spot_img
Homeຂ່າວພາຍ​ໃນກະຊວງສາທາຯເຜີຍ ເຄີຍພົບ 19 ຄົນ ຕິດເຊື້ອຊິກ້າຢູ່ ນ.ວ! ແຕ່​ຢືນຢັນ​ລາວ​ມີ​ໂອກາດຕ່ຳ ​ຕໍ່​ການ​ແຜ່​ລະບາດ​!

ກະຊວງສາທາຯເຜີຍ ເຄີຍພົບ 19 ຄົນ ຕິດເຊື້ອຊິກ້າຢູ່ ນ.ວ! ແຕ່​ຢືນຢັນ​ລາວ​ມີ​ໂອກາດຕ່ຳ ​ຕໍ່​ການ​ແຜ່​ລະບາດ​!

Published on

ກົມ​ຄວບ​ຄຸມພະ​ຍາດຕິ​ດຕໍ່ ກະຊວງ​ສາທາລະນະ​ສຸກ ​ແລະ ສະ​ຖາ​ບັນ​ປັດ​ສະ​ເຕີ​ລາວ ​ໄດ້​ເປີດ​​ເຜີຍ​ຜົນ​ການ​ສຶກສາ​ແຕ່​ປີ 2012-2015, ຊຶ່ງ​ໄດ້​ກວດ​ຕົວຢ່າງ​ເລືອດ​ ທີ່​ເກັບ​ຈາກ​ຄົນ​​ເຈັບ​ທີ່​ມີ​ອາ​ການ​ຄ້າຍຄື​ກັບ​ພະຍາດ​ໄຂ້ຍຸງ​ລາຍ​ຫຼາຍ​ກ່ວາ 1,300 ຕົວຢ່າງ, ​ໃນ​ນັ້ນ ​ໄດ້​ກວ​ດ​ເພີ່ມ​ເຕີມ​ຫາ​ເຊື້ອ​ຈຸ​ລະ​ໂລກ​ອື່ນໆ ​ແລະ ພົບ 19 ຄົນ ທີ່​ຕິດ​ເຊື້ອ​ຈຸ​ລະ​ໂລກຊິ​ກາ ຢູ່​ນະຄອນຫຼວງ​ວຽງ​ຈັນ ​ແລະ ​ໃນ​ຕົ້ນ​ປີ 2016 ​ໄດ້​ສືບ​ຕໍ່​ກວດ ​ແຕ່​ບໍ່​ພົບ​ເຊື້ອ​ຈຸ​ລະ​ໂລກ​ດັ່ງ​ກ່າວ, ຈຶ່ງ​ໄດ້​ມີ​ການ​​ປະເມີນ​ຄວາມ​ສ່ຽງ ​ແລະ ​ເຫັນ​ວ່າ ສປປ ລາວ ມີ​ໂອກາ​ດຕ່ຳ ທີ່​ຈະ​ມີ​ການ​​ແຜ່​ກະຈາ​ຍຂອງ​ເຊື້ອ​ຈຸ​ລະ​ໂລກ​ຊີ​ກາ.

ທ່ານ​ຫົວໜ້າ​ກົມ​ຄວບ​ຄຸມພະ​ຍາ​ດຕິດ​ຕໍ່ ດຣ ບຸນ​ຫຼາຍ ​ພົມມະ​ສັກ ກ່າວ​ວ່າ: ​ເຖິ່ງ​​ວ່າ​ຜົນ​ການ​ປະ​ເມີນ​ຄວາ​ມສ່ຽງ​ຮ່ວມ​ກັນ​ລະ​ຫວ່າງ​ອົງການ​ອະນາ​ໄມ​ໂລກ ​ແລະ ກະຊວງ​ສາທາລະນະ​ສຸກ ​ເຫັນ​ວ່າ​ມີ​ຄວາມ​ສ່ຽງ​ຕ່ຳກໍ່ຕາມ, ລັດຖະບານ​ໄດ້​ມີ​ຄວາມ​ຕື່ນ​ຕົວ​ສູງ ​ແລະ ​ໄດ້​ເຊີນ​ຄູ່​ຮ່ວມ​ງານ​ດ້ານ​ວິ​ຊາ​ການ​ທຸກ​ພາກສ່ວນ​ທີ່​ເຮັດ​ວຽກ​ໃນ ລາວ ​​ເພື່ອ​ຕິດຕາມ​ສະພາບ​ການ ​ແລະ ສະກັດ​ກັ້ນ, ວາງ​ມາ​ດຕະການ​ຕອບ​ໂຕ້.

ຕາງ​ໜ້າ​ອົງການ​ອະນາ​ໄມ​ໂລກ​ປະຈຳ​ລາວ ກ່າວ​ວ່າ: ອົງ​ການ​ອະນາ​ໄມ​ໂລກ ​ໄດ້​ເຮັດ​ວຽກ​ຮ່ວມ​ກັບ​ ກະຊວງສາທາລະນະ​ສຸກ ​​ເພື່ອ​ເພີ່ມ​ທະວີການ​ເຝົ້າ​ລະວັງ, ຄົ້ນ​ຫາ​ພະຍາດ, ປັບປຸງ​ຄວາມ​ສາມາດ​ທາງ​ຫ້ອງ​ວິ​ເຄາະ ​​ເພື່ອ​ກວດ​ຫາ​ເຊື້ອ​ຈຸ​ລະໂລກ​ໄດ້​ໄວ​ຂື້ນ, ​ໃຫ້​ຄຳ​ແນະນຳ​ໃນ​ການ​ປິ່ນປົວ, ສ້າງ​ຂໍ້ຄວາມ​ເພື່ອ​ສື່ສານ ​ແລະ ວຽກ​ງານ​ຄວບ​ຄຸມ​ຍຸງ​ລາຍ​ທີ່​ເປັນ​ພາຫະ​ນຳ​ເຊື້ອ​ພະຍາດ ​ແລະ ຂະ​ບວນການ​ອະນາ​ໄມ​ຊຸມ​ຊົນ.

​ເຊື້ອ​ຈຸ​ລະໂລກ​ຊີ​ກາ ​ແມ່ນ​ຕິດ​ເຊື້ອ​ໄດ້​ໂດຍ​ການ​ກັ​ດຂອງ​ຍຸງ​ລາຍ (Aedes) ​ເຊິ່ງ​ເປັນ​ຍຸງ​ຊະນິດ​ດຽວ​ກັນ​​ ທີ່ແຜ່​​ເຊື້ອພະຍາດ​ໄຂ້ຍຸງ​ລາຍ ​ແລະ ຊີ​ກຸນ​ຄຸນ​ຢາ (chikun gunya), ​ເຊື້ອ​ຈຸ​ລະ​ໂລກ​ຊີ​ກາ​ ແມ່ນ​ເຮັດ​ໃຫ້​ມີ​ອາການ​ເຈັບ​ປ່ວຍ​​ແບບ​​ເບົາບາງ ​​ໂດຍ​ມີ​ອາການ​ໄຂ້​ເລັກ​ນ້ອຍ, ມີ​ຜື່ນຕາມ​ຜິວ​ໜັງ, ຕາ​ແດງ, ​ເຈັບຫົວ ​ແລະ ​ເຈັບ​ຂໍ່. ມີ​ພຽງ 1 ​ໃນ 4 ຄົນ ຂອງ​ຄົນ​ເຈັບ​ທີ່​ຕິດ​ເຊື້ອ​ຈຸລະ​ໂລກ​ຊີ​ກາ​ ຈະ​ມີ​ອາການ​ສະ​ແດງ​ອອກ ການ​ເຈັບ​ປ່ວຍ​ແມ່ນ​ປະມານ 4-7 ມື້ ​ແລະ  ​ເປັນ​ທີ່​ຮູ້​ກັນ​ດີ​ແລ້ວ​ວ່າ ​​ເຊື້ອ​ຈຸລະ​ໂລກ​ຊີ​ກາ ​ແມ່ນ​ຈໍລະ​ຈອນ​ໃນ​ຂົງ​ເຂດ​ອາຊີ, ອາ​ຟຣິກາ, ອາ​ເມ​ລິ​ກາ ​ແລະ ປາຊີ​ຟິກ.

ຍັງ​ມີ​ຫຼັກ​ຖານ​ຢັ້ງຢືນ​ວ່າ​ເຊື້ອ​ຈຸລະ​ໂລກ​ຊີ​ກາ ມີ​ການ​ຈໍລະ​ຈອນ​ໃນ​ປະ​ເທ​ດກຳປູ​​ເຈຍ, ອິນ​ໂດ​ນິ​ເຊຍ, ມາ​ເລ​ເຊຍ, ຟິລິບ​ປີນ ​ແລະ ປະ​ເທດ​ໄທ. ​ໃນ​ປັດຈຸບັນ​ ເຊື້ອ​ຈຸລະ​ໂລກ​ດັ່ງກ່າວ​ກຳລັງ​ກໍ່​ໃຫ້​ເກີດ​ການລະບາດ​ຂະ​ໜາດ​ໃຫຍ່ ​ໃນ​ພາກ​ພື້ນ​ອາ​ເມ​ລິ​ກາ ​ເຊິ່ງອາດ​ມີ​ການ​ພົວພັນ​ກັບ​ເດັກ​ທີ່​ເກີດ​ຈາກ​​ແມ່​ ທີ່​ຕິດ​ເຊື້ອ​ໃນ​ໄລຍະ​ຖືພາ​ ເຮັດ​ໃຫ້​ເດັກ​​ເກີດ​ໃໝ່​ມີ​ຫົວ​ນ້ອຍ​ຜິດ​ປົກກະຕິ ​ມາ​ແຕ່​ກຳ​​ເນີ​ດ (Microcephaly) ຊຶ່ງ​ພົບ​ໜ້ອຍ​ຫຼາຍ.ສ​າ​ເຫ​ດດັ່ງ​ກ່າ​ວ​ແມ່​ນ​ເນື່ອງ​ມາ​ຈາກ​ ການ​ພັດທະນາ​ຂອງ​ຫົວ​ເດັກນ້ອຍ​ ຜິດ​ປົກກະຕິ​ໃນ​ມົດ​ລູກ ຫຼື ພາຍຫຼັງ​ເກີດ, ​ເດັກນ້ອຍ​ທີ່​ມີ​ຫົວ​ນ້ອຍ​ມາ​ແຕ່​ກຳ​​ເນີ​ດ ຈະ​ມີ​ບັນ​ຫາ​ທາງ​ດ້ານ​ພັດທະນາ​ການ ​ເມື່ອ​ເຂົາ​ເຈົ້າ​ເຕີບ​ໃຫຍ່​ຂື້ນ. ​

ໃນ​ບັນດາ​ປະ​ເທ​ດທີ່​ມີ​ການລະບາດ​ຂະໜາ​ດ​ໃຫຍ່​ ຂອງ​ເຊື້ອ​ຈຸລະ​ໂລກ​ດັ່ງກ່າວ, ອາການ​ອື່ນ​ທີ່​ພົວພັນ​ກັບ​ການລະບາດ​ຂອງ​ເຊື້ອ​ພະຍາ​ດດັ່ງກ່າວ​​ແມ່ນ ອາການ​ກ້າມ​ຊີ້ນ​ອ່ອນ​ແຫຼວ (Guillain Barre Syndrome) ​ແມ່ນ​ອາການ​ທີ່​ພົບ​ໜ້ອຍ​ ທີ່​ເຮັດ​ໃຫ້​ມີ​ອາການ​ຄ່ອຍໆ​ອ່ອນ​ແຮງ​ຂາ, ​ແຂນ ​ແລະ ຮ່າງ​ກາຍ​ພາກ​ສ່ວນ​ເທິງ ​ແລະ ບາ​ງຄັ້ງ​ອາດ​ພາ​ໃຫ້​ມີ​ອາການ​ລ່ອຍ​ທຸກ​ພາກສ່ວນ​ຂອງ​ຮ່າງກາຍ, ສ່ວນ​ຫຼາຍ​ແມ່ນ​ຈະ​ຫາຍ​ດີ ​ເຖິງ​ແມ່ນ​ວ່າ​ຈະ​ມີ​ອາການ​ກ້າມ​ຊີ້ນ​ອ່ອນ​ແຫຼວ​ແບບ​ຮຸນ​​ແຮງ​ກໍຕາມ.

ທ່ານນາງ ດຣ. ຈູ​ລຽດ ກ່າວ​ວ່າ: ທຸກ​ຄົນ​ສາມາ​ດປ້ອງ​ກັນ​ຕົນ​ເອງ​ບໍ່​ໃຫ້​ຍຸງ​ກັດ ​ໂດຍ​ນຳ​ໃຊ້​ຢາ​ທາ​ກັນ​ຍຸງ, ​ໃສ່​ເຄື່ອງ​ນຸ່ງ​ສີ​​ແຈ້ງ, ​​ເສື້ອ​ແຂນ​ຍາວ-ສົ້ງຂາ​ຍາວ ​​ເພື່ອ​ປົກ​ປິດ​ຮ່າງ​ກາຍ​​ເທົ່າ​ທີ່​ຈ​ະ​ເຮັດ​ໄດ້, ​ໃຊ້​ຕາໜ່າງກັນ​ຍຸງ ​ແລະ ນອນ​ໃນ​ມຸ້ງ, ​ໂດຍ​ສະ​ເພາະ​ໃນ​ເວລາ​ກາງ​ເວັນ ​ເຊິ່ງ​ເປັນ​ເວລາ​ທີ່​ຍຸງ​ລາຍ​ຫ້າວຫັນ​ທີ່​ສຸດ. ທຸກ​ຄົນ​ຄວນ​ອະນາ​ໄມ​ພາຍ​ໃນ​ເຮືອນ ​ແລະ ບໍລິ​ເວນ​ອ້ອມ​ຂ້າງ​ເຮືອນ​ ຢ່າງ​ໜ້ອຍ​ອາທິດ​ລະ​ຄັ້ງ ​​ໂດຍ​ການຂວ້ຳ ຫຼື​ ປົກ​ປິດ​ພາຊະນະ​ໃສ່ນ້ຳເຊັ່ນ: ຄຸ​ນ້ຳ, ​ໂຖ​ດອກ​ໄມ້ ​ແລະ ຢາງ​ລົດ ​ເຮັດ​ໃຫ້​ຍຸງ​ບໍ່​ສາມາດ​ແຜ່ພັນ​ໄດ້, ສ່ວນ​ແມ່ຍິງ​ຖືພາ ຫຼື ຜູ້​ທີ່​ກຳລັງ​ວາງ​​ແຜນ​ທີ່​ຈະ​ຖືພາ ຄວນ​ຈະ​ດູ​ແລ​ຕົນ​​ເອງ​ເພີ່ມ​ເຕີມ​ ເພື່ອ​ປ້ອງ​ກັນບໍ່​ໃຫ້​ຍຸງ​ລາຍ​ກັດ, ​ແມ່ຍິງ​ທີ່​ຖືພາ​ ຄວນ​ປຶ​ກສາ​​ແຜນ​ການ​ເດີນທາງ​ກັບ​ພະນັກງານ​​ແພດ ​ແລະ ພິຈາລະນາ​ເລື່ອນ​ການ​ເດີນທາງ ​​ໄປ​​ເຂດ​ທີ່​ກຳລັງ​ມີ​ການ​ຕິດ​ເຊື້​ອຈຸລະ​ໂລກ​ຊີ​ກາ. ​ເຊື້ອ​ຈຸລະ​ໂລ​ກຊີ​ກາ ​ແມ່ນ​ມີ​ການ​ແຜ່​ກະຈາຍ​ເຊື້ອ ​ໂດຍ​ຍຸງ​ລາຍ​ເປັນ​ພາຫະນຳ​ເຊື້ອ ​ແລະ ບໍ່​ແມ່ນ​ການ​ສຳຜັດ​ຈາກ​ຄົນ​ສູ່​ຄົນ ​ເຖິ່ງ​ແມ່ນ​ວ່າ​ມີ​ຈຳນວນ​ໜ້ອຍ​ໜຶ່ງ ທີ່​ມີ​ການ​ບັນທຶກ​ວ່າ​ມີ​ການ​ຕິດ​ເຊື້ອ​ທາງ​ເພດ​ສຳພັນ, ​ເຊື້ອ​ຈຸລະ​ໂລກ​ຊີ​ກາ ຍັງ​ພົບ​ເຫັນ​ຢູ່​ໃນ​ນ້ຳ​ອະ​ສຸຈິ​ຂອງ​ຄົນນຳ​ອີກ.

 

ແຫລ່ງຂ່າວ:

ລພນ

ບົດຄວາມຫຼ້າສຸດ

ມີໃຜຊື່ຍາວກວ່ານີ້ບໍ່? ຊາຍຊາວນິວຊີແລນມີຊື່ຍາວທີ່ສຸດໃນໂລກ ໃຊ້ເວລາອ່ານ 20 ນາທີ ຈຶ່ງອ່ານແລ້ວ

ມາຮູ້ຈັກກັບຊາຍຜູ້ທີ່ມີຊື່ທີ່ຍາວທີ່ສຸດໃນໂລກ, ລໍເລນ ວອດກິນ (Laurence Watkins) ອາຍຸ 60 ປີ, ອາໄສຢູ່ເມືອງໂອດແລນ ປະເທດນິວຊີແລນ ລາວມີຈໍານວນຊື່ຍາວເຖິງ 2,253 ຄໍາ. ຜ່ານມາຊາຍຄົນນີ້ຫຼົງໄຫຼໃນລາຍການ Ripley's...

ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ໄຂຂຶ້ນຢ່າງເປັນທາງການ

ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ໄດ້ເປີດຂຶ້ນໃນວັນທີ 21 -...

ກຳນົດຈັດງານ 5 ວັນ ບຸນນະມັດສະການພຣະທາດຫຼວງວຽງຈັນ ຈະຈັດຂຶ້ນໃນລະຫວ່າງວັນທີ 1-5 ພະຈິກ 2025

ໃນວັນທີ 21 ຕຸລາ 2025 ພິທີຖະແຫຼງຂ່າວ ງານປະເພນີບຸນນະມັດສະການ ພຣະທາດຫຼວງ ແລະ ງານວາງສະແດງສິນຄ້າ ປະຈຳປີ ຄສ 2025 ຈັດຂຶ້ນ ທີ່ເດີ່ນພຣະທາດຫຼວງວຽງຈັນ...

ຍີ່ປຸ່ນ ຊ່ວຍເຫຼືອລ້າໂຄງການເກັບກູ້ລະເບີດບໍ່ທັນແຕກ ຢູ່ແຂວງ ຈຳປາສັກ ສາລະວັນ ແລະ ເຊກອງ ມູນຄ່າ 4,5 ລ້ານໂດລາສະຫະລັດ

ລັດຖະບານຍີ່ປຸ່ນສືບຕໍ່ໃຫ້ການຊ່ວຍເຫຼືອວຽກງານ ລບຕ ຢູ່ພາກໃຕ້ຂອງລາວ ໃນວັນທີ 20 ຕຸລາ 2025 ທີ່ນະຄອນຫຼວງວຽງຈັນ ສປປ ລາວ ກະຊວງການຕ່າງປະເທດ ຮ່ວມກັບ ສະຖານເອກອັກຄະລັດຖະທູດຍີ່ປຸ່ນ ປະຈໍາລາວ ໄດ້ຈັດພິທີລົງນາມເອກະ...