ລິເວີພູລ ມີໂອກາດລ້າງແຄ້ນ ແມນຊິຕີ ແບບທັນທີທັນຄັວນ ຫຼັງຈາກພາດທ່າເສຍດວນຈຸດໂທດໃນນັດຊີງຊະນະເລີດການແຂ່ງຂັນຊີງຂັນມາໝາດໆ ເມື່ອອາທິດຜ່ານມາ ໂດຍລິເວີພູລຈະເປີດບ້ານແອນຟິລ ຮັບມື ແມນຊິຕີ້ ໃນການແຂ່ງຂັນບານເຕະພຣີເມຍລີກ ອັງກິດ ນັດກາງອາທິດຄືນນີ້ (ພຸດ 2 ມີນາ) ເກມນີ້ ເຈີເກນ ຄລອບ ຜູ້ຈັດການທີມລິເວີພູລ ຈະສົ່ງຄູຕິນໂຍ, ຟຣີມິໂນ ແລະສະເຕີຣິດ ເປັນ 3 ປະສານໃນແດນໜ້າ ຂະນະທີ່ແມນຊິຕີ້ ກໍ່ຕ້ອງການໄຊຊະນະເພື່ອຕໍ່ຄວາມຫວັງລຸ້ນແຊ໋ມພຣີເມຍລີກ ໂດຍຈະວາງເຊຄິໂອ ອະເກວໂຣ ລົງລ່າປະຕູ ຖ່າຍທອດສົດໃຫ້ເບິ່ງທາງຊີທີເອສ ສະເຕດຽມ 2 ເລີ່ມເວລາ 03.00 ໂມງ ສ່ວນອາເຊນອລ ຫວັງຄືນຟອມເກັ່ງ ກຽມເປີດບ້ານຍິງຖະຫລົ່ມ ສະວອນຊີ ເພື່ອຕໍ່ລົມຫາຍໃຈລຸ້ນແຊ້ມ ຍິງສົດທາງສະເຕດຽມ 3 ເລີ່ມ 02.45 ໂມງ ດ້ານແມນຢູ ທີ່ຟອມກໍາລັງມາແຮງຈະເປີດບ້ານຖ້າເດັດປີກ ວັດຟອດ ເລີ່ມ 03.00 ໂມງ ຖ່າຍສົດທາງສະເຕດຽມ 1.
ການແຂ່ງຂັນພຣີເມຍລີກ ອັງກິດ ລະດູການ 2015-2016 ນັດກາງອາທິດຄືນນີ້ (ພຸດ 2 ມີນາ) ມີການແຂ່ງຂັນລວມ 5 ຄູ່ ໂດຍຄູ່ເອກຈະເປັນເກມທີ່ສະໜາມແອນຟິລ ເມື່ອລິວີພູລຈະໄດ້ເປີດບ້ານຮັບການມາຢ້ຽມຂອງແມນເຊັດເຕີ ຊິຕີ ທີ່ຫາກໍ່ຄວ້າແຊ໋ມລີກລະດູການນີ້ມາຄອງໄດ້ໝາດໆ ເລີ່ມແຂ່ງເວລາ 3 ໂມງກົງ ຖ່າຍທອດສົດໃຫ້ເບິ່ງທາງຊີທີເອສ ສະເຕດຽມ 2
ລິເວີພູນຈະໄດ້ໂອກາດລ້າງແຄ້ນ ແມນຊິຕີ້ ແບບທັນທີທັນຄວັນບໍ່ຕ້ອງຖ້າດົນ ຫຼັງຈາກທີ່ພວກເຂົາຫາກໍ່ພາດທ່າເສຍໃຫ້ແມນຊິຕີໃນການດວນຈຸດໂທດ 1-3 ໃນນັດຊີງຊະນະເລີດ ລີກຄັບ ທີ່ສະໜາມເວມບລີ ເມື່ອອາທິດທີ່ຜ່ານມາ (ຫຼັງສະເໝີ 1-1 ໃນເວລາ 90 ແລະ 120 ນາທີ) ຄາດວ່າ ນັດນີ້ ເຈີເກມ ຄລອບ ຜູ້ຈັດການທີມຊາວເຢຍລະມັນ ຈະກະຕຸ້ນລູກທີມໃຫ້ລືມຝັນຮ້າຍໃນນັດຊີງຂັນ ເພື່ອກັບມາຮີດຟອມເກັ່ງລ້າງແຄ້ນເອົາຊະນະທີມແມນຊີຕີໃຫ້ໄດ້ ໂດຍຍັງຈະສົ່ງຟິລິບເປ ຄູຕິນໂຍ, ໂຣແບຣໂຕ ຟິຣມມິໂນ ແລະແດເນຍ ສະເຕີລິດ ເປັນສາມປະສານແດນໜ້າເໝືອນເດີມ
ຂະນະທີ່ ແມນເຊັດເຕີ ຊີຕີ ອາດມີອາການເມົາຄ້າງຫຼັງສະຫຼອງການຄວ້າແຊ໋ມລີກຄັບ ໂດຍມານູເອລ ເປເຍກຣິນີ ຜູ້ຈັດການທີມຊາວຊິລີ ກາບາເຍໂຣ ຜູ້ຮັກສາປະຕູອາເຈນໄຕ ຊຶ່ງເປັນຫົວໜ້ານໍາທີມໄດ້ແຊ໋ມລີກຄັບ ລົງເຝົ້າເສົາ ແດນກາງມີຢາຢາ ຕູເຣ, ແຟນັນ-ດິນໂຢ, ດາວິດ ຊິລວາ ແລະລາຮືມ ສະເຕີລິງ ລົງປັ້ນເກມ ໂດຍມີເຊຄິໂອ ອະເກວໂຣ ໄລ່ລ່າປະຕູ ສ່ວນເຄວິນ ເດີ ບອຍ ຍັງໜົດສິດລົງຫຼິ້ນ ເນື່ອງຈາກຍັງບໍ່ຫາຍເຈັບສໍາລັບທ່າອຽງເກມນີ້ ຄາດວ່າ ລິເວີພູລຈະຄືນຟອມເກັ່ງ ເປີດຮັງລ້າງແຄ້ນເອົາຊະນະແມນຊິຕີໄດ້ແບບຫວຸດຫວິດ
ດ້ານແມນຢູທີ່ຟອມກໍາລັງມາແຮງ ໜ້າຈະເປີດຮັງໂອລແທຣຟເຟິດ ເດັດປີກເອົາຊະນະວັດຟອດ ໄດ້ແບບບໍ່ຢາກ ໂດຍນັດນີ້ທີມແມນຢູຈະຍັງຄົງສົ່ງມາຣຄັສ ແຣຊຟອດ ກອງໜ້າດາວຮຸ່ງ ທີ່ຫາກໍ່ຍິງຄົນດຽວ 2 ລູກໃນເກມເອົາຊະນະອາເຊນອລ 3-2 ລົງລ່າປະຕູເໝືອນເດີມ ໂດຍຮວນ ມາຕາ, ເມມຟິສ ເດີ ປາຍ ແລະເຈສຊີ ລິນກຣາດ ຊ່ວຍສະໜັບສະໜູນເກມບຸກ ຂະນະທີ່ວັດຟອດຈະວາງໂອດຽນ ອິກາໂລ ເປັນຕົວທີ່ເດັດໃນແດນໜ້າ ຄູ່ນີ້ຖ່າຍທອດສົດທາງສະເຕດຽມ 1 ເລີ່ມ 03.00 ໂມງ
ສ່ວນ ອາເຊນອລ ຫາກຍັງຫວັງມີລຸ້ນແຊ໋ມພຣີເມຍລີກຕໍ່ໄປ ກໍ່ຕ້ອງເປີດບ້ານເອົາຊະນະ ສວອນຊີ ຊີຕີ ຜູ້ມາຢ່ຽມໃຫ້ໄດ້ ຫຼັງຈາກທີມອາເຊນອລບຸກໄປບໍ່ຊະນະແມນຢູ 2-3 ເມື່ອຊ່ວງທ້າຍອາທິດ ເຮັດໃຫ້ຕາມຫຼັງທີມນຳຕາຕະລາງເລສເຕີຫ່າງເຖິງ 5 ຄະແນນ ໂດຍເກມລະຫວ່າງ ອາເຊນອລເປີດບ້ານປະທະສວອນຊີນັດນີ້ ຈະຖ່າຍທອດສົດໃຫ້ເບິ່ງທາງສະເຕດຽມ 3 ເລີ່ມ 02.45 ໂມງ
ສໍາລັບໂປຣແກຣມຄູ່ອື່ນ ເວສຕແຮມ ເປີດບ້ານພົບກັບສະເປີທີມຮອງຕາຕະລາງຝູງ ເລີ່ມ 02.45 ໂມງ ເລີ່ມຖ່າຍທອດສົດທາງສະເຕດຽມ 4 ແລະສໂຕ໊ກ ພົບ ນິວຄາສເຊິລ ເລີ່ມ 02.45 ໂມງ.
ທີ່ມາ: