ໂດຍອີງຕາມບົດລາຍງານຂອງຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ກ່ຽວກັບການປະຕິບັດວຽກງານການແກ້ໄຂບັນຫາລະເບີດທີ່ບໍ່ທັນແຕກຢູ່ ສປປ ລາວ (ລບຕ) ຕໍ່ກອງປະຊຸມສະຫຼຸບວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ ຄັ້ງທີ IV ເມື່ອບໍ່ດົນຜ່ານມາ ເຊິ່ງຜ່ານການຈັດຕັ້ງປະຕິບັດວຽກງານຕົວຈິງ ກ່ຽວກັບວຽກງານແກ້ໄຂບັນຫາລະເບີດທີ່ບໍ່ທັນແຕກ ໃນຕະຫຼອດ 5 ປີ (2011-2015) ໄດ້ມີຜົນສຳເລັດພື້ນຖານຈຳນວນໜຶ່ງ ເປັນຕົ້ນ ໄດ້ໂຄສະນາກ່ຽວກັບທີ່ມາ ແລະ ຄວາມເປັນອັນຕະລາຍຈາກ ລບຕ ຢູ່ໂຮງຮຽນ ແລະ ຊຸມຊົນທີ່ມີຜົນກະທົບ 12 ພັນກວ່າແຫ່ງ ໄດ້ຊ່ວຍເຫຼືອປິ່ນປົວຟື້ນຟູສຸຂະພາບ ປະກອບອາຊີບໃຫ້ຜູ້ລອດຊີວິດຈາກ ລບຕ ໄດ້ທັງໝົດ 700 ກວ່າຄົນ ກວດກູ້ ລບຕ ອອກຈາກເນື້ອທີ່ໄດ້ 35 ພັນກວ່າເຮັກຕາ ໃນນີ້ ມີເນື້ອທີ່ກະສິກຳ 19 ພັນກວ່າເຮັກຕາ ເນື້ອທີ່ພັດທະນາອື່ນໆ 16 ພັນກວ່າເຮັກຕາ ແລະ ໄດ້ທຳລາຍລະເບີດທີ່ບໍ່ທັນແຕກ ທັງໝົດ 5 ແສນກວ່າໜ່ວຍ ພ້ອມກັນນັ້ນ ພົ້ນເດັ່ນກວ່າໝູ່ແມ່ນໄດ້ຫັນການກວດກູ້ ລບຕ ຮັບໃຊ້ຈຸດສຸມພັດທະນາໂຄງການພັດທະນາຂອງສູນກາງ ແລະ ທ້ອງຖິ່ນ ສາມາດລະດົມທຶນຊ່ວຍເຫຼືອຈາກສາກົນ ເຂົ້າໃສ່ວຽກງານແກ້ໄຂ ລບຕ ເພີ່ມຂຶ້ນຫຼາຍກວ່າເກົ່າ ນອກນີ້ ຍັງສາມາດຮັບປະກັນບໍ່ໃຫ້ຜູ້ບໍ່ຫວັງດີ ສວຍໃຊ້ການຊ່ວຍເຫຼືອດັ່ງກ່າວຕ້ານພັກ ແລະ ລັດຖະບານເຮົາ.
ຄາດໝາຍສູ້ຊົນ ແລະ ກິດຈະກຳຕົ້ນຕໍທີ່ຕ້ອງປະຕິບັດ ໃນສົກປີ 2016-2020 ຕ້ອງສູ້ຊົນຫຼຸດຜ່ອນຈຳນວນຜູ້ຖືກເຄາະຮ້າຍຈາກ ລບຕ ໃຫ້ຕ່ຳກວ່າ 40 ຄົນຕໍ່ປີ ຊ່ວຍເຫຼືອຜູ້ລອດຊີວິດຈາກ ລບຕ ໃຫ້ໄດ້ 1.500 ຄົນ ແລະ ປະຕິບັດການສຳຫຼວດບໍ່ແມ່ນວິຊາການ ເພື່ອຊອກຫາຫຼັກຖານ ລບຕ ຕົກຄ້າງຢູ່ 5.238 ບ້ານໃນ 9 ແຂວງທີ່ມີ ລບຕ ຕົກຄ້າງສູງສືບຕໍ່ສຳຫຼວດທາງດ້ານວິຊາການເພື່ອຢັ້ງຢືນພື້ນທີ່ ລບຕ ຕົກຄ້າງຢູ່ 124 ຈຸດສຸມພັດທະນາສູນກາງ ແລະ ທ້ອງຖິ່ນ ພ້ອມທັງດຳເນີນການກວດກູ້ ລບຕ ຢູ່ພື້ນທີ່ໂຄງການຈຸດສຸມພັດທະນາຂອງສູນກາງ ທ້ອງຖິ່ນໃນແຕ່ລະປີ ໂດຍສະເພາະແມ່ນເຂດຈຸດສຸມພັດທະນາ ທີ່ມີທຶນສະໜັບສະໜູນຢູ່ແລ້ວ.
ແຫລ່ຂ່າວ:
