ງານ​ວາງສະແດງ​ຜະລິດ​ຕະພັນ​ເຟີ​ນີ​ເຈີ​ລາວ ຄັ້ງ​ທີ 2 ປະຈຳ​ປີ 2016 (2nd Lao Wood Furniture Fair 2016) ໄດ້​ອັດລົງ​ດ້ວຍ​ຜົນສຳເລັດ​ຢ່າງ​ຈົບງາມ ພາຍຫຼັງ​ທີ່​ໄດ້​ດຳເນີນ​ມາ​ເປັນ​ເວລາ 5 ວັນ ຢູ່​ສູນ​ການ​ຄ້າ​ລາວ-ໄອ​ເຕັກ ໂດຍ​ພິທີ​ຍ້ອງຍໍ​ຜູ້​ໃຫ້ການ​ສະໜັບສະໜູນ ແລະ ມອບລາງວັນ​ໃຫ້​ແກ່​ລູກ​ຄ້າ ​ທີ່​ຊື້​ຜະລິດ​ຕະພັນ​ເຟີ​ນີ​ເຈີ​ພາຍ​ໃນ​ງານ ​ໄດ້​ຈັດຂຶ້ນ​ວັນ​ທີ 19 ມັງກອນ 2016 ໂດຍ​ມີ​ທ່ານ ຄຳ​ໄພ ສົມ​ຊະນະ ປະທານ​ກຸ່ມ​ບໍລິສັດ ​ຄຳ​ໄພຊະນະ ປະທານ​ສະມາຄົມ​ເຟີ​ນີ​ເຈີ​ລາວ (​ສຟລ) ຫົວໜ້າ​ຄະນະ​ກຳ​ມະການ​ຈັດ​ງານ 2nd Lao Wood Furniture Fair 2016 ທ່ານ ກອງ​ມາລາ ພົມມາ​ໄລ ຮອງ​ປະທານ ​ສຟລ ພ້ອມ​ດ້ວຍ​ຄະນະ​ບໍລິ​ຫານ​ງານ ​ສຟລ ສະມາຊິກ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ທ່ານ ກອງ​ມາລາ ພົມມາ​ໄລ ໄດ້​ກ່າວ​ວ່າ: ງານ 2nd Lao Wood Furniture Fair 2016 ໄດ້​ຮັບ​ການ​ຕອບ-ຮັບ​ເກີນ​ຄາດໝາຍ ແລະ ມີ​ບັນຍາກາດ​ຄຶກຄື້ນກວ່າ​ຄັ້ງ​ຜ່ານ​ມາ ເຊິ່ງ​ນອກຈາກມີ​ລູກ​ຄ້າ​ຈາກ​ນະຄອນຫຼວງ​ວຽງຈັນ​ແລ້ວ ຍັງ​ມີ​ລູກ​ຄ້າ​ຈາກ​ຕ່າງແຂວງ ກໍ່​ຄື​​ຕ່າງ​ປະເທດ​ເຂົ້າ​ມາຊົມ ແລະ ຊື້​ສິນຄ້າ​ຢ່າງ​ຫຼວງຫຼາຍ​ນັບ​ແຕ່​ວັນ​ທີ 14-19 ມັງກອນ 2016 ເວົ້າ​ລວມ​ແລ້ວ ​ຜູ້​ປະກອບ​ການ​ຕ່າງ​ກໍ່​ມີ​ຄວາມ​ເບີກບານ​ມ່ວນຊື່ນ ເນື່ອງ​ຈາກ​ເອົາຜະລິດ​ຕະ​ພັນ​ມາ​ຈຳໜ່າຍ​ ແມ່ນໄດ້​ຮັບ​ຄວາມ​ນິຍົມ​ຊົມ​ຊອບ​ຈາກລູກ​ຄ້າ​ເປັນ​ຢ່າງ​ດີ ພິເສດ​ທີ່​ສຸດ ການ​ຈັດ​ງານ​ຄັ້ງ​ນີ້​ ໄດ້​ຮັບ​ກຽດຈາກ​ທ່ານ​ນາຍົກລັດຖະມົນຕີ ມາເປັນ​ປະທານ​ໃນ​ການ​ເປີດ​ງານ ນອກ​ນີ້ ພາຍ​ໃນ​ງານ​ຍັງ​ມີ​ການສາທິດ​ຜະລິດ​ເຄື່ອງ​ເຟີ​ນີ​ເຈີ ແກະ ສະຫຼັກ​ໄມ້ ສະແດງ​ສິລະ​ປະ ແລະ ຍັງ​ມີ​ການ​ຈັບ​ສະຫຼາກ​ມອບ​ລາງວັນ​ແກ່​ລູກ​ຄ້າ​ ເພື່ອ​ສົມ​ມະ​ນາ​ບຸນຄຸນ​ລູກ​ຄ້າ​ຕື່ມ​ອີກ ໂດຍ​ລາງວັນແມ່ນ​ຜະລິດ​ຕະ​ພັນ​ເຟີ​ນີ​ເຈີ​ ທີ່​ໄດ້ຮັບ​ການ​ສະໜັບສະໜູນ​ຈາກ​ຄະນະ​ບໍລິຫານ​ງານ ແລະ ສະ​ມາຊິກ ​ສຟລ ແລະ ຜູ້​ເຂົ້າ​ຮ່ວມ​ວາງສະແດງ.

ຜ່ານ​ການ​ຈັດ​ງານ​ວາງ​ສະແດງ​ແຕ່​ລະ​ຄັ້ງ ​ພວກ​ເຮົາ​ສາມາດຖອດ​ຖອນ​ບົດຮຽນ​ໄດ້​ຢ່າງ​ຫຼວງຫຼາຍ ໂດຍ​ສະເພາະ ສາມາດ​ເຕົ້າໂຮມ​ຄວາມ​ສາມັກຄີ​ລະຫວ່າງ​ສະມາ​ຊິກ ຫົວໜ່ວຍ​ທຸລະ​ກິດ​ຕ່າງແຂວງ ແລະ ປີ​ນີ້​ກໍ່​ມີ​ຫົວໜ່ວຍທຸລະ​ກິດ​ຕ່າງປະເທດ​ມາ​ຮ່ວມ​ນຳ ເຊິ່ງ​ເປັນ​ຜົນ​ດີ​ໃຫ້​ແກ່​ພວກ​ເຮົາ​ໃນ​ການ​ກະກຽມ​ຄວາມ​ພ້ອມ ແລະ ປະສົບ​ການ​ເພື່ອ​ຮວມ​ໂຕ​ເປັນ​ຜະລິດ​ຕະ​ພັນ​ດຽວ​ໃນ​ປະຊາ​ຄົມ​ເສດຖະ​ກິດ​ອາ​ ຊຽນ ກໍ່​ຄືເວທີ​ສາກົນ ຂ້າພະເຈົ້າ​ຄິດ​ວ່າ​ໃນ​ອະນາຄົດ ສະມາຄົມ​ພວກ​ເຮົາ​ຈະ​ເປັນ​ກ້ອນກຳລັງ​ອັນ​ໜຶ່ງ​ ທີ່​ຈະ​ເຮັດ​ໃຫ້​ທຸລະກິດ​ໄມ້​ລາວ ກໍ່​ຄືໂຮງງານ​ເຟີ​ນີ​ເຈີຕ່າງໆ​ ສາມາດ​ເຕີບ​ໃຫຍ່​ເຂັ້ມແຂງ​ໄປ​ພ້ອມໆ​ກັນ ຍ້ອນ​ວ່າ​ຄົນລາວ​ມີ​ສີໄມ້ລາຍມື​ທີ່​ໂດດ​ເດັ່ນ ທີ່​ສຳຄັນ​ພວກ​ເຮົາ​ມີ​ໄມ້​ທີ່​ມີ​ຄຸ​ນະພາບ​ສູງ ແລະ ເພື່ອ​ຮອງ​ຮັບ​ການດຳເນີນ​ທຸລະ​ກິດ​ດ້ານ​ນີ້​ພວກ​ເຮົາ ກໍ່​ໄດ້​ເອົາໃຈໃສ່​ປູກ​ໄມ້​ໃຫ້​ນັບ​ມື້ຫຼາຍ​ຂຶ້ນ ເພື່ອ​ທົດ​ແທນ​ໄມ້​ທຳ​ມະຊາດ​ຕື່ມ​ອີກ.

ສຳລັບ​ຜູ້​ທີ່​ໄດ້​ປະກອບສ່ວນເຮັດ​ໃຫ້​ງານ​ນີ້​ປະສົບ​ຜົນສຳເລັດ ແລະ ໄດ້​ຮັບ​ການ​ຍ້ອງຍໍ​ຄັ້ງ​ນີ້​ປະກອບ​ມີ​ໃບ​ຊົມເຊີຍ 19 ໃບ ໃບຍ້ອງຍໍ 53 ໃບ ແລະ ໃບ​ກຽດ​ຕິຄຸນ 20 ໃບ ສ່ວນ​ຜູ້​ໄດ້​ຮັບ​ລາງວັນ​ໃນ​ຄັ້ງ​ນີ້ ​ຈຳນວນ 14 ລາງວັນ ລວມ​ມູນ​ຄ່າ​ຫຼາຍ​ກວ່າ 33.970.000 ກີບ.