ໃນ​ໄລຍະ​ສົງຄາມ​ຕໍ່ສູ້​ກູ້​ຊາດ ໂດຍ​ສະເພາະ​ລະຫວ່າງປີ 1964-1973 ​ສປປ ລາວ ຖື​ວ່າ​ໄດ້​ກາຍເປັນ​ສະໝໍລະພູມ​ຮົບ​ທາງ​ພາກພື້ນ​ດິນ ແລະ ທາງ​ອາກາດ​ຢ່າງດຸເດືອດ​ໜັກໜ່ວງ​ທີ່​ສຸດ ພວກ​ສັດຕູ້​ຜູ້​ມາ​ຮຸກ​ຮານ ໄດ້​ນຳ​ເອົາ​ເຄື່ອງບິນ​ທີ່​ບັນທຸກ​ລູກ​ລະເບີດມາ​ຖິ້ມໃສ່​ຜືນ​ແຜ່ນດິນ​ລາວ ກວ່າ 580.000 ຖ້ຽວ ຈຳນວນ ລະ ເບີດ​ກວ່າ 3 ລ້ານ​ໂຕນ ໃນ​ນັ້ນ ລະເບີດ​ລູກ​ຫວ່ານ ປະມານ 270 ລ້ານ​ໜ່ວຍ ບົມ​ບີ​ໃຫຍ່ ປະມານ 4 ລ້ານ​ໂຕນ ສະເລ່ຍ​ໃສ່​ພົນ​ລະເມືອງ​ລາວ​ໃນ​ໄລຍະ​ນັ້ນ ຕົກ​ຢູ່ປະມານ 1 ໂຕນ/ຄົນ ຂະນະ​ທີ່​ປັດຈຸ​ບັນ ​ສປປ ລາວ ເຮົາ​ຍັງ​ພົບ​ກັບຜົນ​ກະທົບ​ອັນ​ໃຫຍ່​ຫຼວງ ​ຈາກ​ລູກລະເບີດ​ບໍ່​ທັນ​ແຕກ​ຕົກ​ຄ້າງ ຈຳນວນ 14 ແຂວງ 98 ເມືອງ ກວມເອົາ​ເນື້ອທີ່​ປະມານ 87.000 ກິໂລ​ຕາ​ແມັດ ເຊິ່ງ​ນັ້ນ​ໄດ້​ກາຍເປັນບັນຫາ​ຕໍ່​ການ​ດຳລົງ​ຊີວິດ​ຂອງປະຊາຊົນ​ບັນດາເຜົ່າ ກໍ່​ຄືວຽກງານ​ການ​ພັດທະນາ​ເສດຖະກິດ-ສັງຄົມ​ຂອງ​ປະເທດ​ສູງ​ສົມຄວນ.

ກອງ​ປະຊຸມ​ວຽກ​ງານ​ແກ້​ໄຂບັນຫາ​ລູກ​ລະເບີດ​ບໍ່​ທັນ​ແຕກທົ່ວປະເທດ ປະຈຳ​ປີ 2015 ຈັດ​ຂຶ້ນວັນ​ທີ 12 ກຸມພາ 2016 ຢູ່​ທີ່​ໂຮງແຮມ​ລາວ​ພລາ​ຊາ ໂດຍ​ການເປັນ​ປະທານ​ຂອງ​ທ່ານ ບຸນ​ເຮືອງ ດວງ​ພະຈັນ ລັດຖະມົນຕີ​ປະຈຳຫ້ອງ​ວ່າການ​ລັດຖະບານ ປະທານ ​ຄຊກລ ໃຫ້​ກຽດ​ເຂົ້າ​ຮ່ວມມີ​ທ່ານ ອາ​ຊາງ ລາວ​ລີ ຮອງ​ນາຍົກ​ລັດຖະມົນຕີ ຜູ້​ຊີ້​ນຳ​ວຽກ​ງານແກ້​ໄຂ​ບັນຫາ​ລູກ​ລະເບີດ​ບໍ່​ທັນແຕກ​ຢູ່ ​ສປປ ລາວ ພ້ອມ​ດ້ວຍບັນດາ​ລັດຖະມົນຕີ​ຊ່ວຍ ຄະນະກຳມະການ ຫົວໜ້າ​ຫ້ອງການ ​ຄຊກລ ທັງ​ສູນ​ກາງ-ທ້ອງຖິ່ນ ແລະ ຜູ້ຕາງໜ້າ​ອົງ​ການຈັດຕັ້ງສາກົນ​ກ່ຽວຂ້ອງ.

ທ່ານ ພູ​ຂຽວ ຈັນທະ​ສົມບູນ ຫົວໜ້າ​ຫ້ອງການ​ຄະນະ​ກຳ​ມະການ​ຄຸ້ມ​ຄອງ​ແຫ່ງ​ຊາດ ເພື່ອ​ແກ້ໄຂ​ບັນຫາ​ລະເບີດ​ບໍ່​ທັນ​ແຕກ​ຕົກຄ້າງ​ຢູ່ ​ສປປ ລາວ (​ຄຊກລ) ໄດ້ຜ່ານ​ບົດ​ສະຫຼຸບ​ການຈັດຕັ້ງ​ປະຕິບັດ​ວຽກ​ງານ​ແກ້​ໄຂ​ບັນຫາ ​ລບຕ 5 ປີ (2011-2015) ສະເໜີ​ແຜນການ​ແກ້​ໄຂ​ບັນຫາ ​ລບຕ ສຳລັບປີ 2016-2020 ແລະ ແຜນ​ວຽກຈຸດ​ສຸມ​ປີ 2016 ເຊິ່ງ​ຕະຫຼອດ 5 ປີຜ່ານມາ ​ຄຊກລ ໄດ້​ເອົາໃຈໃສ່ຢ່າງ​ຕັ້ງໜ້າ​ ເຂົ້າ​ໃນ​ການຈັດຕັ້ງປະຕິບັດ​ສິດ​ພາລະ​ບົດບາດ​ຂອງຕົນ​ ດ້ວຍ​ຄວາມ​ຮັບຜິດຊອບ​ສູງ ຜ່ານ​ການ​ປະຕິບັດ​ຍຸດ​ທະ​ສາດ 10 ປີ (2011-2020) ກ່ຽວ​ກັບ​ການແກ້​ໄຂ​ບັນຫາ​ລະເບີດ​ບໍ່​ທັນ​ແຕກຕົກ​ຄ້າງ ມາ​ຮອດ​ປັດຈຸບັນ ສາມາດ​ກວດ​ກູ້​ເນື້ອທີ່​ໄດ້​ທັງ​ໝົດ 29,701 ເຮັກຕາ ໃນ​ນັ້ນ ເນື້ອທີ່ກະສິກຳ 18.541 ເຮັກຕາ ດິນ​ພັດທະ​ນາ 11.160 ເຮັກຕາ ທຳລາຍ ​ລບຕ ໄດ້ 552.968 ໜ່ວຍ ໃນນັ້ນ ລູກ​ບົມ​ບີ​ໃຫຍ່ 1.489 ໜ່ວຍ ລະເບີດ​ລູກ​ຫວ່ານ 259.421 ໜ່ວຍ ມິນ 837 ໜ່ວຍ ແລະ ສຳພາ​ວຸດ​ອື່ນໆ​ອີກ ຈຳນວນ 291.221 ໜ່ວຍ ຄຽງ​ຄູ່​ກັນ​ນັ້ນ ກໍ່​ໄດ້​ລົງ​ເຜີຍແຜ່​ໃຫ້​ຄວາມ​ຮູ້​ແກ່ປະຊາຊົນ​ຜູ້​ທີ່​ມີ​ຄວາມ​ສ່ຽງ ໃຫ້ການ​ຊ່ວຍເຫຼືອ ແລະ ປະກອບອາຊີບ​ແກ່​ຜູ້​ປະສົບ​ເຄາະ​ຮ້າຍຈາກ ​ລບຕ ໄດ້​ກວ່າ 1.000 ຄົນ ເຊິ່ງ​ໃນ​ປີ 2008 ມີ​ຈຳນວນ​ຜູ້ເຄາະ​ຮ້າຍ​ຈາກ ​ລບຕ ຈຳນວນສະເລ່ຍ 300 ຄົນ/ປີ ແລະ ປັດຈຸ​ບັນ ມີ​ຈຳນວນ​ຜູ້​ເຄາະ​ຮ້າຍຈາກ ​ລບຕ ສະເລ່ຍ 50 ຄົນ/ປີ.