ສຳນັກຂ່າວຕ່າງປະເທດ ລາຍງານໃນວັນທີ 6 ມັງກອນນີ້ວ່າ ກຸ່ມຊາວກະສິກອນ ແລະ ກຸ່ມນັກທຸລະກິດ ພາຍໃນເມືອງທົງສີ ແຂວງເຫີໜັນ ທາງພາກກາງຂອງປະເທດຈີນ ໄດ້ສົມທົບທຶນຮ່ວມກັນ ກໍ່ສ້າງຮູບປັ້ນຂະໜາດມະຫຶມາຂອງ ປະທານ ເໝົາເຈີຕຸງ ຜູ່ສ້າງຕັ້ງພັກກອມມູນິດຈີນ ແລະ ຜູ່ນຳພາສະຖາປະນາ ສາທາລະນະລັດປະຊາຊົນຈີນ ຊຶ່ງຖືກສ້າງຂຶ້ນດ້ວຍຄອນກຣີດເສີມເຫລັກ ມີຄວາມສູງທັງໝົດ 36 ແມັດ ໃຊ້ເວລາກໍ່ສ້າງແຕ່ເດືອນມີນາ ເຖິງເດືອນທັນວາ 2015 ດ້ວຍງົບປະມານທັງໝົດ 3 ລ້ານຢວນ.
ທັງນີ້ ກຸ່ມປະຊາຊົນທີ່ອອກທຶນກັນສ້າງໄດ້ກ່າວວ່າ ຮູບປັ້ນປະທານ ເໝົາເຈີຕຸງ ຈະກາຍເປັນສະຖານທີ່ທ່ອງທ່ຽວແຫ່ງໃໝ່ ຊຶ່ງຈະສາມາດດຶງດູດນັກທ່ອງທ່ຽວ ເຂົ້າມາຢ້ຽມຊົມ ແລະ ສ້າງລາຍຮັບໃຫ້ແກ່ຄົນໃນທ້ອງຖິ່ນອີກດ້ວຍ.
