ຂປລ. ແຂວງວຽງຈັນ ເປັນອີກແຂວງໜຶ່ງທີ່ມີຄວາມເອົາໃຈໃສ່ໃນການຂຸດ ຄົ້ນແຫລ່ງລາຍຮັບເຂົ້າງົບປະມານ ເຊິ່ງໃນສົກປີຜ່ານມາ ສາມາດປະຕິບັດໄດ້ 207 ຕື້ກວ່າກີບ ທຽບໃສ່ແຜນການປີລື່ນແຜນ ການກວ່າ 30%.
ທ່ານ ດາວເຮືອງ ນັນທະວົງ ຫົວໜ້າພະແນກການເງິນ ແຂວງວຽງຈັນ ກ່າວໃນກອງປະຊຸມເຜີຍແຜ່ແນະນຳການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ແລະ ແຜນງົບປະມານແຫ່ງລັດສົກປີນີ້ທີ່ຈັດຂຶ້ນບໍ່ດົນມານີ້ວ່າ: ການຈັດເກັບລາຍຮັບເຂົ້າງົບປະມານສົກປີ 2014-2015 ຜ່ານມາແຂວງວຽງຈັນ ສາມາດປະຕິບັດໄດ້ 207 ຕື້ກວ່າກີບ ເທົ່າກັບ 133,57% ຂອງແຜນການປີ, ໃນນີ້ ລາຍຮັບຈາກອາກອນແມ່ນ ເປັນຖານລາຍຮັບໃຫຍ່ ກວມເອົາເຖິງ 70% ຂອງລາຍຮັບທັງໝົດ ສາມາດເກັບລາຍຮັບໄດ້ 158 ຕື້ກວ່າກີບເທົ່າກັບ 147,36% ຂອງແຜນການ, ລາຍຮັບຈາກພາສີທີ່ ດິນເກັບໄດ້ 10 ຕື້ກວ່າກີບ ລາຍຮັບຈາກຊັບສິນ ໄດ້ທັງໝົດ 13,43 ຕື້ກວ່າກີບ ເທົ່າກັບ 102,30% ຂອງແຜນການ.
ສຳລັບລາຍຮັບຈາກດ່ານພາສີ ບ້ານວັງ ແລະ ດ່ານຊະນະຄາມຕາມແຜນການເກັບ 5 ຕື້ກີບ ສາມາດປະຕິບັດໄດ້ 5,71 ຕື້ກວ່າກີບ, ລາຍຮັບສ່ວນໃຫຍ່ ແມ່ນໄດ້ຈາກການນຳເຂົ້ານ້ຳມັນເຊື້ອໄຟຢູ່ດ່ານ ບ້ານວັງ, ສ່ວນທາງດ້ານລາຍຮັບຈາກຄ່າບໍລິການວິຊາການປະຕິບັດໄດ້ 18,7 ຕື້ກີບ ລາຍຮັບສ່ວນໃຫຍ່ແມ່ນໄດ້ມາຈາກກອງທຶນຢາກວມເອົາ 82% ຂອງລາຍຮັບທັງໝົດ. ນອກນີ້ ກໍຍັງມີລາຍຮັບຈາກການຄຸ້ມຄອງການເງິນຂອງລັດໄດ້ 106 ລ້ານກີບ ເທົ່າກັບ 125,68% ຂອງແຜນການປີ.
ປັດຈຸບັນນີ້ທົ່ວແຂວງມີພື້ນຖານວິສາຫະກິດ 7.772 ພື້ນຖານ ໃນນີ້ ເປັນຂະແໜງການຜະລິດ 419 ພື້ນຖານ, ການຄ້າ 4.426 ພື້ນຖານ, ບໍລິການ 2.972 ພື້ນຖານ ແລະມີຈຳນວນຫົວໜ່ວຍທີ່ອອກທະບຽນຜ່ານລະບົບປະຕູດຽວ 401 ຫົວໜ່ວຍ, ອອກທະບຽນປົກກະຕິຢູ່ຂັ້ນເມືອງ 7.731 ຫົວໜ່ວຍ, ແຍກຊັ້ນທະບຽນລົງທຶນຢູ່ພາຍໃນແຂວງມີ 7.703 ຫົວໜ່ວຍ ແລະ ລົງທຶນຕ່າງປະເທດ 69 ຫົວໜ່ວຍ, ຖືບັນຊີທຳມະດາ 432 ພື້ນຖານ, ປະຖົມພື້ນຖານ 2.363 ຫົວໜ່ວຍ ແລະ ຖອກອາກອນແບບມອບເໝົາ 4.974 ຫົວໜ່ວຍ.
ແນວໃດກໍດີ ຜົນງານສຳເລັດຂອງການຈັດຕັ້ງປະຕິບັດເກັບລາຍທັງໝົດນັ້ນ ທ່ານຫົວໜ້າພະແນກ ລະບຸວ່າ: ແມ່ນຍ້ອນຄວາມເອົາໃຈໃສ່ຂອງພະນັກງານ ໃນການຄຸ້ມຄອງ, ຕິດຕາມການເກັບລາຍຮັບຈາກບັນດາຫົວໜ່ວຍທຸລະກິດທີ່ຂຶ້ນກັບການຄຸ້ມຄອງຂອງແຂວງ, ເມືອງແລະບັນດາຫົວໜ່ວຍທຸລະກິດທີ່ຂຶ້ນກັບສູນກາງທີ່ເຄື່ອນໄຫວຢູ່ແຂວງວຽງຈັນ, ສົມທົບກັບພາກສ່ວນກ່ຽວຂ້ອງລົງເກັບກຳຂໍ້ມູນໂຄງການຢູ່ພາຍໃນແຂວງເປັນຕົ້ນແມ່ນໂຄງການສ້າງເຂື່ອນໄຟຟ້າ, ກໍ່ສ້າງຕາຂ່າຍໄຟຟ້າ ແລະ ອື່ນໆ ພ້ອມ ນັ້ນຂັ້ນເທິງຍັງໄດ້ອະນຸມັດງົບປະມານເພື່ອຊຳລະໂຄງການ ກໍ່ສ້າງພື້ນຖານໂຄງລ່າງລວມທັງໂຄງການຂອງສູນກາງຢູ່ພາຍໃນແຂວງວຽງ ຈັນ, ການອ່ວຍໜີ້ສາມແຈ ແລະ ໄດ້ມອບພັນທະອາກອນທີ່ຕິດພັນກັບການອະນຸມັດໂຄງການຂອງງົບປະມານ ຢູ່ທ້ອງຖິ່ນກວມອັດຕາສູງສົມຄວນ.
ຄຽງຄູ່ກັບຜົນສຳເລັດດັ່ງກ່າວ ກໍຍັງມີຫລາຍບັນຫາທີ່ຕ້ອງໄດ້ເອົາໃຈໃສ່ເປັນຕົ້ນແມ່ນຂໍ້ມູນ ຖານລາຍຮັບຈາກທີ່ດິນຍັງບໍ່ທັນໄດ້ປັບປຸງໃຫ້ຖືກຕ້ອງກັບຮູບການ ນຳໃຊ້ຕົວຈິງ, ມີຫລາຍຕອນດິນໄດ້ມີການປ່ຽນແປງເປົ້າໝາຍນຳໃຊ້ທີ່ດິນຈາກປະເພດ ໜຶ່ງໄປຫາອີກປະເພດໜຶ່ງ, ການເກັບລາຍຮັບສ່ວນໃຫຍ່ຍັງເກັບຕາມຂໍ້ມູນເກົ່າ, ອັດຕາເກົ່າ ນອກນັ້ນ ການກຳນົດອັດຕາເຂດປະເມີນລາຄາທີ່ດິນ ຫລື ທີ່ດິນພ້ອມສິ່ງປຸກສ້າງ ເພື່ອເປັນພື້ນຖານໃນການຈັດເກັບລາຍຮັບອາກອນລາຍໄດ້ ຈາກການມອບໂອນສິດ ນຳໃຊ້ທີ່ດິນຍັງບໍ່ທັນໄດ້ກຳນົດລະອຽດໃນທົ່ວແຂວງ ເຊິ່ງຈະຕ້ອງໄດ້ຫາລື ແລະຮ່ວມກັນແກ້ໄຂໃນຕໍ່ໜ້າ.
ແຫລ່ງຂ່າວ:
