ອີງ​ຕາມ​ຂໍ້​ມູນ​ຂອງ​ຄະ­ນະ​ພັດ­ທະ­ນາ​ຊົນ­ນະ­ບົດ ແລະ ​ລົບ​ລ້າງ​ຄວາມ­ທຸກ​ຍາກໃຫ້​ຮູ້​ວ່າ: ໃນ​ສົກ​ປີ 2014-2015 ໜ່ວຍງານ​ເກັບ​ກູ້​ລະ­ເບີດ​ບໍ່​ທັນ​ແຕກ​ສາ­ມາດ​ຈັດ​ຕັ້ງ​ປະ­ຕິ­ບັດ​ວຽກ​ງານ​ຂອງ​ຕົນ​ໄດ້​ດີສົມ­ຄວນໂດຍ​ສະ­ເພາະ​ການ​ເກັບ​ກູ້ແລະ ­ລາຍ​ລະ­ເບີດ​ໄດ້ 62.963 ໜ່ວຍ, ປະກອບ​ມີ​ບົມ​ໃຫຍ່ 329 ໜ່ວຍ, ລະ­ເບີດ​ລູກ ຫວ່ານ 41.317 ໜ່ວຍ, ລະ­ເບີດ​ຝັງ​ດິນ 179 ໜ່ວຍ ແລະ ​ລະ­ເບີດ​ຊະ­ນິດ​ອື່ນໆ 21.202 ໜ່ວຍ, ນອກ​ນັ້ນ​ຍັງ​ສາ­ມາດກວດ​ກູ້​ເນື້ອ­ທີ່​ດິນ​ໄດ້​ທັງ​ໝົດ 7.248 ເຮັກຕາ, ເປັນ​ເນື້ອ­ທີ່​ກະ­ສິ­ກຳ 4 ພັນ​ເຮັກ­ຕາ ແລະ ​ເນື້ອ­ທີ່​ດິນ​ພັດ­ທະ­ນາ​ອື່ນໆ 3 ພັນກວ່າ​ເຮັກ­ຕາ, ພ້ອມ​ທັງໄດ້​ຮັບ​ການ​ຊ່ວຍເຫຼືອ​ດ້ານ​ງົບ­ປະ­ມານ​ຈາກ​ລັດ­ຖະ­ບານຍີ່­ປຸ່ນ​ຈຳ­ນວນ 8,6 ລ້ານ​ໂດ​ລາເພື່ອມອບ​ໃຫ້​ໂຄງ­ການ​ເກັບ​ກູ້​ລະ­ເບີດ​ແຫ່ງຊາດ​ເປັນ​ຜູ້​ຈັດ​ຕັ້ງ​ປະ­ຕິ­ບັດ​ໃນ​ໂຄງ­ການຕອບ​ສະ­ໜອງ​ກົນ​ຈັກ​ໜັກ​ປະ­ເພດ​ເຄື່ອງຕັດ​ຫຍ້າຢູ່​ແຂວງ​ຈຳ­ປາ​ສັກ ແລະ​ເຊ​ກອງໃນ​ໄລ­ຍະ​ແຕ່​ປີ 2014-2016.

ນອກ­ຈາກ​ນັ້ນຍັງ​ໄດ້​ລະ­ດົມ​ແຫຼ່ງທຶນຈາກ​ຕ່າງ­ປະ­ເທດ​ເຂົ້າ​ໃນ​ການ​ແກ້​ໄຂລະ­ເບີດ​ບໍ່​ທັນ​ແຕກ (ລບຕ) ໄດ້​ຈຳ­ນວນ 261 ຕື້​ກີບ ແລະ​ໄດ້​ສຳ­ເລັດ​ການ​ມອບ-ຮັບ​ເຄື່ອງ​ຊ່ວຍ­ເຫຼືອ​ຈາກ​ລັດ­ຖະ­ບານ​ຍີ່ປຸ່ນເພື່ອ​ສະ­ໜັບ­ສະ­ໜູນ​ໂຄງ­ການ​ເກັບ​ກູ້ລະ­ເບີດ​ແຫ່ງ​ຊາດຊຶ່ງ​ມີ​ລົດ​ໃຫຍ່ 97 ຄັນ, ລົດ­ຈັກ 50 ຄັນ, ເຄື່ອງ​ກວດ​ລະ­ເບີດ​ຊະນິດ​ຕ່າງໆ 406 ເຄື່ອງ ແລະ​ ເຄື່ອງ​ອື່ນໆ ຈຳ­ນວນ​ໜຶ່ງລວມ​ມູນ​ຄ່າ 900 ລ້ານເຢນ ຫຼື 9 ລ້ານ​ໂດ​ລາ, ໄດ້​ຮັບ​ເງິນ​ຊ່ວຍເຫຼືອ​ລ້າ​ຈາກ​ລັດ­ຖະ­ບານ​ສະ​ວິດ​ເຊີ​ແລນ 3,7 ລ້ານ​ໂດ​ລາເຂົ້າ​ໃນ​ກອງ​ທຶນ​ຊ່ວຍ ເຫຼືອ​ຂອງ​ອົງ­ການ​ສະ­ຫະ​ປະ­ຊາ​ຊາດ​ທີ່ສະ­ໜັບ­ສະ­ໜູນ​ຂະ­ແໜງ​ແກ້​ໄຂ ລບຕ ສົກປີ 2014-2015 ພ້ອມ​ນັ້ນຍັງ​ສາ­ມາດລະ­ດົມ​ທຶນ​ເຂົ້າ​ໃນ​ການ​ແກ້​ໄຂ​ບັນ­ຫາ​ລະເບີດ​ບໍ່​ທັນ​ແຕກ​ໄດ້​ປະ­ມານ 30 ລ້ານ​ໂດລາ ຫຼື ປະ­ມານ 243 ຕື້​ກີບ ຊຶ່ງ​ທຶນ​ດັ່ງກ່າວ​ແມ່ນ​ເຂົ້າ​ສູ່​ຂະ­ແໜງ­ການ​ແກ້​ໄຂ​ບັນຫາ​ລະ­ເບີດ​ບໍ່​ທັນ​ແຕກ​ຜ່ານ 3 ຊ່ອງ​ທາງຄື: ຜ່ານ​ກອງ​ທຶນ​ຊ່ວຍ­ເຫຼືອ​ລ້າ​ແກ້​ໄຂ​ບັນຫາ​ລະ­ເບີດ​ບໍ່​ທັນ​ແຕກ​ຂອງ​ອົງ­ການ ສປຊ, ການ​ຮ່ວມ​ມື​ສອງ​ຝ່າຍ, ຜ່ານ​ອົງການ​ເອັນ​ຈີ​ໂອ, ຜ່ານ​ບໍ­ລິ­ສັດ​ເກັບ​ກູ້​ລະເບີດ​ຂອງ​ລາວ ແລະ ​ຕ່າງ­ປະ­ເທດ ແລະ ທຶນ​ຂອງ​ລັດ­ຖະ­ບານ ສປປ ລາວ.

ຢ່າງ­ໃດ​ກໍ​ດີເພື່ອ​ສືບ­ຕໍ່​ປະ­ຕິ­ບັດ​ຊອກຫາ​ຫຼັກ​ຖານ​ລະ­ເບີດ​ບໍ່​ທັນ​ແຕກ​ທີ່​ຕົກຄ້າງ​ໃຫ້​ສຳ­ເລັດ​ຢູ່ 124 ຈຸດ​ສຸມ​ພັດ­ທະ­ນາຂອງ​ລັດ­ຖະ­ບານ, ກວດ​ກູ້​ພື້ນ​ທີ່​ຢືນ­ຢັນ​ວ່າມີ​ລະ­ເບີດ​ບໍ່​ທັນ​ແຕກ​ຕົກ​ຄ້າງ​ຢູ່​ຈຸດ​ສຸມຂອງ​ໂຄງ­ການ​ພັດ­ທະ­ນາ ແລະ​ ລົບ​ລ້າງຄວາມ­ທຸກ​ຍາກ​ໃນ​ແຕ່​ລະ​ປີ​ໃຫ້​ສຳ­ເລັດ,   ສືບ­ຕໍ່​ດຳ­ເນີນ​ໂຄງ­ການ​ໂຄ­ສະ­ນາ​ຜົນ​ຮ້າຍຂອງ​ລະ­ເບີດ​ບໍ່​ທັນ​ແຕກ, ແນ­ໃສ່​ຫຼຸດ­ຜ່ອນຜູ້​ຖືກ​ເຄາະ​ຮ້າຍ​ຈາກ​ລະ­ເບີດ​ບໍ່​ທັນ​ແຕກໃຫ້​ຕ່ຳ​ກວ່າ 40 ຄົນ​ຕໍ່​ປີ ຮອດ​ປີ 2020, ຊ່ວຍ­ເຫຼືອ​ປິ່ນ­ປົວ​ຜູ້​ຖືກ​ເຄາະ​ຮ້າຍ, ຟື້ນ​ຟູສຸ­ຂະ­ພາບ, ປະ­ກອບ​ອາ­ຊີບ, ສ້າງ​ງານ​ສ້າງ ລາຍ​ໄດ້​ໃຫ້​ແກ່​ເຂົາ­ເຈົ້າ​ໃຫ້​ໄດ້ 1.500 ຄົນຮອດ​ປີ 2020.

ທີ່ມາ: