ສະພາບຊາວໜຸ່ມ ແລະເຍົາວະຊົນຢູ່ລາວ, ຂອງສູນກາງຊາວໜຸ່ມປະຊາຊົນປະຕິວັດລາວແລະກອງທຶນສຳລັບປະຊາກອນ, ຂອງອົງການສະຫະປະຊາຊາດໃຫ້ຮູ້ວ່າ: ເປັນທີ່ຮັບຮູ້ວ່າ ສປປ ລາວມີຄວາມແຕກຕ່າງກັບບັນດາປະເທດເພື່ອນບ້ານ,ກ່ຽວກັບການດື່ມເຫຼົ້າເບຍທີ່ຢູ່ໃນລະດັບຂ້ອນຂ້າງສູງ,ທັງໃນກຸ່ມເພດຊາຍ ແລະຍິງເຖິງແມ່ນວ່າພຶດຕິກຳໃນການດື່ມເຫຼົ້າເບຍຈະຖືວ່າເປັນບັນຫາຂອງເພດຊາຍສ່ວນຫຼາຍໂດຍສະເພາະໃນຊ່ວງເທສະການຕ່າງໆ,ແຕ່ວ່າເພດຍິງກໍດື່ມເຊັ່ນດຽວກັນ, ການດື່ມເຫຼົ້າແມ່ນຕິດ ພັນກັບໂອກາດການສັງສັນ ແລະບຸນປະເພນີຕ່າງໆ ຊຶ່ງຊາວໜຸ່ມຍິງຈຳຕ້ອງໄດ້ດື່ມເຫຼົ້າຮ່ວມກັບແຂກ.
ຈາກຜົນຂອງການປະເມີນຫຼັກສູດທັກສະຊີວິດ, ໄດ້ພົບເຫັນວ່າ 90% ຂອງນັກຮຽນຊັ້ນມັດທະຍົມຕອນ ປາຍປີທີ 5 ເຄີຍດື່ມເຫຼົ້າ, ໃນນັ້ນ ຜູ້ຊາຍ 53% ແລະ ຜູ້ຍິງ 16%, ເຄີຍເມົາເຫຼົ້າຢ່າງໜ້ອຍໜຶ່ງຄັ້ງໃນໄລຍະ 6 ເດືອນ, ອາຍຸສະເລ່ຍ ຊຶ່ງຊາວໜຸ່ມເລີ່ມດື່ມເຫຼົ້າແມ່ນກາຍ 13 ປີນອກຈາກນັ້ນ, ການດື່ມເຫຼົ້າເບຍເປັນບັນຫາທີ່ໄດ້ກ່າວເຖິງຫຼາຍທີ່ສຸດໃນການສົນທະນາ ຊຶ່ງເຫັນໄດ້ວ່າການດື່ມສິ່ງມຶນເມົາແມ່ນຢູ່ໃນວົງກວ້າງ ແລະອາດເປັນສາເຫດທີ່ສຳຄັນຂອງການເກີດບັນ ຫາທາງສຸຂະພາບອື່ນໆເຊັ່ນ: ອຸປະຕິເຫດທາງຖະໜົນ, ການຕີກັນລະຫວ່າງ ຊາວໜຸ່ມ ແລະບັນຫາສິ່ງຫຍໍ້ທໍ້ອື່ນໆ.
ມີຄວາມແຕກຕ່າງກັນກ່ຽວກັບທັດສະນະຄະຕິໃນການດື່ມເຫຼົ້າເບຍ ແລະ ຄວາມເຂົ້າໃຈບັນຫາທີ່ເກີດຂຶ້ນຈາກ ການດື່ມເຫຼົ້າ, ເຊັ່ນກຸ່ມຄົນໃນຕົວເມືອງ, ບໍ່ຄ່ອຍຄິດວ່າການດື່ມເຫຼົ້າເປັນບັນຫາ,ເນື່ອງຈາກວ່າບັນຫາທີ່ພວກເຂົາກັງວົນ ໃຈກວ່າແມ່ນຢາເສບຕິດ.
ນອກຈາກ ນີ້, ອົງການອະນາໄມໂລກ ຍັງໃຫ້ຮູ້ວ່າ: ສປປ ລາວ ເປັນປະເທດ ທີ່ມີການບໍລິໂພກເຫຼົ້າ ຫຼື ດື່ມສິ່ງມຶນເມົາ ສູງກ່ວາປະເທດອື່ນໃນອາຊຽນ ແລະ ມີທ່າອ່ຽງເພີ່ມຂຶ້ນ ໂດຍແຕ່ລະປີເຄື່ອງດື່ມທີ່ມີທາດເຫຼົ້າເປັນພາລະທາງດ້ານເສດຖະກິດທີ່ໜັກໜ່ວງຂອງລາວ, ກວມ ເອົາ 2% ຂອງ GDP ແລະ ຫຼາຍກ່ວາ 3 ແສນຄົນເກີດເປັນພະຍາດຕ່າງໆ ແລະ 180 ພັນຄົນຕິດເຫຼົ້າ ແລະ 50% ຂອງອຸປະຕິເຫດຕາມທ້ອງຖະໜົນແມ່ນເກີດ ຈາກການດື່ມສິ່ງມຶນເມົາ.
ຢ່າງໃດກໍຕາມຕໍ່ຜົນຮ້າຍດັ່ງກ່າວພັກ-ລັດຖະບານໄດ້ສະແດງຄວາມເປັນ ຫ່ວງຕໍ່ຊີວິດ ແລະຜົນທາງລົບຕໍ່ສຸຂະພາບ ຊຶ່ງໄດ້ສະເໜີໃຫ້ສະພາແຫ່ງຊາດ ຮັບຮອງກົດໝາຍວ່າດ້ວຍການຄວບຄຸມ ເຄື່ອງດື່ມທີ່ມີທາດເຫຼົ້າ ໂດຍປະກາດ ໃຊ້ໃນເດືອນມັງກອນ ປີ 2015 ເປັນຕົ້ນ ມາ, ທັງນີ້ກໍເພື່ອໂຄສະນາ ແລະເພີ່ມຄວາມເຂົ້າໃຈແກ່ຊາວໜຸ່ມເພື່ອໃຫ້ເຫັນ ເຖິງໄພອັນຕະລາຍຈາກການດື່ມສິ່ງມຶນ ເມົາ ແລະເອົາຜິດຕໍ່ຜູ້ທີ່ຂາຍເຄື່ອງດື່ມສິ່ງມຶນເມົາໃຫ້ຜູ້ທີ່ມີອາຍຸຕ່ຳກ່ວາ 18 ປີ.
ທີ່ມາ: