ຍທຂໄດ້ເປີດເຜີຍເຖິງແຜນນະໂຍບາຍບໍລິການທາງຜ່ານດ້ານຄົມມະນາຄົມ-ຂົນສົ່ງຂອງລາວເຊື່ອມຕໍ່ກັບນາໆປະເທດໃນໂລກ ເພື່ອພິກປີ້ນສປປລາວຈາກປະເທດທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດບໍລິການທາງຜ່ານດ້ານຄົມມະນາຄົມ-ຂົນສົ່ງໂດຍໃນຜ່ານມາລັດໄດ້ສຸມທຶນຮອນຢ່າງມະຫາສານເຂົ້າໃນການພັດທະນາພື້ນຖານໂຄ່ງລ່າງໄປພ້ອມໆກັບການສ້າງນິຕິກຳດ້ວຍການລົງນາມໃນສັນຍາຂົນສົ່ງ 2 ຝ່າຍແລະຫຼາຍຝ່າຍເກືອບໝົດທຸກປະເທດໃກ້ຄຽງຂະນະທີ່ປະຈຸບັນລັດໄດ້ກຳນົດເອົາ 9 ຈຸດທົ່ວປະເທດເປັນເຂດໂລຈິສຕິກສາກົນບ່ອນເຕົ້າໂຮມແລະແຈກຢາຍສິນຄ້າພາໃຫ້ເກີດມີການຂົນສົ່ງ 2 ຂາລາຄາຖືກລົງແລະຄູ່ການຄ້າຮັບສິນຄ້າຕົງເວລາສ້າງຄວາມເຂັ້ມແຂງໃຫ້ກຳລັງຂົນສົ່ງຂອງລາວສາມາດແກ່ງແຍ້ງແຂ່ງຂັນກັບສາກົນໄດ້ໃນຕໍ່ໜ້າ.
ທ່ານວຽງສະຫວັດສີພັນດອນຫົວໜ້າກົມຂົນສົ່ງກະຊວງໂຍທາທິການແລະຂົນສົ່ງ (ຍທຂ) ໄດ້ເປີດເຜີຍນະໂຍບາຍດັ່ງກ່າວໃນພິທີເປີດເຂດໂລຈິສຕິກທີ່ແຂວງສະຫວັນນະເຂດເມື່ອບໍ່ດົນມານີ້ໃຫ້ຮູ້ວ່າ: ໂດຍເຫັນໄດ້ຄວາມສຳຄັນທາງດ້ານທີ່ຕັ້ງຍຸດທະສາດຂອງປະເທດພັກແລະລັດໄດ້ວາງຍຸດທະສາດຫັນເອົາສປປລາວທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດບໍລິການທາງຜ່ານດ້ານຄົມມະນາຄົມຂົນສົ່ງ ( Transit Services ) ຫຼືກາຍເປັນສູນກາງການບໍລິການພະລາທິການຂົນສົ່ງ (Logis-tics Hub ) ຂອງພາກພື້ນສະນັ້ນລັດຖະບານຈິ່ງໄດ້ໃຊ້ງົບປະມານຈຳນວນມະຫາສານເຂົ້າໃນການພັດທະນາແລະປັບປຸງໂຄງລ່າງຄົມມະນາຄົມ-ຂົນສົ່ງເພື່ອເຊື່ອມຈອດກັບບັນດາປະເທດອ້ອມຂ້າງ.
ນອກນີ້ທາງດ້ານນິຕິກຳໄດ້ລົງນາມໃນສັນຍາຂົນສົ່ງ 2 ຝ່າຍກັບເກືອບທຸກປະເທດໃກ້ຄຽງເປັນຕົ້ນລາວ-ກຳປູເຈຍ, ລາວ-ຈີນ, ລາວ-ຫວຽດນາມແລະລາວ-ໄທໂດຍຍົກເວັ້ນລາວ-ມຽນມາທີ່ກຳລັງກະກຽມເຈລະຈາພ້ອມດຽວກັນນັ້ນຍັງມີສັນຍາຂົນສົ່ງໃນຂອບການຮ່ວມມືຫຼາຍຝ່າຍເຊັ່ນ: ສາມຝ່າຍລາວ-ຫວຽດນາມ-ໄທ, ລາວ-ຫວຽດນາມ-ກຳປູເຈຍ, ອະນຸພາກພື້ນແມ່ນ້ຳຂອງ (GMS CBTA ) ແລະອາຊຽນ ( Asean Framework Agreement ) ໂດຍໃນທາງປະຕິບັດຕົວຈິງພຽງແຕ່ໝູນໃຊ້ການຈັດຕັ້ງປະຕິບັດສັນຍາຂົນສົ່ງ 2 ຝ່າຍແລະ ສ່ວນຫຼາຍແມ່ນນຳໃຊ້ພາຫະນະຂົນສົ່ງຂອງປະເທດໃກ້ຄຽງເພື່ອດຳເນີນການ, ສ່ວນພາຫະນະຂົນສົ່ງຂອງລາວເອງຍັງບໍ່ທັນມີຄວາມອາດສາມາດໃນການຂົນສົ່ງໄລຍະໄກໄປຮອດທ່າເຮືອຂອງປະເທດໃກ້ຄຽງໄດ້.
