ການເປີດເສລີນ່ານຟ້າ ຈະຊ່ວຍ ເຮັດໃຫ້ສາຍການບິນຂອງເຮົາບໍ່ໂດດດ່ຽວ ແລະຍັງມີການພົວພັນຮ່ວມມືກັບບັນດາປະເທດໃນອາຊຽນເພີ່ມຂຶ້ນ ພ້ອມທັງສາມາດແລກປ່ຽນບົດຮຽນກັບອະນຸພາກພື້ນໄດ້ດີຍິ່ງຂຶ້ນ, ການພົວພັນຮ່ວມມືທາງດ້ານເຕັກນິກ ແລະຄວາມປອດໄພທີ່ເຫັນວ່າເປັນວຽກທີ່ຈຳເປັນ ຊຶ່ງຊ່ວຍໃນດ້ານການເພີ່ມຂຶ້ນທາງດ້ານຖ້ຽວບິນ ແລະຜູ້ໂດຍສານຕະຫຼອດຮອດລາຍຮັບທີ່ຈະເຂົ້າມາພາຍໃນປະເທດທີ່ນັບມື້ຈະເພີ່ມຂຶ້ນໃນຕໍ່ໜ້າ.
ທ່ານ ສົມບູນ ດາວສະຫວັນ ຫົວໜ້າກອງຄຸ້ມຄອງສະໜາມບິນໃຫ້ສຳພາດວ່າກອງຄຸ້ມຄອງສະໜາມບິນ ຊຶ່ງແມ່ນຜູ້ຄຸ້ມຄອງ ແລະບໍລິການສາຍການບິນທົ່ວປະເທດ ໂດຍໄດ້ຮັບການຊີ້ນຳໆພາຂອງກະຊວງໂຍທາທິການ ແລະຂົນສົ່ງກໍຄືກົມການບິນພົນລະເຮືອນເຮັດໜ້າທີ່ເພື່ອຮັກສາຄວາມປອດໄພໃຫ້ດີທີ່ສຸດ ແລະປອດໄພທີ່ສຸດໃນການຮັບໃຊ້ສັງຄົມກໍຄືຜູ້ໂດຍສານ, ປະຈຸບັນພວກເຮົາມີສະໜາມບິນທັງໝົດ 12 ສະໜາມບິນ, ໃນນີ້ ມີ 4 ສະໜາມບິນສາກົນ (ວັດໄຕ, ຫຼວງພະບາງ, ສະຫວັນນະເຂດ ແລະປາກເຊ), ອີກ 8 ສະໜາມບິນເປັນສະໜາມບິນພາຍໃນ (ຫຼວງນ້ຳທາ, ອຸດົມໄຊ, ຫ້ວຍຊາຍ, ຊຽງຂວາງ, ນາທອງ, ບຸນເໜືອ, ໄຊຍະບູລີ ແລະອັດຕະປື) ແລະມີສາຍການບິນທີ່ເຂົ້າມາຈອດທັງໝົດ 11 ບໍລິສັດ, ເຖິງຢ່າງໃດກໍຕາມ ກົມການບິນພົນລະເຮືອນຍາມໃດກໍມີການພັດທະນາໄປເລື້ອຍໆ, ດັ່ງນັ້ນ ການບໍລິການໃນສະໜາມບິນຈຳຕ້ອງໄດ້ພັດທະນາໄປຄວບຄູ່ກັນ ເພື່ອເຮັດໃຫ້ການບໍລິການສະໜາມບິນມີຄວາມປອດໄພ.
ດັ່ງທີ່ຮູ້ແລ້ວວ່າ ສະໜາມບິນແມ່ນມີຄວາມສຳຄັນທີ່ສຸດ ຊຶ່ງເປັນພື້ນຖານໂຄງລ່າງໃຫ້ແກ່ການຄົມມະນາຄົມຂົນສົ່ງທາງອາກາດ, ສະເພາະສົກປີ 2014 2015 ກໍສະແດງໃຫ້ເຫັນແລ້ວວ່າສາຍການບິນພາຍໃນປະເທດມີຖ້ຽວບິນທັງ ໝົດ 24.895 ຖ້ຽວ ເພີ່ມຂຶ້ນ 101,2% ແລະສາຍການບິນຕ່າງປະເທດ 25.578 ຖ້ຽວ ເພີ່ມຂຶ້ນ 100,3%, ພ້ອມນັ້ນຍັງ ສາມາດສ້າງລາຍຮັບໄດ້ 8,13 ຕື້ກີບ ເທົ່າກັບ 97% ຂອງແຜນການ ແລະ ເປັນເງິນໂດລາ 5,75 ລ້ານໂດລາລື່ນ ແຜນການ 2,51 ລ້ານໂດລາ ເທົ່າກັບ 178% ຂອງແຜນ, ດັ່ງນັ້ນ ການເປີດນ່ານຟ້າເສລີເທື່ອນີ້ຈິ່ງເປັນເງື່ອນໄຂອັນດີທີ່ຈະເຮັດໃຫ້ຖ້ຽວບິນຂອງບັນດາປະເທດອ້ອມຂ້າງບິນຜ່ານປະເທດເຮົາ ນັບມື້ເພີ່ມຂຶ້ນ ແລະສາຍການບິນຂອງລາວ ກໍຈະບິນອອກໄປປະເທດອື່ນໄດ້ຫຼາຍຕື່ມ, ສ່ວນຜູ້ໂດຍສານ ຫຼື ນັກທ່ອງທ່ຽວທີ່ຈະເຂົ້າມາປະເທດເຮົາກໍນັບມື້ເພີ່ມຫຼາຍຂຶ້ນ ຊຶ່ງມັນຈະຊ່ວຍສ້າງລາຍຮັບເພີ່ມຈາກເມື່ອກ່ອນ ໂດຍສະເພາະແມ່ນເກັບຈາກການບິນຜ່ານ ແລະການລົງຈອດປະເທດ.
ທ່ານ ສົມບູນ ດາວສະຫວັນ ກ່າວຕື່ມວ່າ: ເຖິງຢ່າງໃດກໍຕາມການເປີດນ່ານຟ້າເສລີຈະຊ່ວຍເຮັດໃຫ້ສາຍການບິນຂອງເຮົາບໍ່ໂດດດຽວ, ແຕ່ຍັງມີການພົວພັນຮ່ວມມືກັບບັນດາປະເທດໃນອາຊຽນເພີ່ມຂຶ້ນ, ສາມາດແລກປ່ຽນບົດຮຽນປະສົບການກັບອະນຸພາກພື້ນໄດ້ດີ, ສ່ວນການພົວພັນຮ່ວມມືທາງດ້ານເຕັກນິກ ແລະຄວາມປອດໄພຫຼາຍຂຶ້ນ, ຄຽງຄູ່ກັນນັ້ນ ໃນປະຈຸບັນທາງກອງຄຸ້ມຄອງເອງ ກໍຍັງຈະສືບຕໍ່ປັບປຸງລະບົບການບໍລິການການບິນໃຫ້ໄດ້ມາດຕະຖານ ແລະ ມີຄວາມປອດໄພ, ເອົາໃຈໃສ່ພັດທະນາບຸກຄະລາກອນໃຫ້ມີຄຸນນະພາບມີຄວາມຮູ້ ແລະປະສົບການສູງຂຶ້ນກວ່າເກົ່າ, ປັບປຸງບັນດານິຕິກຳທີ່ມີແລ້ວໃຫ້ສົມບູນ ແລະມີຄົບຖ້ວນຕາມການແນະນຳຂອງກົມການບິນພົນລະເຮືອນ, ການພົວພັນຮ່ວມມືກັບຕ່າງປະເທດທີ່ມີການເຊັນບັນທຶກການຮ່ວມມືນຳກັນຕົ້ນຕໍແມ່ນກຸ່ມບໍລິສັດສະໜາມບິນຫວຽດນາມ ແລະສະໜາມບິນແຫ່ງປະເທດໄທ, ພ້ອມທັງສະໜາມບິນບັນດາປະເທດອາຊຽນຕາມການເຫັນດີຂອງກົມການບິນພົນລະເຮືອນ.
ທີ່ມາ: