ອີງຕາມຂໍ້ມູນລາຍງານຕໍ່ກອງປະຊຸມຜູ້ແທນທົ່ວປະເທດຄັ້ງທີ X ຂອງພັກຮູ້ວ່າປະຈຸບັນ 90% ຂອງການສົ່ງອອກກາເຟຢູ່ສະຫະກອນຜູ້ປູກກາເຟເຂດພູພຽງບໍລະເວນ, ຫຼັກ 24 ເມືອງບາຈຽງຈະເລີນສຸກ ແຂວງຈຳປາສັກ ແມ່ນສົ່ງໄປຕະຫຼາດສະ ຫະພາບ (ອີຢູ) ເອີຮົບ, ຊຶ່ງທັງໝົດນີ້ແມ່ນໄດ້ຊ່ວຍແກ້ໄຂຄວາມທຸກຍາກຂອງກຸ່ມຜູ້ປູກໄດ້ເປັນຢ່າງດີ.
ສະຫາຍ ບຸນທົງ ເທບໄກສອນ ປະທານສະຫະກອນຜູ້ຜະລິດກາເຟເຂດພູພຽງບໍລະເວນ, ຫຼັກ 24 ເມືອງບາຈຽງຈະເລີນສຸກ,ແຂວງຈຳປາສັກໃຫ້ຮູ້ວ່າ:ພາຍໃຕ້ການນຳພາອັນສະຫຼາດສ່ອງ ໃສຂອງພັກໃນໄລຍະຜ່ານມາເຫັນວ່າວຽກງານການຜະລິດກະສິກຳ ໂດຍສະເພາະການສົ່ງອອກກາເຟຂອງຊາວກະສິກອນ ເຂດພູພຽງບໍລະເວນມີການຂະຫຍາຍຕົວຢ່າງກ້ວາງຂວາງ ແລະເຮັດໃຫ້ຊາວກະສິ ກອນໄດ້ພົ້ນອອກຈາກຄວາມທຸກຍາກ ເທື່ອລະກ້າວ, ຊຶ່ງສະແດງອອກຈາກການເພີ່ມຂຶ້ນຂອງສະມາຊິກສະຫະກອນຈາກ 20% ໃນເບື້ອງຕົ້ນດ້ວຍຄວາມບໍ່ເຂົ້າໃຈ ແລະຫວາດລະແວງກ່ຽວກັບການເຮັດວຽກລວມໝູ່, ແຕ່ພາຍຫຼັງເຫັນວ່າການເຂົ້າຮ່ວມສະຫະກອນຈະຊ່ວຍ ແລະ ສ້າງຜົນດີຫຼາຍດ້ານເປັນຕົ້ນດ້ານລາຄາທີ່ເພີ່ມຂຶ້ນ.
ໃນສົກປີ 2008-2009 ຈິ່ງເຮັດໃຫ້ ສະມາຊິກສະຫະກອນສົນໃຈນຳເອົາຜົນ ຜະລິດຂອງຕົນເຂົ້າມາຂາຍເຮັດໃຫ້ມີປະລິມານເພີ່ມຂຶ້ນຢ່າງຕໍ່ເນື່ອງເຖິງ 140 ກວ່າໂຕນ ແລະຮອດສົກປີ 009-2010 ຜົນຜະລິດໄດ້ເພີ່ມຂຶ້ນຕື່ມອີກເຖິງ 4 ແສນກວ່າໂຕນ, ພ້ອມນັ້ນ ສະຫະກອນ ຍັງໄດ້ຮັບໃບຢັ້ງຢືນຮັບຮອງຜະລິດຕະພັນປອດສານພິດ ແລະການຄ້າເປັນທຳຈາກສະຫະພາບເອີຣົບ, ອາຊີ-ປາຊີຟິກ, ສະຫະລັດອາເມລິກາ, ປະເທດການາດາ ແລະ ເຢຍລະມັນ.