ຢ່າງໃດກໍຕາມການພັດທະນາແລະປັບປຸງໂຄງລ່າງໃນຜ່ານມາເປັນຕົ້ນແມ່ນເສັ້ນທາງ, ຂົວ, ສະໜາມບິນ, ທ່າເຮືອແລະອື່ນໆໂດຍສາມາດອຳນວຍຄວາມສະດວກໃຫ້ແກ່ການຂົນສົ່ງໄປ-ມາຫາສູ່ແລະການຄ້າໄດ້ໃນລະດັບໃດໜຶ່ງເທົ່ານັ້ນຊຶ່ງທ່ານວຽງສະຫວັດສີພັນດອນເຫັນວ່າຍັງບໍ່ທັນຕອບສະໜອງແລະຮັບໃຊ້ນະໂຍບາຍໃນການຫັນສປປລາວຈາກປະເທດທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດບໍລິການທາງຜ່ານດ້ານຄົມມະນາຄົມ-ຂົນສົ່ງໄດ້ຢ່າງສົມບູນເທື່ອເພາະວ່າຖ້າຫາກເຮົາມີແຕ່ໂຄງລ່າງທີ່ບໍ່ມີການບໍລິການທາງດ້ານໂລຈິສຕິກປະເທດໃກ້ຄຽງໃນພາກພື້ນຈະຜ່ານຂ້າມໄປ-ມາປະເທດເຮົາລ້າໆຊຶ່ງຈະບໍ່ໄດ້ຮັບຜົນປະໂຫຍດຫຍັງຫຼາຍແລະຍັງສ້າງພາລະອັນໜັກໜ່ວງໃນການບູລະນະສ້ອມແປງບັນດາໂຄງລ່າງຄົມມະນາຄົມ-ຂົນສົ່ງເຫຼົ່ານີ້ອີກດ້ວຍ.
ຕໍ່ກັບສະພາບຄືແນວນັ້ນທ່ານຫົວໜ້າກົມຂົນສົ່ງເປີດເຜີຍໃຫ້ຮູ້ຕື່ມວ່າກະຊວງຍທຂຈິ່ງໄດ້ຮ່າງຍຸດທະສາດການພັດທະນາໂລຈິສຕິກການຂົນສົ່ງສິນຄ້າແລະຖືກຮັບຮອງຈາກລັດຖະບານໃນປີ 2015 ພ້ອມທັງໄດ້ເຂົ້າເປັນພາຄີສົນທິສັນຍາສະຫະປະຊາຊາດວ່າດ້ວຍທ່າບົກ(Dry Port) ຊຶ່ງສປປລາວໄດ້ກຳນົດເອົາ 9 ຈຸດທີ່ເປັນເຂດໂລຈິສຕິກສາກົນຄື: ຈຸດທຳອິດແມ່ນຢູ່ຫ້ວຍຊາຍ, 2. ນາເຕີຍ, 3. ເມືອງໄຊ, 4. ຫຼວງພະບາງ, 5. ທ່ານາແລ້ງ, 6. ຫຼັກຊາວ, 7. ທ່າແຂກ, 8. ສະຫວັນນະເຂດແລະຈຸດສຸດທ້າຍທີ່ຈຳປາສັກໃນຈຳນວນທັງໝົດ9ຈຸດນັ້ນມີພຽງ 2 ຈຸດທີ່ພວມຈັດຕັ້ງປະຕິບັດຄືທ່ານາແລ້ງກຳລັງເຈລະຈາຮ່ວມທຶນກັບຍີ່ປຸ່ນດ້ວຍກົນໄກPPP ແລະສະຫວັນນະເຂດທີ່ເປີດບໍລິການແລ້ວ.
ໂດຍການຈັດຕັ້ງປະຕິບັດການບໍລິການເຂດໂລຈິສຕິກທ່ານວຽງສະຫວັດສີພັນດອນຢ້ຳວ່າແມ່ນເປັນການຈັດຕັ້ງປະຕິບັດຍຸດທະສາດການພັດທະນາໂລຈິສຕິກການຂົນສົ່ງສິນຄ້າຂອງລາວທັງເປັນການປະຕິບັດພັນທະສົນທິສັນຍາສາກົນແລະມີຄວາມຈຳເປັນອັນຮີບດ່ວນທີ່ສຸດເພາະຈະມີບ່ອນສຳລັບການເຕົ້າໂຮມແລະແຈກຢາຍສິນຄ້າຊຶ່ງເຮັດໃຫ້ເກີດມີການຂົນສົ່ງ 2 ຂາພາໃຫ້ລາຄາຂົນສົ່ງຖືກລົງສາມາດແກ້ໄຂບັນຫາການຈອດລົດຂົນສິນຄ້າຊະຊາຍຕາມທາງຫຼວງເຮັດໃຫ້ເສັ້ນທາງເປ່ເພແລະບໍ່ປອດໄພ, ປະກອບສ່ວນເຂົ້າໃນການບໍລິການທາງຜ່ານດ້ານຄົມມະນາຄົມຂົນສົ່ງຢ່າງແທ້ຈິງຄຽງຄູ່ກັນນັ້ນຈະເປັນການດຶງດູດການລົງທຶນ, ການຜະລິດໃຫ້ຫຼາຍຂຶ້ນເນື່ອງຈາກວ່າຜູ້ລົງທຶນໃສ່ການຜະລິດມີຄວາມສະດວກໃນການຂົນສົ່ງສິນຄ້າຂອງເຂົາເຈົ້າໄດ້ຕົງຕໍ່ເວລາໄປເຖິງຈຸດໝາຍປາຍທາງແລະມີລາຄາສົມເຫດສົມຜົນ.
ທີ່ມາ: