ໂຄງການກໍ່ສ້າງ ເຂື່ອນໄຊຍະບູລີ ເທິງແນວແມ່ນ້ຳຂອງ
ໃນລາວສ້າງວຽກເຮັດງານທຳໄດ້ຫຼາຍກວ່າ 7,000 ຄົນ
ໂດຍໃນນີ້ເປັນຄົນລາວຫຼາຍກວ່າ 5,600 ຄົນຫຼື 80 ເປີເຊັນ
ຂອງແຮງງານທັງໝົດ.
ເຈົ້າໜ້າທີ່ຂັ້ນສູງໃນກະຊວງພະລັງງານແລະບໍ່ແຮ່ ໄດ້ຢືນຢັນວ່າ
ໂຄງການກໍ່ສ້າງເຂື່ອນໄຊຍະບູລີເທິງແນວແມ່ນ້ຳຂອງ ໄດ້ມີການຈ້າງແຮງງານຈຳນວນທັງໝົດ ຫຼາຍກວ່າ 7,000 ຄົນ ໂດຍໃນນີ້ກໍເປັນແຮງງານຄົນລາວ ຫຼາຍກວ່າ 5,600 ຄົນຫຼື ຄິດເປັນ 80 ເປີເຊັນ ຂອງແຮງງານທັງໝົດ ຊຶ່ງລວມເຖິງປະຊາຊົນລາວທີ່ຖືກຍົກຍ້າຍຈາກເຂດກໍ່ສ້າງເຂື່ອນແລະປະຊາຊົນທີ່ອາໄສຢູ່ໃກ້ກັບໂຄງການດ້ວຍ.
ແຕ່ຢ່າງໃດກໍຕາມ ຄົນລາວທີ່ເປັນລູກຈ້າງໃນໂຄງການເຂື່ອນໄຊຍະບູລີສ່ວນໃຫຍ່ກໍຄືແຮງງານລະດັບຂັ້ນຕ່ຳຫຼືຜູ້ອອກແຮງງານເທົ່ານັ້ນ ເພາະສ່ວນໃຫຍ່ກໍຄືປະຊາຊົນ
ລາວທີ່ໄດ້ພາກັນຢຸດເຊົາຈາກການເປັນກະເສດຕະກອນແລ້ວມາເປັນແຮງງານໃນໂຄງການ ເນື່ອງຈາກເຫັນວ່າການເປັນແຮງງານໃນໂຄງການເຂື່ອນໄຊຍະບູລີນັ້ນມີເງິນເດືອນທີ່ມັ້ນຄົງກວ່າການເຮັດໄຮ່ເຮັດນານັ້ນເອງ ດັ່ງທີ່ເຈົ້າໜ້າທີ່ຂັ້ນສູງຂອງລາວ ໄດ້ໃຫ້ການຢືນຢັນວ່າ:
“ຈະເຫັນວ່າປະຊາຊົນ ຈະປະໄຮ່ປະນາ ໄປເປັນກຳມະກອນຢູ່ໂຄງການ ຜູ້ໃດມີ
ເງື່ອນໄຂເຮັດອັນໃດ ກະເຮັດຕັ້ງແຕ່ວຽກຂັ້ນຕ່ຳໄປຫາສູງ ຕົວຢ່າງເພິ່ນຕ້ອງການ
ຄົນໄປເປັນແມ່ບ້ານ ກະໄປເປັນແມ່ບ້ານ ແລະຢ່າງຕ່ຳກະຖືວ່າເດືອນໜຶ່ງຄະເຈົ້າ
ກໍໄດ້ລ້ານປາຍ.”
