ສຳນັກຂ່າວຕ່າງປະເທດ ລາຍງານໃນວັນທີ 3 ກຸມພານີ້ວ່າ ທ່ານ ນາງ ດິນມາ ຣູດເຊບ ປະທານາທິບໍດີບຣາຊິນ ໄດ້ອອກມາປະກາດ ຈະດຳເນີນມາດຕະການເຂັ້ມງວດ ເພື່ອກວາດລ້າງຍຸງທີ່ເປັນພາຫະນະຂອງເຊື້ອພະຍາດຊິກ້າ (Zika virus) ທີ່ກຳລັງແຜ່ລະບາດໃນທົ່ວທະວີບອາເມຣິກາ ແລະ ຈົນຮອດປັດຈຸບັນນີ້ ຍັງບໍ່ທັນມີວິທີການປິ່ນປົວ ຕະຫລອດຮອດຍັງບໍ່ທັນມີວັກແຊັງປ້ອງກັນອີກດ້ວຍ.
ທັງນີ້ ໄວຣັສຊິກາ ຖືກຄົ້ນພົບເທື່ອທຳອິດ ໃນປະເທດອູກັນດາ ທາງພາກຕາເວັນອອກຂອງທະວີບອາຟຣິກາ ແຕ່ປີ 1947 ໂດຍໃນເວລານັ້ນ ຍັງບໍ່ທັນຖືເປັນເຊື້ອພະຍາດລະບາດຮ້າຍແຮງ, ແຕ່ພາຍຫລັງເກີດການລະບາດຂຶ້ນ ໃນພາກພື້ນອາເມຣິກາລາຕິນ ເມື່ອປີ 2015 ເປັນຕົ້ນມາ ເຊື້ອພະຍາດດັ່ງກ່າວ ຊຶ່ງມີຍຸງລາຍເປັນພາຫະນະນຳເຊື້ອ ໄດ້ມີການແຜ່ລະບາດໃນທຸກປະເທດ ທົ່ວທະວີບອາເມຣິກາ ຍົກເວັ້ນພຽງປະເທດຈີເລ ແລະ ການາດາ 2 ປະເທດເທົ່ານັ້ນ.
ສຳລັບປະເທດບຣາຊິນ ແມ່ນຖືເປັນປະເທດທຳອິດໃນພາກພື້ນດັ່ງກ່າວ ທີ່ໄດ້ໃຫ້ຄວາມສຳຄັນຕໍ່ອັນຕະລາຍ ຂອງເຊື້ອໄວຣັສຊິກາ ໂດຍໜ່ວຍງານສາທາລະນະສຸກຂອງບຣາຊິນ ໄດ້ລະບຸວ່າ ເຊື້ອພະຍາດດັ່ງກ່າວນີ້ ອາດມີຄວາມເຊື່ອມໂຍງຢ່າງຈະແຈ້ງ ກັບອາການຜິດປົກກະຕິ ຫລື ການເປັນພິການຂອງເດັກເກີດໃໝ່ ຫລັງຈາກທີ່ເຈົ້າໜ້າທີ່ສັງເກດເຫັນວ່າ ມີເດັກນ້ອຍທີ່ເກີດໃໝ່ຢູ່ບຣາຊິນ ມີກະໂຫລກຫົວນ້ອຍຜິດປົກກະຕິ ຈຳນວນຫລາຍກໍລະນີເຖິງ 4,000 ຄົນ.
