ສຳນັກຂ່າວຕ່າງປະເທດ ລາຍງານໃນວັນທີ 21 ມັງກອນຜ່ານມານີ້ວ່າ ໂຄງການອາຫານໂລກ ແຫ່ງ ອົງການສະຫະປະຊາຊາດ (U.N. World Food Program) ໄດ້ອອກມາເຜີຍແຜ່ລາຍງານ ໃນວັນທີ 20 ມັງກອນ 2016 ວ່າ ປະຊາກອນຂອງ ສາທາລະນະລັດອາຟຣິກາກາງ ອາດຈະຕ້ອງປະເຊີນກັບ ຄວາມອຶດຫິວຂາດແຄນອາຫານ ຄັ້ງຮຸນແຮງ ຊຶ່ງເປັນຜົນພວງຂອງຄວາມຂັດແຍ່ງ ແລະ ການສູ້ຮົບພາຍໃນປະເທດ ໂດຍອາດຈະເຮັດໃຫ້ປະຊາກອນກ່ວາເຄິ່ງປະເທດ ຕ້ອງອົດຕາຍ.
ທ່ານ ກີ ອະດູອາ ຮອງຜູ້ອຳນວຍການ U.N. World Food Program ປະຈຳສາທາລະນະລັດອາຟຣິກາກາງ ໄດ້ອອກມາລະບຸວ່າ ບັນຫາການຂາດສະຖຽນລະພາບທາງການເມືອງ ໄດ້ສົ່ງຜົນເຮັດໃຫ້ປະຊາຊົນ ບໍ່ສາມາດເຮັດການຜະລິດ ຫລື ລ້ຽງສັດໄດ້ຕາມປົກກະຕິ ຊຶ່ງເປັນຕົ້ນຕໍ ນຳມາຊຶ່ງວິກິດການຂາດແຄນອາຫານ ຄັ້ງຮຸນແຮງທີ່ສຸດໃນປະເທດນີ້.
ທັງນີ້ ສາທາລະນະລັດອາຟຣິກາກາງ ຊຶ່ງເປັນອະດີດຫົວເມືອງຂຶ້ນຂອງຝຣັ່ງ ໄດ້ເລີ່ມເຂົ້າສູ່ຄວາມຂັດແຍ່ງພາຍໃນ ຕັ້ງແຕ່ປີ 2013 ເປັນຕົ້ນມາ ຫລັງຈາກທີ່ກຸ່ມຕິດອາວຸດມຸດສະລິມ ເຊເລກາ ໄດ້ເຂົ້າຍຶດອຳນາດລັດຖະບານ ທີ່ເປັນຊາວຄຣິສຕຽນ ແລ້ວທຳການສັງຫານຊາວຄຣິສຕຽນແບບບໍ່ເລືອກໜ້າ ຈາກນັ້ນຜູ້ນຳສາສະໜາຄຣິສຕຽນ ຈຶ່ງໄດ້ທຳການຈັດຕັ້ງກຸ່ມຕິດອາວຸດ ແອນຕີ-ບາລາກາ ຂຶ້ນ ເພື່ອທຳການສັງຫານໝູ່ຊາວມຸດສະລິມ ຊຶ່ງບານປາຍ ກາຍເປັນຂໍ້ຂັດແຍ່ງລະຫວ່າງສາສະໜາ ໃນຂອບເຂດທົ່ວປະເທດເຖິງປັດຈຸບັນ ຊຶ່ງມີລາຍງານວ່າ ຄວາມຂັດແຍ່ງດັ່ງກ່າວ ໄດ້ສັງຫານປະຊາຊົນຊາວອາຟຣິກາກາງໄປແລ້ວ ຫລາຍກ່ວາ 5,000 ຄົນ.
