ສຳນັກຂ່າວ INN ຂອງໄທລາຍງານ ໃນວັນທີ 29 ທັນວານີ້ວ່າ ພົນໂທ ສານິດ ມະຫະຖາວອນ ຮັກສາການຜູ່ບັນຊາການ ຕຳຫລວດນະຄອນບານຂອງໄທ ໄດ້ອອກມາຖະແຫລງວ່າ ຈະມີການລະດົມກຳລັງຕຳຫລວດທຸກພື້ນທີ່ ໃນການຕັ້ງດ່ານກວດ ໄລຍະເທດສະການປີໃໝ່ສາກົນນີ້ ເພື່ອປ້ອງກັນບັນຫາອາຊະຍາກຳ ແລະ ກວດວັດແທກທາດເຫລົ້າ ປ້ອງກັນອຸບັດເຫດ ໂດຍທ່ານໄດ້ເນັ້ນວ່າ ຖ້າຫາກມີການກວດພົບ ຜູ່ໃດຫາກເມົາແລ້ວຂັບ ແມ່ນຈະດຳເນີນມາດຕະການຍຶດລົດ ແລ້ວໃຫ້ມາຮັບຄືນ ນັບຕັ້ງແຕ່ວັນທີ 5 ມັງກອນ 2016 ເປັນຕົ້ນໄປ.
ທັງນີ້ ມາດຕະການດັ່ງກ່າວ ແມ່ນເພື່ອສ້າງຄວາມປອດໄພ ໃນການເດີນທາງເທິງທ້ອງຖະໜົນ ແລະ ຖ້າຫາກພື້ນທີ່ໃດ ປ່ອຍປະລະເລີຍ ກໍຈະນຳໃຊ້ມາດຕະການ ພິຈາລະນາລົງວິໄນທາງບໍລິຫານ.