spot_img
Homeຂ່າວຕ່າງປະເທດຈີນກວດພົບ ແຂວງລາຍງານດອກໄມ້ ຕົວເລກເສດຖະກິດສູງເກີນຈິງ ພາໃຫ້ວາງນະໂຍບາຍຜິດພາດ!

ຈີນກວດພົບ ແຂວງລາຍງານດອກໄມ້ ຕົວເລກເສດຖະກິດສູງເກີນຈິງ ພາໃຫ້ວາງນະໂຍບາຍຜິດພາດ!

Published on

120531_china_flag

ສຳນັກຂ່າວຕ່າງປະເທດ ລາຍງານໃນວັນທີ 14 ທັນວາ ຜ່ານມານີ້ວ່າ ສຳນັກຂ່າວຊິນຫົວຂອງຈີນ ໄດ້ເຜີຍແຜ່ບົດຄວາມ ກ່ຽວກັບບັນຫາເສດຖະກິດ ທີ່ເກີດຂຶ້ນຢູ່ ແຂວງເຮີຍຫລົງຈຽງ, ແຂວງຈີ໋ຫລິນ ແລະ ແຂວງຫລຽວໜິງ ທາງພາກຕາເວັນອອກສຽງເໜືອຂອງປະເທດ ທີ່ກຳລັງປະເຊີນກັບ ພາວະເສດຖະກິດຕົກຕ່ຳ ແລະ ພັດທະນາຊັກຊ້າກ່ວາໝູ່ວ່າ ເຈົ້າໜ້າທີ່ຂອງລັດໃນບັນດາແຂວງດັ່ງກ່າວ ບິດເບືອນຂໍ້ມູນທາງເສດຖະກິດ ຢ່າງຮຸນແຮງມາຫລາຍປີ ຈົນນຳໄປສູ່ການວາງແຜນ ແລະ ວາງນະໂຍບາຍທີ່ຜິດພາດ ລວມເຖິງກໍ່ໃຫ້ເກີດ ການສໍ້ລາດບັງຫລວງ ເປັນຈຳນວນຫລວງຫລາຍ.

ລາຍງານດັ່ງກ່າວ ຖືກນຳສະເໜີ ພາຍຫລັງເມື່ອຕົ້ນປີ 2015 ຜ່ານມານີ້ ຄະນະກຳມະການກວດກາ ພັກກອມມູນິດຈີນ ໄດ້ລົງກວດສອບເອກະສານ ແລະ ຫລັກຖານຕ່າງໆ ເນື່ອງຈາກຄວາມສົງໄສ ກ່ຽວກັບຕົວເລກ ຂໍ້ມູນທາງດ້ານເສດຖະກິດ ທີ່ທ້ອງຖິ່ນດັ່ງກ່າວລາຍງານ ເຫັນວ່າຕົວເລກ ສູງເກີນຄວາມເປັນຈິງເຊັ່ນ ຕົວເລກເສດຖະກິດ ຂອງບາງເມືອງ ໃນຈຳນວນແຂວງດັ່ງກ່າວ ມີຂະໜາດໃຫຍ່ກ່ວາບາງພື້ນທີ່ຂອງ ເຂດບໍລິຫານພິເສດຮົງກົງ ທີ່ເປັນເຖິງສູນກາງທຸລະກິດ ການຄ້າ ແລະ ການເງິນແຫ່ງສຳຄັນຂອງຈີນ ຢ່າງຜິດສັງເກດ, ໂດຍພາຍຫລັງຜ່ານການກວດກາ ບັນດາເຈົ້າໜ້າທີ່ລະດັບແຂວງດັ່ງກ່າວ ຕ່າງກໍພາກັນຍອມຮັບ ວ່າໄດ້ປອມແປງຂໍ້ມູນ ແລະ ຕົວເລກຕ່າງໆ ຢ່າງຕໍ່ເນື່ອງມາດົນນານແລ້ວ.

ຕົວຢ່າງເຊັ່ນ ເມືອງເຮີຍເຫີ ເມືອງໜຶ່ງຂອງແຂວງເຮີຍຫລົງຈຽງ ລາຍງານຕົວເລກ ການລົງທຶນພາຍໃນແຂວງ ເມື່ອປີ 2013 ສູງເກີນຈິງເຖິງ 1.9 ຕື້ຢວນ  ແລະ ອີກເມືອງໜຶ່ງໃນ ແຂວງຫລຽວໜິງ ກໍລາຍງານຜົນປະກອບການ ຈຳນວນ 847 ລ້ານຢວນ ຊຶ່ງສູງກ່ວາຄວາມເປັນຈິງເຖິງສອງເທົ່າ.  ນອກຈາກນັ້ນ, ຕົວເລກລາຍຮັບຂອງປະຊາຊົນ ຕະຫລອດຮອດ ອັດຕາການເຕີບໂຕຂອງ ຜະລິດຕະພັນມວນລວມພາຍໃນ ຫລື ຈີດີພີ ກໍຖືກປອມແປງຂຶ້ນມາ ເຊັ່ນດຽວກັນ.

ສຳນັກຂ່າວຊິນຫົວ ຍັງໄດ້ລະບຸຕື່ມວ່າ ກະແສການປອມແປງຂໍ້ມູນ ຢູ່ພາກຕາເວັນອອກສຽງເໜືອຂອງປະເທດ ມີຢູ່ຢ່າງແຜ່ຫລາຍ ຊຶ່ງບໍ່ພຽງແຕ່ພາໃຫ້ພັກ ແລະ ລັດຖະບານຈີນ ວາງແຜນການ ກໍຄືວາງນະໂຍບາຍ ໃນການພັດທະນາຜິດພາດເທົ່ານັ້ນ, ມັນຍັງພົວພັນເຖິງ ການສໍ້ລາດບັງຫລວງ ທີ່ເປັນອັນຕະລາຍຕໍ່ພັກ ແລະ ຄວາມເຊື່ອໝັ້ນຂອງປະຊາຊົນ ຕໍ່ກັບລັດຖະບານອີກດ້ວຍ.

ແຫລ່ງຂ່າວຍັງໃຫ້ຮູ້ວ່າ ລະບົບການປະເມີນຜົນງານ ດ້ວຍການແຂ່ງຂັນກັນ ເພື່ອສ້າງຕົວເລກເສດຖະກິດທີ່ດີ ແລະ ຄວາມປາຖະໜາຂອງເຈົ້າໜ້າທີ່ລັດ ໃນການເລື່ອນຊັ້ນເລື່ອນຕຳແໜ່ງ ລ້ວນແຕ່ເປັນສາເຫດຫລັກ ທີ່ຊຸກດັນເຮັດໃຫ້ ບັນດາເຈົ້າໜ້າທີ່ດັ່ງກ່າວ ລົງມືສ້າງຕົວເລກແບບລາຍງານດອກໄມ້ ທັງທີ່ຮູ້ດີວ່າ ເປັນເລື່ອງອັນຕະລາຍ ແລະ ສົ່ງຜົນເສຍຫາຍ ໃຫ້ແກ່ການພັດທະນາທ້ອງຖິ່ນຕົນກໍຕາມ.

ທັງນີ້ ສະພາບເສດຖະກິດ ພາຍໃນບັນດາແຂວງ ທາງພາກຕາເວັນອອກສຽງເໜືອຂອງຈີນ ເຊັ່ນແຂວງຫລຽວໜິງ ໃນໄລຍະ 6 ເດືອນຕົ້ນປີຜ່ານມາ ມີອັດຕາການເຕີບໂຕ ພຽງແຕ່ 2.6% ຊຶ່ງຖືວ່າຕ່ຳທີ່ສຸດໃນປະເທດ, ສ່ວນແຂວງເຮີຍຫລົງຈຽງ ແລະ ແຂວງຈີ໋ຫລິນ ກໍຂະຫຍາຍຕົວພຽງ 5.1% ແລະ 6.1% ຕາມລຳດັບ ຊຶ່ງແຕກໂຕນກັນຫລາຍ ກັບແຂວງອື່ນໆ ທີ່ລ້ວນແຕ່ມີອັດຕາການເຕີບໂຕສູງ 10-11% ຂຶ້ນໄປ.

 

ບົດຄວາມຫຼ້າສຸດ

ຫວຽດນາມ ຈັດພິທີສະຫລອງ 80 ປີ ການປະຕິວັດເດືອນສິງຫາ ແລະ ວັນຊາດ.

ສະເຫຼີມສະຫຼອງຢ່າງຍິ່ງໃຫຍ່! ປະທານປະເທດແຫ່ງ ສປປ ລາວ ເຂົ້າຮ່ວມ ພິທີສະເຫລີມສະຫລອງ 80 ປີ ການປະຕິວັດເດືອນສິງຫາທີ່ສຳເລັດຜົນ ແລະ ວັນຊາດ ສສ ຫວຽດນາມ. ໃນເຊົ້າວັນທີ 2...

ສຕລ ປະກາດລາຍຊື່ 22 ນັກເຕະລາວ ລຸຍບານເຕະຊີງແຊ້ມອາຊີ U23 ຮອບຄັດເລືອກ 2026 ທີ່ປະເທດອິນໂດເນເຊຍ

ປະກາດລາຍຊື່ 22 ນັກເຕະລາວ ເຂົ້າຮ່ວມການແຂ່ງຂັນບານເຕະຊີງແຊ້ມອາຊີ U23 ຮອບຄັດເລືອກ 2026 ທີ່ປະເທດອິນໂດເນເຊຍ. ທີມຊາດລາວຮຸ່ນອາຍຸບໍ່ເກີນ23 ປີ ຫຼື U23 ພາຍໃຕ້ການຄຸມທີມຂອງ ທ່ານ ຮາ...

ລໍ້າໜ້າໄປອີກຂັ້ນ 10G ຈາກຈີນໄວທີ່ສຸດໃນໂລກ ດາວໂຫຼດຂໍ້ມູນ 20GB ໃນເວລາ 20 ວິນາທີ

ເຊິ່ງໃນກ່ອນໜ້ານີ້ປະເທດຍີ່ປຸ່ນໄປເປີດໂຕ 6G ທີ່ໄວທີ່ສຸດໃນໂລກເຊິ່ງມີກຳນົດນນຳໃຊ້ໃນຕົ້ນປີ 2030, ແຕ່ຕອນນີ້ປະເທດຈີນໄດ້ເປີດໂຕບໍລິການອິນເຕີເນັດບຣອດແບນຄວາມໄວ 10 Gbps ຕໍ່ວິນາທີ (10G) ເປັນຄັ້ງທຳອິດຂອງໂລກ. ໂຄງການນີ້ເປັນການຮ່ວມມືລະຫວ່າງບໍລິສັດ China Unicom ແລະ ບໍລິສັດ...

ປະທານປະເທດ ແຫ່ງ ສປປ ລາວ ໄດ້ນຳພາຄະນະຜູ້ແທນຂັ້ນສູງເຂົ້າຮ່ວມ ກອງປະຊຸມສຸດຍອດຂອງອົງການຮ່ວມມືຊຽງໄຮ້ ຄັ້ງທີ 25

ປະທານປະເທດ ແຫ່ງ ສປປ ລາວ ເຂົ້າຮ່ວມກອງປະຊຸມສຸດຍອດຂອງອົງການຮ່ວມມືຊຽງໄຮ້ ຄັ້ງທີ 25 (The 25th SCO Summit) ໃນລະຫວ່າງວັນທີ 31ສິງຫາ - 1...