ການກໍ່ສ້າງເຂື່ອນໄຊຍະບູລີໄດ້ເລີ້ມລົງມືດຳເນີນການນັບແຕ່ທ້າຍປີ 2012 ເປັນຕົ້ນມາໂດຍມາຮອດປັດຈຸບັນນີ້ກໍປະກົດວ່າໄດ້ຄືບໜ້າໄປແລ້ວເກີນກວ່າ 30 ເປີເຊັນ ຂອງແຜນການທັ້ງໝົດຫາກແຕ່ວ່າໂຄງການເຂື່ອນໄຊຍະບູລີ ກໍຍັງຄົງຖືກຄັດຄ້ານຈາກພາກປະຊາສັງຄົມໃນໄທ ກຳປູເຈຍ ຫວຽດນາມແລະ ອົງການອະນຸລັກສິ່ງແວດລ້ອມທຳມະຊາດໃນລະດັບສາກົນມາຢ່າງຕໍ່ເນື່ອງ.
ໂດຍລ້າສຸດເຄືອຂ່າຍປະຊາຊົນໄທເພື່ອການອະນຸລັກແມ່ນ້ຳຂອງ ເຄືອຂ່າຍເພື່ອການຮ່ວມມືໃນການພັດທະນາດ້ານການປະມົງໃນກຳປູເຈຍ ສູນສຶກສາວິໄຈກົດໝາຍ ແລະນະໂຍບາຍເພື່ອການພັດທະນາຢ່າງຍືນຍົງໃນຫວຽດນາມ ອົງການແມ່ນ້ຳສາກົນ ແລະ ອົງການອະນຸລັກສິ່ງແວດລ້ອມໃນປະເທດອອສເຕຣຍ ກໍໄດ້ຮ່ວມກັນຍື່ນເອກະສານຮ້ອງຮຽນເຖິງສຳນັກງານກາງຂອງປະເທດອອສເຕຣຍ
ທີ່ນະຄອນຫຼວງວຽນນາມ ຢ່າງເປັນທາງການເມື່ອບໍ່ນານມານີ້.
ໂດຍເນື້ອໃນທີ່ສຳຄັນຂອງການຮ້ອງຮຽນໃນຄັ້ງນີ້ ກໍຄືການກ່າວຫາກຸ່ມບໍລິສັດ Andritz AG
ແຫ່ງອອສເຕຣຍ ຊຶ່ງເປັນຜູ້ຕອບສະໜອງດ້ານເຕັກນິກ ແລະວິສະວະກຳໃຫ້ໂຄງການເຂື່ອນໄຊຍະບູລີ ວ່າໄດ້ລະເມີດຕໍ່ຈັນຍາບັນຂອງອົງການຮ່ວມມືເພື່ອພັດທະນາ
ເສດຖະກິດລະຫວ່າງຊາດ (OECD) ທີ່ຢືນຢູ່ບົນຫຼັກການສຳຄັນທີ່ວ່າການດຳເນີນທຸລະກິດຂອງບັນດາບໍລິສັດຕ້ອງຄຳນຶງເຖິງການປ້ອງກັນຜົນກະທົບທີ່ຈະມີຕໍ່ສັງຄົມສິດ
ທິມະນຸດຍະຊົນແລະສິ່ງແວດລ້ອມທຳມະຊາດຢ່າງໜັກແໜ້ນ.
ຫາກແຕ່ສຳລັບໂຄງການເຂື່ອນໄຊຍະບູລີ ທີ່ກໍ່ສ້າງຢູ່ເທິງແນວແມ່ນ້ຳຂອງໃນລາວ
ຈະບໍ່ພຽງແຕ່ຈະສົ່ງຜົນກະທົບ ຕໍ່ສິ່ງແວດລ້ອມທຳມະຊາດ ແລະສັດນ້ຳ ສະເພາະຢູ່
ໃນລາວເທົ່ານັ້ນ ຫາກຍັງຈະສົ່ງຜົນກະທົບຕໍ່ປະເທດ ທີ່ຢູ່ເຂດຕອນລຸ່ມຂອງແມ່ນ້ຳຂອງ
ດ້ວຍ ເພາະສະນັ້ນ ຈຶ່ງຖືວ່າບໍລິສັດ Andritz AG ໄດ້ດຳເນີນທຸລະກິດທີ່ຂັດຕໍ່ຈັນຍາບັນຂອງອົງການ OECD ໂດຍກົງນັ້ນເອງ.