ຂປລ. ປັດຈຸບັນ, ລັດຖະບານແຫ່ງ ສປປ ລາວ ໄດ້ເປີດກວ້າງໃຫ້ທຸກພາກສ່ວນທັງພາຍໃນ ແລະ ຕ່າງປະເທດທີ່ສົນໃຈຕໍ່ການພັດທະນາໂຄງການ ກໍ່ສ້າງ ເຂື່ອນໄຟຟ້ານໍ້າຂອງໄຊຍະບູລີ ທີ່ກຳລັງດຳເນີນການ ເຂົ້າຢ້ຽມຊົມເພື່ອຕິດຕາມຄວາມຄືບໜ້າຂອງໂຄງການ ຢູ່ເຂດກໍ່ສ້າງຕົວຈິງ ແລະ ບັນຫາຕ່າງໆ ທີ່ກ່ຽວຂ້ອງ ກັບການພັດທະນາ ເພື່ອໃຫ້ເປັນທີ່ເຂົ້າໃຈກັນທົ່ວສັງຄົມ ທັງພາຍໃນ ແລະ ສາກົນ ວ່າໂຄງການດັ່ງກ່າວ ໄດ້ດຳເນີນໄປຕາມທິດຍືນຍົງ, ເປັນມິດຕໍ່ສິ່ງແວດລ້ອມ ແລະ ໄປຄຽງຄູ່ກັບ ການຍົກລະດັບຊີວິດການເປັນຢູ່ຂອງປະຊາຊົນລາວບັນດາເຜົ່າ ໂດຍສະເພາະ ຜູ້ທີ່ໄດ້ຮັບຜົນກະທົບຈາກໂຄງການດັ່ງກ່າວ.
ລັດຖະບານລາວເຊື້ອໝັ້ນວ່າ: ໂຄງການນີ້ ໄດ້ພັດທະນາຕາມມາດຕະຖານສາກົນ ມີຜົນກະທົບໜ້ອຍ ແຕ່ຈະນຳເອົາຜົນປະໂຫຍດສູງສຸດມາສູ່ ສປປ ລາວ ແລະ ປະເທດໃກ້ຄຽງ. ດ້ວຍເຫດຜົນນີ້, ສປປ ລາວ ເຮົາຈຶ່ງມີຄວາມໂປ່ງໄສຕໍ່ສັງຄົມ ພາຍໃນ ແລະ ຕ່າງປະເທດ ໂດຍອະນຸຍາດໃຫ້ທຸກພາກສ່ວນ ຕິດຕາມ ຄວາມຄືບໜ້າໄປພ້ອມໆກັນ. ໃນວັນທີ 16 ທັນວາ 2015 ໄດ້ມີຄະນະຜູ້ແທນຈາກ ກະຊວງພັດທະນາ ແລະ ຮ່ວມມືເສດຖະກິດຂອງເຢຍລະມັນ ລົງໄປຢ້ຽມຢາມ ໂຄງການພັດທະນາ ເຂື່ອນໄຟຟ້ານ້ຳຂອງແຫ່ງດັ່ງກ່າວ ເຊິ່ງມາຮອດປັດຈຸບັນ ມີຄວາມຄືບໜ້າປະມານ 66%. ເຂື່ອນໄຟຟ້ານ້ຳຂອງໄຊຍະບູລີ ມີກຳລັງການຕິດ 1.285 ເມກາວັດ ແລະ ສາມາດຜະລິດພະລັງງານໄຟຟ້າ ສະເລ່ຍ 7.370 ຈິກກາວັດໂມງຕໍ່ປີ ດ້ວຍການລົງທຶນ ທັງໝົດ 3,8 ຕື້ໂດລາສະຫະລັດ.
ໃນເດືອນພະຈິກ 2015 ໄດ້ມີ 3 ພາກສ່ວນທີ່ໄປຢ້ຽມຊົມໂຄງການດັ່ງກ່າວ ໃນນັ້ນປະກອບມີ ຄະນະຊ່ຽວ ຊານຈາກອົງການຊີດາ (SIDA-Swedish International Development Cooperation), ນັກສຶກສາ ໂຄງການຫລັກສູດ ປະລິນຍາໂທ ສາຂາວິສະວະກຳສິ່ງແວດລ້ອມ ແລະ ການຄຸ້ມຄອງ ຂອງຄະນະ ວິສະວະກຳສາດ ມະຫາວິທະຍາໄລແຫ່ງຊາດລາວ ແລະ ຄະນະຜູ້ແທນອົງການຊ່ວຍເຫລືອ ທາງດ້ານວິຊາການສາກົນ (International Technical Assistance Programme) ປະເທດສະຫະລັດອາເມຣິກາ.
ເຂື່ອນໄຟຟ້ານ້ຳຂອງ ໄຊຍະບູລີ ເປັນເຂື່ອນນ້ຳໄຫລ ຫລື “run-of-river hydropower” ມີປະລິມານນ້ຳໄຫລເຂົ້າ ແລະ ໄຫລອອກພາຍໃນເຂື່ອນ ແມ່ນສະເໝີກັນ, ຈຳນວນປະຊາກອນຂອງປາ ຕາມລຳແມ່ນ້ຳຂອງ ແມ່ນສາມາດຂຶ້ນລົງໄດ້ ຕາມປົກກະຕິ ລວມທັງການເຄື່ອນຍ້າຍຂອງດິນຕະກອນອີກດ້ວຍ. ນອກຈາກນັ້ນ, ເຂື່ອນແຫ່ງນີ້ ຍັງຖືກອອກແບບ ໃຫ້ມີຊ່ອງທາງຂອງການເດີນເຮືອ ສຳລັບຊາວປະມົງ ແລະ ເຮືອບັນທຸກນໍ້າໜັກເຖິງ 500 ໂຕນນຳອີກ.
