ສຳນັກຂ່າວຕ່າງປະເທດ ລາຍງານໃນວັນທີ 27 ທັນວາຜ່ານມານີ້ວ່າ ທາງການຈີນໄດ້ຍົກເລີກ ນະໂຍບາຍລູກຄົນດຽວ ຢ່າງເປັນທາງການ ຊຶ່ງຈະມີຜົນບັງຄັບໃຊ້ ໃນວັນທີ 1 ມັງກອນ 2016 ເປັນຕົ້ນໄປ ໂດຍຈະອະນຸຍາດໃຫ້ ຄູ່ຜົວເມຍຊາວຈີນ ສາມາດມີລູກຄົນທີສອງໄດ້ຢ່າງເປັນອິດສະຫລະ ຊຶ່ງເປັນໄປຕາມຄວາມພະຍາຍາມ ຂອງລັດຖະບານຈີນ ໃນການແກ້ໄຂບັນຫາ ສັງຄົມຜູ່ເຖົ້າລົ້ນເມືອງ ແລະ ຂາດເຂີນແຮງງານໄວໜຸ່ມ.
ທັງນີ້ ລັດຖະບານຈີນ ໄດ້ນຳໃຊ້ນະໂຍບາຍລູກຄົນດຽວ ມາຕັ້ງແຕ່ປີ 1970 ເປັນຕົ້ນມາ ໂດຍກຳນົດໃຫ້ຄູ່ຜົວເມຍຊາວຈີນ ສາມາດມີລູກໄດ້ພຽງຄົນດຽວ ຍົກເວັ້ນແຕ່ຄອບຄົວໃນຊົນນະບົດ ແລະ ຊົນເຜົ່າສ່ວນໜ້ອຍເທົ່ານັ້ນ.