ຂປລ. ພາຍຫລັງລັດຖະບານ ໄດ້ມີການອະນຸມັດໃຫ້ສ້າງຕັ້ງເຂດເສດຖະກິດພິເສດ-ເຂດເສດຖະກິດສະເພາະ (ຂພສ) ເຊິ່ງໄລ່ມາຮອດປັດຈຸບັນລວມມີ 13 ເຂດມີເນື້ອທີ່ທັງໝົດປະມານ 22.000 ເຮັກຕາ, ໄດ້ສ້າງພື້ນຖານໂຄງລ່າງຢ່າງມີຈຸດສຸມ ແລະ ສາມາດຮອງຮັບການລົງທຶນ ທັງພາຍໃນ ແລະ ຕ່າງປະເທດ ຈຳນວນ 500 ບໍລິສັດ–ຫ້າງຮ້ານ, ໃນນີ້ຂະແໜງການບໍລິການກວມ 44%, ອຸດສາຫະກຳ 29% ແລະ ຂະແໜງການຄ້າ 27% ສ້າງວຽກເຮັດງານທຳໄດ້ 22.000 ຕຳແໜ່ງງານ, ສາມາດດຶງດູດເອົາປະຊາຊົນ ທີ່ໄປອອກແຮງງານຢູ່ປະເທດເພື່ອນບ້ານ ທີ່ບໍ່ຖືກລະບຽບກົດໝາຍໄດ້ເປັນຢ່າງດີ.
ສະຫາຍ ນາງ ບົວທາ ຂັດຕິຍະ ຄະນະພັກຫ້ອງວ່າການລັດຖະບານ ລາຍງານຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃນວັນທີ 19 ມັງກອນນີ້ ວ່າ: ໃນໄລຍະຜ່ານມາ ເຂດເສດຖະກິດພິເສດ ສາມາດດຶງດູດການລົງທຶນ ຈົດທະບຽນມີມູນຄ່າ 4 ຕື້ກວ່າໂດລາສະຫະລັດ, ລົງທຶນຕົວຈິງ 1,2 ຕື້ໂດລາສະຫະລັດ, ໃນນັ້ນ ລັດຖະບານລົງທຶນພຽງ 16 ລ້ານໂດລາສະຫະລັດ, ສ່ວນທີ່ເຫລືອແມ່ນການລົງທຶນຂອງເອກະຊົນ ທັງພາຍໃນ ແລະ ຕ່າງປະເທດ. ໃນປີ 2014 ສາມາດເກັບລາຍຮັບເຂົ້າງົບປະມານແຫ່ງຊາດໄດ້ 18 ລ້ານໂດລາສະຫະລັດ, ຜົນຜະລິດສິນຄ້າເພື່ອສົ່ງອອກ ມີມູນຄ່າປະມານ 60 ລ້ານໂດລາສະຫະລັດ ເປັນຕົ້ນ ຜະລິດຕະພັນກ້ອງຖ່າຍຮູບ ຢູ່ເຂດເສດຖະກິດພິເສດ ສະຫວັນ-ເຊໂນ, ເຄື່ອງແບບສຳລັບພະນັກງານດັບເພີງ ຢູ່ເຂດນິຄົມອຸດສາຫະກຳ-ການຄ້າວຽງຈັນ ໂນນທອງ ເຊິ່ງຜົນໄດ້ຮັບດັ່ງກ່າວ ໄດ້ປະກອບສ່ວນຕໍ່ການເຕີບໂຕຂອງ GDP ປະມານ 1%, ນອກນີ້ ຍັງມີການພັດທະນາພື້ນຖານໂຄງລ່າງພາຍໃນເຂດ ແລະ ເຊື່ອຕໍ່ນອກເຂດ ເປັນຕົ້ນ ຂພສ ສາມຫລ່ຽມຄຳ ມູນຄ່າກວ່າ 657 ລ້ານໂດລາສະຫະລັດ, ເຂດວິຕາປາກ 13 ລ້ານກວ່າໂດລາສະຫະລັດ, ບຶງທາດຫລວງ 76 ລ້ານກວ່າໂດລາສະຫະລັດ ແລະ ເຂດອື່ນໆ. ໃນຂະນະດຽວກັນ ຂພສ ຈຳນວນໜຶ່ງ ຍັງເປັນແຫລ່ງທ່ອງທ່ຽວ ທີ່ຕິດພັນກັບທຳມະຊາດ, ວັດທະນະທຳ ແລະ ຮ່ອງຮອຍປະຫວັດສາດອັນດີງາມຂອງຊາດ, ກາຍເປັນຕົວເມືອງໃໝ່ ແລະ ນິຄົມອຸດສາຫະກຳໃໝ່ທີ່ທັນສະໄໝເທື່ອລະກ້າວ. ອັນພົ້ນເດັ່ນຂອງການພັດທະນາ ຂພສ ແມ່ນການຈັດຕັ້ງປະຕິບັດບາດກ້າວບຸກທະລຸດ້ານຈິນຕະນາການ ແລະ ບຸກທະລຸດ້ານລະບອບລະບຽບການ ຕັດຂອດຂັ້ນບໍລິຫານຄຸ້ມຄອງລັດໃຫ້ສັ້ນລົງ ແລະ ສະດວກຂຶ້ນ ບົນພື້ນຖານຮັບປະກັນຄວາມຖືກຕ້ອງຕາມກົດໝາຍ, ທັງມີການຈັດຕັ້ງການບໍລິການຜ່ານປະຕູດຽວຕາມກົນໄກຫົວໜ່ວຍບໍລິຫານນ້ອຍ–ສັງຄົມກວ້າງ ເຊິ່ງເປັນກົນໄກການບໍລິຫານຄຸ້ມຄອງແບບໃໝ່ທີ່ເກີດຂຶ້ນໃນກົນໄກເສດຖະກິດຕະຫລາດ ເຮັດໃຫ້ຜູ້ລົງທຶນຢູ່ໃນແຕ່ລະເຂດມີຄວາມວ່ອງໄວໂປ່ງໃສ ແລະ ສາມາດກວດສອບໄດ້.
ແຫລ່ງຂ່າວ:
