ຂ້າພະເຈົ້າຂໍຮຽກຮ້ອງມາຍັງທຸກພາກສ່ວນ ໂດຍສະເພາະ ຜູ້ປະກອບການທີ່ນຳໃຊ້ນ້ຳເພື່ອທຳການຜະລິດ ຕ້ອງມີການປະຢັດນ້ຳຊ່ວຍກັນ ແລະ ໃຊ້ນ້ຳເທົ່າທີ່ຈຳເປັນ ເພື່ອຊ່ວຍເຫຼືອປະເທດເພື່ອນບ້ານຂອງພວກເຮົາ ທີ່ໄດ້ຮັບຜົນກະທົບກັບໄພແຫ້ງແລ້ງໃນຄັ້ງນີ້.
ແຫລ່ງຂ່າວ:
