ເພື່ອ​ເປັນ​ການ​ຕອບ​ສະ­ໜອງ​ຄວາມ​ຮຽກ­ຮ້ອງ​ຕ້ອງ­ການຂອງ​ຕະ­ຫຼາດ​ຊີ້ນ​ໃນ​ນະ­ຄອນ­ຫຼວງ​ວຽງ​ຈັນ​ກໍ​ຄື​ໃນ​ລາວ​ອັນ​ສຳຄັນ​ທີ່​ສຸດ​ແມ່ນ​ຕ້ອງ​ຜະ­ລິດ​ງົວ​ໃຫ້​ໄດ້​ມາດ­ຖານ​ສາ­ກົນ​ທຽບ­ໃສ່ຟາມ​ງົວ​ຂອງ​ປະ­ເທດ​ໃກ້​ຄຽງ​ສະ­ນັ້ນ​ເອັນ​ແອນ​ວີ​ໃນ​ນາມ​ຟາມລ້ຽງ­ສັດ​ຈິ່ງ​ມີ​ຄວາມ​ຕ້ອງ­ການ​ທຶນ, ເນື້ອ­ທີ່​ແລະ​ແນວ​ພັນ​ງົວ​ຕື່ມເພື່ອ​ມາ​ພັດ­ທະ­ນາ​ຟາມ​ໃຫ້​ໄດ້​ມາດ­ຖານ​ສາ­ກົນ​ສາ­ມາດ​ແຂ່ງ­ຂັນ​ໄດ້​ກັບ​ປະ­ເທດ​ອື່ນ.

ວັນ​ທີ 29 ກຸມ­ພາ​ຜ່ານ​ມາ​ທີ່​ຟາມ​ລ້ຽງ­ສັດ​ເອັນ​ແອນ​ວີ​ໄດ້​ມີພີ​ທີ​ຕ້ອນ­ຮັບ​ຜູ້​ແທນ​ນະ­ຄອນ​ໂຮ່​ຈິ​ມິນ​ປະ­ເທດຫວຽດ­ນາມ​ຊຶ່ງ​ນຳ​ໂດຍ​ທ່ານ​ຫວຽນວັນ​ຈຶກ​ຮອງ​ຫົວ­ໜ້າ​ພະ​ແນກ​ກະ­ສິ­ກຳ​ປ່າ­ໄມ້​ແລະ​ພັດ­ທະ­ນາ​ຊົນ­ນະ­ບົດ​ປະ­ເທດຫວຽດ­ນາມ​ພ້ອມ​ດ້ວຍ​ຄະ­ນະ, ໂດຍ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ​ວິ­ລະ​ສັກ​ນາມມົນ­ຕີ​ເຈົ້າ­ເມືອງໆ​ນາ​ຊາຍ​ທອງ, ມີ​ພະແນກ​ກະ­ສິ­ກຳ -ປ່າ­ໄມ້​ນະ­ຄອນ­ຫຼວງ​ວຽງ​ຈັນ, ປະ­ທານ​ບໍ­ລິ­ສັດ​ເອັນ​ແອນ​ວີ​ຟາມ​ລ້ຽງ​ງົວ​ພ້ອມ​ດ້ວຍ​ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

ທ່ານ​ຈັນ­ທະ​ວົງ​ມະ​ໄລ​ເພັດ​ທີ່​ປຶກ­ສາ​ບໍ­ລິ­ສັດ​ກ່າວ​ວ່າ: ຟາມ​ລ້ຽງ​ງົວ​ເອັນແອນ​ວີ​ຕັ້ງ​ຢູ່​ບ້ານ​ສີ​ສະ­ຫວາດ​ເມືອງ​ນາ​ຊາຍ​ທອງ​ນະ­ຄອນ­ຫຼວງ​ວຽງ​ຈັນ​ສ້າງ­ຕັ້ງ​ຂຶ້ນ​ໃນ​ວັນ​ທີ 11 ມັງ­ກອນ 2014 ໂດຍ​ທາງ​ເຈົ້າ​ຂອງ​ຟາມ​ໄດ້​ລົງ­ທຶນ​ທັງ
ໝົດ 28 ຕື້​ກີບ​ປະ­ມານ 3,5 ລ້ານ​ໂດ​ລາ​ເພື່ອ​ສຳ​ປະ­ທານ​ເນື້ອ­ທີ່​ດິນ​ຈຳ­ນວນ75ເຮັກ­ຕາ​ເພື່ອ​ບຸກ­ເບີກ​ແລະ​ກໍ່­ສ້າງ​ຟາມ​ງົວ​ປະ­ຈຸ​ບັນ​ໄດ້​ບຸກ­ເບີກ​ສຳ­ເລັດ​ພ້ອມ​ທັງ​ປຸກ​ສ້າງ​ຄອກ​ງົວ9ຄອກ, ບອກ​ໝັກ​ຫຍ້າ 1 ບ່ອນ, ສາງ​ເກັບ​ຫຍ້າໃຫ້​ງົວ​ກິນ​ໃນ​ລະ­ດູ­ແລ້ງ 1 ບ່ອນ, ມີ​ລະບົບ​ຊົນ­ລະ­ປະ­ທານ​ເກັບ​ກັກ​ນ້ຳ​ຊຶ່ງ​ສາ­ມາດ​ເກັບ​ນ້ຳ​ໄດ້​ທັງ​ໝົດ 1,20 ແສນແມັດ​ກ້ອນ​ສາ­ມາດ​ຫົດ​ເນື້ອ­ທີ່​ປູກ​ຫຍ້າໃນ​ລະ­ດູ­ແລ້ງ​ໃນ​ນີ້​ໃກ້ໆຟາມ​ຍັງ​ມີ​ອ່າງ​ນ້ຳ​ຫຸມ​ຂະ­ໜາດ​ໃຫຍ່​ຢູ່​ໃກ້​ພຽງ​ແຕ່ 700 ແມັດ, ມີ​ລະ­ບົບ​ນ້ຳ​ບາ​ດານ 4 ແຫ່ງ​ໃນ​ທົ່ວ​ຟາມ​ເກັບ​ກັກ​ນ້ຳ​ຫົດ​ຫຍ້າ​ໄດ້ 32 ແມັດ​ກ້ອນ​ຕໍ່​ຊົ່ວ­ໂມງ​ປະ­ຈຸ​ບັນ​ຟາມ​ລ້ຽງ​ງົວ​ເອັນ​ແອນ​ວີ​ໄດ້​ນ້ຳ​ເຂົ້າ​ງົວ​ພັນ​ຊີ້ນ 30 ໂຕ​ແລະ​ງົວ​ພື້ນ​ບ້ານ​ລາວ 70 ໂຕ​ລວມ​ທັງ​ໝົດ 100 ໂຕ.

ພ້ອມ​ດຽວ​ກັນ​ນີ້​ໃນ​ແຜນ­ການ 5 ປີຕໍ່­ໜ້າ (2015-2020) ຟາມ​ລ້ຽງ​ງົວເອັນ​ແອນ​ວີ​ຈະ​ຂໍ​ສຳ​ປະ­ທານ​ເນື້ອ­ທີ່​ຟາມຕື່ມ​ຈາກ 75 ເຮັກ­ຕາ​ທີ່​ມີ​ຢູ່​ຕ້ອງ­ການ​ເນື້ອທີ່​ຕື່ມ​ປະ­ມານ 1-2 ພັນ​ເຮັກ­ຕາ​ໃນ​ເຂດເມືອງ​ນາ​ຊາຍ​ທອງ​ແລະ​ແຂວງ​ຈຳ­ປາສັກ​ທີ່​ຈະ​ພັດ­ທະ­ນາ​ການ​ປູກ​ຫຍ້າ​ຫຼາຍສາຍ​ພັນ​ຕ່າງໆ​ເພື່ອ​ສະ­ໜອງ​ໃຫ້​ແກ່​ແນວພັນ​ງົວ​ທີ່​ຈະ​ເພີ່ມ​ຂຶ້ນ​ຈຳ­ນວນ 4 ພັນ​ໂຕໂດຍ​ການ​ນຳ​ເຂົ້າ​ພໍ່​ພັນ​ແລະ​ແມ່​ພັນ​ງົວ​ຂອງ​ຕ່າງ­ປະ­ເທດ​ພ້ອມ​ທັງ​ຂະ­ຫຍາຍ​ສົ່ງ­ເສີມ​ງົວ​ພື້ນ​ບ້ານ​ໃຫ້​ໄດ້​ງົວ​ທີ່​ມີ​ມາດຖານ​ເພື່ອ​ຕອບ​ສະ­ໜອງ​ໃຫ້​ແກ່​ຕະ­ຫຼາດ​ຂາຍ​ຊີ້ນ​ງົວ​ໃນ​ນະ­ຄອນ­ຫຼວງ​ວຽງ​ຈັນ​ກໍ​ຄື​ໃນ​ສປ​ປລາວ​ໃນ​ນັ້ນ​ສຳ­ຄັນ​ທີ່​ສຸດຟາມ​ແຫ່ງ​ນີ້​ຕ້ອງ​ຜະ­ລິດ​ງົວ​ໃຫ້​ໄດ້​ມາດ­ຖານ​ສາ­ກົນ​ທຽບ​ເທົ່າ​ຟາມ​ງົວ​ໃນ​ເຂດ​ປະ­ເທດ​ໃກ້​ຄຽງ​ເພື່ອ​ສົ່ງ​ຂາຍ​ໃຫ້​ປະ­ເທດ​ເພື່ອນ​ບ້ານ​ໂດຍ​ສະ­ເພາະ​ຜູ້​ສະ­ໜອງ​ທຶນ​ໃຫ້​ແກ່​ຟາມ​ລ້ຽງ​ງົວ​ເອັນ​ແອນ​ວີ​ກໍ​ຄື​ສສ​ຫວຽດ­ນາມ.

ແນວ­ໃດ​ກໍ​ດີ​ຟາມ​ລ້ຽງ​ງົວ​ເອັນ​ແອນວີ​ແມ່ນ​ມີ​ຄວາມ​ຕ້ອງ­ການ​ທຶນ​ຕື່ມ​ຈຳ­ນວນ 240 ຕື້​ກີບ​ປະ­ມານ 30 ລ້ານ​ໂດ​ລາ​ເພື່ອ​ພັດ­ທະ­ນາ​ຟາມ​ຈາກ​ຂະ­ໜາດນ້ອຍ​ໄປ​ສູ່​ຂະ­ໜາດ​ໃຫຍ່​ໃຫ້​ໄດ້​ມາດ­ຖານ​ສາ­ກົນ.

ຂໍ້ມູນຈາກ http://www.sedthakid.la/