ໃນວາລະດໍາເນີນກອງຕໍ່ກອງປະຊຸມໃຫຽ່ ຄັ້ງ ທີ X ຂອງພັກ ໃນວັນທີ 18 ມັງກອນ 2016 ຜ່ານມາ ທີ່ຫໍປະຊຸມແຫ່ງຊາດ ຫຼັກ 6 ນະຄອນຫຼວງວຽງຈັນ ສະຫາຍ ດຣ. ຄໍາມະນີ ອິນທິລາດ ເລຂາຄະນະພັກກະຊວງພະລັງງານ ແລະ ບໍ່ແຮ່ ໄດ້ລາຍງານຕໍ່ກອງປະຊຸມວ່າ ໃນໄລຍະຫຼາຍປີຜ່ານມາ ພາຍໃຕ້ການນຳພາ-ຊີ້ນຳຂອງຄະນະບໍລິຫານງານສູນກາງພັກ ການຄຸ້ມຄອງຂອງລັດຖະບານ ແລະ ດ້ວຍຄວາມເປັນເຈົ້າການ ຕັ້ງໜ້າບຸກບືນສູ້ຊົນຂອງຖັນແຖວສະມາຊິກພັກ ພະນັກງານ ແລະ ກຳມະກອນໃນຂະແໜງການພະລັງງານ ແລະ ບໍ່ແຮ່ ເຮັດໃຫ້ຂະແໜງການນີ້ໄດ້ຮັບການພັດທະນາ ແລະ ມີບາດກ້າວຂະຫຽາຍໂຕຢ່າງແຂງແຮງ ເຊິ່ງໄດ້ສ້າງພື້ນຖານອັນໜັກແໜ້ນໃຫ້ແກ່ການຫັນເປັນອຸດສາຫະກຳ ແລະ ທັນສະໄໝ ສາມາດດໍາລົງບົດບາດເປັນເຈົ້ານໍາໜ້າພາທາງໃນລະບົບພື້ນຖານໂຄງລ່າງເສດຖະກິດແຫ່ງຊາດ ຕະຫຼອດໄລຍະ 30 ປີແຫ່ງການປ່ຽນແປງໃໝ່ ໂດຍສະເພາະ ໃນການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຽ່ ຄັ້ງທີ IX ຂອງພັກ ໄດ້ຍົກສູງວຽກງານພັດທະນາອຸດສາຫະກຳພະລັງງງານໄຟຟ້າ ແລະ ບໍ່ແຮ່ ຮັບໃຊ້ໜ້າທີ່ການເມືອງຂອງພັກ ແລະ ຕິດພັນກັບການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາຊົນນະບົດ ລຶບລ້າງຄວາມທຸກຍາກ ແລະ ປະຕິບັດການທົດລອງວຽກງານສາມສ້າງ ສະເພາະໃນໄລຍະ 5 ປີຜ່ານມານີ້ ຍອດຜະລິດຕະພັນຂອງຂະແໜງພະລັງງານ ແລະ ບໍ່ແຮ່ ມີມູນຄ່າເຖິງ 94.342 ຕື້ກີບ ກວມເອົາ 12% ຂອງ GDP ທຽບໃສ່ສົກປີ 2006-2010 ເພີ່ມຂຶ້ນປະມານ 9,22% ສະເພາະການພັດທະນາອຸດສາຫະກຳພະລັງງານໄຟຟ້າໃນໄລຍະ 5 ປີຜ່ານມາມີຜົນສຳເລັດຄື ປີ 2015 ທົ່ວປະເທດມີແຫຼ່ງຜະລິດໄຟຟ້າ ທີ່ສ້າງສຳເລັດ 38 ແຫ່ງ ມູນຄ່າ 10 ຕື້ໂດລາສະຫະລັດ ກໍາລັງການຜະລິດ 6.000 ກວ່າເມກາວັດ ເພີ່ມຂຶ້ນ 26 ແຫ່ງ ຖ້າປຽບທຽບໃສ່ເມື່ອກ່ອນ ປີ 2015 ທົ່ວປະເທດມີ 148 ເມືອງ ໄດ້ຊົມໃຊ້ໄຟຟ້າແບບຖາວອນ 100% ໃນນັ້ນ ມີ 85,54% ຂອງຈຳນວນບ້ານ ແລະ 89,78% ຂອງຈຳນວນຄອບຄົວໃນທົ່ວປະເທດ ມີໄຟຟ້າໃຊ້ຖາວອນ ສົມທຽບຈຳນວນຄອບຄົວ ທີ່ຊົມໃຊ້ໄຟຟ້າປັດຈຸບັນ ກັບ ປີ 1975 ນັ້ນ ຖືວ່າລື່ນກັນເປັນ 200 ເທົ່າໂຕ ແລະ ລື່ນແຜນການທີ່ວາງໄວ້ 9,78% ພ້ອມກັນນັ້ນ ການພັດທະນາພະລັງງານທາງເລືອກໃໝ່ເຊັ່ນ ພະລັງງານຈາກແສງຕາເວັນ ຢູ່ເຂດຫ່າງໄກສອກຫຼີກ ກໍໄດ້ຮັບການພັດທະນາເຊັ່ນກັນ ມາຮອດກາງປີ 2015 ການຊົມໃຊ້ໄຟຟ້າແສງຕາເວັນມີ 14.327 ຄອບຄົວ ເທົ່າກັບ 1,27% ຂອງຄອບຄົວທັງໝົດໃນທົ່ວປະເທດ ພະລັງງານລົມ ຊີວະພາບ ຊີວະມວນ ແລະ ພະລັງງານອື່ນໆ ກໍໄດ້ມີການກະກຽມພັດທະນາໃຫ້ຕໍ່ເນື່ອງຢູ່ບາງທ້ອງຖິ່ນທີ່ມີເງື່ອນໄຂ ສຳລັບການຂະຫຽາຍໄຟຟ້າ ໃຫ້ແກ່ຄອບຄົວທຸກຍາກ ທີ່ຢູ່ຊົນນະບົດຫ່າງໄກສອກຫຼີກ ເຊິ່ງໄຟຟ້າລາວ ໄດ້ມີນະໂຍບາຍການຕິດຕັ້ງໄຟຟ້າເຂົ້າເຮືອນໃຫ້ກ່ອນ ແລ້ວຈິ່ງຊໍາລະແບບຜ່ອນຜັນ ດ້ວຍການຄິດໄລ່ເຂົ້າໃນການຊົມໃຊ້ໄຟຟ້າ ໃນແຕ່ລະເດືອນ ອັນໄດ້ເຮັດໃຫ້ພໍ່ແມ່ປະຊາຊົນ ມີຄວາມເພິງພໍໃຈ ແລະ ເຮັດໃຫ້ພວກເຂົາເຈົ້າ ມີການພັດທະນາຊີວິດການເປັນຢູ່ດີຂຶ້ນເທື່ອລະກ້າວ ໃນໄລຍະດຽວກັນນີ້ ກໍສາມາດປະຕິບັດໄດ້ 2.404 ບ້ານ ມີ 43.218 ຄອບຄົວ ເຊິ່ງໃນໄລຍະ 5 ປີ ຜ່ານມາ ສາມາດຈຳໜ່າຍພະລັງງານໄຟຟ້າອອກຕ່າງປະເທດຄື ໄທ ຫວຽດນາມ ກຳປູເຈຍ ໄດ້ເພີ່ມຂຶ້ນ 4 ເທົ່າໂຕທຽບໃສ່ປີ 2010 ແລະ ຄາດວ່າປີ 2016 ກໍຈະໄດ້ເລີ່ມສົ່ງຂາຍໄຟຟ້າໄປປະເທດມຽນມາ ອັນໄດ້ເຮັດໃຫ້ຂະແໜງພະລັງງານໄຟຟ້າ ສາມາດສ້າງລາຍຮັບສະເຫຼ່ຍ 300 ກວ່າລ້ານໂດລາສະຫະລັດຕໍ່ປີ ແລະ ມີທ່າອ່ຽງເພີ່ມຂຶ້ນໃນແຕ່ລະປີ.

ຂ່າວ/ພາບ ສິງຄໍາ

ແຫ່ລງຂ່າວ