ໃນ​ວັນ​ທີ 15 ກຸມ­ພາ 2016 ນີ້ ກົມ​ທຸ­ລະ​ກິດ​ກະ­ຊວງ​ພະ­ລັງ­ງານ ແລະ​ບໍ່ແຮ່ ໄດ້​ຈັດ​ຝຶກ​ອົບ­ຮົມ​ກ່ຽວ​ກັບ​ການ​ບໍ​ລິຫານ​ຄວາມ​ສ່ຽງ​ຕໍ່​ຮ່າງ​ມາດ­ຕະ­ຖານສັນ­ຍາ​ສຳ​ປະ­ທານ​ຂອງ​ໂຄງ­ການ​ໄຟ­ຟ້າພະ­ລັງ­ງານ​ນ້ຳ​ຂຶ້ນ​ຢ່າງ​ເປັນ​ທາງ​ການ​ຢູ່​ແຂວງ​ອັດ​ຕະ​ປື, ໂດຍ​ເປັນ​ປະ­ທານ​ຂອງ ທ່ານ ວິ­ທະ­ຍາ ພົມ­ມະ­ຈັນ ຫົວ­ໜ້າ​ພະແນກ​ພະ­ລັງ­ງານ ແລະ​ບໍ່​ແຮ່ແຂວງ​ອັດຕະ​ປື ແລະ​ການ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ໄຊ​ປະ­ເສີດ ພົມ​ສຸ­ພາ ຫົວ­ໜ້າ​ກົມ​ທຸລະ​ກິດ​ກະ­ຊວງ​ພະ­ລັງ­ງານ ແລະ​ບໍ່​ແຮ່ ພ້ອມ​ຄະ­ນະ ມີ​ພະ­ນັກ­ງານ​ວິ­ຊາ​ການຈາກ​ກົມ​ພະ­ລັງ­ງານ ແລະ​ບໍ່​ແຮ່, ຫົວ­ໜ້າພະ​ແນກ, ຮອງ​ຫົວ­ໜ້າ​ພະ​ແນກ​ພະ­ລັງງານ ແລະ​ບໍ່​ແຮ່​ແຂວງ ພ້ອມ​ດ້ວຍ​ພະ­ນັກງານ​ວິ­ຊາ​ການ 17 ແຂວງ ໃນ​ທົ່ວ​ປະເທດ ແລະ​ນະ­ຄອນ­ຫຼວງ​ເຂົ້າ​ຮ່ວມ.

ຈຸດ­ປະ­ສົງ​ຂອງ​ການ​ຝຶກ​ອົບ­ຮົມ​ໃນ​ຄັ້ງ​ນີ້, ແມ່ນ​ເພື່ອ​ເພີ່ມ​ຂິດ​ຄວາມ​ສາ­ມາດໃຫ້​ແກ່​ພະ­ນັກ­ງານ​ຫຼັກ​ແຫຼ່ງ ແລະ​ວິ­ຊາການ​ທີ່​ເຮັດ​ວຽກ​ໃນ​ດ້ານ​ນີ້​ເຂົ້າ­ໃຈ​ຢ່າງເລິກ ­ເຊິ່ງ​ໃນ​ການ​ຄຸ້ມ​ຄອງ​ໂຄງ­ການ​ໄຟຟ້າ​ພະ­ລັງ­ງານ​ນ້ຳ​ກໍ​ຄື: ເຂື່ອນ​ໄຟ­ຟ້າ​ນໍ້​ຕົກດ້ວຍ​ມາດ­ຕະ­ຖານ​ສາ­ກົນ​ຕາມ​ສັນ­ຍາ​ສຳປະ­ທານ​ໃຫ້​ສູງ​ຂຶ້ນ ແລະ​ຖືກ­ຕ້ອງ​ກ່ຽວກັບ​ການ​ບໍ­ລິ­ຫານ​ຄວາມ​ສ່ຽງ​ທີ່​ຕິດ​ພັນກັບ​ຮ່າງ​ມາດ­ຕະ­ຖານ​ສັນ­ຍາ​ສຳ​ປະ­ທານ ແຕ່​ລະ​ໄລ­ຍະ​ເຊັ່ນ: ໄລ­ຍະ​ການ​ກວດ­ກາກ່ອນ​ເຊັນ​ສັນ­ຍາ, ໄລ­ຍະ​ການ​ພັດ­ທະ­ນາໂຄງ­ການ, ໄລ­ຍະ​ດຳ­ເນີນ​ການ​ກໍ່­ສ້າງ,  ແລະ​ໄລ­ຍະມອບ​ໂອນ​ໂຄງ­ການ.

ພ້ອມ​ກັນ​ນັ້ນ, ເພື່ອ​ເປັນ​ການ​ແລກປ່ຽນ​ບົດ­ຮຽນ​ເຊິ່ງ​ກັນ ແລະ​ກັນໃຫ້​ຜູ້​ເຂົ້າຮ່ວມ​ຕ້ອງ​ໄດ້​ສຶກ​ສາ​ເຖິງ​ຄວາມ​ເປັນ​ມາ, ສະ­ພາບ​ຄວາມ​ເປັນ​ຈິງ​ໃນ​ປະ­ຈຸ​ບັນ ແລະ ຄວາມ​ຄາດ​ຫວັງ​ກັບ​ການ​ພັດ­ທະ­ນາແບບ​ຍືນ​ຍົງ​ໃນ​ການ​ພັດ­ທະ­ນາ​ໄຟ­ຟ້າ​ນ້ຳຕົກ​ໃນ ສປປ ລາວ ລວມ​ທັງ​ພາກ​ລັດ ແລະ​ເອ­ກະ​ຊົນ, ສຶກ​ສາ​ເຖິງ​ຄວາມ​ຈຳກັດ, ຄວາມ​ສ່ຽງ​ໃນ​ໂຄງ­ການ​ສຳ​ປະທານ ແລະ​ບັນ­ຫາ​ອື່ນໆທີ່​ພົວ­ພັນ​ເຖິງ​ພູ­ມີ­ພາກ​ບ່ອນ​ທີ່​ມີ​ໂຄງ­ການ​ໄຟ­ຟ້າ​ພະ­ລັງງານ​ນ້ຳ­ຕົກ ພ້ອມ​ນີ້​ກໍ່​ຍັງ​ໄດ້​ມີ​ການ​ລະ ດົມ​ຄວາມ​ຄິດ​ເຫັນ​ແບບ​ມີ​ສ່ວນ​ຮ່ວມກ່ຽວ​ກັບ​ຄວາມ​ສ່ຽງ​ຕົ້ນ­ຕໍ​ທີ່​ອາດ​ຈະ​ເກີດຂຶ້ນ​ໃນ​ວິ­ໄສ​ທັດ​ທີ່​ຫຼີກ​ລ້ຽງ​ບໍ່​ໄດ້.

ອີກ​ດ້ານ​ໜຶ່ງ​ພະ­ລັງ­ງານ​ໄຟ­ຟ້າແມ່ນປັດ​ໄຈ​ບຸ­ລິ­ມະ­ສິດ​ອັນ​ຕົ້ນ­ຕໍ​ທີ່​ປະ­ກອບ​ເຂົ້າໃນ​ໂຄງ​ລ່າງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃນ​ໄລ­ຍະ​ຜ່ານ​ມາ​ ເຫັນ​ວ່າ­ການພັດ­ທະ­ນາ​ພະ­ລັງ­ງານ​ນ້ຳ­ຕົກ​ແມ່ນ​ໄດ້​ຮັບ ຜົນ­ສຳ­ເລັດ​ເປັນ​ຢ່າງ​ດີ: ປະ­ຈຸ​ບັນ​ມີ​ໂຮງງານ​ໄຟ­ຟ້າ​ນ້ຳ­ຕົກ 38 ໂຄງ­ການ ລວມກຳ­ລັງ​ຕິດ​ຕັ້ງ 6.300 ເມ​ກາ​ວັດ ໄດ້​ເປີດດຳ­ເນີນ​ການ​ຜະ­ລິດ​ຈຳ­ໜ່າຍ​ໃຫ້​ແກ່​ພາຍ​ໃນ ແລະ​ສົ່ງ​ອອກ​ຕ່າງ­ປະ­ເທດ ໃນ​ນັ້ນ ມີ 25 ໂຄງ­ການ, ລວມ​ກຳ­ລັງ​ຕິດ​ຕັ້ງ 5.675 ເມ​ກາ​ວັດ (90%) ເປັນ​ໂຄງການ​ທີ່​ພັດ­ທະ­ນາ​ໂດຍ​ເອ­ກະ​ຊົນ ນອກຈາກ​ນີ້ ຍັງ​ມີ 39 ໂຄງ­ການ ລວມ​ກຳ­ລັງຕິດ​ຕັ້ງ 4.100 ເມ​ກາ​ວັດ ກຳ­ລັງ​ດຳ­ເນີນການ​ກໍ່­ສ້າງ ແລະ​ອີກ​ຫຼາຍ​ກວ່າ 200 ໂຄງການ ລວມ​ທັງ​ໂຄງ­ການ​ຂະ­ໜາດ​ນ້ອຍ​ທີ່ສ້າງ​ທ່າ­ແຮງ​ໃນ​ການ​ຜະ­ລິດ​ໄຟ­ຟ້າ​ທັງໝົດ 15.000 ເມ​ກາ​ວັດ ກຳ­ລັງ​ດຳ­ເນີນສຶກ​ສາ​ຄວາມ​ເປັນ​ໄປ​ໄດ້ ແລະ​ພັດ­ທະ­ນາໃນ​ລະ​ດັັບ​ຕ່າງໆ.

ສະ­ເພາະ​ແຂວງ​ອັດ​ຕະ​ປືກໍ່​ເປັນ​ອີກ​ແຂວງ​ໜຶ່ງ​ທີ່​ສາ­ມາດ​ສ້າງ​ທ່າ­ແຮງ​ບົ່ມຊ້ອນ​ໃນ​ການ​ຜະ­ລິດ​ໄຟ­ຟ້າ​ນ້ຳ­ຕົກ ແລະ ມີ​ຫຼາຍ​ແຫ່ງ​ທີ່​ເປັນ​ບຸ­ລິ­ມະ­ສິດ​ຂອງ​ໂຄງການ​ລັດ­ຖະ­ບານ.

ທີ່ມາ: ນສພ ເສດຖະກິດ-ສັງຄົມ