ຂປລ. ໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII, ລັດຖະບານ ແຫ່ງ ສປປ ລາວ ໄດ້ວາງຄາດ ໝາຍ ການຫລຸດພົ້ນອອກຈາກສະຖານະພາບປະເທດດ້ອຍພັດທະນາ ໂດຍຈະສູ້ຊົນເຮັດໃຫ້ລວມຍອດລາຍໄດ້ແຫ່ງຊາດຕໍ່ຫົວຄົນ ໃຫ້ລື່ນຄາດໝາຍທີ່ສາກົນກຳນົດໄວ້(ສູງກວ່າ 1.574 ໂດລາສະຫະລັດຕໍ່ຄົນຕໍ່ປີ ໃນປີ 2018 ຫລື 1.810 ໂດລາສະຫະລັດ ຕໍ່ຄົນຕໍ່ປີ ໃນປີ 2021) ໃນປີ 2020 ສູ້ຊົນໃຫ້ລາຍໄດ້ແຫ່ງຊາດຕໍ່ຫົວຄົນສະເລ່ຍ 2.450 ໂດລາສະຫະລັດ, ສູ້ຊົນໃຫ້ດັດສະນີໝາຍດ້ານຊັບສິນມະນຸດຕ້ອງສູງກວ່າ 66 ແລະ ດັດສະນີຄວາມບອບບາງທາງດ້ານເສດຖະກິດ ໃຫ້ບັນລຸຕ່ຳກວ່າ 32 ດັດສະນີ.
ສຳລັບ ຄາດໝາຍ ດ້ານມາຫາພາກ ໃນ 5 ປີຕໍ່ໜ້າ 2016-2020 ຈະຕ້ອງສ້າງໂຄງປະກອບເສດຖະກິດກະສິ ກຳ-ປ່າໄມ້ ຕິດພັນກັບອຸດສາຫະກຳປຸງແຕ່ງ ແລະ ບໍລິການ ໂດຍຖືເອົາຂະເໜງກະສິກຳ ເປັນພື້ນຖານໃນການຄ້ຳປະ ກັນດ້ານສະບຽງອາຫານໃຫ້ໜັກແໜ້ນ, ຖືເອົາການປົກປັກຮັກສາ ແລະ ພັດທະນາປ່າໄມ້ ເປັນສຳຄັນ; ເອົາຂະແໜງອຸດ ສາຫະກຳ ແລະ ບໍລິການເປັນຂະແໜງຕົ້ນຕໍ ໃນການຊຸກຍູ້ການເຕີບໂຕຂອງເສດຖະກິດ, ສ້າງວຽກເຮັດງານທຳ ແລະ ຍົກສູງລາຍໄດ້ຂອງປະຊາຊົນ. ສ່ວນຄາດໝາຍດ້ານເສດຖະກິດ ແມ່ນລວຍອດຜະລິດຕະພັນພາຍໃນ(GDP) ຂະ ຫຍາຍຕົວສະເລ່ຍ ບໍ່ໃຫ້ຫລຸດ 7,5% ຕໍ່ປີ, ໃນນັ້ນ ກະສິກຳ-ປ່າໄມ້ ເພີ່ມຂຶ້ນສະເລ່ຍ 3,2% ກວມ 19% ຂອງ GDP, ອຸດສາຫະກຳ ເພີ່ມຂຶ້ນ 9,3%, ກວມ 32% ຂອງ GDP, ການບໍລິການ ເພີ່ມຂຶ້ນ 8,9% ກວມ 41% ຂອງ GDP ແລະ ພາສີຂາເຂົ້າເພີ່ມຂຶ້ນ 6% ກວມປະມານ 8% ຂອງ GDP, ລວມຍອດຜະລິດຕະພັນພາຍໃນຕໍ່ຫົວຄົນ ໃຫ້ໄດ້ 3.100 ໂດລາສະຫະລັດ ໃນປີ 2020.
ພ້ອມ ກັນນີ້, ຕ້ອງສູ້ຊົນໃຫ້ມູນຄ່າການສົ່ງອອກຂະຫຍາຍຕົວ ສະເລ່ຍໃນແຕ່ລະປີ ຢູ່ໃນລະດັບບໍ່ຫລຸດ 15%, ຄັງສຳຮອງເງິນຕາຕ່າງປະເທດຂະຫຍາຍຕົວຢ່າງຕໍ່ເນື່ອງ ແລະ ກຸ້ມການນຳເຂົ້າໃຫ້ໄດ້ຢ່າງໜ້ອຍ 5 ເດືອນຂຶ້ນໄປ ແລະ ເຮັດໃຫ້ມູນຄ່າການຄ້າ ຂາອອກ-ຂາເຂົ້າ ທຽບໃສ່ GDP ຫລາຍກວ່າ 70%, ອັດຕາເງິນເຟີ້ ໃຫ້ຢູ່ໃນລະດັບທີ່ ເໝາະສົມ ບໍ່ເກີນ 6%, ທັງຮັບປະກັນສະຖຽນລະພາບທາງດ້ານອັດຕາແລກປ່ຽນ ໃຫ້ຢູ່ໃນຂອບເຂດທີ່ສາມາດຄວບຄຸມໄດ້ ແລະ ອື່ນໆ.
ແຫລ່ງຂ່າວ:
