ຢາຄຸມສຸກເສີນມີຫຼາຍແບບ
ຢາຄຸມສຸກເສີນບໍ່ໄດ້ຢູ່ໃນຮູບຕົວຢາເປັນເມັດເທົ່ານັ້ນ ແຕ່ຍັງມີຢາຄຸມສຸກເສີນຊະນິດຫ່ວງທອງແດງ (copper IUD) ອີກຢ່າງໜຶ່ງ ເຊິ່ງຄວາມແຕກຕ່າງກໍ່ຢູ່ທີ່ຢາຄຸມສຸກເສີນຊະນິດເມັດທົ່ວໄປຈະເປັນຮໍໂມນທີ່ເຂົ້າໄປສະລໍຂະບວນການຕົກໄຂ່ ສ່ວນຢາຄຸມສຸກເສີນຊະນິດຫ່ວງຈະມີສານທີ່ເຂົ້າໄປທຳລາຍໄຂ່ ແລະ ເຊື້ອອະສຸຈິບໍ່ໃຫ້ເກີດການປະຕິສົນທິກັນໄດ້.
ຢາຄຸມສຸກເສີນຊະນິດໃດທີ່ມີປະສິດທິພາບຫຼາຍກ່ວາກັນ.
ຢາຄຸມສຸກເສີນທັງ 2 ແບບສາມາດປ້ອງກັນການຕັ້ງຖືພາໄດ້ຄືກັນ ຫາກແຕ່ວ່າຫ່ວງສຸກເສີນຊະນິດທອງແດງຈະປ້ອງກັນການຖືພາໄດ້ສູງເຖິງ 99% ແລະ ສາມາດໃສຫ່ວງໄດ້ພາຍໃນ 5-7 ວັນຫຼັງມີເພດສຳພັນ ໂດຍຜົນການທົດລອງເມື່ອປີ 1979-2011 ກໍ່ພົບວ່າ ກຸ່ມອາສາທີ່ຄຸມກຳເນີດດ້ວຍການໃຊ້ຫ່ວງສຸກເສີນຊະນິດທອງແດງຖືພາພຽງຮ້ອຍລະ 0.1 ເທົ່ານັ້ນ ອີກຢ່າງມັນຍັງຊ່ວຍຄຸມກຳເນີດໃນໄລຍະຍາວໄດ້ເຖິງ 10 ປີ ແຕ່ຕ້ອງໃສ່ຫ່ວງນີ້ໄວ້ຕະຫຼອດເວລາ.
ສາວໆ ຮູ້ບໍ່ວ່າ ເຮົາບໍ່ຈຳເປັນຕ້ອງຟ້າວກິນຢາຄຸມສຸກເສີນ
ເຖິງແມ່ນການກິນຢາຄຸມສຸກເສີນຫຼັງມີເພດສຳພັນໂດຍໄວທີ່ສຸດຈະເພີ່ມໂອກາດປ້ອງກັນຖືພາໄດ້ຫຼາຍ ກ່ວາ ແຕ່ກໍ່ບໍ່ໄດ້ໝາຍຄວາມວ່າກິນຊ້າກ່ວາປະມານ 1-2 ວັນ ແມ່ນຈະພາດໂອກາດປ້ອງກັນການຖືພາ ເພາະຢາຄຸມສຸກເສີນສາມາດກິນຫຼັງມີເພດສຳພັນໄດ້ປະມານ 72 ຊົ່ວໂມງ ເຊິ່ງສາມາດປ້ງກັນການຖືພາໄດ້ປະມານ 75% ແຕ່ຫາກກິນຢາຄຸມສຸກເສີນພາຍໃນ 24 ຊົ່ວໂມງຫຼັງມີເພດສຳພັນ ໂອກາດລອດຈາກການຖືພາຈະເພີ່ມເປັນ 85% ແຕ່ຖ້າກິນຫຼັງຈາກ 72 ຊົ່ວໂມງຫຼັງມີເພດສຳພັນໂອກາດຖືພາກໍ່ມີສິດສູງຂຶ້ນ.
ຢາຄຸມສຸກເສີນໃຊ້ເພື່ອທຳແທ້ງບໍ່ໄດ້.
ຢາຄຸມສຸກເສີນມີໜ້າທີ່ພຽງຊ່ວຍສະລໍການຕົກໄຂ່ຂອງເພດຍິງພ້ອມທັງຂັດຂວາງການຕົກໄຂ່ໃນມົດລູກເພື່ອປ້ອງກັນບໍ່ໃຫ້ໄຂ່ພົບກັບສະເປີມຂອງທ່ານຊາຍຈົນເກີດການຖືພາເທົ່ານັ້ນ ແຕ່ຫາກວ່າໄຂ່ລຸດເຂົ້າໄປຝັງຕົວໃນມົດລູກຮຽບຮ້ອຍແລ້ວ ຢາຄຸມສຸກເສີນກໍ່ບໍ່ສາມາດກຳຈັດໄຂ່ທີ່ຝັງໃນມົດລູກໄດ້
ຜົນຂ້າງຄຽງຈາກຢາຄຸມສຸກເສີນບໍ່ໄດ້ເກີດກັບທຸກຄົນ
ຜົນຂ້າງຄຽງຈາກຢາຄຸມສຸກເສີນອັນດັບຕົ້ນໆ ຜູ້ກິນຈະມີອາການປວດຮາກ, ປວດຫົວ, ເຈັບເຕົ້ານົມ, ເລືອດອອກເໝືອນເປັນປະຈຳເດືອນ, ປະຈຳເດືອນມາຜິດປົກກະຕິບໍ່ຕົງເວລາ ແຕ່ອາການຂ້າງຄຽງເຫຼົ່ານີ້ກໍ່ບໍ່ໄດ້ເກີດກັບທຸກຄົນ
ກິນຢາຄຸມສຸກເສີນໄດ້ ເຖິງວ່າທ່ານຈະກິນຢາຄຸມຊະນິດລາຍວັນຢູ່ແລ້ວ.
ຫາກປົກກະຕິທ່ານກິນຢາຄຸມຢູ່ແລ້ວ ແຕ່ວ່າທ່ານລືມກິນຢາຄຸມປະມານ 3 ວັນ ແລະ ທ່ານໄປມີເພດສຳພັນໂດຍບໍ່ໄດ້ປ້ອງກັນ ທ່ານສາມາດກິນຢາຄຸມສຸກເສີນໄດ້ ເພາະຫາກທ່ານຂາດການກິນຢາຄຸມແບບລາຍວັນໄປ 3 ວັນແລ້ວ ຮ່າງກາຍຂອງທ່ານຈະບໍ່ມີຮໍໂມນປ້ອງກັນການຖືພາຫຼົງເຫຼືອຢູ່ ສະນັ້ນທ່ານຈິ່ງສາມາດກິນຢາຄຸມສຸກເສີນແທນໄດ້.
ສຳລັບສາວໆທີ່ກິນຢາຄຸມລາຍວັນເປັນປະຈຳຢູ່ແລ້ວບໍ່ຄວນກິນຢາຄຸມສຸກເສີນເກີນ 2 ຄັ້ງຕໍ່ເດືອນ ເພາະອາດໃຫ້ເກີດຜົນຂ້າງຄຽງກັບຮັງໄຂ່ໄລຍະຍາວ.
ຢາຄຸມສຸກເສີນບໍ່ເຮັດໃຫ້ອ້ວນ.
ຕັດຄວາມກັງວົນເລື່ອງນີ້ອອກໄປໄດ້ເລີຍເພາະທາງການແພດໜ່ວຍງານຄວບຄຸມຢາແຫ່ງສະຫະພາບຢຸໂຣບ
(European Medicines Agency: EMA) ອອກມາຢືນຢັນວ່າ ການກິນຢາຄຸມສຸກເສີນບໍ່ສາມາດເຮັດໃຫ້ອ້ວນຂຶ້ນໄດ້ເລີຍ
ຢ້ຳກັນອີກຄັ້ງວ່າ ເຖິງແມ່ນການກິນຢາຄຸມສຸກເສີນຈະຊ່ວຍປ້ອງກັນການຖືພາໃນເບື້ອງຕົ້ນໄດ້ ແຕ່ການກິນຢາຄຸມສຸກເສີນເລື້ອຍໆກໍ່ບໍ່ຄວນເຮັດ ຫາກມີເພດສຳພັນໃນຊ່ວງທີ່ຍັງບໍ່ພ້ອມຂໍແນະນຳໃຫ້ໃຊ້ຖົງຢາງອານະໄມເພື່ອຄວາມປອດໄປໃນທຸກໆດ້ານດີກ່ວາ.