ໃນສົກປີ 2014-2015 ການສົ່ງ ອອກໄປຍັງຕະຫຼາດສາກົນ ເພີ່ມຂຶ້ນສູງ ເຖິງ 1.100 ກວ່າໂຕນຕໍ່ປີ ກວມເອົາ 90% ແມ່ນສົ່ງເຂົ້າຕະຫລາດເອີຣົບ ແລະ ຍັງມີບໍລິສັດຊື່ດັງຂອງໂລກຊື້ກາເຟຈາກສະຫະກອນຂອງລາວເຮົາເຊັ່ນ: ບໍລິສັດກາເຟມາ (CAFEMA) ປະເທດສະວິດ ເຊີແລນ, ບໍລິສັດຂົ້ວກາເຟ ມາລົງໂກ (MALONGO) ຂອງປະເທດຝຮັ່ງ, ບໍລິສັດອາວິດນໍກິດ (ARVID MOR-DQUIST) ປະເທດສະວີເດັນ, ບໍລິສັດ ລົມບຸດ (ROMBOUTS) ປະເທດເບວຢຽມ, ບໍລິສັດຈອນເບີຕັນ (JOHN BURTON ປະເທດນິວຊີແລນ ແລະບໍລິສັດເຄແອບທີເອ (KFTA) ຂອງ ສ.ເກົາຫຼີ.
ນອກຈາກນີ້ ສະຫະກອນຜູ້ຜະລິດກາ ເຟ ຍັງໄດ້ຮັບໃບຢັ້ງຢືນເປັນຜະລິດຕະ ພັນກະສິກຳປອດສານພິດ ແລະການຄ້າ ເປັນທຳ, ຈິ່ງເຮັດໃຫ້ຕະຫລາດຄູ່ຄ້າເຂົ້າ ມາຄ້ຳປະກັນລາຄາຕ່ຳສຸດ 3.500 ກີບຕໍ່ກິໂລ, ຖ້າລາຄາຕະຫຼາດຫຼຸດລົງເຂົາກໍຈະເກັບຊື້ໃນລາຄາຄ້ຳປະກັນ, ແຕ່ຖ້າວ່າລາຄາກາເຟສູງຂຶ້ນກໍຊື້ຕາມຕົວຈິງຂອງ ຕະຫຼາດ, ເຮັດໃຫ້ສະມາຊິກສະຫະກອນ ຂາຍກາເຟໃນລາຄາດີ ແລະສູງກວ່າລາຄາທົ່ວໄປເກືອບສອງເທົ່າ.
ໃນສົກປີ 2013-2014 ຊາວສວນທົ່ວໄປຂາຍກາເຟນ້ອຍໝາກແດງໄດ້ 2.396 ກີບຕໍ່ກິໂລ, ແຕ່ສະມາຊິກສະຫະກອນຂາຍໄດ້ 4.487 ກີບຕໍ່ກິໂລ, ຍ້ອນມີໃບຢັ້ງຢືນປອດສານພິດລາຄາກາເຟຈະໄດ້ເພີ່ມຕື່ມອີກ 500 ກີບຕໍ່ກິໂລ ແລະໄດ້ເພີ່ມຈາກໃບຢັ້ງຢືນການຄ້າເປັນທຳ 1.382 ກີບຕໍ່ກິໂລ, ສຳລັບເງິນຈຳນວນນີ້ຈະນຳເຂົ້າເປັນເງິນ ລວມຂອງສະຫະກອນ, ຖ້າຫາກວ່າບໍ່ໄດ້ມີການປັບປຸງສູນ ອີ້ວ ແລະຊ່ວຍເຫຼືອສັງຄົມຈະນຳເຂົ້າເປັນ ເງິນກອງທຶນໃຫ້ສະມາຊິກພາຍໃນກູ້ຢຶມ.
ສັງລວມແລ້ວສະຫາຍ ປະທົງ ເທບ ໄກສອນ ລະບຸວ່າ: ລາຍຮັບຂອງສະຫະກອນປີໜຶ່ງ ປະມານ 20-100 ລ້ານກີບ ຕໍ່ຄອບຄົວ, ຍ້ອນແນວນັ້ນ ຄຸນນະພາບຊີວິດການເປັນຢູ່ຂອງສະມາຊິກສະຫະກອນ ຈິ່ງນັບມື້ໄດ້ຮັບການປັບປຸງໃຫ້ດີຂຶ້ນເປັນກ້າວໆ ແລະເປັນການປະກອບ ສ່ວນອັນສຳຄັນເຂົ້າໃນການລຶບລ້າງຄວາມທຸກຍາກຂອງປະຊາຊົນໃນເຂດພູພຽງບໍລິເວນຢ່າງຕັ້ງໜ້າ.
ທີ່ມາ: 