ການພັດທະນາອຸດ ສາຫະກຳພະລັງງານໄຟ ຟ້າຢູ່ປະເທດເຮົາໄລຍະ ຜ່ານມາໄດ້ດຳເນີນໄປຢ່າງຖືກຕ້ອງ, ມີການພັດ ທະນາເປັນລະບົບຄົບຊຸດ, ມີຜົນສຳເລັດເປັນພື້ນຖານຢ່າງໜັກແໜ້ນ ແລະ
ມີບາດກ້າວກະໂດດເປັນທີ່ເພິ່ງພໍໃຈຊຶ່ງບໍ່ເຄີຍມີມາກ່ອນໃນປະຫວັດສາດຂອງປະເທດເຮົາ ຂະນະທີ່ຮອດປີ 2020 ລາວອາດມີເຂື່ອນ ທີ່ສາມາດຜະລິດໄຟຟ້າໄດ້ເຖິງ 60 ແຫ່ງແລະຄາດຈະສ້າງລາຍຮັບໃຫ້ປະເທດ ຊາດຫຼາຍກວ່າ 1 ຕື້ໂດລາສະຫະລັດຕໍ່ປີ ຊຶ່ງດຽວນີ້ີປະເທດມີແລ້ວເກືອບ 40 ແຫ່ງ.
ເມື່ອວັນທີ 18 ມັງກອນຜ່ານມາ ສະຫາຍ ດຣ. ຄຳມະນີ ອິນທິລາດ ລັດຖະມົນຕີວ່າການກະຊວງພະລັງງານແລະບໍ່ແຮ່ໄດ້ປະກອບຄຳເຫັນກ່ຽວກັບ ການພັດທະນາອຸດສາຫະກຳພະລັງ ງານໄຟຟ້າຕາມແນວທາງຫັນເປັນອຸດ ສາຫະກຳ ແລະທັນສະໄໝຕາມທິດກ້າວ ຂຶ້ນສັງຄົມນິຍົມຕໍ່ກອງປະຊຸມໃຫຍ່ຄັ້ງທີ X ຂອງພັກຮູ້ວ່າ: ໃນຊຸມປີຜ່ານມາພາຍໃຕ້ການຊີ້ນຳ-ນຳພາຂອງພັກ, ການຄຸ້ມຄອງຂອງລັດຖະບານ ແລະດ້ວຍຄວາມ ເປັນເຈົ້າການຕັ້ງໜ້າບຸກບືນສູ້ຊົນຂອງ ຖັນແຖວສະມາຊິກພັກ, ພະນັກງານ ແລະ ກຳມະກອນຂອງຂະແໜງພະລັງງານ ແລະບໍ່ແຮ່ ເຮັດໃຫ້ໄດ້ຮັບການພັດທະນາ ແລະມີບາດກ້າວຂະຫຍາຍຕົວຢ່າງແຂງ ແຮງ ໃນໄລຍະ 5 ປີຜ່ານມາ ຍອດຜະ ລິດຕະພັນຂອງຂະແໜງພະລັງງານ ແລະບໍ່ແຮ່ ມີມູນຄ່າເຖິງ 94.342 ຕື້ກີບກວມເອົາ 12% ຂອງຈີດີພີທຽບໃສ່ໃນ ຊຸມສົກປີ 2006-2010 ເພີ່ມຂຶ້ນປະມານ 9,22% ສະເພາະການພັດທະນາອຸດສາຫະກຳພະລັງງານໄຟຟ້າຜ່ານມາໄດ້ປະສົບຜົນສຳເລັດຫຼາຍໂຄງການ.
ປີ 2015 ທົ່ວປະເທດມີແຫຼ່ງຜະລິດ ໄຟຟ້າທີ່ສ້າງສຳເລັດ 38 ແຫ່ງ ດ້ວຍການລົງທຶນຫຼາຍກວ່າ 10 ຕື້ໂດລາ ມີກຳລັງ ຕິດຕັ້ງທັງໝົດ 6.265 ເມກາວັດ ເພີ່ມຂຶ້ນ 26 ແຫ່ງ ແລະມີກຳລັງຕິດຕັ້ງເພີ່ມ ຂຶ້ນ 4.334 ເມກາວັດ ຫຼື ເທົ່າກັບ 3,2 ເທື່ອທຽບກັບປີ 2010, ມີບັນດາແຫຼ່ງ ຜະລິດພະລັງງານໄຟຟ້າທີ່ສ້າງຂຶ້ນໃໝ່ເຊັ່ນ: ນ້ຳງື່ມ 2, ເທີນ-ຫີນບູນພາກຂະ ຫຍາຍ, ນ້ຳອູ 2, ນ້ຳອູ 5, ນ້ຳອູ 6, ນ້ຳ ຄານ 2, ນ້ຳງຽບ 2, ໂຮງງານຄວາມ ຮ້ອນຫົງສາລິກໄນເປັນຕົ້ນ ຊຶ່ງສາມາດ ຜະລິດພະລັງງານໄຟຟ້າໄດ້ເຖິງ 33.315 ລ້ານກິໂລວັດໂມງຕໍ່ປີເພີ່ມຂຶ້ນ 23.332 ລ້ານກິໂລວັດໂມງຕໍ່ປີ ຫຼື ເທົ່າກັບ 3,3 ເທື່ອທຽບໃສ່ປີ 2010, ມີອັດຕາສ່ວນ ການຊົມໃຊ້ຢູ່ພາຍໃນກວມ 20,4% ແລະ ສົ່ງອອກ 79,6%.
ນອກນັ້ນ ຍັງມີໂຄງການໄຟຟ້າທີ່ກຳ ລັງກໍ່ສ້າງ ແລະກະກຽມກໍ່ສ້າງເປັນຕົ້ນ ແມ່ນເຂື່ອນໄຟຟ້ານ້ຳຂອງໄຊຍະບູລີ, ດອນສະໂຮງ, ນ້ຳງື່ມ 3, ນ້ຳອູ 1,3,4 ແລະ7, ນ້ຳງຽບ 1, ເຊປຽນ-ເຊນ້ຳນ້ອຍ ໂດຍມີ ລະບົບສາຍສົ່ງແຮງສູງ 5.200 ກິໂລແມັດ, ແຮງກາງ 26 ພັນກິໂລແມັດ ແລະແຮງຕ່ຳ 17.560 ກິໂລແມັດ, ມີ 53 ສະຖານີຈ່າຍໄຟຟ້າ.
ທ້າຍປີ 2015 ທົ່ວປະເທດມີ 148 ເມືອງໄດ້ຊົມໃຊ້ໄຟຟ້າແບບຖາວອນ 100% ກວມ 85,54% ຂອງຈຳນວນ ບ້ານ ແລະ 89,78% ຂອງຈຳນວນ ຄອບຄົວທັງໝັດໃນ ທົ່ວປະເທດສົມທຽບ ຄອບຄົວທີ່ຊົມໃຊ້ໄຟຟ້າປະຈຸບັນກັບປີ 1975 ນັ້ນຖືວ່າລື່ນກັນເປັນ 200 ເທົ່າຕົວ ແລະລື່ນແຜນການທີ່ວາງໄວ້ 9,78% ພ້ອມດຽວກັນນັ້ນ ຍັງມີການຊົມໃຊ້ໄຟ ຟ້າແສງຕາເວັນ 14.327 ຄອບຄົວ ເທົ່າ ກັບ 1,27% ຂອງຄອບຄົວ ທັງໝົດທົ່ວ ປະເທດ.
ໃນ 5 ປີຜ່ານມາ ສາມາດຈຳໜ່າຍພະ ລັງງານໄຟຟ້າໄປປະເທດໄທ, ສສ ຫວຽດນາມ, ກຳປູເຈຍ ໄດ້ເພີ່ມຂຶ້ນ 4 ເທົ່າຕົວ ທຽບກັບປີ 2010 ແລະຄາດວ່າປີ 2016 ນີ້ຈະໄດ້ເລີ່ມສົ່ງຂາຍໄຟຟ້າໄປປະເທດມຽນມາ ທັງນີ້ ຂະແໜງພະລັງງານໄຟ ຟ້າຍັງສາມາດສ້າງລາຍຮັບສະເລ່ຍ ຫຼາຍກວ່າ 300 ລ້ານໂດລາຕໍ່ປີ ແລະມີ ທ່າອຽງເພີ່ມຂຶ້ນໃນແຕ່ລະປີ.
ທັງນີ້ ອຸດສາຫະກຳໄຟຟ້າຍັງປະ ກອບສ່ວນສະໜອງພະລັງງານໄຟຟ້າໃຫ້ຂະແໜງການຕ່າງໆ ໂດຍສະເພາະ ຂະແໜງກະສິກຳ ຊຶ່ງໄດ້ສະໜອງກະແສ ພະລັງງານໄຟຟ້າໃຫ້ລະບົບຊົນລະປະ ທານຫຼາຍກວ່າ 8 ພັນແຫ່ງ, ສະໜອງ ໃຫ້ອຸດສາຫະກຳຂຸດຄົ້ນ ແລະປຸງແຕ່ງ ແຮ່ທາດມີຈຳນວນ 220 ແຫ່ງ, ໂຮງ ງານປຸງແຕ່ງຕ່າງໆມີ 11,50 ພັນກວ່າ ແຫ່ງ ຊຶ່ງເປັນການປະກອບສ່ວນສ້າງວຽກ ເຮັດງານທຳໃຫ້ຊາວຜູ້ອອກແຮງງານ ແລະບັນດາຂະແໜງການອື່ນໆອີກ.
ສັງລວມແລ້ວ ສະຫາຍ ດຣ. ຄຳມະນີ ອິນທິລາດ ລະບຸຕື່ມວ່າ: ການພັດທະນາ ອຸດສາຫະກຳໄຟຟ້າຢູ່ປະເທດເຮົາໄລຍະ ຜ່ານມາໄດ້ດຳເນີນໄປຢ່າງຖືກຕ້ອງ, ມີ ການພັດທະນາເປັນລະບົບຄົບຊຸດ, ມີຜົນ ສຳເລັດເປັນພື້ນຖານຢ່າງໜັກແໜ້ນ ແລະມີບາດກ້າວກະໂດດເປັນທີ່ເພິ່ງພໍ ໃຈ ຊຶ່ງບໍ່ເຄີຍມີມາກ່ອນໃນປະຫວັດສາດ ຂອງຊາດເຮົາ.
ເພື່ອເຮັດໃຫ້ການພັດທະນາຂະແໜງ ອຸດສາຫະກຳພະລັງງານ ແລະບໍ່ແຮ່ ໃຫ້ ຂະຫຍາຍຕົວຕາມແນວທາງຫັນເປັນອຸດ ສາຫະກຳ ແລະທັນສະໄໝຕາມທິດສັງ ຄົມນິຍົມຢູ່ປະເທດເຮົາ, ຂະແໜງອຸດສາ ຫະກຳພະລັງງານໄຟຟ້າ ແລະບໍ່ແຮ່ໄດ້ວາງວິໄສທັດຮອດປີ 2030 ແລະມີຄຳ ຂວັນໄວ້ວ່າ: “ພັດທະນາພະລັງງານ ແລະ ບໍ່ແຮ່ຕາມທິດຫັນເປັນອຸດສາຫະກຳ ແລະ ທັນສະໄໝ, ຂຸດຄົ້ນ ແລະນຳໃຊ້ທ່າແຮງ ຊັບພະຍາກອນທຳມະຊາດໃຫ້ຮັບປະກັນ ຄວາມຍືນຍົງ, ສົ່ງເສີມຫົວໜ່ວຍເສດຖະ ກິດຂອງຊາດໃຫ້ເຂັ້ມແຂງ, ຍູ້ແຮງການ ສະໜອງໄຟຟ້າຮັບໃຊ້ພາຍໃນໃຫ້ພຽງພໍ ແລະໝັ້ນຄົງ, ເຊື່ອມໂຍງ-ແລກປ່ຽນພະ ລັງງານກັບປະເທດເພື່ອນບ້ານ ແລະພາກ ພື້ນ, ພັດທະນາພະລັງງານ ແລະບໍ່ແຮ່ເພີ່ມ ຂຶ້ນດ້ວຍສີຂຽວ ແລະສົດໃສ”.
ໂດຍຮອດປີ 2020 ຈະສູ້ຊົນເຮັດໃຫ້ ລາຍຮັບຈາກຂະແໜງພະລັງງານ ແລະ ບໍ່ແຮ່ໄດ້ຫຼາຍກວ່າ 20% ຂຶ້ນໄປຂອງຈີ ດີພີ ໃນນີ້ ຕ້ອງສຳເລັດການສ້າງເຂື່ອນ ຫຼາຍກວ່າ 19 ໂຄງການ ມີກຳລັງຕິດຕັ້ງ 3.500 ເມກາວັດ ແລະສາມາດຜະລິດ ກະແສໄຟຟ້າໄດ້ສະເລ່ຍ 30 ພັນລ້ານກິ ໂລວັດໂມງຕໍ່ປີ, ສູ້ຊົນເຮັດໃຫ້ອັດຕາຊົມ ໃຊ້ໄຟຟ້າກວມ 98% ຂຶ້ນໄປຂອງຄອບ ຄົວທັງໝົດທົ່ວປະເທດເມື່ອລວມກັບ ເຂື່ອນທີ່ມີຢູ່ແລ້ວໃນ ປະຈຸບັນ ຄາດຮອດປີ 2020 ຈະມີເຂື່ອນພະລັງງານໄຟຟ້າເຖິງ 60 ແຫ່ງ ທີ່ມີກຳລັງຕິດຕັ້ງຫຼາຍກວ່າ 10 ພັນເມກາວັດ ຊຶ່ງສາມາດຜະລິດພະ ລັງງານໄດ້ຫຼາຍກວ່າ 60 ພັນຈີກາວັດ ໂມງຕໍ່ປີ ( Gwh/y ) ແລະຄາດຈະສ້າງ ລາຍຮັບໃຫ້ປະເທດຊາດຫຼາຍກວ່າ 1 ຕື້ ໂດລາສະຫະລັດຕໍ່ປີ.
ທີ່ມາ: