ຄວາມຮູ້ຮອບຕົວ ວັນນີ້ເຮົາຈະມານຳສະເໜີກ່ຽວກັບ ວິທີຊ່ວຍຄົນຈົມນ້ຳເບື້ອງຕົ້ນ ເພາະນີ້ມັນເປັນຊ່ວງລະດູຝົນ ເປັນລະດູທີ່ນ້ຳຫຼາຍ ແລະ ຍັງເປັນຊ່ວງພັກແລ້ງ ທີ່ນ້ອງໆນັກຮຽນໄດ້ພັກໂຮງຮຽນກັນເຖິງ 3 ເດືອນ ແນ່ນອນວ່າ ເດັກນ້ອຍ ກັບ ນ້ຳ ມັນເປັນຂອງຄູ່ກັນ ຖ້າບັງເອີນເກີດເຫດບໍ່ຄາດຄິດວັນໜຶ່ງທ່ານອາດໄປພົບຄົນກຳລັງຈົມນ້ຳຢູ່ ແລ້ວຈະສາມາດຊ່ວຍໃຫ້ຖືກວິທີໄດ້ແນວໃດນັ້ນຕ້ອງອ່ານກັນເລີຍ

ຄົນຕົກນ້ຳ ຫຼື ຈົມນ້ຳເກີດຂື້ນໄດ້ທຸກເມື່ອໂດຍສະເພາະກັບເດັກນ້ອຍ ສະນັ້ນເພື່ອຄວາມປອດໄພຂອງຄົນທີ່ຈົມນ້ຳ ແລະ ຄົນທີ່ໄປຊ່ວຍ ການຮຽນຮູ້ວິທີຊ່ວຍຄົນຈົມນ້ຳຈິ່ງເປັນເລື່ອງທີ່ທຸກຄົນຄວນສຶກສາໄວ້ຍິ່ງເປັນການດີ.

ວິທີຊ່ວຍຄົນຈົມນ້ຳ

     ສິ່ງສຳຄັນໃນການຊ່ວຍຄົນຈົມນ້ຳ ຢ່າງທຳອິດທ່ານຄວນມີສະຕິກ່ອນ ຈາກນັ້ນຈິ່ງຄ່ອຍໃຊ້ວິທີຊ່ວຍຄົນຈົມນ້ຳຢ່າງຖືກຕ້ອງ ເຊິ່ງມີຫຼັກການງ່າຍໆຢູ່ 4 ວິທີດັ່ງນີ້:
1. ຢື່ນອຸປະກອນໃຫ້ຄົນຕົກນ້ຳຈັບເຊັ່ນ: ເສື້ອ, ສາຍແອວ, ທ່ອນໄມ້, ຮ່ວງຢາງ ວິທີນີ້ໃຊ້ໃນກໍລະນີທີ່ໄລຍະຫ່າງລະຫວ່າງຄົນຕົກນ້ຳກັບທ່ານບໍ່ໄກກັນເກີນໄປ

2. ໂຍນອຸປະກອນຮ່ວງຢາງ, ຖັງພລາສຕິກ, ຮ່ວງຊູຊີບ ໃຫ້ຄົນຕົກນ້ຳໄດ້ເກາະ ວິທີນີ້ຈະມີຄວາມປອດໄພຕໍ່ຜູ້ທີ່ໄປຊ່ວຍຄົນຕົກນ້ຳພ້ອມ

3. ການໃຊ້ອຸປະກອນເຊັ່ນເຮືອພາຍ, ເຮືອນໄວ ແລະ ເຮືອຊະນິດອື່ນໆເປັນຕົ້ນ ການໃຊ້ອຸປະກອນເຫລົ່ານີ້ຈະສາມາດຊ່ວຍຫຼຸດຄວາມສ່ຽງຈາກອັນຕະລາຍທາງນ້ຳແກ່ຜູ້ທີ່ໄປຊ່ວຍຄົນຕົກນ້ຳ

4. ລາກຜູ້ຕົກນ້ຳເຂົ້າຝັ່ງພ້ອມອຸປະກອນທີ່ສົ່ງໄປຊ່ວຍ.

ທ່າລອຍນ້ຳສຳລັບຊ່ວຍຄົນຈົມນ້ຳ

ທ່າລອຍນ້ຳທີ່ຖືກຕ້ອງສຳລັບຊ່ວຍຄົນຈົມນ້ຳ  ມີຢູ່ 4 ທ່າດ້ວຍກັນ ແບ່ງເປັນທ່າລອຍໄປ 2 ທ່າ ແລະ ທ່າລອຍກັບ 2 ທ່າດັ່ງນີ້
ທ່າລອຍໄປໄດ້ແກ່ທ່າຟຣີສໄຕລ໌ ແລະ ທ່າກົບ ທ່ານີ້ຈະຍົກຫົວຂຶ້ນຈາກນ້ຳ ແລະ ເຮັດໃຫ້ເບິ່ງເຫັນຄົນຕົກນ້ຳ ທ່າລອຍກັບໄດ້ແກ່ ທ່າກິ່ງກົບຫງາຍ ແລະ ທ່າລອຍສະແຄງ.

ກໍລະນີທີ່ຄົນຈົມນ້ຳໝົດສະຕິ ເຮົາສາມາດເຂົ້າໄປແນບຕົວເພື່ອນຳເຂົາຂຶ້ນຝັ່ງໄດ້ໂດຍວິທີດັ່ງຕໍ່ໄປນີ້:
1. ໃຊ້ວິທີດຶງເຂົ້າຫາຝັ່ງໂດຍການກອດໄຂ່ວໜ້າເອິກ ແລ້ວໃຊ້ມືອີກຂ້າງລອຍທ່າກົບຫງາຍ ຫຼື ທ່າສະແຄງເຂົ້າຫາຝັ່ງ ຢ່າລືມຕ້ອງໃຫ້ໜ້າຕົນເອງ ແລະ ໜ້າຄົນຈົມນ້ຳຢູ່ເໜືອໜ້ານ້ຳສະເໝີ.

2. ດຶງເຂົ້າຫາຝັ່ງດ້ວຍວິທີຈັບຄາງ ໃຊ້ມືທັງສອງຂ້າງຈັບຄາງກະໄຕທັງສອງຂອງຜູ້ຈົມນ້ຳ ຈາກນັ້ນໃຫ້ໃຊ້ຕີນດີດນ້ຳເພື່ອປະຄອງຕົວເຂົ້າຫາຝັ່ງ ຢ່າລືມຕ້ອງໃຫ້ໜ້າຕົນເອງ ແລະ ໜ້າຄົນຈົມນ້ຳຢູ່ເໜືອໜ້ານ້ຳສະເໝີ.

3. ດຶງເຂົ້າຫາຝັ່ງດ້ວຍວິທີຈັບຜົມ ໃຫ້ເຂົ້າປະຊິດທາງດ້ານຫຼັງຜູ້ຈົມນ້ຳ ໂດຍໃຊ້ມືເບື້ອງໜຶ່ງຈັບຜົມຜູ້ຈົມນ້ຳໄວ້ໃຫ້ແໜ້ນ ຈາກນັ້ນກໍ່ລອຍນ້ຳມືດຽວເຂົ້າຫາຝັ່ງ  ຢ່າລືມຕ້ອງໃຫ້ໜ້າຕົນເອງ ແລະ ໜ້າຄົນຈົມນ້ຳຢູ່ເໜືອໜ້າ ນ້ຳສະເໝີ.

ຫຼັງຈາກຊ່ວຍຂື້ນມາຈາກນ້ຳໄດ້ແລ້ວເຮົາຕ້ອງກວດກາເບິ່ງວ່າຍັງມີຊີວິດ ຫຼື ບໍ່ ກໍລະນີທີ່ໝົດສະຕິ ແຕ່ຍັງຫາຍໃຈຢູ່ແມ່ນສາເຫດຊ່ວຍໄດ້ດ້ວຍວິທີດັ່ງນີ້:

ການຜາຍປອດທີ່ຖືກຕ້ອງ
1. ຈັບຫົວໃຫ້ຫງາຍຂຶ້ນໃຫ້ຫຼາຍທີ່ສຸດ ຝາມືກົດໜ້າຜາກຂອງຜູ້ຈົມນ້ຳ ແລ້ວໃຊ້ນິ້ວມືບີບດັງ ຈາກນັ້ນໃຊ້ປາກຕົນເອງຄອບປາກຂອງຜູ້ຈົມນ້ຳໃຫ້ມິດຊິດ ແລ້ວເປົ່າລົມເຂົ້າໄປໃຫ້ສຸດລົມຫາຍໃຈຂອງເຮົາ.
2. ເມື່ອເປົ່າລົມເຂົ້າແລ້ວໃຫ້ເບິ່ງທີ່ໜ້າເອິກວ່າຄົນຈົມນ້ຳວ່າມັນມີການຂະຫຍາຍຂຶ້ນ ຫຼື ບໍ່
3. ຖ້າເຫັນໜ້າເອິກບໍ່ຂະຫຍາຍໃຫ້ປ່ອຍມືທີ່ບີບດັງໄວ້ ແລ້ວເປົ່າລົມເຂົ້າໄປ ເຮັດຊ້ຳໆປະມານ 20 ຄັ້ງ/1ນາທີ ຫຼື ຈົນກ່ວາຜູ້ຈົມນ້ຳຈະຮູ້ສຶກຕົວ ແລ້ວໂທຫາແພດມາຊ່ວຍ.

ໝາຍເຫດ: ຖ້າມີຄົນຊ່ວຍ 2 ຄົນ ໃຫ້ຄົນໜຶ່ງເປົ່າປາກ ແລະ ຄົນໜຶ່ງນວດຫວໃຈ ເຊິ່ງການນວດຫົວໃຈສາມາດເຮັດໃດ້ດັ່ງນີ້:

1. ຈັດໃຫ້ຜູ້ຈົມນ້ຳນອນຢູ່ບ່ອນພື້ນລາບແຂງ
2. ວັດຕຳແໜ່ງທີ່ເໝາະສົມສຳລັບການນວດຫົວໃຈ ໂດຍໃຊ້ນີ້ວຊີ້ ແລະ ນີ້ວກາງຂ້າງທີ່ຖະນັດຂອງທ່ານ ເລີ່ມຈາກດ້ານຊ້າຍຊີ້ໂຄງລ່າງຂອງຜູ້ຈົມນ້ຳຂື້ນໄປຈົນເຖິງປາຍກະດູກໜ້າເອິກ ວັດເໜືອປາຍກະດູກຂຶ້ນມາສອງນິ້ວມື ແລ້ວໃຊ້ສັນມືອີກຂ້າງໜຶ່ງວາງເທິງຕຳແໜ່ງດັ່ງກ່າວ ຈາກນັ້ນໃຊ້ມືຂ້າງທີ່ຖະນັດທັບລົງໄປ ນີ້ວມືເບື້ອງໜຶ່ງໃຫ້ກ່ຽວກັບນີ້ມືເບື້ອງໜຶ່ງໄວ້ ສ່ວນມືອີກເບື້ອງໜຶ່ງແມ່ນແບອອກ
3. ຜູ້ຊ່ວຍເຫຼືອຕ້ອງຢືດໄຫລ່ ແລະ ແຂນຢືດໃຫ້ຕົງ ຈາກນັ້ນປ່ອຍນ້ຳໜັກຕົວຜ່ານຈາກໄຫລ່ໄປສູ່ແຂນທັງສອງ ແລະ ລົງໄປສູ່ກະດູກໜ້າເອິກໃນແນວຕັ້ງສາກລຳຕົວຂອງຜູ້ປ່ວຍແລ້ວກົດລົງໄປເລິກປະມານ 1,5-5 ນິ້ວ ຫຼື ປະມານ 1 ໃນ 3 ຂອງຄວາມໜາໜ້າເອິກ ໂດຍກົດລົງໄປໃນແນວດິ່ງ ແລະ ຢ່າກະແທກ ທັງນີ້ໃຫ້ເຮັດສະລັບກັບການເປົ່າປາກ ໂດຍເປົ່າປາກ 2 ຄັ້ງ ກົດໜ້າເອິກ 30 ຄັ້ງ.
4. ຜ່ອນມືທີ່ກົດຂຶ້ນໃຫ້ເຕັມທີ່ເພື່ອໃຫ້ອົກມີການຂະຫຍາຍຕົວ ແລະ ຫົວໃຈໄດ້ຮັບເລືອດທີ່ອຸດົມໄປດ້ວຍອັອກຊີເຈນ ຂະນະທີ່ຜ່ອນມືບໍ່ຈຳເປັນຕ້ອງຍົກມືຂຶ້ນສູງ ມືຍັງຄົງສຳພັດຢູ່ທີ່ກະດູກໜ້າເອິກ ຢ່າຍົກມືອອກຈາກໜ້າເອິກ ຈະເຮັດໃຫ້ມີເລືອດໄປລ້ຽງສ່ວນຕ່າງໆ ໃນຮ່າງກາຍ ແລະ ມີເລືອດໄຫລກັບເຂົ້າສູ່ຫົວໃຈ ເຮັດໃຫ້ມີການໄຫລວຽນຂອງເລືອດໃນຮ່າງກາຍ.
5. ການກົດນວດຫົວໃຈຄວນນວດເປັນຈັງຫວະສະໝ່ຳສະເໝີ ໃນອັດຕາຄວາມໄວ 100ຄັ້ງ/ນາທີ ຖ້າໜ້ອຍກ່ວານີ້ຈະບໍ່ໄດ້ຜົນ

ເພື່ອເຮັດໃຫ້ທຸກທ່ານເຂົ້າໃຈວິທີຊ່ວຍເຫຼືອຜູ້ຈົມນ້ຳຂັ້ນພື້ນຖານງ່າຍຂຶ້ນທາງເຮົາເລີຍມີວິດີໂອສາທິດໃຫ້ເບິ່ງ ແຕ່ວິດີໂອທີ່ນຳໃຊ້ປະກອບນີ້ແມ່ນພາກສຽງເປັນພາສາໄທ ເພື່ອເຮັດໃຫ້ການສື່ສານດ້ານພາສາເຂົ້າໃຈງ່າຍຂຶ້ນ.

ຂໍ້ມູນຈາກ http://health.kapook.com/