ຂປລ. ອົງການກວດສອບແຫ່ງລັດ ໄດ້ດຳເນີນການກວດສອບ ບົດສະຫລຸບຕົວເລກຂາດຕົວ ການຈັດຕັ້ງປະຕິບັດ ແຜນງົບປະມານແຫ່ງລັດ ໃນສົກປີ 2013-2014 ຂອງຫົວໜ່ວຍງົບປະມານ, ທະນາຄານ, ໂຄງການ ແລະ ວິສາຫະກິດ ໃນສົກປີດັ່ງກ່າວໄດ້ຈຳນວນ 116 ຫົວໜ່ວຍ, ໃນນັ້ນ ດ້ານລາຍຮັບ ໄດ້ກວດສອບເຫັນເພີ່ມ ລາຍຮັບສ່ວຍສາອາກອນ, ລາຍຮັບຊັບສິນຂອງລັດ, ເງິນຂາຍໄມ້, ເງິນລະດົມ, ຄັງພັດທະນາແຂວງ, ຫັນຊັບສິນເປັນທຶນ, ລາຍຮັບ ຈາກການປ່ອຍເງິນກູ້ ແລະ ອື່ນໆ ຈຳນວນ 749,22 ຕື້ກີບ ເຊິ່ງບັນດາກະຊວງ, ແຂວງເກັບ​ໄດ້ແລ້ວ ແຕ່ບໍ່ມອບເຂົ້າງົບປະມານ ແລະ ໄດ້ນຳໃຊ້ເຂົ້າໃນວຽກງານບໍລິຫານ, ຈ່າຍຊຳລະໜີ້ສິນໂຄງການລົງທຶນ, ຮັກສາໄວ້ໃນຄັງເງິນສົດ, ຝາກໄວ້ຢູ່ໃນທະນາຄານ ແລະ ໃຫ້ບໍລິສັດຢືມ.

ທ່ານ ດຣ. ນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ໄດ້ລາຍງານໃຫ້ຮູ້ ໃນວາລະດຳ ເນີນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VII ວັນທີ 24 ທັນວາ 2015, ​ໂດຍ​ກ່າວ​ວ່າ: ໄດ້ກວດສອບເຫັນ ເງິນເກີນແຜນທ້ອງຖິ່ນ ຈຳນວນ 206,45 ຕື້ກີບ ທີ່ໄດ້ສະຫລຸບ ເປັນລາຍຮັບ ສົກປີ 2012-2013 ແລະ ໃນສົກປີ 2013-2014 ກະຊວງການເງິນ ໄດ້ນຳມາຈົດເປັນລາຍຮັບງົບປະມານແຫ່ງລັດອີກ ເຊິ່ງເຫັນວ່າເປັນການເອົາຕົວເລກດັ່ງກ່າວ​ ເຂົ້າແຜນຊ້ຳຊ້ອນ; ກວດເຫັນຍອດເຫລືອບັນຊີເງິນຝາກ ອົງການບໍລິຫານວິຊາການ ຢູ່ຄັງເງິນແຫ່ງຊາດປະຈຳສູນກາງ ແລະ ຄັງເງິນປະຈຳແຂວງ ຈຳນວນ 443,26 ຕື້ກີບ; ກວດສອບເຫັນການຍົກເວັ້ນ, ຫລຸດຜ່ອນພາສີ-ອາກອນ ປະເພດນ້ຳມັນເຊື້ອໄຟ, ພາຫະນະ ແລະ ຄ່າຊັກພິເສດໄມ້ຂາອອກ ຈຳນວນ 2.083,37 ຕື້ກີບ ເຊິ່ງຂະແໜງກ່ຽວຂ້ອງ ບໍ່​ໄດ້ສະຫລຸບບັນຊີແຍກລະອຽດ ລະຫວ່າງ ການຍົກເວັ້ນທີ່ຖືກຕ້ອງ ກັບການຍົກເວັ້ນທີ່ບໍ່ສອດຄ່ອງກັບ ກົດໝາຍວ່າດ້ວຍ ການສົ່ງເສີມການລົງທຶນ; ກວດເຫັນການອະນຸມັດໃຫ້ເຊົ່າ ແລະ ສຳປະທານທີ່ດິນລັດ ທີ່ສູນກາງຄຸ້ມຄອງ ໃນເນື້ອທີ່ 23.870 ເຮັກຕາ ມູນຄ່າເກັບຕາມສັນຍາ ຈຳນວນ 251.195 ໂດລາສະຫະລັດຕໍ່ປີ ແລະ ໄດ້ກວດສອບເຫັນການຫັນຊັບສິນ ຂອງລັດເປັນທຶນ ຈຳນວນ 52,88 ຕື້ກີບ ເພື່ອຊຳລະ ໃນໂຄງການກໍ່ສ້າງຕຶກອາຄານ ທີ່ມີມູນຄ່າຕາມສັນຍາ 132,50 ຕື້ກີບ ເຊິ່ງເງິນຈຳນວນ 79,62 ຕື້ກີບ ແມ່ນໄດ້ເອົາເຂົ້າແຜນສະພາແຫ່ງຊາດຮັບຮອງ ແລະ ຈົດທະບຽນສັນຍາຮັບເໝົາກໍ່ສ້າງ. ສ່ວນເງິນທີ່ໄດ້ຫັນເປັນທຶນ ແມ່ນບໍ່ໄດ້ຈົດເຂົ້າເປັນລາຍຮັບ ເພື່ອຈັດສັນເຂົ້າລາຍຈ່າຍຕາມສັນຍາ ເພື່ອໃຫ້ສອດຄ່ອງກັບມາດຕາ 22 ແລະ 23 ຂອງກົດໝາຍ ວ່າດ້ວຍຊັບສິນຂອງລັດ.

ຄຽງ​ຄູ່ກັນນີ້, ອົງການກວດສອບແຫ່ງລັດ ຍັງໄດ້ກວດເຫັນການສັງລວມບັນຊີໜີ້ຄ້າງມອບ ຈາກຫົວໜ່ວຍວິສາຫະກິດ ທີ່ສູນກາງຄຸ້ມຄອງ ເຊິ່ງສ່ວຍສາອາກອນ ບໍ່ໄດ້ຕິດຕາມ, ກວດກາຄືນ ແລະ ໄລ່ລຽງໃນການຈັດຊັ້ນປະເພດໜີ້ສິນ, ການຂຶ້ນທະບຽນວິສາຫະກິດ, ວິສາຫະກິດທີ່ຍັງສືບຕໍ່ເຄື່ອນໄຫວທຸລະກິດ, ວິສາຫະກິດ ທີ່ລົ້ມລະລາຍ, ຢຸດເຊົາການເຄື່ອນໄຫວທຸລະກິດ ຕາມກົດໝາຍວ່າດ້ວຍສ່ວຍສາອາກອນ ແລະ ກວດສອບເຫັນການລະເມີດຕໍ່ກັບ ລະບຽບກົດໝາຍການຄຸ້ມຄອງເງິນ ຈາກການຂາຍໄມ້ໂຄຕາ, ໄມ້ແຂວງອະນຸມັດ, ໄມ້ຢຶດ, ໄມ້ຜ່ານໄປປະເທດທີ 3  ແລະ ໄມ້ເຄື່ອນຍ້າຍ ລະຫວ່າງແຂວງ ແລະ ອື່ນໆ.

ແຫລ່ງຂ່າວ: